Tiiri tɩʋ luə ləŋə
27
Baŋa-Wɛ kwǝrǝ ma yi amʋ ka wɩ:2 «Nabiinu, mɔ luə ləŋə n pa Tiiri tɩʋ kʋm. 3 Tiiri tɩʋ kʋm lɔgɩ kʋ zɩgɩ nɩnɩʋ kʋm ni nɩ, yɩ kʋ nɔn-biə bam kɩ pipiu dɩ nɩnɩʋ ni tɩɩnɩ zanzan. Nan ta dɩ tɩʋ kʋm kʋntʋ nɩ: ‹Yuutu Baŋa-Wɛ na tagɩ te tɩn mʋ tɩntʋ:
Tiiri tɩʋ, nmʋ brɩ n tɩtɩ n wɩ:
«Amʋ jɩgɩ lam mʋ cɩga cɩga.»
4 N sisənə yam yɔɔrɩ ya wʋ nɩnɩʋ kʋm tɩtarɩ nɩ mʋ.
N lwara bam ma pa n lam dɩm nuŋi cɩga cɩga.
5 Nmʋ nyɩ dɩ naboro kʋlʋ dɛ
na yɩ Seniri tu-dɩdwaarʋ mʋ ba goni ba ma kɩ tɩn.
Ba ta ma kwe Sɛdrɩ tiu na nuŋi Liban nɩ tɩn
ba ma ba kɩ n tɩtarɩ bəŋə kam.
6 Basan tweeru tɩlʋ na kɩ dɩdwaarʋ tɩn mʋ ba kwe
ba ma ba sarɩ n coonə bam nanywi sɩm.
Kʋ ta na yɩ n wʋ kʋm tɩga kam seeni,
ba mɛ Koperesɩ dɛ sɩlʋ na nuŋi Kitimia nɩ tɩn mʋ ba kɩ-kʋ,
yɩ ba ma tuu yələ ba gɔgɩrɩ dɛ sɩm kʋntʋ.
7 Ba ta ma kwe gar-fɩfalɩ sɩlʋ na gɔgɩrɩ yɩ sɩ nuŋi Ezipi nɩ tɩn
ba palɩ wɛɛnɩ sɩ viu taa dʋlɩ kʋ magɩ-sɩ.
ɡwaarʋ tɩm kʋntʋ nan ta mʋ yɩ nmʋ drapoo dɩ.
Ba ta ma kwe gwaarʋ tɩlʋ nyɩnyʋrʋ na yɩ nasʋnnʋ dɩ nasʋŋ-pupwiu yɩ tɩ nuŋi Elisa je sɩm nɩ tɩn
ba ma ba pu vwə ba kɩ da.
8 Sidɔn tiinə, dɩ Arvadi tiinə mʋ yɩ n naboro coonə bam.
Nmʋ tɩtɩ Tiiri nɔɔna balʋ na jɩgɩ yi-pʋrʋ tɩn
nan mʋ nii naboro yuŋim baŋa nɩ.
9 ɡebalɩ tɩʋ nakwa balʋ na yɩ gwarʋ tɩn
mʋ fɔgɩ ba kwɛ naboro kʋm nɩ kʋ na cɔgɩ.
Balʋ maama na tɔgɩ nɩnɩʋ kʋm baŋa ba beeri tɩn
mʋ yǝni ba tui sɩ ba kɩ pipiu n tɩʋ kʋm wʋnɩ.
10 Pɛrsɩ tiinə, dɩ Luudi tiinə, dɩ Puti tiinə
dɩ tɔgɩ ba yɩ nmʋ jar-kərə mʋ.
Ba ma kwe ba najara cɩ-kwɛn dɩ ba najara yice
ba palɩ n kabri sɩm yɩra nɩ,
pa kʋ ja nɩnwaŋa kʋ ba kʋ pa‑m.
11 Arvadi tiinə, dɩ Heleki tiinə
mʋ zɩgɩ n kabri sɩm baŋa nɩ ba yɩrɩ je sɩm maama.
Gamadɩ tiinə dɩ maa wʋ n di-dɩdwaarʋ tɩm nɩ.
Bantʋ dɩ kwe ba najara cɩ-kwɛn sɩm
ba palɩ n kabri sɩm maama yɩra nɩ.
Kʋntʋ ma pa n lam dɩm tiini dɩ nuŋi.
12 Tiiri tɩʋ, Tarsisi tiinə mʋ tu ba kɩ pipiu dɩ nmʋ, nmʋ na tiini n duni dɩ jɩjɩgɩrʋ zanzan tɩn ŋwaanɩ. Ba maa yǝni ba kwe səbu, dɩ luuru tɩdonnǝ ba ma ba yəgi n zɩla yam.b
13 Grɛkɩ, dɩ Tubalɩ, dɩ Mesɛkɩ tiinə dɩ yǝni ba kɩ ba pipiu dɩ nmʋ mʋ. Ba maa yǝni ba kwe gambɛ, dɩ canna wǝǝnu ba pa‑m sɩ ba daarɩ ba joŋi n zɩla yam.
