Yisɩrayɛlɩ dɩdɛɛra bam luə ləŋə
Baŋa-Wɛ ma ta dɩ amʋ DƖ wɩ:
‹Á nu wʋm yɩ tɩta mʋ?
O nan nyɩ dɩ nyoŋ-kana na jɩgɩ yuu
nywəənu tɩm maama tɩtarɩ nɩ tɩn mʋ!
Kʋ maa tigi nyoŋ-pwalɩ sɩm tɩtarɩ nɩ kʋ kɔnɩ kʋ biə.
3 Kʋ ma kʋrɩsɩ kʋ biə bam wʋnɩ dɩdʋa
pa kʋ ji nyoŋ-dʋŋʋ na dana tɩn.
Kʋ dɩ ma lwarɩ nwana jam,
yɩ kʋ puli sɩ kʋ taa di nabiinǝ.
4 Dwi-gɛ tiinə laan ma ni kʋ ŋwa,
yɩ ba daarɩ ba kʋ goŋo kʋ ŋwaanɩ pa kʋ tʋ da.
Ba ma kwe gwəli ba lə kʋ ban nɩ
yɩ ba ja-kʋ ba vu Ezipi tɩʋ.
5 Nyoŋ-kana kam na maanɩ nɩ ka tɩɩna yam wʋ kɩ,
yɩ ka wʋbʋŋa yam dɩ wʋ tʋŋɩ tɩn,
ka daa ma lɩ ka biə bam wʋnɩ dɩdʋa
ka kʋrɩsɩ-kʋ pa kʋ dɩ ji nyoŋo na dana tɩn.
6 Kʋ dɩ na bɩgɩ kʋ ti tɩn, kʋ ma kaagɩ dɩ nywəənu tɩdonnǝ
kʋ beeri nwana.
Kʋ dɩ ma ba kʋ lwarɩ nwana jam
yɩ kʋ puli sɩ kʋ taa di nabiinǝ.
7 Nyoŋo kʋm kʋntʋ yǝni kʋ cɔgɩ nɔɔna bam dam je sɩm mʋ,
yɩ kʋ cɔgɩ ba tɩɩnɩ dɩm dɩ.
Tɩʋ kʋm dɩ kʋ nɔɔna bam na yǝni ba ni kʋ na suuri te tɩn,
fʋʋnɩ mʋ yɔɔrɩ dɩ jaanɩ-ba.
8 Tɩɩnɩ dɩlʋ maama na gilimi da tɩn maa ba
ba kɩ ni daanɩ sɩ ba ja-kʋ.
Ba ma tiŋi cɩgɩrʋ sɩ ba ja-kʋ,
yɩ kʋ tʋ ba goŋo wʋnɩ.
9 Ba laan ma kwe gwəli ba le kʋ ban nɩ,
yɩ ba vaŋɩ-kʋ ba vu ba kɩ luguru cɩfɩʋ wʋnɩ.
Ba ma ja-kʋ ba vu ba pa Babilɔnɩ tɩʋ pɛ wʋm.
Ba ma pɩ nyoŋo kʋm kʋntʋ,
pa kʋ ŋuunim dɩm daa yɩ taa ni Yisɩrayɛlɩ pweeru tɩm yum nɩ.
10 Abam nu wʋm nan ya ta nyɩ dɩ vinyə tiu
kʋlʋ ba na jəri á vinyə kara nɩ tɩn mʋ
pa kʋ wʋ bugə təŋə nɩ.
Kʋ ma ləri biə zanzan, yɩ kʋ nɛ sɩm dɩ wʋra zanzan,
na na daga kʋ jǝgǝ kam nɩ tɩn ŋwaanɩ.
11 Kʋ nɛ sɩm ma fɔgɩ sɩ kɩ dam,
yɩ sɩ maŋɩ sɩ ba kwe-sɩ ba kɩ pɛ nacəgə tɩn.
vinyə tiu kʋm kɩ dɩdwarɩm
sɩ kʋ dwǝni tweeru tɩlʋ maama na gilimi-kʋ tɩn mʋ.
Nɔɔna maama maa nii ba naɩ kʋ na zɩgɩ dəki te tɩn,
kʋ nɛ sɩm na daga tɩn ŋwaanɩ.
12 Ba nan dɛ banɩ baŋa nɩ mʋ ba vaŋɩ-kʋ ba vuuri,
yɩ ba daarɩ ba dʋlɩ-kʋ ba dɩ tɩga nɩ.
Viu ma zaŋɩ wa-puli seeni kʋ dʋlɩ kʋ magɩ-kʋ,
pa kʋ tiu biə bam kʋ.
Kʋ na-dɛɛrʋ tɩm dɩ ma bwəri pa tɩ kwaarɩ
yɩ mim di-tɩ.
13 Ba laan nan jaanɩ vinyə tiu kʋm kʋntʋ
ba vu ba jəri kagʋa yuu nɩ mʋ,
mɛ tɩga kam na kʋgɩ yɩ na tǝrǝ tɩn.
14 Mim ma zɩgɩ kʋ təŋə nɩ dɩ jagɩ dɩ yi
kʋ nɛ sɩm dɩ kʋ biə bam maama kʋ di kulə.
Na-dɛa daa wʋ daarɩ
sɩ ka maŋɩ dɩ pɛ nacəgə sɩ o taa zeerə.›
Ləŋə kantʋ mʋ yɩ luə ləŋə, yɩ ba maŋɩ sɩ ba taa jɩgɩ-ka ba mɔɔnɩ lusəm mʋ.»