Kaloŋ-zwaanʋ tɩle dɩ vinyə tiu mɩmaŋɩ
17
Baŋa-Wɛ kwǝrǝ tu ka yi amʋ ka wɩ:2 «Nabiinu, ve n sɔɔlɩ sɩnswala n brɩ Yisɩrayɛlɩ dwi tiinə bam, sɩ n ta mɩmaŋɩ dɩntʋ n brɩ-ba. 3 Ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Kaloŋ-zɔŋɔ mʋ jaanɩ kʋ vu kʋ cu Liban laŋa kam nɩ. Kʋ dɛɛn tiini kʋ daga, yɩ kʋ vwana yalma. Kʋ kʋrʋ dɩ maa dwara yɩ tɩ ta tiini tɩ lana dɩ nyɩnyʋrʋ dwi dwi. Kʋ laan ma vu kʋ ja Sɛdrɩ tiu na-gɩla kadoŋ na wʋ tiu kʋm yuu nɩ tɩn. 4 Kʋ ma bwəri naga kam yɩ Kʋ daarɩ kʋ ja-ka kʋ vu pipimpiinə tɩʋ mɛ kʋ nɔn-biə bam na kɩ pipiu tɩn kʋ jəri da.
5 Kaloŋ-zɔŋɔ kʋm daa ma kwe tiu bu Yisɩrayɛlɩ tɩga kam nɩ, yɩ kʋ vu kʋ jəri-kʋ tɩ-ywəŋə jǝgǝ kadoŋ nɩ. Jǝgǝ kam wʋ bu-zaŋa təŋə nɩ pa tiu kʋm bɩ lɩla nɩ bugə ni tiua na kɩ te tɩn. 6 Kʋ ma nuŋi pa kʋ ji vinyə tiu na tagɩ kʋ nɛ kʋ lwarɩ je maama. Kʋ nɛ sɩm ma lwarɩ sɩ tɩtɩ sɩ jeeri kaloŋ-zɔŋɔ kʋm na wʋ mɛ tɩn. Kʋ kuru tɩm nan sɔɔnɩ tɩga nɩ mɛ kʋ na zɩgɩ tɩn mʋ. Kʋ na yɩ vinyə tiu kʋntʋ tɩn, kʋ ma ta nɛ zanzan dɩ vɔɔrʋ tigi-tigi.
7 Kaloŋ-zɔŋɔ kʋdoŋ dɩ daa ma ba. Kʋ dɩ maa daga yɩ kʋ jɩgɩ vɔ-dɛɛra dɩ kʋrʋ-liluuru. Nii-na! vinyə tiu kʋm ma pa kʋ kuru tɩm pipiri tɩ jeeri kaloŋ-zɔŋɔ kʋm kʋntʋ. Kʋ nɛ sɩm dɩ ma ta sɩ jeeri-kʋ. Tiu kʋm zɩgɩ tɩga kalʋ kʋ na jəri tɩn nɩ mʋ kʋ kɩ kʋntʋ, kʋ na tɩɩna nɩ kaloŋ-zɔŋɔ kʋm wʋ́ yagɩ na kʋ pa-kʋ tɩn ŋwaanɩ. 8 Kʋ nan maŋɩ kʋ zɩgɩ tɩ-ywəŋə nɩ mʋ, mɛ na na daga da sɩ kʋ wanɩ nɛ kʋ taa taɩ, yɩ Kʋ daarɩ kʋ kɩ biə, sɩ kʋ taa yɔɔrɩ kʋ yɩ tu-ŋʋŋʋ tɩn mʋ.›
9 Nan ta ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: vinyə tiu kʋntʋ wʋ́ bɩ lanyɩranɩ na? Dayigə kaloŋ-zɔŋɔ kʋm bá gɔ-kʋ o yagɩ, yɩ o daarɩ o pʋʋrɩ kʋ biə bam, pa kʋ vɔ-lɛɛrʋ tɩm maama kwaarɩ na? O nan wʋ́ yɔɔrɩ o gɔ tiu kʋm mwalɩ mwalɩ yɩ nɔn-kɔgɔ wʋ zən‑o. 10 Nii-na ba na fɔgɩ ba jəri-kʋ te tɩn. Kʋ nan wʋ́ bɩ lanyɩranɩ na? Viu na zaŋɩ wa-puli seeni kʋ dʋlɩ kʋ magɩ-kʋ, kʋ bá yɔɔrɩ kʋ maŋɩ jǝgǝ kalʋ kʋ na nuŋi da tɩn mʋ kʋ kwaarɩ na?› »
