Tiiri tɩʋ pɛ yɩra taanɩ
28
Baŋa-Wɛ kwǝrǝ ma yi amʋ ka wɩ:2 «Nabiinu, ta dɩ Tiiri tɩʋ yuutu wʋm nɩ: ‹Yuutu Baŋa-Wɛ na tagɩ te tɩn mʋ tɩntʋ:
Nmʋ yǝni n brɩ n tɩtɩ kamunni mʋ
yɩ n ta n tɩtɩ nɩ n wɩ: «Amʋ yɩ wɛ mʋ.
Tiiri tɩʋ kʋm nɩ mʋ a je a di paarɩ,
nɩ wɛ dɩdoŋ na di paarɩ
nɩnɩʋ kʋm tɩtarɩ nɩ te tɩn.»
Nmʋ nan yɩ nabiinu mʋ sɩ n daɩ Wɛ,
dɩ nmʋ na bʋŋɩ nɩ n jɩgɩ Wɛ wʋbʋŋa tɩn dɩ.
3 Nmʋ brɩ n tɩtɩ nɩ n jɩgɩ swan n dwe Daniyɛlɩ mʋ na?
N ta bʋŋɩ nɩ kʋlʋkʋlʋ wʋ səgi n yigə nɩ mʋ na?
4 Nmʋ kwe swan mʋ, dɩ yi-pʋrʋ,
yɩ n tɔgɩ tɩntʋ baŋa nɩ n beeri jɩjɩgɩrʋ n pa n tɩtɩ.
N ma n la səbu-sɩŋa, dɩ səbu-poŋo zanzan
n tiŋi n di sɩm wʋnɩ.
5 Nmʋ tiini n ye pipiu laŋa
yɩ n tɔgɩ kʋ baŋa nɩ n tiini n duni.
Nmʋ jɩjɩgɩrʋ tɩm ŋwaanɩ,
n laan ma n brɩ n tɩtɩ.
6 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ:
Nmʋ bʋŋɩ nɩ n jɩgɩ swan,
pa n ye wǝǝnu nɩ wɛ doŋ tɩn.
7 Kʋntʋ ŋwaanɩ, amʋ lagɩ a pa vərə ba
ba kɩ jara dɩ n tɩʋ kʋm.
Ba nan yɩ tɩɩnɩ dɩlʋ nɔɔna na jɩgɩ wʋ-lʋŋʋ
ba dwe nɔɔna maama tɩn mʋ.
Nii mʋ! Baá jeeri nmʋ nɔɔna bam dɩ najara,
sɩ ba cɔgɩ wo-laarʋ tɩlʋ n na nɛ n swan baŋa nɩ tɩn ba yagɩ,
yɩ ba daarɩ ba cɔgɩ n nɩnwaŋa kam.
8 Nmʋ dʋna bam kʋntʋ wʋ́ pa n tɩ dam tʋʋnɩ mʋ,
pa n maŋɩ tɩga kuri nɩ,
mɛ na yɩ nɩnɩʋ kʋm tɩtarɩ tɩn.
9 Nmʋ nan na zɩgɩ balʋ na lagɩ ba gʋ-m tɩn yigə nɩ,
n laan wʋ́ ta nɩ: n yɩ wɛ mʋ na?
Nɩ n na tʋ n gʋra bam jɩŋa nɩ,
n laan wʋ́ lwarɩ nɩ n yɩ nabiinu mʋ,
sɩ n daɩ wɛ.
10 Nɔn-yɔɔrʋ mʋ lagɩ ba gʋ-m,
sɩ n tɩ balʋ na yǝri Wɛ tɩn tʋʋnɩ.
Amʋ Yuutu Baŋa-Wɛ na tagɩ kʋlʋ tɩn mʋ kʋntʋ.› »
11 Baŋa-Wɛ kwǝrǝ daa ta ma yi amʋ ka wɩ:
12 «Nabiinu, yɔɔrɩ n mɔ luə ləŋə n pa Tiiri tɩʋ pɛ wʋm yɩ n ta dɩd-o nɩ: ‹Yuutu Baŋa-Wɛ na tagɩ te tɩn mʋ tɩntʋ:
Nmʋ dɛɛn yɩ nɔɔnʋ mʋ cɩga cɩga.
N swan gaalɩ yɩ n ta n jɩgɩ lam kʋ gaalɩ.
13 Wɛ na kɩ kara kalʋ Edɛn je sɩm nɩ tɩn
nmʋ ya n zʋʋra.
N ma n kwe kandwa-ŋʋna dwi maama
n ma n fɔgɩ n yɩra.
Tɩ maa yɩ: Sardʋanɩ, dɩ Topazɩ, dɩ Emɛrɔdɩ,
dɩ Krisolidi, dɩ Onisi, dɩ Zasɩpɩ,
dɩ Safiiri, dɩ Dɩama, dɩ Bɛrili.
Ba ta ma gɔgɩrɩ səbu-sɩŋa wǝǝnu ba tiŋi,
sɩ tɩ cəgi dɛ dɩlʋ nɩ ba na wʋ́ lʋ nmʋ tɩn.
14 Amʋ ma lɩ Serubɛn yuutu sɩ o taa yɩrɩ-m.
N dɛɛn wʋ amʋ Wɛ piu kʋlʋ na yɩ lanyɩranɩ fasɩ tɩn baŋa nɩ mʋ.
N ma n beeri kandwa yalʋ na di dɩ mim tɩn tɩtarɩ nɩ.
