Wʋlʋ na kɩ lwarɩm tɩn mʋ maŋɩ sɩ o tɩ
18
Baŋa-Wɛ kwǝrǝ daa ta ma yi amʋ ka wɩ:2 «Bɛɛ mʋ yɩ abam jɩgɩ mɩmaŋɩ dɩntʋ na ve Yisɩrayɛlɩ tɩga kam seeni tɩn yɩ á ta á wɩ:
‹Kwə mʋ kɩ ba wǝǝnu,
pa tɩ zɩm laan gwəri ba biə›?a
3 Nɩ amʋ Yuutu Baŋa-Wɛ na jɩgɩ ŋwɩa te tɩn, kʋ yɩ cɩga mʋ nɩ abam daa bá maŋɩ mɩmaŋɩ dɩm kʋntʋ Yisɩrayɛlɩ laŋa kam nɩ. 4 Nii-na! Amʋ mʋ jɩgɩ nabiinǝ maama dam, nɩ kʋ na yɩ ko, naa o bu dɩ. Kʋ yɩ wʋlʋ na kɩ lwarɩm tɩn mʋ maŋɩ sɩ o tɩ.
5 Nɔɔnʋ wʋlʋ na sɩɩnɩ o yɩ nɔn-ŋʋm cɩga cɩga,
kʋ tu waɩ o kɩ tɩtʋŋ-ŋʋna yɩ o tɔgɩ cwǝŋǝ.
6 O maa ba diini pweeru tɩm yuu sɩ o di jwǝnǝ wʋdiiru,
yɩ o yigə tǝrǝ dɩ Yisɩrayɛlɩ dwi tiinə jwǝnǝ yam.
O ba kɩ tʋlʋ dɩ o donnǝ bam kaana.
O maa ba pəni dɩ kaanɩ wʋlʋ na jɩgɩ o cana zarɩm o kɩ tɩn.
7 O nan ba bɛɛsɩ nɔɔn-nɔɔnʋ.
O na joŋi wǝǝnu tɩlʋ nɔɔnʋ tee nɩ jɩnɩ ŋwaanɩ tɩn
mʋ oó joori o pa kʋ tu.
O maa ba vrɩ nɔɔna.
O ta yǝni o pa wʋdiu yi balʋ kana na jɩgɩ-ba tɩn,
o daarɩ o kwe gwaarʋ o kwǝli yinigə tiinə cavɩɩra.
8 Kʋntʋ tu ba jɩnɩ wǝǝnu o paɩ
yɩ o daŋɩ nyɔɔrɩ zanzan jɩnɩ dɩm baŋa nɩ.
O maa cʋ o tɩtɩ dɩ wo-lwaanʋ kikiə
yɩ o bʋrɩ nɔɔna taanɩ dɩ cɩga.
9 O maa tʋŋɩ o tɔgɩ a zaasɩm dɩm,
yɩ o kɩ o cɩga dɩ a niə yam.
Nɔɔnʋ wʋlʋ na sɩɩnɩ o kɩ kʋntʋ doŋ,
kʋntʋ tu yɩ cɩga tu mʋ,
yɩ oó sɩɩnɩ o taa ŋwɩ.»
Yuutu Baŋa-Wɛ na tagɩ kʋlʋ tɩn mʋ kʋntʋ.
10 «Nɔɔnʋ wʋm kʋntʋ nan na lʋgɩ bu, yɩ bu wʋm na yɩ nɔn-vɩrnʋ na yɩ nɔn-gʋrʋ, yɩ o daarɩ o kɩ wǝǝnu tɩm kʋntʋ doŋ, bu wʋm maŋɩ sɩ o tɩ mʋ, 11 yɩ o ko ya wʋ kɩ tɩ kʋlʋkʋlʋ.
O kaagɩ o di jwǝnǝ wʋdiiru pweeru yuu bimbinə yam nɩ.
O ta maa soe sɩ o taa tigi dɩ o doŋ kaanɩ.
12 O maa jɩgɩ nabwənə dɩ yinigə tiinə o bɛɛsa,
yɩ o kaagɩ o vrɩ nɔɔna.
O yǝni o cəŋi kʋlʋ ba na pɛ‑o ba ma tiŋi daarɩ tɩn.
O yigə maa wʋ jwǝnǝ wʋnɩ,
yɩ o daarɩ o tɔgɩ wo-zɔɔna kikiə.
13 O ta yǝni o jɩnɩ wǝǝnu o pa nɔɔna,
yɩ o beeri nyɔɔrɩ zanzan mʋ sɩ o dwanɩ.
