Kaana bale mɩmaŋɩ
23
Baŋa-Wɛ kwǝrǝ ma yi amʋ ka wɩ:2 «Nabiinu, kaana bale dɛɛn mʋ wʋra, ba na yɩ nu dɩdʋa. 3 Ba ta na yɩ bukwa-dʋnnʋ yɩ ba zʋʋrɩ Ezipi tɩʋ wʋnɩ tɩn mʋ ba jigi ka-bwəəru. Dáanɩ mʋ baara dɛɛn jɩgɩ ba yɩla ba təŋə, yɩ ba ta jɩgɩ ba kabwəm-nyɔɔnɩ dɩm seeni ba peerə. 4 Zɩmbaarʋ wʋm yɩrɩ mʋ yɩ Ohola. O nyaanɩ wʋm yɩrɩ maa yɩ Oholiba. Ba ma ji amʋ kaana, yɩ ba lʋ bəkəri dɩ bukwa ba pa-nɩ. Ohola mʋ yɩ Samari tɩʋ. Oholiba maa yɩ Zeruzalɛm tɩʋ kʋm.
5 Ohola ya ta na wʋ amʋ tee nɩ tɩn mʋ o zʋ boorim kikiə wʋnɩ. O ma kaagɩ o lagɩ bɔɔla, nɩ o fra na zʋ-ba te tɩn. Asiiri tiinə bam mʋ kʋntʋ. Ba badonnǝ maa yɩ jar-kərə 6 yɩ ba zʋ gwaarʋ tɩlʋ nyɩnyʋgʋ na yɩ nasʋnnʋ tɩn. Ba badaara nan yɩ dɩdɛɛra, dɩ yigǝ tiinǝ, dɩ balʋ na diini siseŋ-nɔɔna tɩn mʋ. Ba maama maa yɩ nɔn-dʋnnʋ tɩlʋ na jɩgɩ lam tɩn. 7 O ma yɔɔrɩ o kwe o tɩtɩ o pa Asiiri tɩʋ nɔn-yum tɩm maama kabwərim ŋwaanɩ. O ta ma cɔgɩ o tɩtɩ dɩ o na zuli balʋ maama fra na wʋ o wʋnɩ tɩn jwǝnǝ yam. 8 O nan wʋ sɛ sɩ o yagɩ o boorim kikiə yam, nɩ o na maŋɩ o kɩ te Ezipi nɩ yɩ o ta yɩ bɩsankana tɩn. Maŋa kam kʋntʋ nɩ baara dɛɛn taanɩ o kabwəm-nyɔɔnɩ dɩm yɩ ba daarɩ ba tʋŋɩ ba fra na lagɩ te tɩn mʋ dɩd-o. 9 Amʋ nan yɔɔrɩ a yag-o mʋ a pa o bɔɔla Asiiri tiinə bam. Bɛŋwaanɩ, o fra maŋɩ ya wʋ ba wʋnɩ.a 10 Ba dɩ ma lɩ o yɩra zɩla ba daarɩ‑o ba zɩgɩ bwəri. Ba ta kalɩ o bəkəri dɩ o bukwa bam mʋ ba ja ba viiri, yɩ ba daarɩ ba kwe sʋ-lɔŋɔ ba ma ba gʋ o tɩtɩ. Kaana laan maa jɩgɩ o yɩra taanɩ ba ŋɔɔna, o na nɛ waarɩm dɩlʋ tɩn ŋwaanɩ.
11 O nyaanɩ Oholiba dɛɛn nɛ tɩntʋ maama, yɩ wʋntʋ nan ta kɩ o cɔgɩ sɩ kʋ dwǝni o zɩmbaarʋ wʋm kabwərim tɩtʋŋa, o na warɩ o fra yam o ja tɩn ŋwaanɩ. 12 O ma yɔɔrɩ o lagɩ Asiiri tiinə bam, ba na yɩ dɩdɛɛra, dɩ yigǝ tiinǝ, dɩ jar-kərə na zʋ gwar-laarʋ tɩn, dɩ balʋ na dɔgɩ siseŋ-nɔɔna baŋa nɩ tɩn. Ba maama maa yɩ nɔn-dʋnnʋ tɩlʋ na jɩgɩ lam tɩn. 13 A ma maanɩ nɩ wʋntʋ dɩ kɩ nɩ o zɩmbaarʋ wʋm ya na kɩ te tɩn mʋ, pa o digimi o tɩtɩ.
