Baŋa-Wɛ sʋ-lɔŋɔ kʋm taanɩ
21
Baŋa-Wɛ kwǝrǝ daa ta ma yi amʋ ka wɩ:2 «Nabiinu, pipiri n yibiyə n jeeri Zeruzalɛm tɩʋ kʋm. Tɔɔlɩ kwǝrǝ n cɔgɩ kʋ Wɛ-di-kamunu kʋm, sɩ n daarɩ n ŋɔɔnɩ yiyiu-ŋwɛ n cɔgɩ Yisɩrayɛlɩ tɩga kam. 3 Ta dɩ ba n wɩ: ‹Baŋa-Wɛ na tagɩ te tɩn mʋ tɩntʋ: Amʋ lagɩ a vaŋɩ a sʋ-lɔŋɔ mʋ a lɩ kʋ polo kʋm nɩ, sɩ a ma-kʋ a gʋ nɔn-ŋʋna dɩ nɔn-balwaarʋ dɩ. 4 Amʋ na wʋ́ yɔɔrɩ a kɩ kʋntʋ tɩn ŋwaanɩ, a sʋ-lɔŋɔ kʋm wʋ́ zɩgɩ jagwiə seeni mʋ kʋ taa goni nɔɔna maama kʋ dɩ sɩ kʋ vu kʋ yi jazɩm baŋa seeni. 5 Nabiinǝ maama laan maa wʋ́ lwarɩ nɩ amʋ mʋ yɩ Baŋa-Wɛ. A nan na lɩ a sʋ-lɔŋɔ kʋm kʋ polo nɩ kʋntʋ tɩn, a daa bá pa kʋ joori kʋ zʋ da.›
6 Kʋntʋ ŋwaanɩ, nabiinu, ta n ŋʋʋsa wʋ-cɔgɔ ŋwaanɩ. Pa nɔɔna bam na nmʋ wʋʋ na cɔgɩ yɩ n tiini n ŋʋʋsɩ te tɩn. 7 Ba nan na bwe‑m sɩ ba lwarɩ bɛŋwaanɩ n na ŋʋʋsɩ tɩn, sɩ n ta dɩ ba nɩ: ‹Kwǝrǝ kalʋ na bɩɩnɩ sɩ ka pa nɔɔna zanzan wʋʋ cɔgɩ tɩn ŋwaanɩ mʋ amʋ ŋʋʋsa. Ba nadoonə wʋ́ taa magɩ daanɩ mʋ dɩ fʋʋnɩ, yɩ ba vwana dɩ parɩ.› Wǝǝnu tɩntʋ nan lagɩ tɩ sɩɩnɩ tɩ kɩ mʋ. Yuutu Baŋa-Wɛ na tagɩ kʋlʋ tɩn mʋ kʋntʋ.»
8 Baŋa-Wɛ kwǝrǝ daa ma yi amʋ ka wɩ:
9 «Nabiinu, ŋɔɔnɩ n ta dɩ ba wɩ: ‹Baŋa-Wɛ na tagɩ te tɩn mʋ tɩntʋ:
Nii-na sʋ-lɔŋɔ!
Ba nan dwəri-kʋ mʋ!
Kʋ maa tiini kʋ jɩgɩ ni mʋ yɩ kʋ nyɩɩna.
10 Kʋ ni tiini kʋ dwəri kʋ ti
sɩ kʋ goni kʋ dɩ tɩga nɩ.
Kʋ nan ta liligi je maama nɩ mʋ
nɩ dʋa na pɩpɩlɩ te tɩn!
Dɩ́ wʋ́ taa caka Zuda paarɩ dɩm ŋwaanɩ na?
Sʋ-lɔŋɔ kʋm yigə nan tǝrǝ paarɩ maama wʋnɩ!
11 Amʋ kuri sʋ-lɔŋɔ kʋm a tiŋi
sɩ ba dwəri-kʋ pa kʋ tiini kʋ jɩgɩ ni mʋ.
Ba laan wʋ́ kwe-kʋ ba kɩ nɔn-gʋrʋ wʋm jɩŋa nɩ.
12 Nabiinu, nan ta n keerǝ yɩ n coosi n yaga,
lɛɛrʋ tɩlʋ na wʋ́ yi a nɔɔna bam tɩn ŋwaanɩ.
Yisɩrayɛlɩ tɩʋ yigǝ tiinǝ bam dɩ wʋ́ na lɛɛrʋ tɩm kʋntʋ.
Ba maama wʋ́ tɩ najara wʋnɩ mʋ,
ba dɩ a nɔɔna bam maama.
Kʋntʋ ŋwaanɩ, magɩ n tikəri wʋ-cɔgɔ ŋwaanɩ.