14 Bɛtɩ-Togarama tɩʋ nɔɔna dɩ maa yǝni ba kwe siseŋ-nɔɔna, dɩ jara-kǝm sise, dɩ bɩna-sise ba pa‑m yɩ ba daarɩ ba joŋi n zɩla yam.
15 Dodani tiinə dɩ maa yǝni ba kɩ pipiu dɩ nmʋ. Tɩɩnɩ dɩlʋ na wʋ nɩnɩʋ ni nɩ tɩn nɔɔna zanzan mʋ tu sɩ á kɩ pipiu daanɩ. Ba ma kwe tuu yələ dɩ kakɔnɔ dɛ ba maa yəgi n zɩla yam.
16 Siiri tiinə dɩ maa yǝni ba kɩ pipiu dɩ nmʋ, n zɩla yam na daga tɩn ŋwaanɩ. Ba kwe kandwa-ŋʋna dwi dwic, dɩ gwar-ŋʋnnʋ, dɩ gwaarʋ tɩlʋ ba na gɔgɩrɩ tɩn, dɩ gar-fɩfalɩ, dɩ Korayi kandwa-ŋʋna mʋ ba ma ba ləri n zɩla yam.
17 Zuda dɩ Yisɩrayɛlɩ dwi tiinə dɩ pipi dɩ nmʋ mʋ. Ba kwe bəniŋəd kalʋ na nuŋi Miniti tɩn, dɩ mɔɔla, dɩ tʋʋrʋ, dɩ nugə, dɩ tralɩ nugə mʋ ba ləni n wo-yəllu tɩm.
18 Damasɩ tiinə kɩ pipiu dɩ nmʋ, n na jɩgɩ zɩla zanzan dɩ jɩjɩgɩrʋ dwi dwi tɩn ŋwaanɩ. Ba ma ja sana balʋ na nuŋi Helebon tɩn, dɩ peeni kʋrʋ tɩlʋ na nuŋi Saharɩ tɩn, 19 dɩ kɔɔra dɩ ba wʋ sana balʋ na nuŋi Uzalɩ nɩ tɩn ba ba ba ma ba yəgi n wǝǝnu. Luuru, dɩ Kasɩa tiu pʋrʋ, dɩ dwə-biə balʋ lwəm na ywənə tɩn maa wʋ n zɩla yam wʋnɩ.
20 Dedan tiinə ma kwe gwaarʋ tɩlʋ n na wʋ́ kwe n daŋɩ n bɩnaga baŋa nɩ tɩn ba ma ba kɩ pipiu dɩ nmʋ zɩla yam.
21 Kʋ nan na yɩ Arabɩ tiinə, dɩ Kedarɩ tɩʋ dɩdɛɛra bam, ba kwe pəlbiə, dɩ pi-balɩ, dɩ bʋnɩ mʋ ba kɩ pipiu dɩ nmʋ, yɩ ba ma-tɩ ba ləni n zɩla yam.
22 Seba dɩ Raama tiinə bam dɩ kɩ pipiu dɩ nmʋ mʋ. Ba kwe dwə-biə, dɩ kandwa-ŋʋna, dɩ səbu-sɩŋa mʋ ba ma ləni n zɩla yam.
23 N ta kɩ pipiu dɩ Haran tiinə, dɩ Kanne tiinə, dɩ Edɛn tiinə, kʋ ta wǝli dɩ Seba, dɩ Asuuri, dɩ Kilmadɩ pipimpiinə bam. 24 Bantʋ yǝni ba pipi n yɛ sɩm nɩ mʋ yɩ ba kwe gwar-laarʋ dwi dwi ba ma ləni n zɩla yam. ɡwaarʋ tɩm tɩdonnǝ nyɩnyʋrʋ yɩ nazwən-pupwiu mʋ, yɩ ba ta gɔgɩrɩ tɩ tɩdonnǝ lanyɩranɩ. ɡwaarʋ tɩdonnǝ na yɩ sarɩ tɩn yɩ ba mɛ gar-ŋʋnɩ na yɩ nyɩnyʋrʋ dwi dwi tɩn mʋ ba sɔ-sɩ pa jujugi yɩ ba daarɩ ba fɔgɩ ba sɔ sɩ niə yam. 25 Tarsisi nabwǝǝru tɩm mʋ yǝni tɩ zɩŋɩ n zɩla yam tɩ ja vu je sɩdonnǝ pipiu ŋwaanɩ.