14 Kʋ nan na yɩ Oholiba, wʋntʋ kɩ kabwərim sɩ kʋ dwǝni o zɩmbaarʋ wʋm kikiə yam. O dɛɛn nɛ ba na pʋpʋrɩ Babilɔnɩ tiinə nyɩnyʋrʋ tɩlʋ ba yagɩ kəbrə yɩra nɩ pa tɩ lana nasʋn-sʋnnʋ te tɩn. 15 Ba maa jɩgɩ kili sɩlʋ na bagɩ ba təŋə nɩ tɩn, dɩdaanɩ yuu garyiə yalʋ na vɔgɩ ba yum nɩ tɩn. Nyɩnyʋrʋ tɩm maama maa yɔɔrɩ tɩ nyɩ dɩ Babilɔnɩ tɩʋ dɩdɛɛra balʋ na nuŋi Kalde tɩn. 16 O na puli o na ba nyɩnyʋrʋ tɩm kʋntʋ tɩn, mʋ o fra zʋ ba wʋnɩ, pa o tʋŋɩ nɔɔna ba tɩʋ kʋm nɩ sɩ ba bǝŋi-ba ba pa‑o. 17 Babilɔnɩ tiinə bam dɩ ma ba o te ba pəni dɩd-o. Ba ma tiini ba cɔg-o dɩ ba sar-pwəgə kikiə, pa o yɩra ba ya cɛ yɩ o ma o kwaga o ya-ba. 18 O yɔɔrɩ o ja o boorim kikiə yam o nuŋi pooni mʋ pa nɔɔna maama na o kuri. A laan ma ma a kwaga a ya‑o, nɩ a dɛɛn na yagɩ o zɩmbaarʋ te tɩn. 19 Dɩ kʋ dɩ, o ta wʋ sɛ sɩ o yagɩ o tʋlʋ kʋm. O nan guli o ya na yɩ nɔn-dʋŋʋ Ezipi tɩʋ nɩ yɩ o tɔgɩ boorim kikiə yalʋ tɩn gulə mʋ, pa o tiini o kɩ kʋntʋ doŋ sɩ kʋ gaalɩ. 20 O ta yɔɔrɩ o soe sɩ o taa tigi dɩ o bɔɔla bam mʋ, ba na dana dɩ sar-pwəgə nɩ bɩnɛ dɩ siseŋ-nɔɔna na yɩ te tɩn ŋwaanɩ. 21 Oholiba, nmʋ na guli n na kɩ wo-zɔɔna yalʋ n nɔn-dʋnnɩ maŋa nɩ yɩ Ezipi baara bam peeri n kabwəm-nyɔɔnɩ dɩm yɩ ba təŋi n yɩla tɩn, n ta lagɩ sɩ n ta n yɩ kʋntʋ mʋ.
