Zeruzalɛm tiinə bam na cɔgɩ te tɩn
22
Baŋa-Wɛ kwǝrǝ ma yi amʋ ka wɩ:2 «Kʋ ta na yɩ nmʋ, nabiinu, n nan bá bʋrɩ taanɩ n vanɩ tɩʋ kʋntʋ nɔn-biə bam, dɩ ba na soe nɔn-gʋra kikiə te tɩn na? Tʋlɩ ba wo-zɔɔna kikiə yam taanɩ sɩ ba taa ye ya ni nɩ. 3 Nan ta dɩ ba n wɩ: ‹Yuutu Baŋa-Wɛ na tagɩ te tɩn mʋ tɩntʋ: Zeruzalɛm tɩʋ, n lagɩ n ja cɔgɩm mʋ n ba n pa n tɩtɩ. Bɛŋwaanɩ, n nɔn-biə bam yǝni ba gʋ ba donnǝ zanzan n wʋnɩ, yɩ ba ta mɔ jwǝnǝ sɩ ba zuli-ya, pa ba digimi ba tɩtɩ. 4 Abam Zeruzalɛm tiinə nɔn-gʋra kikiə yam pɛ á tʋ dɩ á bʋra. Á na mɔɔnɩ jwǝnǝ á pa á tɩtɩ tɩn dɩ ma pa á digimi á tɩtɩ. Zeruzalɛm, nmʋ waarɩm maŋa kam bwələ. N bɩna yam lagɩ ya ti mʋ. Amʋ lagɩ a pa dwi-gɛ tiinə bam taa jɩgɩ-m ba yáalɩ mʋ, sɩ lʋgʋ baŋa tɩɩnɩ dɩm dɩ taa twɩ‑m. 5 Tɩɩnɩ dɩlʋ na bwələ dɩ nmʋ tɩn, dɩ dɩlʋ na yɩ yigə yigə tɩn maama wʋ́ taa mwanɩ‑m mʋ, nmʋ yɩrɩ na cɔgɩ yɩ n su dɩ vuvugə tɩn ŋwaanɩ.
6 Nii mʋ! Yisɩrayɛlɩ tɩʋ yigə tu wʋlʋ maama na wʋ n wʋnɩ tɩn jɩgɩ o dam dɩm o gʋɩ nɔɔna mʋ. 7 Nmʋ nɔn-biə bam yɔɔrɩ ba gooni ba kwə dɩ ba niinə mʋ. Ba ta maa jɩgɩ vərə, dɩ bɩtara, dɩdaanɩ kadənə ba bɛɛsa. 8 Ba brɩ ba ba nɩgɩ wǝǝnu tɩlʋ na yɩ lanyɩranɩ fasɩ tɩ pa amʋ tɩn, yɩ ba daarɩ ba jɩgɩ amʋ siun da yam ba yáala. 9 Nmʋ wʋnɩ nɔɔna kaagɩ ba ba bɩbara sɩ ba wanɩ ba donnǝ ba gʋ mʋ. Nɔɔna badonnǝ dɩ maa diini pweeru tɩm yuu ba di jwǝnǝ wʋdiiru, yɩ badaara dɩ soe boorim kikiə. 10 Nmʋ wʋnɩ baara badonnǝ dɩ maa tigi dɩ ba kwə kaana, yɩ babam dɩ fɩn mʋ sɩ ba pəni dɩ kaana balʋ na jɩgɩ ba cana zarɩm ba kɩ tɩn. 11 Nɔɔna ta wʋ n wʋnɩ yɩ ba lagɩ ba donnǝ kaana sɩ ba kɩ bwǝŋǝ dɩ ba. Badaara maa jɩgɩ ba bu-kaana ba laga, yɩ babam dɩ yǝni ba pəni dɩ ba nakwa ba na yɩ kwə daanɩ tɩn. 12 Nmʋ wʋnɩ dɩ, nɔɔna joŋi dim mʋ sɩ ba wanɩ ba gʋ ba donnǝ. Badonnǝ dɩ maa jɩnɩ wǝǝnu ba paɩ yɩ ba dwanɩ nyɔɔrɩ zanzan jɩnɩ dɩm baŋa nɩ. Ba laan maa tɔgɩ kampinə baŋa nɩ ba duni. Nmʋ nɔn-biə bam maa swe amʋ swiə. Yuutu Baŋa-Wɛ na tagɩ kʋlʋ tɩn mʋ kʋntʋ.
