Kambiə mɩmaŋɩ
24
Bɩna nʋgʋ bɩnɩ dɩm canɩ fugə cana kam da fugə dɛ dɩm nɩ, mʋ Baŋa-Wɛ kwǝrǝ tu ka yi amʋ ka wɩ:2 «Nabiinu, pʋpʋnɩ dɛ dɩntʋ n tiŋi tɔnɔ wʋnɩ, bɛŋwaanɩ, kʋ yɩ dɛ dɩm kʋntʋ nɩ nɔ́ɔ mʋ Babilɔnɩ tɩʋ pɛ tu o kaagɩ Zeruzalɛm tɩʋ kʋm o pu.a 3 Ve zwabani-nyɩna bantʋ te n maŋɩ mɩmaŋɩ dɩ ba n wɩ: ‹Yuutu Baŋa-Wɛ na tagɩ te tɩn mʋ tɩntʋ:
Kwe kambiə n təni mim nɩ,
sɩ n daarɩ n lo na ka wʋnɩ.
4-5 Nan nii n vara bam wʋnɩ n kuri var-ŋʋm.
Kwe kʋ nwan-dɛ sɩm maama n kɩ kambiə kam wʋnɩ,
kʋ cwe dɩm dɩ kʋ vɔŋɔ kʋm mʋ kʋntʋ.
Ta kuri kʋ kwi-laarʋ tɩm n kɩ da,
n su kambiə kam ni maama.
Laan tigisi da-kʋrɩ zanzan ka kuri nɩ,
n pa na bam cʋrɩ lanyɩranɩ
yɩ kwi sɩm dɩ saŋɩ sɩ bɩ.
6 Bɛŋwaanɩ, Yuutu Baŋa-Wɛ na tagɩ te tɩn mʋ tɩntʋ: Lɛɛrʋ wʋ tɩʋ kʋntʋ na su dɩ nɔn-gʋra tɩn yuu nɩ! Kʋ yɔɔrɩ kʋ nyɩ dɩ kambi-doŋə mʋ na tiini ka digimi yɩ ka ba zarɩ ka gɔɩ tɩn. Nan ta lɩ ka wʋ nwana yam dɩdʋa dɩdʋa yɩ á wʋ kuri ya wʋnɩ á daarɩ. 7 Tɩʋ kʋm nɔn-biə bam kaagɩ ba gʋ nɔɔna pa ba jana bam taagɩ tɩga kam maama mʋ. Ba ma lo jana bam pulwaarʋ baŋa nɩ jaja, yɩ kʋ daɩ tɩga nɩ mɛ fogo na wʋ́ kwǝli-ba tɩn. 8 Amʋ dɩ nan yagɩ jana bam pa ba tigi pulwaarʋ tɩm baŋa nɩ kʋntʋ mʋ, sɩ nɔn-gʋra bam daa yɩ səgi-ba. Kʋntʋ wʋ́ pa a banɩ zaŋɩ yɩ a joori a ŋwɩ jana bam jɩnɩ ba yuu nɩ.
9 Yuutu Baŋa-Wɛ nan na tagɩ te tɩn mʋ tɩntʋ: Lɛɛrʋ wʋ tɩʋ kʋntʋ na su dɩ nɔn-gʋra tɩn yuu nɩ! Amʋ tɩtɩ mʋ wʋ́ tigisi da-kʋrɩ a tiŋi da-baŋa nɩ. 10 Kʋntʋ ŋwaanɩ, dʋgɩlɩ dɛ sɩm sɩ sɩ di baŋa, sɩ n daarɩ n dwe mim sɩ kuri nɩ. Saŋɩ nwana yam sɩ ya bɩ lanyɩranɩ, sɩ n wǝli dwə-biə ya wʋnɩ. Nan ta pa kwi sɩm fuli. 11 Laan kwe kambi-kʋra kam n saŋɩ min-cala yam baŋa nɩ sɩ n pa ka tiini ka lʋnɩ yɩ ka canna kam nyɩɩnɩ. Kʋntʋ mʋ wʋ́ pa digiru tɩlʋ na wʋ ka yɩra nɩ tɩn maama nyɩɩnɩ tɩ ti, sɩ mim dɩm zwɛ wǝǝnu tɩlʋ ya na pɛ ka cɔgɩ tɩn pa tɩ je. 12 Amʋ yɩra nan cɛ dɩ a na kwaanɩ sɩ a kwɛ-ka te tɩn mʋ. Digiru tɩlʋ na daga ka wʋnɩ tɩn ta wʋ je. Dʋlɩ-ka n yagɩ mim dɩm wʋnɩ, dɩ ka digiru tɩm maama!
13 Abam nan digimi á tɩtɩ dɩ á wo-zɔɔna kikiə yam mʋ. Amʋ yɔɔrɩ a kwɛ abam a ga mʋ. Á wʋ sɛ sɩ a lɩ á digiru tɩm. Abam nan daa bá wanɩ á kwɛ á digiru tɩm, kʋ na daɩ nɩ amʋ logi a ban-lʋm dɩm á baŋa nɩ mʋ a ti pa a wʋʋ laan zuri.