11 Baŋa-Wɛ kwǝrǝ daa ta ma yi-nɩ ka wɩ:
12 «Ta dɩ nɔɔna bantʋ na yɩ zwabani-nyɩna tɩn nɩ: ‹Abam nan wʋ ni mɩmaŋɩ dɩm kʋntʋ kuri na?› Nan ta n brɩ-ba nɩ: ‹Babilɔnɩ tɩʋ pɛ mʋ ve Zeruzalɛm, yɩ o kalɩ tɩʋ kʋm kʋntʋ pɛ dɩ o dɩdɛɛra bam o ja o joori o tɩtɩ tɩʋ Babilɔnɩ. 13 O ma lɩ pa-digə wʋnɩ nɔɔnʋ dɩdʋa, pa o dɩ kʋ tu kɩ ni-mɔrɔ daanɩ. O ma pa kʋ tu du durə nɩ: oó taa jɩgɩ cɩga o pa‑o. O nan ya kalɩ tɩʋ kʋm nɔn-yum tɩm mʋ o ja o viiri, 14 sɩ kʋ pa tɩʋ kʋm taa wʋ o dam kuri nɩ, sɩ ba daa yɩ wanɩ ba zǝŋi ba tɩtɩ wɛɛnɩ. O dɛɛn pɛ ba dam zɩgɩ ni-mɔrɔ dɩlʋ o na kɩ dɩ ba tɩn wʋnɩ. 15 O na lɩ Zuda tɩʋ pɛ wʋlʋ tɩn nan nuŋi ba ni-mɔrɔ dɩm kwaga nɩ mʋ. O ma tʋŋɩ nɔɔna Ezipi tɩʋ nɩ sɩ ba ja jar-kərə dɩ siseŋ-nɔɔna zanzan ba ba ba pa‑o. Nɔɔnʋ wʋntʋ nan wʋ́ wanɩ o lu Babilɔnɩ tɩʋ pɛ wʋm jɩŋa nɩ na? O na lɔgɩ ba ni-gonim dɩm kwaga nɩ tɩn, oó joŋi o tɩtɩ o yagɩ na?b
16 Nɩ amʋ Yuutu Baŋa-Wɛ na jɩgɩ ŋwɩa te tɩn, kʋ yɩ cɩga mʋ nɩ kʋ tu lagɩ o tɩ Babilɔnɩ tɩʋ nɩ mʋ, sɩ o bá lu. Kʋ yɩ Babilɔnɩ tɩʋ pɛ mʋ tiŋ‑o paarɩ, yɩ o nan cɔgɩ durə dɩlʋ o na dugi tɩn pa o nuŋi ni-mɔrɔ dɩlʋ ba na kɩ daanɩ tɩn kwaga nɩ. Babilɔnɩ tɩʋ kʋm wʋnɩ mʋ o lagɩ o tɩ! 17 Ezipi tɩʋ pa-farʋ wʋm dɩ o jar-kərə bam sɩɩnɩ ba yɩ nɔn-babɛ. Ba nan bá wanɩ ba joŋi Zuda pɛ wʋm ba yagɩ, dɩ ba kɔgɔ kʋm na maŋɩ kʋ daga te tɩn dɩ. Babilɔnɩ jar-kərə bam wʋ́ ba ba kaagɩ Zeruzalɛm tɩʋ kʋm ba pu yɩ ba daarɩ ba tiŋi kandwa, dɩ tɩɩrʋ ba ja ba din tɩʋ kʋm kəbrə kam yuu, sɩ ba wanɩ ba gʋ tɩʋ kʋm nɔn-biə zanzan. 18 Zuda pɛ wʋm vɩn o durə dɩm dɩ o na lɔgɩ ba ni-gonim dɩm kwaga nɩ te tɩn mʋ. Cɩga ŋwaanɩ tɩn, o ya kɩ kampwələ mʋ, yɩ o ta kɩ wǝǝnu tɩm kʋntʋ maama o ma o cɔgɩ-ka. Kʋntʋ ŋwaanɩ, o brɩ o bá lu.