15 Nmʋ tɩtʋŋa maama dɛɛn ba jɩgɩ tusim
kʋ zɩgɩ dɛ dɩlʋ nɩ ba na naanɩ‑m tɩn.
Kʋ laan ma yi yigə yɩ n puli sɩ n ta n kɩ lwarɩm.
16 Nmʋ na tiini n kɩ pipiu te tɩn
mʋ pɛ n wʋ-lʋŋ-tɩtʋŋa dɩ n lwarɩm laan gaalɩ.
Amʋ dɩ ma zəli‑m pa n yagɩ Wɛ piu kʋm
dɩ n cavɩɩra.
Serubɛn tu wʋlʋ ya na yɩrɩ-m tɩn
dɩ laan ma lɩ‑m kandwa yalʋ na di dɩ mim tɩn tɩtarɩ nɩ.
17 N dɛɛn brɩ n tɩtɩ kamunni mʋ
n na n jɩgɩ lam kʋ gaalɩ tɩn ŋwaanɩ.
N nɩnwaŋa kam ma li n swan yam.
Kʋntʋ ŋwaanɩ mʋ a vuvugi‑m a dʋlɩ a dɩ tɩga nɩ,
pa n ji wo-mɔnɔ pwa badonnǝ yigə nɩ.
18 N tiini n cɔgɩ zanzan,
yɩ n daarɩ n pini nɔɔna pipiu baŋa nɩ.
Kʋ ma pa n cɔgɩ wara-je sɩlʋ n ya na zuli-nɩ da tɩn.
A ma da kʋ ŋwaanɩ a pa mim tʋ n tɩʋ kʋm nɩ,
sɩ dɩ zwɛ kʋ maama kulə!
Tɩʋ kʋm laan jigi tɩntwarɩm mʋ,
yɩ balʋ maama na nɛ nmʋ tɩn zɩgɩ ba niə.
19 Kʋ na yɩ dwi tiinə balʋ ya na ye n na yɩ wʋlʋ tɩn,
ba niə laan yɛ mʋ dɩ kʋlʋ na yi‑m tɩn.
Lɛɛrʋ tɩlʋ na yi nmʋ tɩn kɛ jɩŋa,
pa n dwi ti maŋa maama.› »
Sidɔn tɩʋ taanɩ
20 Baŋa-Wɛ kwǝrǝ daa ma yi amʋ ka wɩ:
21 «Nabiinu, pa n yibiyə jeeri Sidɔn tɩʋ kʋm seeni sɩ n daarɩ n ŋɔɔnɩ yiyiu-ŋwɛ n ja dɩ-kʋ. 22 Ta wɩ: ‹Yuutu Baŋa-Wɛ na tagɩ te tɩn mʋ tɩntʋ:
Sidɔn tɩʋ, amʋ dwǝni dɩ nmʋ.
A nan wʋ́ pa a paarɩ-zulǝ yam taa naɩ jaja n wʋnɩ.
Nɔɔna wʋ́ lwarɩ nɩ amʋ mʋ yɩ Baŋa-Wɛ dɩm,
nɩ a na yɔɔrɩ a waarɩ n nɔn-biə bam a ti,
yɩ ba sɛ nɩ amʋ mʋ yɩ wʋ-poŋo tu.
23 Amʋ wʋ́ pa yawɩ-cɛɛrʋ tʋ ba tɩʋ kʋm nɩ
kʋ gʋ ba zanzan.
A ta wʋ́ pa jar-kərə zaŋɩ je maama nɩ
ba zaŋɩ najara dɩ tɩʋ kʋm
pa twa faarɩ kʋ wʋ maama.
Ba laan wʋ́ lwarɩ nɩ amʋ mʋ yɩ Baŋa-Wɛ wʋm.
24 Yisɩrayɛlɩ tiinə bam daa bá taa jɩgɩ dʋna balʋ na nyɩ dɩ sabarɩ dɩ sabar-mangwəli tɩn sɩ ba taa jɩgɩ-ba ba zɔa yɩ ba yáalɩ-ba. Ba maa wʋ́ lwarɩ nɩ amʋ mʋ yɩ Yuutu Baŋa-Wɛ dɩm.
25 Yuutu Baŋa-Wɛ na tagɩ te tɩn mʋ tɩntʋ: Amʋ na lagɩ Yisɩrayɛlɩ tiinə bam a ja a nuŋi tɩɩnɩ dɩlʋ a ya na yagɩ-ba dɩ wʋnɩ tɩn, a laan wʋ́ pa dwi-gɛ tiinə bam lwarɩ nɩ amʋ mʋ yɩ wʋ-poŋo tu dɩ a na kɩ a nɔɔna bam te tɩn. Yisɩrayɛlɩ tiinə bam laan maa wʋ́ joori ba vu ba taa zʋʋrɩ ba tɩtɩ tɩga kalʋ a dɛɛn na kwe a pa a tɩntʋŋnʋ Zakɔbɩ tɩn wʋnɩ. 26 Ba maa wʋ́ taa zʋʋrɩ da dɩ yazurə yɩ ba lɔ sam ba daarɩ ba jəri vinyə tweeru. Kʋlʋkʋlʋ daa bá yaarɩ-ba, amʋ na wʋ́ waarɩ ba dʋna balʋ ya na jɩgɩ-ba ba yáalɩ tɩn ŋwaanɩ. Kʋntʋ mʋ baá lwarɩ nɩ amʋ mʋ yɩ ba Tu Baŋa-Wɛ dɩm.› »