Yisɩrayɛlɩ nakwa bam na kaanɩ jwǝnǝ te tɩn
14
Dɛ dɩdwɩ mʋ Yisɩrayɛlɩ tɩʋ nakwa badonnǝ tu a te ba jǝni a yigə nɩ, sɩ ba bwe ba lwarɩ Wɛ wʋbʋŋa na yɩ te tɩn. 2 Baŋa-Wɛ kwǝrǝ ma yi amʋ ka wɩ:3 «Nabiinu, nɔɔna bantʋ kwe jwǝnǝ kaanɩm mʋ ba fǝri ba bɩcara nɩ, yɩ ba puuri wo-yɔɔrʋ tɩlʋ na pa ba cɔgɩ tɩn ba ja. Bɛŋwaanɩ mʋ a nan wʋ́ pa ba lwarɩ a wʋbʋŋa na yɩ te tɩn? 4 Nan ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Yisɩrayɛlɩ tu wʋlʋ maama na kwe jwǝnǝ kaanɩm o fǝri o bɩcarɩ nɩ, yɩ o puuri wo-yɔɔrʋ tɩlʋ na paɩ o cɔgɩ tɩn o ja, yɩ o na ve o bwe Wɛ nijoŋnu sɩ o nii, amʋ Baŋa-Wɛ tɩtɩ mʋ wʋ́ ləri kʋ tu sɩ kʋ maŋɩ dɩ o jwǝnǝ kaanɩm na daga te tɩn. 5 A lagɩ a kɩ kʋntʋ mʋ sɩ a pipiri Yisɩrayɛlɩ tiinə bam wʋbʋŋa sɩ ya joori ya tɔgɩ-nɩ, ba na mɛ ba kwaga ba ya amʋ yɩ ba daarɩ ba zuli jwǝnǝ tɩn ŋwaanɩ.›
6 Nan ta dɩ Yisɩrayɛlɩ dwi tiinə bam n wɩ: Yuutu Baŋa-Wɛ na tagɩ te tɩn mʋ tɩntʋ: ‹Lǝni-na á wʋbʋŋa! Yagɩ-na jwǝnǝ kaanɩm, sɩ á daarɩ á vɩn tɩtʋŋ-zɔɔna yalʋ á na jɩgɩ á kɩ tɩn.
7 Cɩga ŋwaanɩ, kʋ na yɩ Yisɩrayɛlɩ tu, naa vəru wʋlʋ maama na zʋʋrɩ Yisɩrayɛlɩ tɩʋ kʋm nɩ tɩn, kʋ tu na vɩ-nɩ yɩ o daarɩ o kwe jwǝnǝ kaanɩm o fǝri o bɩcarɩ nɩ, yɩ o puuri wo-yɔɔrʋ tɩlʋ na pa o cɔgɩ tɩn o ja, yɩ o na ve o bwe Wɛ nijoŋnu sɩ o nii, amʋ Baŋa-Wɛ tɩtɩ mʋ wʋ́ ləri kʋ tu. 8 Amʋ wʋ́ dwəni dɩ kʋ tu pa o ji maana o pa a nɔɔna bam sɩ ba yɩ kɩ kʋntʋ doŋ. A ta wʋ́ lɩ-o sɩ o daa yɩ wǝli a nɔɔna bam wʋnɩ. Abam laan maa wʋ́ lwarɩ nɩ amʋ mʋ yɩ Baŋa-Wɛ.
9 Kʋ ta na yɩ Wɛ nijoŋu wʋm tɩtɩ, o na cɔgɩ pa o ŋɔɔnɩ taanɩ dɩ amʋ yɩrɩ o pa nɔɔnʋ wʋm, kʋ yɩ amʋ Baŋa-Wɛ mʋ gan‑o sɩ o kɩ kʋntʋ. A nan wʋ́ dwəni dɩ kʋ tu dɩ, yɩ a cɔg-o mʋ sɩ o daa yɩ wǝli a nɔɔna Yisɩrayɛlɩ tiinə bam wʋnɩ. 10 Kʋ na yɩ Wɛ nijoŋu wʋm dɩ wʋlʋ na ve o te sɩ o bwe o nii tɩn, kʋ yɩ bɩdwɩ mʋ. Bantʋ maama lwarɩm wʋ́ taa wʋ ba yuu nɩ mʋ. 11 Kʋntʋ mʋ wʋ́ cɩ Yisɩrayɛlɩ dwi tiinə bam sɩ ba daa yɩ ywəri a cwǝŋǝ kam nɩ. Ba daa bá taa digimi ba tɩtɩ ba lwarɩm baŋa nɩ. Ba nan wʋ́ taa yɩ a nɔɔna, sɩ amʋ dɩ taa yɩ ba Tu Wɛ dɩm. Yuutu Baŋa-Wɛ mʋ tagɩ kʋntʋ.› »
Baŋa-Wɛ cam dɩm taanɩ
12 Baŋa-Wɛ kwǝrǝ daa ta ma yi amʋ ka wɩ:
13 «Nabiinu, nɩ tɩʋ kʋlʋ nɔɔna na kɩ lwarɩm ba cɔgɩ amʋ yigə dɩ ba na ba jɩgɩ cɩga ba pa-nɩ te tɩn, pa a dʋlɩ-ba ja-guli, ba bá wanɩ ba tɩtɩ ba joŋi. A na pɛ ba tɩʋ kʋm ga wʋdiu mʋ sɩ kana laan taa jɩgɩ nabiinǝ dɩ vara maama ka gʋɩ, 14 Nowe, dɩ Daniyɛlɩ, dɩ Zobi mʋ ya na maŋɩ ba zʋʋrɩ tɩʋ kʋm kʋntʋ wʋnɩ dɩ, ba nɔn-ŋʋnnɩ dɩm wʋ́ joŋi bantʋ tɩtɩ yɩranɩ mʋ, sɩ nɔn-gaa daa bá lu.a Yuutu Baŋa-Wɛ mʋ tagɩ kʋntʋ.