13 Kʋ lagɩ kʋ maŋɩ a nɔɔna bam mʋ kʋ nii. Zuda paarɩ dɩm na ti, sʋ-lɔŋɔ kʋm yigə na tǝri dɩ wʋnɩ tɩn ŋwaanɩ, bɛɛ mʋ daa wʋ́ kɩ? Yuutu Baŋa-Wɛ na tagɩ kʋlʋ tɩn mʋ kʋntʋ.›
14 Kʋntʋ ŋwaanɩ, nabiinu, ŋɔɔnɩ yiyiu-ŋwɛ
sɩ n daarɩ n magɩ n jɩa.
Pa sʋ-lɔŋɔ kʋm zagɩ kuni bɩle naa bɩtɔ.
Bɛŋwaanɩ, kʋ yɩ sʋ-lɔŋɔ kʋlʋ na gʋɩ tɩn mʋ.
Kʋ nan wʋ́ kaagɩ nɔɔna bam kʋ pu
sɩ kʋ yɔɔrɩ kʋ gʋ-ba.
15 Kʋntʋ wʋ́ pa ba vwana parɩ,
yɩ ba zanzan da kʋ ŋwaanɩ ba tʋ.
Amʋ pɛ sʋ-lɔŋɔ mʋ cɩ ba tɩʋ kʋm ni maama.
Kʋ nan yɔɔrɩ kʋ liligi je maama nɩ
nɩ dʋa na pɩpɩlɩ te tɩn mʋ,
yɩ kʋ ti kʋ yigə sɩ kʋ goni kʋ dɩ tɩga nɩ.
16 Sʋ-lɔŋɔ, yɔɔrɩ n ta n zagɩ jazɩm seeni,
sɩ n daarɩ n pipiri jagwiə seeni n zagɩ n wǝli da.
Nmʋ ni dɩm na jeeri mɛ seeni,
sɩ n ta n goni nɔɔna n dɩ tɩga nɩ.
17 Amʋ dɩ maa wʋ́ magɩ a jɩa daanɩ
yɩ a banɩ dɩ laan zuri.
Amʋ Baŋa-Wɛ mʋ tagɩ kʋntʋ.»
18 Baŋa-Wɛ kwǝrǝ daa ma yi amʋ ka wɩ:
19 «Nabiinu, bə bibəli sɩle sɩ sɩ brɩ cwe sɩlʋ Babilɔnɩ tɩʋ pɛ sʋ-lɔŋɔ kʋm na wʋ́ tɔgɩ da kʋ ba tɩn. Cwe sɩm nan wʋ́ nuŋi tɩʋ dɩdʋa nɩ mʋ sɩ ba. Laan cwi daa mɛ seeni cwe sɩm na wʋ́ pwɛ tɩn, sɩ ka brɩ cwǝŋǝ maama yigə na yɔɔrɩ tɩʋ kʋlʋ seeni tɩn. 20 Ta pa sʋ-lɔŋɔ kʋm tɔgɩ cwǝŋǝ dɩdʋa kʋ vu Amɔn tiinə tʋ-fɔrɔ Raba seeni, sɩ cwǝŋǝ wʋdoŋ kam dɩ vu Zeruzalɛm tɩʋ na wʋ Zuda laŋa kam nɩ tɩn seeni. 21 Bɛŋwaanɩ, Babilɔnɩ tɩʋ pɛ wʋm lagɩ o vu o zɩgɩ cwe sɩm na pwɛ bɩle mɛ tɩn, yɩ o daarɩ o tɔgɩ yi-nɛɛrɩ baŋa sɩ o lwarɩ cwǝŋǝ kalʋ o na wʋ́ tɔgɩ tɩn. O maa zuzugi taŋa cɩna, o daarɩ o bwe cwǝŋǝ o tɩʋ jwǝnǝ tee nɩ, yɩ o kwe culu varɩm cwɛ o nii, sɩ o lwarɩ o na wʋ́ kɩ te tɩn. 22 O jazɩm nɩ mʋ oó taa ze cɩnɩ dɩlʋ baŋa nɩ ba na pʋpʋnɩ Zeruzalɛm tɩʋ yɩrɩ tɩn. O maa wʋ́ vu da o tiŋi dɛ sɩlʋ ba na wʋ́ kwe ba magɩ tɩʋ kʋm ni-bwəəru tɩm ba bwəri, sɩ o laan pa o jar-kərə bam ni sɩ ba gʋ kʋ nɔn-biə bam. Ba maa wʋ́ bagɩ tiguri-kaasa, yɩ ba lɔ taala ba salɩ tɩʋ kʋm kəbrə kam təŋə nɩ ba ja din ka yuu. 23 Zeruzalɛm tiinə bam nan bá sɛ nɩ Babilɔnɩ tɩʋ pɛ yi-nɛɛrɩ dɩm wʋ́ sɩɩnɩ kʋ kɩ, ba na maŋɩ ba du durə ba pa‑o tɩn ŋwaanɩ. Pɛ wʋm nan wʋ́ guli-ba ba vwa-kənə yam na yɩ te tɩn, yɩ o daarɩ o ja-ba.
