Tiiri tɩʋ taanɩ
26
Bɩna fugə-dɩdʋa bɩnɩ dɩm cana kam pulim dɛ dɩm wʋnɩ, mʋ Baŋa-Wɛ kwǝrǝ yi amʋ ka wɩ:2 «Nabiinu, Tiiri tiinə bam ya yɔɔrɩ ba cakɩ mʋ dɩ Zeruzalɛm tʋm dɩm yɩ ba wɩ: ‹Zeruzalɛm tɩʋ laan tʋ yoo! Kʋ laan nan jigi di-dwəənu mʋ kʋ tigə. Cwǝŋǝ laan pʋrɩ sɩ dɩ́ tɔgɩ da dɩ́ kɩ pipiu dɩ tɩɩnɩ dɩdonnǝ. Dɩbam mʋ wʋ́ ləri ba yuu nɩ dɩ́ duni.› 3 Kʋntʋ ŋwaanɩ Yuutu Baŋa-Wɛ na tagɩ te tɩn mʋ tɩntʋ: Abam Tiiri tɩʋ tiinə bam, amʋ jɩgɩ dɩdaanɩ abam mʋ. A lagɩ a pa dwi-gɛ tiinə zanzan mʋ ba ba kɩ jara dɩ abam, nɩ nɩnɩʋ na-ŋʋnɩ sɩm na zaŋɩ wɛɛnɩ te tɩn. 4 Bantʋ nan lagɩ ba vaarɩ tɩʋ kʋm kabri dɩ kʋ dalɩm je sɩm mʋ ba dɩ tɩga nɩ. A ta wʋ́ pa ba coori kʋ tɩɩrʋ tɩm maama ba ja je, sɩ kʋlʋ yɩranɩ na wʋ́ daarɩ da tɩn taa yɩ piu kʋ tigə. 5 Tiiri tɩʋ wʋ́ taa zɩgɩ nɩnɩʋ kʋm tɩtarɩ nɩ mʋ, sɩ kalǝŋ-jara yǝni ba jarɩ ba bʋrɩ da. Amʋ Yuutu Baŋa-Wɛ mʋ tagɩ kʋntʋ. Dwiə yadonnə tiinə mʋ wʋ́ ba ba vrɩ ba wǝǝnu. 6 Ba maa wʋ́ yɔɔrɩ ba gʋ Tiiri tiinə balʋ na zʋʋrɩ nɩnɩʋ ni tɩ-kamparɩ sɩm nɩ tɩn. Ba laan maa wʋ́ lwarɩ nɩ amʋ mʋ yɩ Baŋa-Wɛ.
7 Bɛŋwaanɩ, Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a pa Babilɔnɩ tɩʋ pɛ Nebukadnɛtsarɩ mʋ zɩgɩ jazɩm baŋa seeni o ba o jeeri Tiiri tɩʋ kʋm dɩ najara. Wʋntʋ yɩ pa-farʋ mʋ pwa maama wʋnɩ. O maa jɩgɩ siseŋ-nɔɔna dɩ najara tərikooru zanzan. O ta jɩgɩ balʋ na dɔgɩ siseŋ-nɔɔna baŋa nɩ tɩn, dɩ jar-kərə kɔ-fɔrɔ na daga tɩn.a 8 O lagɩ o yɔɔrɩ o cɔgɩ á tɩɩnɩ dɩlʋ maama na wʋ nɩnɩʋ ni tɩ-kamparɩ sɩm nɩ tɩn mʋ jara-kǝm baŋa nɩ. O jar-kərə bam maa wʋ́ kaagɩ á tɩʋ kamunu kʋm ba pu. Baá lɔ taala yɩ ba tiŋi tɩɩrʋ ba salɩ á kəbrə kam təŋə nɩ ba ja din ka yuu, yɩ ba daarɩ ba gɩɩnɩ jara-kǝm cɩ-kwɛn ba ma jeeri abam dɩ najara. 9 O ta wʋ́ pa ba kwe dɛ ba ma magɩ á kabri sɩm ba bwəri, yɩ ba daarɩ ba ma ba luuru ba bwəri á dalɩm je sɩm ba dɩ tɩga nɩ. 10 O siseŋ-nɔɔna bam fogo wʋ́ pɩ á tɩʋ kʋm, sɩ na daga tɩn ŋwaanɩ. O sise sɩm na guri tɩga, yɩ o najara tərikooru tɩm dɩ duri tɩ kɛa, á tɩʋ kʋm kabri wʋ́ taa sisiŋi mʋ. Ba maa wʋ́ tɔgɩ á tɩʋ kʋm manco-pɩɩna yam ba zʋ kʋ wʋ, nɩ nɔɔna na magɩ tɩʋ kəbrə ba yarɩ sɩ ba zʋ te tɩn. 11 Ba siseŋ-nɔɔna napɔɔna wʋ́ taa dwana á tɩʋ kʋm cwe sɩm maama nɩ mʋ. Ba maa wʋ́ taa jɩgɩ ba sʋ-lwaanʋ ba yɔɔrɩ ba gʋɩ nɔɔna. Ywə yalʋ á na cwi yɩ ya dana tɩn maa wʋ́ tʋ tɩga nɩ bʋrʋ-tʋ-tʋ. 12 Jar-kərə bam wʋ́ vrɩ á jɩjɩgɩrʋ tɩm, dɩ á pipiu zɩla maama mʋ. Ba maa wʋ́ yigi á kabri sɩm ba dɩ tɩga nɩ, yɩ ba daarɩ ba cɔgɩ á sɔ-ŋʋnnʋ tɩm. Kʋ na yɩ á sam dɩm kandwa yam, dɩ dɛ sɩm, dɩdaanɩ tɩɩrʋ tɩlʋ na daarɩ tɩn, baá dʋlɩ tɩntʋ maama ba yagɩ nɩnɩʋ kʋm wʋnɩ mʋ. 13 Amʋ wʋ́ cɩ sɩ á le sɩm sɔɔ daa yɩ taa zaŋa. Abam nan daa bá taá taɩ á kwaanʋ tɩm sɩ tɩ kwǝri zʋ nɔɔna zwa. 14 Amʋ nan lagɩ a pa á tɩʋ kʋm ji piu kʋlʋ kalǝŋ-jara na wʋ́ yǝni ba jarɩ ba bʋrɩ da tɩn mʋ. Ba daa bá joori ba lɔ tɩʋ kʋm ba zɩgɩ. Bɛŋwaanɩ, amʋ Yuutu Baŋa-Wɛ mʋ tagɩ kʋntʋ.