22 Kʋntʋ ŋwaanɩ Oholiba, Yuutu Baŋa-Wɛ na tagɩ te tɩn mʋ tɩntʋ: Kʋ na yɩ n bɔɔla balʋ n na mɛ n kwaga n ya-ba tɩn, a lagɩ a pa ba zaŋɩ je maama nɩ ba jara dɩ nmʋ mʋ. 23 A nan wʋ́ la nɔn-dʋnnʋ tɩlʋ na jɩgɩ lam yɩ ba nuŋi Babilɔnɩ, dɩ Kalde, dɩ Pekɔdɩ, dɩ Soa, dɩ Koa tɩn, kʋ ta wǝli dɩ Asiiri tiinə bam maama a kɩ daanɩ. Ba yɩ ba tɩʋ dɩdɛɛra, dɩ ba yigǝ tiinǝ, dɩ jar-kərə, dɩ pamaŋa, yɩ ba maama dɔgɩ siseŋ-nɔɔna baŋa nɩ mʋ. 24 Ba maa wʋ́ ba dɩ jar-kərə kɔgɔ kamunu dɩ ba tərikooru ba jeeri‑m dɩ najara, yɩ ba ze najara zɩla dwi dwi. Baá taa jɩgɩ najara cɩ-kwɛn ba ma ba kwǝli ba tɩtɩ, yɩ ba pu najara yice mʋ. Ba maa wʋ́ ba ba gilimi nmʋ ba kɩ tɩtarɩ nɩ yɩ ba daarɩ ba waarɩ-m. Amʋ mʋ wʋ́ pa-ba cwǝŋǝ sɩ ba di n taanɩ, yɩ ba daarɩ ba waarɩ-m sɩ kʋ tɔgɩ dɩ bantʋ cullu tɩm. 25 A lagɩ a da a ban-lʋm dɩm baŋa nɩ mʋ a pa ba sɩɩnɩ ba yiǝ ba waarɩ-m. Ba maa wʋ́ go n mʋmwɛ dɩ n zwa ba yagɩ. Balʋ ta na wʋ́ daarɩ n wʋnɩ tɩn wʋ́ tɩ najara wʋnɩ. Kʋ ta na yɩ n biə bam dɩ, ba lagɩ ba ja-ba mʋ, yɩ ba daarɩ ba zwɛ n nɔn-biə balʋ na daarɩ tɩn mim wʋnɩ. 26 Ba ta wʋ́ lɩ n gwaarʋ tɩm maama, dɩ n nɩnwaŋa zɩla yam. 27 Amʋ nan wʋ́ pa wo-zɔɔna dɩ boorim kikiə yalʋ nmʋ dɛɛn na sɩŋɩ n kɩ Ezipi nɩ tɩn ti. Nmʋ daa bá ta n jɩgɩ kikiə yantʋ doŋ fra, naa n guli Ezipi tɩʋ gulə maŋa dɩ maŋa!
28 Yuutu Baŋa-Wɛ nan na tagɩ te tɩn mʋ tɩntʋ: Oholiba, a lagɩ a kwe‑m a kɩ balʋ n na culi tɩn jɩŋa nɩ mʋ. Kʋ yɩ bantʋ mʋ n dɛɛn mɛ n kwaga n ya-ba. 29 Ba dɩ wʋ́ kwe sɩbɔŋɔ mʋ ba tʋŋɩ sɩ kʋ yi abam lanyɩranɩ. Ba ta wʋ́ vrɩ wǝǝnu tɩlʋ n na yaarɩ n na tɩn ba ja viiri. Ba maa wʋ́ kɛ ba daarɩ‑m, sɩ n ta n zɩgɩ dɩ cavɩɩra. N boorim kikiə yam wʋ́ taa naɩ jaja pa cavɩɩra yɔɔrɩ ya ja‑m. Kʋ yɩ n wo-zɔɔna dɩ n tʋlʋ kikiə yam mʋ 30 pɛ daanɩm dɩntʋ ba n baŋa, n na kaagɩ n lagɩ dwi-gɛ tiinə bam yɩ n digimi n tɩtɩ ba jwǝnǝ yam kaanɩm baŋa nɩ tɩn ŋwaanɩ. 31 Nmʋ yɔɔrɩ n kwe n zɩmbaarʋ tɩtʋŋ-naga kam mʋ. Kʋntʋ ŋwaanɩ, amʋ dɩ wʋ́ kwe na-zʋŋa kalʋ a na pɛ‑o pa o nyɔ ka wʋ cam tɩn mʋ a pa‑m sɩ n dɩ nyɔ.
