Waarɩm wʋ́ ba vwan nijoŋnə bam baŋa
13
Baŋa-Wɛ kwǝrǝ daa tu ka yi amʋ ka wɩ:2 «Nabiinu, ŋɔɔnɩ yiyiu-ŋwɛ n cɔgɩ Yisɩrayɛlɩ tiinə sampwəri sɩlʋ zɩm na ŋɔɔnɩ tɩn. Ta dɩ balʋ na jɩgɩ ba tɩtɩ wʋbʋŋa ba maɩ ba ŋɔɔnɩ yiyiu-ŋwɛ tɩn nɩ: ‹Cəgi-na Baŋa-Wɛ kwǝrǝ kam. 3 Yuutu Baŋa-Wɛ na tagɩ te tɩn mʋ tɩntʋ: Kʋ na yɩ nijoŋnə balʋ na tɔgɩ ba tɩtɩ wʋbʋŋa ŋwaanɩ ba ŋɔɔnɩ jwərim yɩ ba wʋ nɛ kʋlʋkʋlʋ tɩn, lɛɛrʋ wʋ ba yuu nɩ.a 4 Yisɩrayɛlɩ tiinə bam, á nijoŋnǝ bam nyɩ dɩ ga-kakuri na kaagɩ di-dwəənu baŋa nɩ ba beeri tɩn mʋ. 5 Ba wʋ kwaanɩ ba kwǝni lulooru tɩlʋ na wʋ tɩʋ kʋm kəbrə kam yɩra nɩ tɩn sɩ ba fɔgɩ ba kwɛ-ka ba pa Yisɩrayɛlɩ dwi tiinə bam, sɩ ka taa dana yɩ ka cʋ-ba Baŋa-Wɛ ban-zɔŋɔ dɛ dɩm nɩ. 6 Ba vɩɩra yam ganɩ nɔɔna mʋ, yɩ ba yi-nɛɛrɩ taana yɩ vwan yɩranɩ. Ba kaagɩ ba ta nɩ amʋ Baŋa-Wɛ mʋ tʋŋɩ-ba dɩ a kwǝrǝ, yɩ a wʋ tʋŋɩ-ba. Ba maa bʋŋɩ nɩ a wʋ́ pa ba taanɩ dɩm sɩɩnɩ kʋ kɩ. 7 Vɩɩra yalʋ á na nɛ tɩn daɩ wo-yɔɔrʋ mʋ na? Yi-nɛɛrɩ dɩlʋ maama á na tagɩ dɩ taanɩ tɩn daɩ vwan na? Á nan yǝni á ta nɩ: amʋ Baŋa-Wɛ mʋ tʋŋɩ abam dɩ a kwǝrǝ, yɩ a wʋ tagɩ kʋlʋkʋlʋ dɩ abam.
8 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Bɩtar-yɔɔrʋ tɩlʋ á na jɩgɩ á ta tɩn, dɩ á vɩɩra yalʋ na yɩ vwan tɩn ŋwaanɩ, amʋ jɩgɩ dɩdaanɩ abam mʋ. 9 Kʋ na yɩ Wɛ nijoŋnə balʋ maama vɩɩra na yɩ wo-yɔɔrʋ yɩ ba yi-nɛɛrɩ taana yam yɩ vwan tɩn, a lagɩ a dʋlɩ-ba ja-guli mʋ. Ba daa bá tɔgɩ ba wǝli a nɔɔna kɔ-fɔrɔ kʋm wʋnɩ, naa ba pʋpʋnɩ ba yɩra Yisɩrayɛlɩ dwi dɩm natɔga twannʋ tɩm wʋnɩ. Ba nan bá joori ba zʋ ba tɩtɩ tɩʋ kʋm. Kʋntʋ tɩn, á wʋ́ ba á lwarɩ nɩ amʋ mʋ yɩ Yuutu Baŋa-Wɛ.
10 Nijoŋnǝ bam kʋntʋ paɩ a nɔɔna bam cɔgɩ mʋ. Ba kaagɩ ba ta wɩ: «Yazurə taa wʋ á tee nɩ», yɩ yazurə tǝrǝ sɩ ya yi a nɔɔna bam. Kʋ nyɩ dɩ nɔɔna na lɔgɩ kabri-mɩmɩna te, yɩ nijoŋnǝ bam kʋntʋ laan kwe kʋtaalɩ ba taagɩ ka maama tɩn mʋ. 11 Nan ta dɩ balʋ na fɔgɩ kəbrə kam kʋntʋ tɩn nɩ ka lagɩ ka tʋ mʋ. A lagɩ a pa dʋ-fara mʋ magɩ-ka, sɩ dʋ-kambana dɩ tʋ ka yɩra nɩ, yɩ vu-dɩʋ dɩ yigi-ka dɩ dam. 12 Ka laan maa wʋ́ tʋ bʋrʋ-tʋ-tʋ, sɩ nɔɔna bwe abam wɩ: «Kʋtaalɩ dɩm á na mɛ á taagɩ kabri kam tɩn laan bɛ?»