Nɔɔnʋ na kɩ kʋntʋ doŋ, oó joŋi o ŋwɩa o yagɩ mʋ na? Kɔtaa! O bá na o ŋwɩa! Wo-zɔɔna yalʋ maama o na kɩ tɩn ŋwaanɩ, oó tɩ mʋ yɩ kʋʋ́ taa yɩ o tɩtɩ yigə.
14 Kʋ daarɩ, bu wʋm kʋntʋ dɩ na lʋgɩ bu, yɩ o bu wʋm na nɛ lwarɩm yalʋ o ko na jɩgɩ o kɩ tɩn, yɩ o na vɩn sɩ o kɩ nɩ o ko na kɩ wo-zɔɔna yalʋ tɩn, o bá tɩ o ko lwarɩm dɩm ŋwaanɩ.
15 O ba diini pweeru tɩm yuu sɩ o di jwǝnǝ wʋdiiru,
yɩ o yigə tǝrǝ dɩ Yisɩrayɛlɩ dwi tiinə jwǝnǝ yam.
O maa ba kɩ tʋlʋ dɩ o donnǝ kaana.
16 O ba bɛɛsɩ nɔɔn-nɔɔnʋ.
O ba joŋi woŋo nɔɔnʋ tee nɩ
sɩ o laan jɩnɩ jɩnɩ o pa kʋ tu.
O ba vrɩ nɔɔna
O ta yǝni o pa wʋdiu yi balʋ kana na jɩgɩ-ba tɩn,
o daarɩ o kwe gwaarʋ o kwǝli yinigə tiinə cavɩɩra.
17 O maa cʋ o tɩtɩ dɩ tɩtʋŋ-balwaarʋ,
yɩ o ba beeri nyɔɔrɩ zanzan sɩ o dwanɩ jɩna baŋa nɩ.
O maa tʋŋɩ o tɔgɩ a niə yam dɩ a zaasɩm dɩm.
Bu wʋm kʋntʋ bá tɩ o ko lwarɩm ŋwaanɩ. Oó taa ŋwɩ mʋ. 18 O ko nan wʋ́ tɩ o tɩtɩ lwarɩm ŋwaanɩ mʋ, dɩ o na pini nɔɔna, yɩ o vrɩ o cʋrrʋ, yɩ o daarɩ o tʋŋɩ lwarɩm o tɩtɩ nɔɔna tɩtarɩ nɩ te tɩn.
19 Abam nan bwe á wɩ: ‹Bɛɛ mʋ yɩ bu wʋm kʋntʋ bá tɔgɩ o yaarɩ o ko kəm-balwaarʋ dɩm ŋwaanɩ?› Kʋ na yɩ te tɩn, bu wʋm na jɩgɩ cɩga yɩ o kɩ kʋlʋ na maŋɩ tɩn, o daarɩ o tʋŋɩ o tɔgɩ a zaasɩm dɩm tɩn ŋwaanɩ, oó sɩɩnɩ o taa ŋwɩ mʋ. 20 Wʋlʋ na kɩ lwarɩm, kʋntʋ tu mʋ maŋɩ sɩ o tɩ. Nɔɔnʋ ko lwarɩm jɩnɩ bá taa wʋ kʋ tu yuu nɩ. Bu dɩ lwarɩm nan bá taa tɔgɩ o ko. Nɔn-ŋʋna wʋ́ na ba tɩtʋŋ-ŋʋna tɩm nyɔɔrɩ mʋ, sɩ nɔn-balwaarʋ na waarɩm dɩlʋ na maŋɩ dɩ ba tɩtʋŋ-lwaannʋ tɩm tɩn.