32 Yuutu Baŋa-Wɛ nan na tagɩ te tɩn mʋ tɩntʋ:
Nmʋ dɩ lagɩ n nyɔ n zɩmbaarʋ wʋm na-zʋŋa kam wʋnɩ mʋ.
Ka wʋ nan tiini kʋ luunə.
Nɔɔna wʋ́ taa jɩgɩ-m ba mwana yɩ ba ta yáalɩ‑m,
na-zʋŋa kam kʋntʋ na jɩgɩ n yɩra wǝǝnu zanzan ka wʋnɩ tɩn ŋwaanɩ.
33 Nmʋ wʋ́ nyɔ ka wʋ wǝǝnu tɩm n bugi
yɩ n ta n je dɩ wʋ-cɔgɔ.
Ka nan yɩ na-zʋŋa kalʋ na wʋ́ ja cɔgɩm dɩ lɛɛrʋ ka ba
yɩ n zɩmbaarʋ Samari dɩ nyɔ ka wʋnɩ tɩn mʋ.
34 Nmʋ nan wʋ́ nyɔ ka wʋ wǝǝnu tɩm mʋ n ti maama nyɔ!
Nmʋ laan ma n wʋ́ fəri-ka tɩga nɩ n lɔ mugə-mugə,
yɩ n daarɩ n bɛ bɛ n yɩla wʋ-cɔgɔ ŋwaanɩ.
Amʋ Yuutu Baŋa-Wɛ mʋ tagɩ kʋntʋ.
35 Yuutu Baŋa-Wɛ nan na tagɩ te tɩn mʋ tɩntʋ: Nmʋ na swe amʋ swiə yɩ n ta-nɩ n yagɩ kwaga kwaga tɩn, nmʋ nan maŋɩ sɩ n na waarɩm mʋ sɩ kʋ maŋɩ dɩ n wo-zɔɔna dɩ n tʋlʋ kikiə yam.»
36 Baŋa-Wɛ daa ta ma ta dɩ amʋ DƖ wɩ:
«Nabiinu, nmʋ nan bá bʋrɩ taanɩ n vanɩ Ohola dɩ Oholiba na? Tʋlɩ ba kəm-balwaarʋ yam taanɩ sɩ ba taa ye ya ni nɩ. 37 Bɛŋwaanɩ, ba tiini ba kɩ tʋlʋ zanzan, yɩ ba nɔn-gʋra kikiə dɩ kɛ jɩŋa. Ba nuŋi amʋ kwaga nɩ yɩ ba daarɩ ba zuli ba jwǝnǝ yam. Ba maŋɩ ba kwe biə balʋ amʋ dɩ ba na lʋgɩ daanɩ tɩn mʋ ba kɩ kaanɩm ba pa ba jwǝnǝ yam kʋntʋ. 38 Dɩ kʋ dɩ, ba ta kɩ tɩntʋ mʋ ba ma cɔgɩ amʋ yigə: Ba yɔɔrɩ ba jɩgɩ a digə kam ba digimi mʋ, yɩ ba yáalɩ a siun da yam. 39 Dɛ dɩlʋ wʋnɩ ba na kwe ba biə bam ba kɩ kaanɩm ba pa ba jwǝnǝ yam tɩn, mʋ ba zʋ amʋ digə kam wʋnɩ pa ba cɔgɩ sɩ cullu tɩm. Ba sɩɩnɩ ba kɩ kʋntʋ doŋ mʋ amʋ tɩtɩ digə kam wʋnɩ.
