Amɔn tɩʋ taanɩ
25
Baŋa-Wɛ kwǝrǝ ma yi amʋ ka wɩ:2 «Nabiinu, pipiri n yibiyə sɩ ka jeeri Amɔn tiinə bam sɩ n ŋɔɔnɩ yiyiu-ŋwɛ n cɔgɩ-ba. 3 Ta dɩ ba nɩ: ‹Cəgi-na Yuutu Baŋa-Wɛ taanɩ dɩm. Yuutu Baŋa-Wɛ na tagɩ te tɩn mʋ tɩntʋ: Abam ya yɔɔrɩ á cakɩ mʋ dɩ ba na jaanɩ amʋ digə kam ba cɔgɩ tɩn. Ba na wanɩ Yisɩrayɛlɩ tɩga kam ba cɔgɩ, yɩ ba daarɩ ba kalɩ Zuda dwi tiinə bam ba ja vu sa-tɩʋ yigə yigə tɩn, mʋ á dɛɛn jɩgɩ a nɔɔna bam á mwana. 4 Kʋntʋ ŋwaanɩ, taá ye-na nɩ a lagɩ a ja abam a kɩ dwiə yalʋ na zʋʋrɩ wa-puli seeni tɩn jɩŋa nɩ mʋ. Baá ba ba cwi ba vwə sɩ ba taa zʋʋrɩ abam tɩtarɩ nɩ. Ba maa wʋ́ joŋi á tiu biə bam ba di, yɩ ba ta vrɩ á nayɩla dɩ ba nyɔ ba daarɩ abam. 5 Amʋ ta wʋ́ pa Raba pipiri kʋ ji mɛ yogondə na ve ya di gaa tɩn, sɩ Amɔn dɩ taa yɩ je sɩlʋ ba na kɔnɩ peeni da tɩn. Abam laan maa wʋ́ lwarɩ nɩ amʋ mʋ yɩ Baŋa-Wɛ wʋm. 6 Bɛŋwaanɩ, Yuutu Baŋa-Wɛ tagɩ tɩntʋ mʋ DƖ wɩ: Abam magɩ á jɩa dɩ wʋpolo, yɩ á faŋɩ á cwi á nɛ baŋa nɩ kʋ ŋwaanɩ, á ma á daarɩ á cakɩ dɩ wʋ-gʋrʋ kʋlʋ na yi Yisɩrayɛlɩ tɩʋ kʋm tɩn. 7 Kʋntʋ ŋwaanɩ nan lwarɩ-na nɩ amʋ dɩ lagɩ a twɩ a jɩŋa mʋ á baŋa nɩ, sɩ a kwe abam a kɩ dwiə yadonnə jɩŋa nɩ sɩ ba vrɩ á wǝǝnu tɩm. Amʋ lagɩ a lɩ abam mʋ dwi-gɛ tiinə bam wʋnɩ, sɩ a daarɩ a saarɩ abam sɩ á daa yɩ gwaanɩ lʋgʋ baŋa tɩɩnɩ dɩm wʋnɩ. A na yɔɔrɩ a goni abam a dɩ tɩga nɩ kʋntʋ doŋ, mʋ á wʋ́ lwarɩ wɩ amʋ mʋ yɩ Baŋa-Wɛ wʋm.› »
Moabɩ tɩʋ taanɩ
8 «Yuutu Baŋa-Wɛ na tagɩ te tɩn mʋ tɩntʋ: Moabɩ tɩʋ dɩ Seyiri tɩʋ dɛɛn tagɩ ba wɩ: ‹Zuda dwi tiinə bam dɩ laan yɔɔrɩ ba nyɩ dɩ dwiə yadonnə yam mʋ.› 9 Kʋntʋ ŋwaanɩ amʋ dɩ wʋ́ pa nɔɔna kɩ jara dɩ Moabɩ tɩɩnɩ dɩlʋ na cɩgɩ ba sisəm dɩm tɩn. Kʋ nan yɩ ba tɩɩnɩ dɩlʋ na jɩgɩ nɩnwaŋa tɩn, Bɛt-Yesimɔtɩ, dɩ Baal-Meyɔn, dɩ Kiryatayim mʋ kʋntʋ. 10 A nan lagɩ a kwe Moabɩ tɩʋ kʋm dɩ Amɔn tiinə bam mʋ a kɩ dwiə yalʋ na zʋʋrɩ wa-puli seeni tɩn jɩŋa nɩ sɩ ba taa te. Kʋntʋ tɩn, Amɔn tiinə yɩrɩ dɩm wʋ́ saarɩ lʋgʋ baŋa tɩɩnɩ dɩm wʋnɩ. 11 A laan maa wʋ́ waarɩ Moabɩ tiinə bam sɩ ba lwarɩ nɩ amʋ mʋ yɩ Baŋa-Wɛ dɩm.»