21 Nɔn-balɔrɔ wʋlʋ nan na pipiri o yagɩ lwarɩm kǝm, kʋ tu bá tɩ. O nan na tʋŋɩ o tɔgɩ a zaasɩm dɩm maama, yɩ o kɩ o cɩga dɩ kikiə yalʋ na maŋɩ tɩn, kʋ tu wʋ́ taa ŋwɩ mʋ, o daa bá tɩ. 22 Kʋ na yɩ lwarɩm yalʋ o ya na maŋɩ o kɩ tɩn, amʋ bá kɩ tɩntʋ a wʋbʋŋa nɩ. O nan wʋ́ taa ŋwɩ mʋ, o na lɛɛrɩ o kɩ tɩtʋŋ-ŋʋna yalʋ tɩn ŋwaanɩ. 23 Á nan bʋŋɩ nɩ nɔn-balwaarʋ tʋʋnɩ mʋ paɩ amʋ wʋʋ poli na? Kʋ nan na yɩ te tɩn, nɔn-balwaarʋ na pipiri ba yagɩ ba cwe sɩm, sɩ kʋ pa ba na ŋwɩa, kʋntʋ wʋ́ pa a wʋʋ poli. Amʋ Yuutu Baŋa-Wɛ na tagɩ kʋlʋ tɩn mʋ kʋntʋ.b
24 Kʋ daarɩ, nɔn-ŋʋm na yagɩ tɩtʋŋ-ŋʋna kǝm, yɩ o puli sɩ o taa kɩ wo-zɔɔna yalʋ doŋ nɔn-balwaarʋ tɩm na kaagɩ ba kɩ tɩn, á bʋŋɩ nɩ oó taa ŋwɩ mʋ na? Kɔtaa! Amʋ bá kɩ wo-laarʋ tɩlʋ o ya na kɩ tɩn a wʋbʋŋa nɩ. O dɩ maŋɩ sɩ o tɩ mʋ, o na kɩ lwarɩm yalʋ o ma o cɔgɩ amʋ yigə tɩn ŋwaanɩ.
25 Abam maa yǝni á ta á wɩ: ‹Cɩga tǝrǝ Baŋa-Wɛ na tɔgɩ cwe sɩlʋ tɩn wʋnɩ.› Yisɩrayɛlɩ dwi tiinə bam, á pa-na dɩ́ taa tɛ cɩga. Kʋ yɩ amʋ mʋ ba tʋŋɩ kʋ cwǝŋǝ nɩ na? Kʋ daɩ abam za mʋ tʋŋɩ á cɔgɩ na? 26 Nɔn-ŋʋm na pipiri o yagɩ tɩtʋŋ-ŋʋna kǝm, yɩ o lɛɛrɩ o kɩ lwarɩm, o maŋɩ sɩ o tɩ mʋ o lwarɩm kikiə ŋwaanɩ. 27 Nɔn-balɔrɔ nan na yagɩ kǝm-balwaarʋ yalʋ o ya na kɩ tɩn, yɩ o daarɩ o tʋŋɩ cɩga kam dɩ kikiə yalʋ na maŋɩ tɩn, oó joŋi o ŋwɩa o yagɩ mʋ. 28 Kʋlʋ na wʋ́ joŋ-o tɩn yɩ o na jeeli o tɩtʋŋ-lwaannʋ tɩm ni o ja, yɩ o daarɩ o pipiri o yagɩ-tɩ tɩn. O daa bá tɩ, oó taa ŋwɩ mʋ. 29 Yisɩrayɛlɩ dwi tiinə bam nan ta maa ta ba wɩ: ‹Cɩga tǝrǝ Baŋa-Wɛ na tɔgɩ cwe sɩlʋ tɩn wʋnɩ.› Cɩga sɩɩnɩ ka tǝrǝ sɩ wʋnɩ na? Yisɩrayɛlɩ dwi tiinə bam, kʋ daɩ abam za mʋ tʋŋɩ á cɔgɩ na?
30 Yuutu Baŋa-Wɛ na tagɩ te tɩn mʋ tɩntʋ: Kʋntʋ ŋwaanɩ, Yisɩrayɛlɩ dwi tiinə bam, amʋ lagɩ a di abam dɩdʋa dɩdʋa taanɩ mʋ sɩ kʋ maŋɩ dɩ á na kɩ te tɩn. Nan pipiri-na á yagɩ á lwarɩm kikiǝ yam maama, sɩ á yɩ na waarɩm. Kʋ na daɩ kʋntʋ, á lwarɩm dɩm wʋ́ pa á tri á tɩn tɩga nɩ. 31 Dʋlɩ-na lwarɩm yalʋ maama á na yǝni á kɩ tɩn á yagɩ, sɩ á daarɩ á beeri bɩcarɩ-dʋʋrɩ dɩ wʋbʋŋ-dʋʋra á pa á tɩtɩ. Yisɩrayɛlɩ dwi tiinə bam, bɛɛ mʋ yɩ á beeri tʋʋnɩ á pa á tɩtɩ? 32 Nɔɔn-nɔɔnʋ tʋʋnɩ nan ba paɩ a wʋʋ polə. Kʋntʋ ŋwaanɩ, pipiri-na á yagɩ lwarɩm kikiə sɩ á daarɩ á na ŋwɩa. Yuutu Baŋa-Wɛ na tagɩ kʋlʋ tɩn mʋ kʋntʋ.»