40 Ba maa yǝni ba tʋŋɩ sɩ ba vu yigə yigə ba bəŋi nɔɔna sɩ ba ba. Nɔɔna bam kʋntʋ maa na nuŋi sa-tɩɩnɩ wʋnɩ ba yi, nmʋ Oholiba wʋ́ kɩ n yɩra mʋ, n daarɩ n kwɛ n yibiyə yɩ n fɔgɩ n yɩra dɩ wo-nyɩnnʋ dwi dwi. 41 Nmʋ laan ma n wʋ́ vu n jǝni jangɔŋɔ kʋlʋ na jɩgɩ nɩnwaŋa tɩn baŋa nɩ, yɩ n pa ba kwe yituŋu ba zɩgɩ n yigə nɩ. N ma n wʋ́ kwe wǝǝnu tɩlʋ lwǝm na ywǝmmǝ tɩn, dɩ nugə kalʋ ya na yɩ amʋ zulə ŋwaanɩ tɩn n tiŋi kʋ baŋa nɩ.
42 Nɔn-kɔgɔ kʋlʋ na tiini ba di ywəəni tɩn mʋ gilimi‑o ba bagɩ sɔɔ ba yaga. Ba nan nuŋi kagʋa kam seeni mʋ ba ba. Nɔɔna bam maa yɩ dwiə yadonnə, kʋ wǝli dɩ sa-nyɔra balʋ ba na jaanɩ ba nuŋi kagʋa wʋnɩ tɩn. Nɔɔna bam kʋntʋ ma kwe jɩŋa bɛn ba kɩ kaana bale bam jɩn nɩ, yɩ ba daarɩ ba kwe nɩnwaŋa yipwi ba pu ba yum nɩ. 43 A laan ma ta kaanɩ wʋlʋ yɩra na cɛ dɩ boorim kikiə tɩn yɩra taanɩ a wɩ: ‹Ba ta wʋ́ taa tigi dɩd-o mʋ nɩ ba na kɩ te dɩ ka-tʋlɩ tɩn.› 44 Ba ma sɩɩnɩ ba kɩ sar-pwəgə dɩd-o, nɩ nɔɔna na tigi dɩ ka-bwəəru te tɩn. Ba kɩ kəm-balwaarʋ kʋntʋ doŋ mʋ dɩ Ohola dɩdaanɩ Oholiba, ba na yɩ ka-tʋlɩ tɩn ŋwaanɩ. 45 Nɔn-ŋʋna nan wʋ́ di bantʋ taanɩ ba vanɩ-ba, pa ba na waarɩm dɩlʋ na maŋɩ dɩ ba kabwərim dɩ ba nɔn-gʋra kikiə tɩn mʋ, ba na sɩɩnɩ ba yɩ ka-tʋlɩ yɩ nɔn-gʋra jana wʋ ba yum nɩ tɩn ŋwaanɩ.
46 Yuutu Baŋa-Wɛ nan na tagɩ te tɩn mʋ tɩntʋ: Pa jar-kərə kɔgɔ ba ba jara dɩ ba, pa lɛɛrʋ dɩ fʋʋnɩ yi-ba. 47 Kɔ-fɔrɔ kʋm kʋntʋ wʋ́ dʋlɩ-ba dɩ kandwa mʋ, yɩ ba daarɩ ba kwe ba sʋ-lwaanʋ ba goni-ba ba dɩ tɩga nɩ. Ba ta wʋ́ gʋ ba bu-baara dɩ ba bukwa, yɩ ba daarɩ ba zwɛ ba sam dɩm.
48 Amʋ wʋ́ tɔgɩ kʋntʋ baŋa nɩ mʋ a pa wo-zɔɔna kikiə yantʋ doŋ ti tɩga kam je maama nɩ. Kaana bam maama wʋ́ na kʋ na kɩ bantʋ te tɩn pa ba daa bá lwǝni ba kikiə yam. 49 Kʋ nan na yɩ abam, Ohola dɩ Oholiba, á wʋ́ yaarɩ mʋ á boorim kikiə yam á na kɩ tɩn ŋwaanɩ. Á lwarɩm dɩm á na kɩ dɩ á na kaanɩ jwǝnǝ te tɩn jɩnɩ mʋ wʋ́ taa wʋ abam yuu nɩ. Abam laan maa wʋ́ lwarɩ nɩ amʋ mʋ yɩ Yuutu Baŋa-Wɛ.»