13 Amʋ wʋ́ dʋlɩ abam ja-guli mʋ, abam na pini á ma á duni, yɩ á daarɩ á gʋ á donnǝ á tɩʋ kʋm wʋnɩ tɩn ŋwaanɩ. 14 Amʋ nan na tu a tʋŋɩ dɩ abam nɩ kʋ na maŋɩ te tɩn, á ta wʋ́ taá jɩgɩ baarɩ na? Á ta wʋ́ taá dana maŋa kam kʋntʋ nɩ na? Amʋ Baŋa-Wɛ mʋ tagɩ kʋntʋ. A nan wʋ́ sɩɩnɩ a kɩ kʋlʋ a na tagɩ tɩn. 15 A lagɩ a jagɩ abam mʋ pa á vu yigə yigə sɩ á taá zʋʋrɩ lʋgʋ baŋa tɩɩnɩ dɩm je maama wʋnɩ. Kʋntʋ tɩn, a laan wʋ́ lɩ á digiru tɩm maama a yagɩ. 16 Abam na pɛ dwi-gɛ tiinə bam jɩgɩ abam ba yáala, á laan wʋ́ ba á lwarɩ nɩ amʋ mʋ yɩ Baŋa-Wɛ wʋm.› »
17 Baŋa-Wɛ kwǝrǝ daa ta ma yi amʋ ka wɩ:
18 «Nabiinu, amʋ nii a naɩ Yisɩrayɛlɩ dwi tiinə bam nɩ ba yɩ weeru mʋ. Kʋ nyɩ dɩ luru na kwɛ lu-nyɩnnʋ mim wʋnɩ sɩ o lɩ canna, dɩ luuru tɩdonnǝ o daarɩ lu-nyɩnnʋ cɩga cɩga tɩn mʋ. Bantʋ nan nyɩ dɩ weeru tɩm kʋntʋ mʋ amʋ yigə nɩ. 19 Kʋntʋ ŋwaanɩ Yuutu Baŋa-Wɛ nan na tagɩ te tɩn mʋ tɩntʋ: ‹Amʋ dɩ wʋ́ la abam mʋ a kɩ daanɩ Zeruzalɛm tɩʋ kʋm wʋnɩ, á laan na jigi weeru doŋ tɩn ŋwaanɩ. 20 Nɩ luru na yǝni o la lu-nyɩnnʋ, dɩ canna, dɩ luuru tɩdonnǝ o dɩ min-vʋgʋ wʋnɩ sɩ o fuli mim dɩm pa tɩ nyɩɩnɩ te tɩn, kʋntʋ mʋ amʋ dɩ lagɩ a kɩ abam. A maa wʋ́ tɔgɩ a ban-lʋm dɩm ŋwaanɩ a la abam a kɩ daanɩ tɩʋ kʋm wʋnɩ, yɩ a daarɩ a waarɩ abam, sɩ á dɩ nyɩɩnɩ, a wʋʋ na fuli zanzan tɩn ŋwaanɩ. 21 Cɩga ŋwaanɩ tɩn, a lagɩ a la abam a kɩ daanɩ tɩʋ kʋm wʋnɩ mʋ, sɩ a laan fuli a ban-lʋm dɩm a yagɩ á yɩra nɩ. 22 Nɩ səbu na nyɩɩnɩ te min-vʋgʋ wʋnɩ tɩn, kʋntʋ mʋ abam dɩ lagɩ á yaarɩ tɩʋ kʋm wʋnɩ. Abam laan maa wʋ́ lwarɩ nɩ amʋ Baŋa-Wɛ mʋ logi a ban-lʋm dɩm a yagɩ á baŋa nɩ.› »
23 Baŋa-Wɛ kwǝrǝ daa ma yi amʋ ka wɩ:
