Ezipi tɩʋ taanɩ
29
Bɩna fugə bɩnɩ dɩm canɩ fugə cana kam da fugə-yale dɛ dɩm nɩ, mʋ Baŋa-Wɛ kwǝrǝ yi amʋ ka wɩ:2 «Nabiinu, pipiri n jeeri Ezipi tɩʋ kʋm seeni, sɩ n ŋɔɔnɩ yiyiu-ŋwɛ n cɔgɩ ba pa-farʋ wʋm, dɩ o tɩʋ kʋm maama. 3 Ta o yɩra taanɩ n wɩ: ‹Yuutu Baŋa-Wɛ na tagɩ te tɩn mʋ tɩntʋ:
Ezipi tɩʋ pɛ, amʋ dwəni dɩ nmʋ mʋ.
Nmʋ nyɩ dɩ nɩnɩʋ wʋ juru
kʋlʋ na tigi n tɩʋ kʋm bwi sɩm nɩ tɩn mʋ.
Nmʋ ma n brɩ n tɩtɩ nɩ: «Amʋ mʋ te Nili bugə kam.
A nan kɩ-ka sɩ a pa a tɩtɩ mʋ.»
4 A nan lagɩ a kwe gwəli mʋ a ja‑m n pɩyaa seeni.
A ta wʋ́ pa kale yalʋ na su n bwi sɩm tɩn
məəli n yɩra yam.
A nan lagɩ a vaŋɩ‑m mʋ a ja a nuŋi n bwi sɩm nɩ,
yɩ kale yam maama ta yɔɔrɩ ya məəli n yɩra yam.
5 A nan lagɩ a dʋlɩ nmʋ tɩtɩ
dɩ n bwi sɩm wʋ kale yam mʋ
a yagɩ kagʋa yuu nɩ.
Abam laan wʋ́ taa tigi pwələ nɩ mʋ,
yɩ nɔɔn-nɔɔnʋ daa bá wanɩ o la abam o kɩ daanɩ.
A lagɩ a pa á ji wʋdiu mʋ
á pa tɩga baŋa vara bam,
dɩ wɛyuu zunə bam.
6 Balʋ maama na zʋʋrɩ Ezipi tɩʋ wʋnɩ tɩn laan wʋ́ lwarɩ nɩ amʋ mʋ yɩ Baŋa-Wɛ.
Nmʋ dɛɛn nyɩ dɩ kasʋgʋ kʋlʋ Yisɩrayɛlɩ dwi tiinə bam na kwe ba ji ba nacəgə tɩn mʋ. 7 Ba na twɩ ba jɩn sɩ ba zi nmʋ ba zaŋɩ tɩn, n sɩɩrɩ mʋ pa ba vwana kaarɩ. Ba maa na salɩ nmʋ yɩra nɩ tɩn, mʋ n bwəri n daarɩ-ba pa ba nɛ sɩm tɩ.a
8 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a pa najara mʋ tʋ n tɩʋ kʋm wʋnɩ, sɩ nabiinǝ dɩ ba vara bam maama tɩ. 9 Ezipi tɩʋ kʋm wʋ́ ji di-dwəənu yɩranɩ, sɩ ba laan lwarɩ nɩ amʋ mʋ yɩ Baŋa-Wɛ dɩm.
Bɛŋwaanɩ, nmʋ tagɩ n wɩ: «Amʋ mʋ te Nili bugə kam. Amʋ mʋ kɩ-ka.» 10 Kʋntʋ ŋwaanɩ amʋ dwəni dɩ nmʋ, dɩ n bwi sɩm maama mʋ. Amʋ wʋ́ pa Ezipi tɩʋ kʋm cɔgɩ, yɩ kʋ ji di-dwəənu yɩranɩ, sɩ kʋ zɩgɩ Migidɔla nɩ kʋ vu kʋ yi Siyɛnɩb sɩ kʋ kɛ kʋ yi Kusi sisəm dɩm seeni. 11 Nabiinǝ dɩ vara daa bá dɩ ba nɛ tɩga kam kʋntʋ nɩ sɩ ba tɔgɩ da ba kɛ. Nɔɔn-nɔɔnʋ dɩ nan bá taa zʋʋrɩ ka wʋnɩ sɩ kʋ yi bɩna fiinna. 12 A lagɩ a pa Ezipi mʋ yɔɔrɩ kʋ ji kagʋa tɩɩnɩ dɩlʋ maama na cɔgɩ tɩn wʋnɩ. Kʋ tɩɩnɩ dɩm maama wʋ́ taa yɩ di-dwəənu yɩranɩ mʋ, yɩ di-dwəənu dɩ gilimi-dɩ. Kʋʋ́ taa yɩ kʋntʋ mʋ bɩna fiinna. A maa wʋ́ jagɩ Ezipi tiinə bam pa ba vu yigə yigə, sɩ a yagɩ-ba lʋgʋ baŋa tɩɩnɩ dɩm je maama wʋnɩ.