Edɔm tɩʋ taanɩa
12 «Yuutu Baŋa-Wɛ na tagɩ te tɩn mʋ tɩntʋ: Edɔm tiinə bam sagɩ cwǝŋǝ dɩ ba na yiri jɩnɩ Zuda dwi tiinə bam baŋa nɩ tɩn. Lwarɩm dɩm kʋntʋ jɩnɩ yɔɔrɩ dɩ wʋ ba yuu nɩ mʋ.b 13 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Amʋ nan wʋ́ twɩ a jɩŋa mʋ Edɔm tɩʋ baŋa nɩ, sɩ a gʋ kʋ nɔn-biə dɩ kʋ vara maama. A maa wʋ́ pa kʋ ji di-dwəənu yɩranɩ. Kʋ na wʋ́ zɩgɩ Teman nɩ sɩ kʋ yi Dedan tɩn, sʋ-lwaanʋ mʋ wʋ́ ti ba maama. 14 A maa wʋ́ tɔgɩ a tɩtɩ nɔɔna Yisɩrayɛlɩ tiinə bam baŋa a yiri jɩnɩ Edɔm tɩʋ kʋm baŋa nɩ. A wʋ́ pa-ba cwǝŋǝ sɩ ba waarɩ Edɔm tiinə bam nɩ a ban-lʋm dɩm na lagɩ sɩ ba kɩ te tɩn. Kʋntʋ baŋa nɩ mʋ baá lwarɩ a ban-zɔŋɔ kʋm na yɩ te tɩn. Yuutu Baŋa-Wɛ mʋ tagɩ kʋntʋ.»
Filisi tɩʋ taanɩ
15 «Yuutu Baŋa-Wɛ na tagɩ te tɩn mʋ tɩntʋ: Filisi tiinə bam jɩgɩ nabaara sɩbɔŋɔ mʋ ba di dɩ Zuda tiinə bam. Ba ma kwaanɩ sɩ ba yiri jɩnɩ ba baŋa nɩ kuni zanzan, ba daarɩ ba cɔgɩ-ba. Ba maa wʋ duri ba ŋwaŋa dɩ fɩnfɩɩn dɩ. 16 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a twɩ a jɩŋa mʋ Filisi tiinə bam baŋa nɩ. A maa wʋ́ pa Kereti tiinə bam dwi je tɩga baŋa nɩ, yɩ a daarɩ a cɔgɩ Filisi tiinə balʋ ta na daarɩ yɩ ba zʋʋrɩ nɩnɩʋ kʋm ni nɩ tɩn. 17 Amʋ wʋ́ tɔgɩ a ban-lʋm dɩm ŋwaanɩ a yiri jɩnɩ ba baŋa nɩ. A maa na yiri jɩnɩ ba baŋa nɩ yɩ a waarɩ-ba a ti, ba dɩ wʋ́ lwarɩ nɩ amʋ mʋ yɩ Baŋa-Wɛ dɩm.»