15 A nan daa na pɛ ga-vara mʋ cu ba puri tɩʋ kʋm wʋnɩ ba jɩgɩ kʋ nɔɔna bam ba gʋɩ yɔɔ, pa kʋ ji di-dwəənu yɩranɩ yɩ nɔɔna ba beeri kʋ wʋnɩ vara bam ŋwaanɩ, 16 nɔɔna batɔ bam kʋntʋ na maŋɩ ba wʋ tɩʋ kʋm wʋnɩ, kʋ ta bá joŋi ba biə. Ba batɔ bam yɩranɩ mʋ wʋ́ lu, sɩ kʋ na yɩ tɩʋ kʋm maama, kʋʋ́ cɔgɩ mʋ. Nɩ amʋ Yuutu Baŋa-Wɛ na jɩgɩ ŋwɩa te tɩn, kʋʋ́ taa yɩ kʋntʋ mʋ.
17 Kʋ nan na yɩ sɩ a pɛ cwǝŋǝ sɩ najara mʋ ba tɩʋ kʋm kʋntʋ baŋa, yɩ a wɩ: ‹Sʋ-lɔŋɔ maŋɩ sɩ kʋ cɔgɩ tɩʋ kʋm maama,› pa nabiinǝ dɩ vara maama tɩ, 18 nɔɔna batɔ bam kʋntʋ na maŋɩ ba wʋ tɩʋ kʋm wʋnɩ, kʋ ta bá joŋi ba biə. Ba batɔ bam yɩranɩ mʋ wʋ́ lu. Nɩ amʋ Yuutu Baŋa-Wɛ na jɩgɩ ŋwɩa te tɩn, kʋʋ́ taa yɩ kʋntʋ mʋ.
19 A banɩ nan na tiini dɩ zaŋɩ dɩ tɩʋ kʋm kʋntʋ pa a tʋŋɩ yawɩ-cɛɛrʋ kʋ wʋnɩ, pa nabiinǝ dɩ vara maama yɔɔrɩ ba tʋ yɔɔ, 20 Nowe, dɩ Daniyɛlɩ, dɩ Zobi mʋ na maŋɩ ba wʋ tɩʋ kʋm wʋnɩ, kʋ ta bá joŋi ba biə. Ba batɔ bam yɩranɩ mʋ wʋ́ joŋi ba ŋwɩa ba nɔn-ŋʋnnɩ dɩm ŋwaanɩ. Nɩ amʋ Yuutu Baŋa-Wɛ na jɩgɩ ŋwɩa te tɩn, kʋʋ́ sɩɩnɩ kʋ taa yɩ kʋntʋ mʋ.
21 Yuutu Baŋa-Wɛ na tagɩ te tɩn mʋ tɩntʋ: Amʋ nan na lagɩ a waarɩ Zeruzalɛm tɩʋ kʋm, kʋʋ́ dwǝni tɩntʋ mʋ. A lagɩ a pa lɛɛrʋ dwiə yana mʋ yi-ba. Tɩntʋ yɩ tigurə, dɩ kana, dɩ ga-vara daanɩm, dɩ yawɩ-cɛɛrʋ, sɩ tɩ cɔgɩ nɔɔna bam dɩ vara maama. 22 Dɩ kʋntʋ maama dɩ, tɩʋ kʋm nɔɔna fɩɩn wʋ́ lu lɛɛrʋ tɩm wʋnɩ. Ba laan wʋ́ ja á cʋrrʋ tɩm kʋntʋ ba ba á te yo seeni. Abam nan na nɛ-ba, yɩ á lwarɩ ba tɩtʋŋ-balwaarʋ tɩm na sɩɩnɩ tɩ yɩ te tɩn, á wʋ́ na nɩ lɛɛrʋ tɩlʋ maama a na jaanɩ a ba Zeruzalɛm baŋa nɩ tɩn tɔgɩ cwǝŋǝ mʋ. Kʋntʋ baŋa nɩ, abam banɩ maa wʋ́ zuri. 23 Cɩga tɩn, abam na nɛ ba kikiə yam na yɩ te tɩn, á wʋ́ lwarɩ nɩ amʋ jɩgɩ cɩga dɩ kʋlʋ maama a na tʋŋɩ ba yɩra nɩ tɩn. Yuutu Baŋa-Wɛ mʋ tagɩ kʋntʋ.»