14 Amʋ Baŋa-Wɛ dɩm mʋ tagɩ kʋntʋ maama. Maŋa kam yi sɩ a kɩ te a na tagɩ tɩn. A bá yiri a ni dɩm kʋntʋ. A bá ləni a wʋbʋŋa, yɩ a ta bá duri á yibwənə. Amʋ nan lagɩ a waarɩ abam mʋ sɩ kʋ maŋɩ dɩ á tɩtʋŋa yam na yɩ te tɩn. Yuutu Baŋa-Wɛ na tagɩ kʋlʋ tɩn mʋ kʋntʋ.› »
Ezekɩyɛlɩ kaanɩ wʋm na tɩgɩ te tɩn
15 Baŋa-Wɛ kwǝrǝ daa ma yi amʋ ka wɩ:
16 «Nabiinu, amʋ lagɩ a da a kɩ kǝm mʋ na wʋ́ zwɛ‑m lanyɩranɩ. A wʋ́ joŋi wʋlʋ na tiini o tigi n bɩcarɩ nɩ tɩn a daarɩ‑m. Dɩ kʋ dɩ, yɩ keeri o ŋwaanɩ. Yɩ kanɩ yi-na naa n pa n yigə nywanɩ. 17 N jɩgɩ cwǝŋǝ sɩ n suuri fɩnfɩɩn n wʋnɩ. Nan yɩ pa n kwǝrǝ zaŋɩ. Yɩ keeri o luə kam. Kwe n yuu garyi n ba n yuu nɩ, sɩ n daarɩ n zʋ n natra yam. Yɩ kwǝli n yibiyə nɩ balʋ na keeri ba twa na kɩ te tɩn, naa sɩ n di wʋdiu kʋlʋ luə tiinə na jɩgɩ ba di tɩn.»
18 Dɛ dɩm kʋntʋ tɩtɩɩtɩ mʋ a ŋɔɔnɩ dɩ nɔɔna bam. Kʋ na yi dɩdaan-ni maŋa tɩn, mʋ a kaanɩ wʋm tɩga. Tɩga na pʋʋrɩ tɩn, amʋ dɩ ma kɩ nɩ Wɛ na pɛ-nɩ ni sɩ a kɩ te tɩn. 19 Nɔɔna bam ma bwe-nɩ ba wɩ: «N kaanɩ na tɩga yɩ n kɩ kʋntʋ doŋ tɩn, n bá pa dɩ́ lwarɩ kʋ kuri na yɩ te kʋ pa dɩbam tɩn mʋ na?»
20 Amʋ dɩ ma ta dɩ ba a wɩ: «Baŋa-Wɛ kwǝrǝ mʋ tu ka yi amʋ ka wɩ: 21 Ta dɩ Yisɩrayɛlɩ dwi tiinə bam nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a pa a tɩtɩ digə kam ji wo-zɔɔnɩ mʋ. Kʋ yɩ kʋlʋ á na jɩgɩ wʋpolo kʋ baŋa nɩ tɩn mʋ. Abam ba nii-kʋ á sui, yɩ kʋ yɩ jǝgǝ kalʋ á bɩcara na tigi da tɩn mʋ. Abam biə balʋ á nan na daarɩ kwaga nɩ tɩn dɩ lagɩ ba tɩ najara wʋnɩ mʋ. 22 Kʋntʋ maama nan na kɩa, abam dɩ wʋ́ kɩ nɩ amʋ na kɩ te tɩn mʋ. Abam bá kwǝli á yibiyə nɩ balʋ na keeri ba twa na kɩ te tɩn, naa á di wʋdiu kʋlʋ luə tiinə na jɩgɩ ba di tɩn. 23 Abam wʋ́ yagɩ á yuu garyi mʋ sɩ sɩ ba á yum nɩ, yɩ á daarɩ á yagɩ á natra sɩ ya taa wʋ á nɛ nɩ. Á bá keeri kǝm dɩm ŋwaanɩ. Á nan bá pa á yigə nywanɩ dɩ. Abam wʋ́ yɔɔrɩ á taá bugi á je mʋ á lwarɩm dɩm ŋwaanɩ, yɩ á daarɩ á ŋʋʋsɩ á brɩ daanɩ. 24 Ezekɩyɛlɩ nan yɩ mɩmaŋɩ mʋ o pa abam sɩ á lwarɩ kʋ na wʋ́ taa yɩ te tɩn á yɩra nɩ. Abam dɩ wʋ́ kɩ te wʋntʋ na kɩ tɩn mʋ. Kʋntʋ maama na yi abam, á wʋ́ lwarɩ nɩ amʋ mʋ yɩ Yuutu Baŋa-Wɛ wʋm.›
25 Kʋ ta na yɩ nmʋ, nabiinu, dɛ dɩm wʋ́ yi a na wʋ́ cɔgɩ dam je sɩlʋ ba na jɩgɩ wʋpolo kʋ baŋa nɩ tɩn. Kʋ maa yɩ woŋo kʋlʋ ba na di ywəəni kʋ ŋwaanɩ yɩ ba soe sɩ ba taa nii-kʋ ba ba sui tɩn mʋ. Ba bɩcara maa tigi kʋ baŋa nɩ. A ta wʋ́ ja ba biə bam mʋ a wǝli da a ja a kɛ. 26 Dɛ dɩm kʋntʋ nɩ mʋ nɔɔnʋ wʋ́ duri o lu najara wʋnɩ o ja kwǝrǝ o ba o pa‑m sɩ n lwarɩ kʋlʋ na kɩ tɩn.b 27 Maŋa kam kʋntʋ nɩ mʋ cwǝŋǝ wʋ́ pʋrɩ ka pa‑m sɩ n ni puri sɩ n ŋɔɔnɩ dɩd-o. Nmʋ daa bá ta n yɩ cɩmm. Kʋntʋ baŋa nɩ mʋ nmʋ lagɩ n ji mɩmaŋɩ n pa-ba, sɩ ba dɩ wanɩ ba lwarɩ nɩ amʋ mʋ yɩ Baŋa-Wɛ.»