15 Yuutu Baŋa-Wɛ nan na tagɩ taanɩ dɩlʋ DƖ brɩ Tiiri tɩʋ tɩn mʋ tɩntʋ: Tɩɩnɩ dɩlʋ maama na wʋ nɩnɩʋ kʋm ni nɩ tɩn na ni nmʋ na tʋ tɩga nɩ buri buri yɩ n nɔn-biə bam nɛ zʋnnɩ pa ba ŋʋʋsa te tɩn, ba yɩra bá taa saɩ mʋ na? 16 Nɩnɩʋ ni tɩɩnɩ dɩm pwa laan wʋ́ zaŋɩ ba daarɩ ba paarɩ yitunnu yɩ ba lɩ ba paarɩ nɩnwaŋa gwaarʋ, ba daarɩ ba lɔɔrɩ ba gwar-ŋʋnnʋ tɩm. Fʋʋnɩ wʋ́ yɔɔrɩ dɩ ja-ba pa ba jǝni tɩga nɩ, yɩ ba yɩra sɔɔrɩ dɩ kʋlʋ na yi á tɩʋ kʋm tɩn. 17 Ba laan maa wʋ́ leeni luə ləŋə nmʋ ŋwaanɩ ba ta wɩ:
‹Nmʋ yɩ tɩʋ kʋlʋ yɩrɩ ya na zaŋɩ
yɩ n nɔn-biə bam nuŋi nanɩɩrʋ tɩm baŋa nɩ tɩn.
Nmʋ laan nan yɔɔrɩ n cɔgɩ mʋ n tigə!
Nmʋ dɩ n nɔn-biə bam dɛɛn jɩgɩ dam mʋ
nanɩɩrʋ tɩm maama wʋnɩ,
pa balʋ maama na zʋʋrɩ nɩnɩʋ kʋm ni nɩ tɩn
tiini ba kwarɩ fʋʋnɩ abam ŋwaanɩ.
18 Dɛ dɩm nmʋ nan na lagɩ n tʋ kʋntʋ tɩn,
nɩnɩʋ ni tɩɩnɩ dɩm maama yɩra wʋ́ sɔɔrɩ mʋ,
dɩ nmʋ dam dɩm na ti te tɩn.›
19 Yuutu Baŋa-Wɛ nan na tagɩ te tɩn mʋ tɩntʋ: Amʋ na pɛ n ji di-dwəənu yɩranɩ, nɩ tɩʋ kʋlʋ nɔɔna daa na ba zʋʋrɩ kʋ wʋnɩ tɩn, yɩ a ta na pɛ nɩnɩʋ kʋm wʋ dʋ-fara tɩm pɛɛlɩ tɩ ba tɩ kwǝli‑m, 20 a laan wʋ́ pa nmʋ dɩ n nɔn-biə bam tu á zʋ curu, pa á wǝli dɩ faŋa faŋa nɔɔna balʋ na ve da tɩn. Nmʋ laan wʋ́ ta n zʋʋrɩ tɩga kuri nɩ mɛ faŋa faŋa di-dwəənu na maŋɩ tɩ tigi tɩn. Kʋ laan maa wʋ́ pa n maŋɩ daanɩ maŋa maama, yɩ n daa bá ta n yɩ tɩʋ kʋlʋ naŋʋna na zʋʋrɩ kʋ wʋnɩ tɩn. 21 Amʋ wʋ́ pa lɛɛrʋ ba n baŋa yɩ n laan guri. Nɔɔna wʋ́ beeri n je yɩ ba daa bá na‑m. Yuutu Baŋa-Wɛ na tagɩ kʋlʋ tɩn mʋ kʋntʋ.»