Tiiri tɩʋ, nmʋ dɛɛn nyɩ dɩ naboro kʋlʋ zɩla na dunǝ
yɩ kʋ wʋ nɩnɩʋ kʋm tɩtarɩ nɩ kʋ ve tɩn mʋ.
26 Balʋ na co nmʋ tɩn mʋ jaanɩ‑m
ba zʋʋrɩ na-luŋə je sɩm nɩ.
Nmʋ na wʋ nɩnɩʋ kʋm tɩtarɩ nɩ kʋntʋ tɩn,
viu mʋ zaŋɩ wa-puli seeni kʋ ba kʋ vuvugi‑m
pa n cɔgɩ fasɩ.
27 Kʋ na yɩ n jɩjɩgɩrʋ tɩm, dɩ n zɩla yam,
dɩ n pipiu wǝǝnu tɩm maama,
dɩ n naboro coonə bam, dɩ balʋ na nii coom dɩm baŋa nɩ tɩn,
dɩ balʋ na fɔgɩ ba kwɛ naboro kʋm tɩn,
dɩ n pipimpiinə bam,
dɩ n jar-kərə bam,
dɩ balʋ maama na wʋ n wʋnɩ tɩn,
bantʋ maama wʋ́ maŋɩ nɩnɩʋ kʋm tɩtarɩ wʋnɩ mʋ ba tɩ.
Kʋntʋ maama wʋ́ kɩ dɛ dɩm lɛɛrʋ na tu n baŋa tɩn mʋ.
28 Nɩnɩʋ ni buburi-bɛ maama wʋ́ sisiŋi mʋ,
dɩ n nɔɔna bam na tiini ba kaasɩ te tɩn.
29 Naboro coonə bam maama wʋ́ nuŋi ba nabwǝǝru tɩm wʋnɩ mʋ
ba daarɩ-ba.
Balʋ maama ya na wʋ́ zʋ tɩ wʋnɩ ba yɛ na ba bɛ tɩn
laan maa wʋ́ bɛ ba zɩgɩ buburi-bɛ dɩm nɩ.
30 Ba maa wʋ́ kaasɩ baŋa baŋa dɩ wʋ-cɔgɔ nmʋ ŋwaanɩ.
Ba ta maa wʋ́ kwe kasʋlʋ ba taagɩ ba yum
yɩ ba ta bibili tɩntwarɩm wʋnɩ.
31 Ba ta wʋ́ ceeri ba yum dɩ kʋlʋ na yi nmʋ tɩn,
sɩ ba daarɩ ba kwe gwar-zɩnzwara ba zʋ.
Baá tiini ba keeri dɩ wʋ-cɔgɔ ba pa‑m,
ba wʋʋ na wʋ́ tiini kʋ cɔgɩ tɩn ŋwaanɩ.
32 Ba na kaasɩ kʋntʋ doŋ á ŋwaanɩ,
baá taa leeni luə ləŋə ba wɩ:
«Tiiri tɩʋ jɩgɩ doŋ mʋ na?
Kʋ ni nan tu dɩ məəri
yɩ nɩnɩʋ kʋm yɔɔrɩ kʋ li-kʋ fasɩ!»
33 Tɩɩnɩ zanzan yǝni dɩ joŋi nmʋ wǝǝnu tɩm
pa ba tʋŋɩ ba fra abam yɩra nɩ mʋ.
Nmʋ jɩjɩgɩrʋ tɩm dɩ n zɩla yam
mʋ pɛ tɩga baŋa tɩɩnɩ dɩm pwa duni.
34 Lele nan, nɩnɩʋ kʋm yɔɔrɩ kʋ cɔgɩ nmʋ mʋ,
pa n maŋɩ na-luŋə kuri nɩ.
N zɩla yam dɩ balʋ maama na tʋŋɩ n wʋnɩ tɩn
tɔgɩ dɩ nmʋ ba je nɩnɩʋ kʋm wʋnɩ.
35 Nɔɔna balʋ maama na zʋʋrɩ nɩnɩʋ ni tɩɩnɩ dɩm nɩ tɩn
yɩra sɔɔrɩ dɩ kʋlʋ na yi nmʋ tɩn.
Ba pwa yɩra saɩ mʋ dɩ fʋʋnɩ,
yɩ ba yigə tiini ka nywanɩ.
36 Balʋ na kɩ pipiu lʋgʋ baŋa tɩɩnɩ dɩm wʋnɩ tɩn
pwɛ ba tɩtɩ dɩ nmʋ mʋ.
Lɛɛrʋ tɩlʋ na yi nmʋ tɩn kɛ jɩŋa,
pa n dwi ti maŋa dɩ maŋa.› »