19 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Nɩ amʋ na jɩgɩ ŋwɩa te tɩn, kʋ yɩ cɩga mʋ nɩ a lagɩ a waar‑o mʋ. Kʋ yɩ amʋ yɩrɩ ŋwaanɩ mʋ o dugi durə yɩ o ta vɩ-dɩ. O na cɔgɩ ni-gonim dɩlʋ tɩn dɩ maa yɩ amʋ nyɩm. O kənə yam kʋntʋ jɩnɩ wʋ́ taa wʋ o yuu nɩ. 20 A lagɩ a cɩ cɩkʋ mʋ sɩ kʋ ja-o. A laan wʋ́ ja-o a vu Babilɔnɩ, yɩ a di o taanɩ daanɩ, o na nuŋi a kwaga nɩ tɩn ŋwaanɩ. 21 O jar-kərə babɛ sɩm maama wʋ́ tɩ najara wʋnɩ. A ta wʋ́ jagɩ balʋ na wʋ́ daarɩ tɩn a yagɩ tɩga baŋa je maama nɩ. Kʋntʋ baŋa nɩ mʋ á wʋ́ lwarɩ nɩ kʋ yɩ amʋ Baŋa-Wɛ mʋ pɛ kwǝrǝ kam kʋntʋ.
22 Yuutu Baŋa-Wɛ na tagɩ te tɩn mʋ tɩntʋ: Amʋ tɩtɩ mʋ lagɩ a ja Sɛdrɩ tiu dɩdɔrɔ kʋdoŋ na-gɩla, yɩ a daarɩ a bwəri na-bʋbɔla dɩdʋa na wʋ kʋ yuu nɩ tɩn. Amʋ tɩtɩ laan wʋ́ ja-ka á vu a jəri piu kʋdoŋ yuu nɩ wɛ wɛ. 23 Yisɩrayɛlɩ pweeru tɩm yuu nɩ mʋ a lagɩ a jəri-ka. Tiu kʋm wʋ́ bɩ lanyɩranɩ yɩ kʋ ta nɛ, Kʋ daarɩ kʋ kɩ biə. Kʋ maa wʋ́ ji Sɛdrɩ tu-laa. Zunə dwi dwi wʋ́ ba da ba sɔ ba pwǝru kʋ nɛ sɩm nɩ, yɩ ba sin kʋ woro kʋm nɩ. 24 Tweeru tɩm maama na wʋ gaa wʋnɩ tɩn wʋ́ lwarɩ nɩ amʋ mʋ yɩ Baŋa-Wɛ. A maa waɩ a pa tu-dɩdwaarʋ tʋɩ, yɩ a daarɩ a pa tweeru tɩlʋ na wʋ tɩga nɩ tɩn zaŋɩ wɛɛnɩ. A ta waɩ a pa tweeru tɩlʋ na jɩgɩ vɔ-lɛɛrʋ tɩn kwaara, yɩ a daarɩ a pa dɩlʋ na kwaarɩ tɩn yɩra zuri.
Amʋ Baŋa-Wɛ mʋ tagɩ kʋntʋ. A nan wʋ́ sɩɩnɩ a kɩ kʋlʋ a na tagɩ tɩn.› »