13 Yuutu Baŋa-Wɛ na tagɩ te tɩn mʋ tɩntʋ: A lagɩ a tɔgɩ a ban-lʋm dɩm ŋwaanɩ mʋ a tʋŋɩ vu-dɩʋ, dɩ dʋ-fara, dɩ dʋ-kambana sɩ tɩntʋ ba tɩ cɔgɩ kəbrə kam. 14 A wʋ́ yigi kəbrə kalʋ á na kwe kʋtaalɩ á taagɩ ka maama tɩn mʋ a dɩ tɩga nɩ yɩ a daarɩ a guri-ka a ja tɩga. Ka nan wʋ́ tʋ ka panɩ abam, pa abam tɩtɩ dɩ cɔgɩ. Kʋntʋ tɩn á wʋ́ ba á lwarɩ nɩ amʋ mʋ yɩ Baŋa-Wɛ. 15 Amʋ banɩ wʋ́ tiini dɩ zaŋɩ dɩ kəbrə kam, dɩ nijoŋnə balʋ na jɩgɩ kʋtaalɩ ba taagɩ-ka tɩn. A laan maa wʋ́ ta dɩ abam nɩ: «Kabri kam dɩ balʋ na jɩgɩ-ka ba taagɩ tɩn maama je. 16 Bantʋ maa yɩ balʋ ya na kaagɩ ba ŋɔɔnɩ Zeruzalɛm tɩʋ kʋm taanɩ yɩ ba brɩ nɩ yazurə wʋ́ taa wʋ kʋ baŋa nɩ, yɩ yazurə nan tǝrǝ tɩn.» Yuutu Baŋa-Wɛ mʋ tagɩ kʋntʋ!›
17 Nabiinu, ta ŋɔɔnɩ n cɔgɩ kaana balʋ na yǝni ba jɩgɩ ba tɩtɩ wʋbʋŋa ba maɩ ba ŋɔɔnɩ tɩn. Ŋɔɔnɩ yiyiu-ŋwɛ n cɔgɩ-ba, 18 sɩ n ta nɩ: ‹Yuutu Baŋa-Wɛ na tagɩ te tɩn mʋ tɩntʋ: Kʋ na yɩ kaana balʋ na kɩ liri ba paɩ nɔɔna sɩ ba vɔ ba jɩn nɩ, yɩ ba ta sɔ yukwalɩ dwi maama ba pa-ba sɩ ba vɔ ba yum nɩ tɩn, lɛɛrʋ wʋ ba yuu nɩ. Á kɩ kʋntʋ mʋ sɩ á ma liri sɩm á vɔ nɔɔna bam á pa á tɩtɩ. Abam nan bʋŋɩ nɩ á wʋ́ vɔ a nɔɔna bam yɩ á daarɩ á joŋi á tɩtɩ ŋwɩa mʋ na? 19 Kwǝrǝ yalʋ á na yǝni á joŋi amʋ nɔɔna bam tee nɩ tɩn mʋ yɩ mɩna dɩ dɩpɛ fɩnfɩɩn, yɩ kʋntʋ ŋwaanɩ á jɩgɩ-nɩ á lwɛa ba yigə nɩ. Kʋntʋ tɩn á yǝni á fɔ vwan á ganɩ balʋ dɩ na soe sɩ ba taa cəgi vwan tɩn mʋ. Abam laan ma da kʋ ŋwaanɩ á jɩgɩ balʋ na wʋ maŋɩ sɩ ba tɩ tɩn á gʋɩ, yɩ á ta paɩ balʋ na maŋɩ dɩ tʋʋnɩ tɩn kaagɩ ba veǝ.
20 Yuutu Baŋa-Wɛ nan na tagɩ te tɩn mʋ tɩntʋ: Amʋ culi liri sɩlʋ á na jɩgɩ á ma á vɔ nɔɔna sɩ ba taa tʋɩ ba paɩ abam nɩ zunə doŋ tɩn. A nan wʋ́ bwǝli liri sɩm á jɩn sɩm nɩ, pa nɔɔna balʋ á na vɔgɩ á pa á tɩtɩ tɩn viiri zaanɩ. 21 Kʋ ta na yɩ á yukwalɩ sɩm, a lagɩ a kaarɩ-sɩ a yagɩ, sɩ a joŋi a nɔɔna bam á jɩŋa nɩ a yagɩ mʋ. Ba daa bá taa wʋ abam dam kuri nɩ. Abam dɩ laan maa wʋ́ lwarɩ nɩ amʋ mʋ yɩ Baŋa-Wɛ. 22 Abam pɛ nɔn-ŋʋna wʋrʋ ga baarɩ dɩ á vwan yalʋ á na jɩgɩ á ganɩ-ba tɩn, yɩ amʋ ya ba beeri ba wʋ-cɔgɔ. Á ma daarɩ á kɩ dam nɔn-balwaarʋ kuri nɩ, sɩ ba yɩ yagɩ ba kǝm-balwaarʋ yam yɩ ba daarɩ ba joŋi ba ŋwɩa. 23 Kʋntʋ ŋwaanɩ abam daa bá taá naɩ vɩɩra na yɩ wo-yɔɔrʋ tɩn naa á tɔgɩ yi-nɛɛrɩ kikiə. A maa wʋ́ joŋi a nɔɔna bam a yagɩ á jɩŋa nɩ. Kʋntʋ tɩn á laan wʋ́ lwarɩ nɩ amʋ mʋ yɩ Baŋa-Wɛ.› »