24 Kʋntʋ ŋwaanɩ, Yuutu Baŋa-Wɛ tagɩ tɩntʋ mʋ DƖ wɩ: ‹Abam pɛ á vwa-kənə yam nuŋi pooni, yɩ á lwarɩm dɩm maa yɔɔrɩ ya naɩ jaja. Á kikiə yam maama maa brɩ nɩ á ba jɩgɩ cɩga. Kʋntʋ ŋwaanɩ mʋ á dʋna wʋ́ ba ba ja abam dɩ dam.
25 Kʋ ta na yɩ nmʋ Yisɩrayɛlɩ tiinə yigə tu wʋm, n lwarɩm kikiə dɩ n pu-sɩŋa gaalɩ. Maŋa kam yi ka ti sɩ n yɔɔrɩ n na waarɩm. 26 Yuutu Baŋa-Wɛ nan na tagɩ te tɩn mʋ tɩntʋ: Dwanɩ n yuu garyi dɩm, dɩ n paarɩ yupugə kam n yuu nɩ. Kʋ daa bá taa yɩ nɩ kʋ ya na yɩ te faŋa tɩn. Nabwənə maŋɩ sɩ ba zaŋɩ dɩ zulə, sɩ balʋ ya na jɩgɩ paarɩ ba di tɩn ga ba paarɩ. 27 Cɔgɩm bɩɩna! Cɔgɩm bɩɩna! Tɩʋ kʋm paarɩ dɩm wʋ́ ti! Kʋntʋ nan bá kɩ, yɩ kʋ daɩ nɩ wʋlʋ a na kuri sɩ o waarɩ tɩʋ kʋm tɩn tuǝ. A laan maa wʋ́ kwe-kʋ a kɩ o jɩŋa nɩ.›
28 Nabiinu, kʋ nan na yɩ nmʋ, ŋɔɔnɩ yiyiu-ŋwɛ n wɩ: ‹Yuutu Baŋa-Wɛ na tagɩ te Amɔn tiinə bam dɩ ba tʋrʋ tɩm seeni tɩn mʋ tɩntʋ:
Nii-na sʋ-lɔŋɔ!
Ba laan zei-kʋ mʋ sɩ ba ma ba gʋ nɔɔna.
Ba kwɛ-kʋ pa kʋ liligi mʋ nɩ dʋa na pɩpɩlɩ te tɩn,
sɩ kʋ yɔɔrɩ kʋ taa cɔgɩ nɔɔna.
29 Á vɩɩra yalʋ na ve najara yam seeni tɩn nan ganɩ abam mʋ,
yɩ á yi-nɛɛrɩ taana yɩ vwan yɩranɩ.
Sʋ-lɔŋɔ kʋm wʋ́ ba abam baŋa
pa nɔn-balwaarʋ tɩm na maŋɩ dɩ tʋʋnɩ tɩn tɩ.
Dɛ dɩm bantʋ na wʋ́ na cɔgɩm tɩn yiǝ,
pa ba yɔɔrɩ ba na waarɩm.
30 Laan nan kwe sʋ-lɔŋɔ kʋm
n joori n kɩ kʋ polo wʋnɩ.
Joori n vu je sɩlʋ ba na naanɩ‑m tɩn.
Bɛŋwaanɩ, amʋ wʋ́ di n taanɩ
tɩʋ kʋlʋ na yɩ n kugu je tɩn nɩ.
31 A yɔɔre a lagɩ a lo a ban-lʋm dɩm mʋ n baŋa nɩ,
sɩ n lwarɩ nɩ a wʋʋ tiini kʋ fuli dɩ nmʋ.
A ta wʋ́ kwe‑m a kɩ wʋ-lʋn-nyɩna
balʋ na mɩ dɩ nɔn-gʋra kikiə tɩn jɩŋa nɩ.
32 Nmo wʋ́ ji ne da-kʋra
kalʋ ba na kwe ba dɩ mini wʋnɩ tɩn.
N tɩtɩ tɩʋ kʋm wʋnɩ mʋ
n jana wʋ́ lo tɩga nɩ.
N yɩrɩ dɩm laan maa wʋ́ saarɩ lʋgʋ baŋa nɩ.
Amʋ Baŋa Wɛ mʋ tagɩ kʋntʋ.› »