13 Dɩ kʋ dɩ, Yuutu Baŋa-Wɛ na tagɩ te tɩn mʋ tɩntʋ: Bɩna fiinna yam ni na diə, amʋ wʋ́ la Ezipi tiinə bam sɩ ba nuŋi tɩɩnɩ dɩlʋ maama ba ya na jagɩ ba zʋʋrɩ dɩ wʋnɩ tɩn mʋ. 14 A laan maa wʋ́ pa ba joori ba taa jɩgɩ yu-yoŋo. Baá zɩgɩ sa-tɩʋ nɩ ba joori ba ba Patrɔsɩ seeni, mɛ na yɩ ba kugu je tɩn. Daanɩ mʋ baá maŋɩ ba taa yɩ tʋ-balaŋa. 15 Kʋ maa wʋ́ tiini kʋ taa yɩ tʋ-balaŋa tɩɩnɩ dɩm maama wʋnɩ. Kʋ daa bá wanɩ kʋ zǝŋi kʋ tɩtɩ tɩɩnɩ dɩdonnǝ baŋa nɩ. Kʋ bá di dam dwi-gɛ tiinə baŋa nɩ, amʋ na wʋ́ pa kʋ taa bwǝnǝ tɩn ŋwaanɩ. 16 Ezipi daa bá taa yɩ tɩʋ kʋlʋ Yisɩrayɛlɩ dwi tiinə bam na kɩ ba tɩɩna kʋ wʋnɩ tɩn. Ba nan wʋ́ guli ba na cɔgɩ yɩ ba beeri zǝnǝ kʋ wʋnɩ tɩn mʋ. Ba laan maa wʋ́ lwarɩ nɩ amʋ mʋ yɩ Yuutu Baŋa-Wɛ dɩm.› »
17 Bɩna fiinle-yarpɛ bɩnɩ dɩm pulim cana kam pulim dɛ dɩm nɩ, mʋ Baŋa-Wɛ kwǝrǝ yi amʋ ka wɩ:
18 «Nabiinu, Babilɔnɩ tɩʋ pɛ Nebukadnɛtsarɩ dɛɛn pɛ o jar-kərə bam tiini ba zaŋɩ najara dɩ Tiiri tɩʋ kʋm. O ma fɩn-ba najara yam ŋwaanɩ pa ba yum fɩn, yɩ ba bakalɩ dɩ dwarɩ ŋwana. Nebukadnɛtsarɩ dɩ o jar-kərə bam nan wʋ wanɩ Tiiri tɩʋ kʋm sɩ ba di nyɔɔrɩ kʋ baŋa nɩ, dɩ ba na tʋŋɩ te maama dɩ tɩn. 19 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a kwe Ezipi tɩʋ kʋm mʋ a pa Babilɔnɩ tɩʋ pɛ Nebukadnɛtsarɩ sɩ o taa te. Wʋntʋ wʋ́ zɩŋɩ ba jɩjɩgɩrʋ o ja o viiri, yɩ o daarɩ o vrɩ ba wǝǝnu o pa o jar-kərə bam sɩ ba joŋi ba ŋwɩɩrʋ. 20 A nan kwe Ezipi tɩʋ kʋm a pa‑o sɩ kʋ taa yɩ o tɩtʋŋa yam ŋwɩɩrʋ mʋ, o dɩ o jar-kərə bam na kɩ kʋlʋ maama ba pa amʋ tɩn ŋwaanɩ. Yuutu Baŋa-Wɛ na tagɩ kʋlʋ tɩn mʋ kʋntʋ.
21 Maŋa kam kʋntʋ na yiǝ, amʋ wʋ́ pa Yisɩrayɛlɩ dwi tiinə bam joori ba na dam. Kʋ daarɩ nmʋ Ezekɩyɛlɩ, a maa wʋ́ pa n ni puri sɩ n ŋɔɔnɩ dɩ ba. Ba maa wʋ́ lwarɩ nɩ amʋ mʋ yɩ Baŋa-Wɛ.»