24 «Nabiinu, ta dɩ Yisɩrayɛlɩ tiinə tɩga kam nɩ: ‹Nmʋ yɩ tɩga kalʋ dʋa na ba nɩ n baŋa nɩ sɩ ka kwɛ tɩn mʋ, a banɩ na zaŋɩ n baŋa nɩ tɩn ŋwaanɩ.› 25 Tɩʋ kʋm yigǝ tiinǝ bam kɩ ni daanɩ mʋ nɩ nywəənu na kaasɩ te sɩ tɩ ja nwana tɩ kaagɩ tɩn. Ba maa kaagɩ ba gʋɩ nɔɔna, yɩ ba daarɩ ba vrɩ ba jɩjɩgɩrʋ dɩ ba lʋnnɩ wǝǝnu tɩm, pa ba daarɩ kadənə zanzan ba yagɩ tɩʋ kʋm wʋnɩ. 26 Tɩʋ kʋm kaanɩm tiinə bam yigə tǝri amʋ niə yam wʋnɩ. Ba maa yáalɩ wǝǝnu tɩlʋ na yɩ lanyɩranɩ fasɩ tɩ paɩ amʋ tɩn. Ba nan ba pɔɔrɩ wǝǝnu tɩlʋ na yɩ lanyɩranɩ fasɩ amʋ ŋwaanɩ tɩn, dɩ tɩlʋ na wʋra dɛ maama tɩtʋŋa yam ŋwaanɩ tɩn daanɩ. Ba maa brɩ nɩ wǝǝnu tɩlʋ na maŋɩ dɩ Wɛ cullu tɩm tɩn, dɩ tɩlʋ na jɩgɩ digiru cullu tɩm seeni tɩn maama yɩ bɩdwɩ mʋ. Kʋ ta na yɩ amʋ siun da yam, ba yigə tǝri ya wʋnɩ. Ba na kɩ te kʋntʋ tɩn maa paɩ nɔɔna jɩgɩ amʋ yɩrɩ dɩm ba yáala. 27 Tɩʋ kʋm nakwa bam nyɩ dɩ nywǝnkuri mʋ na nɛ vara sɩ ba zi ba kaagɩ tɩn. Ba maa kɩ nɔɔna zʋnnɩ yɩ ba jɩgɩ-ba ba gʋɩ sɩ ba tɩtɩ ma ba duni. 28 Tɩʋ kʋm Wɛ nijoŋnǝ bam dɩ yɩ ja cɔgɩ. Ba yɔɔrɩ ba peeri nɔɔna bam kikiə mʋ, dɩ ba vɩɩra yam na ganɩ nɔɔna, yɩ ba yi-nɛɛrɩ taana yɩ vwan te tɩn. Ba maa ta ba wɩ: ‹Yuutu Baŋa-Wɛ tagɩ DƖ wɩ tɩntʋ mʋ,› yɩ Baŋa-Wɛ nan brɩ DƖ wʋ puri DƖ ni dɩ ba dɩ. 29 Tɩʋ kʋm nɔɔna bam yɔɔrɩ ba mɩ dɩ kampinə mʋ, yɩ ba ta soe sɩ ba taa vrɩ nɔɔna. Ba maa yɔɔrɩ ba jɩgɩ yinigə tiinə dɩ nabwənə ba bɛɛsa. Ba ta maa jɩgɩ vərə dɩ ba yaara, yɩ ba vanɩ bantʋ bʋra taanɩ dim baŋa nɩ.
30 A nan beeri sɩ a na nɔɔnʋ mʋ ba wʋnɩ, sɩ kʋ tu fɔgɩ o lɔ tɩʋ kʋm kəbrə kam o zɩgɩ. Kʋ tu yaá zɩgɩ o cɩ sɩ lulogo kʋlʋ na tigi amʋ dɩ tɩʋ kʋm laŋa nɩ tɩn kwǝni, sɩ a daa yɩ cɔgɩ tɩʋ kʋm. A ma beeri a ga.a 31 Kʋntʋ ŋwaanɩ mʋ a nan lagɩ a yɔɔrɩ a lo a ban-lʋm dɩm ba baŋa nɩ, sɩ a zwɛ-ba kulə, a wʋ na tiini kʋ fuli dɩ ba tɩn ŋwaanɩ. A maa wʋ́ joori a ŋwɩ ba kǝm-balwaarʋ tɩm maama jɩnɩ. Yuutu Baŋa-Wɛ na tagɩ kʋlʋ tɩn mʋ kʋntʋ.»