Sa-tɩʋ vəŋə taanɩ
12
Baŋa-Wɛ kwǝrǝ daa ma yi amʋ ka wɩ:2 «Nabiinu, nmʋ zʋʋrɩ zwabani-nyɩna tɩtarɩ nɩ mʋ. Ba sɩɩnɩ ba jɩgɩ yiǝ, ya nan ba naɩ. Ba ta jɩgɩ zwa, ba nan ba ni taanɩ kuri. Bɛŋwaanɩ, ba yɔɔrɩ ba yɩ zwabani-nyɩna mʋ.
3 Kʋntʋ ŋwaanɩ, kwalɩmɩ n zɩla n kɩ daanɩ nɩ wʋlʋ ba na fɩn sɩ o viiri o daarɩ o tɩʋ tɩn. Laan zaŋɩ wɩa tɩtarɩ nɩ sɩ n nuŋi n daarɩ n na zʋʋrɩ mɛ tɩn n vu jǝgǝ kadoŋ, sɩ nɔɔna bam na n na kɩ te tɩn. Baá wanɩ ba ni n kikiə yam kuri, dɩ ba na yɩ zwabani-nyɩna te tɩn dɩ. 4 Lu n zɩla wɩa tɩtarɩ nɩ n ja n nuŋi n digə nɩ, yɩ nɔɔna bam maama zɩgɩ ba niə. Dɩdaan-ni nɩ laan nuŋi pooni n kɩ nɩ wʋlʋ na lagɩ o vu sa-tɩʋ tɩn na wʋ́ kɩ te tɩn. 5 Ba ta wʋ́ taa nii‑m mʋ, yɩ n vu n lu bɔɔnɩ n sɔŋɔ kʋm kəbrə yɩra nɩ sɩ n tɔgɩ dɩ wʋnɩ n nuŋi dɩ n zɩla yam. 6 Wa-zʋʋrɩ maŋa nɩ sɩ n kwe n zɩla yam n daŋɩ n bakalɩ baŋa nɩ n kɛ, yɩ ba zɩgɩ ba nii‑m. Nmʋ nan maŋɩ sɩ n kwǝli n yibiyə mʋ sɩ n yɩ ta n nii n naɩ tɩga kam. Amʋ kɩ nmʋ sɩ n ta yɩ maana woŋo mʋ, n paɩ Israyɛlɩ dwi tiinə bam.»
7 A ma sɩɩnɩ a kɩ nɩ Baŋa-Wɛ na pɛ-nɩ ni sɩ a kɩ te tɩn. Wɩa nɩ a lugi a zɩla mʋ a ja a nuŋi digə nɩ, nɩ wʋlʋ na lagɩ o viiri o daarɩ o tɩʋ tɩn. Wa-zʋʋrɩ maŋa nɩ a ma lu bɔɔnɩ dɩ a jɩa kəbrə kam yɩra nɩ. A ma tɔgɩ da a nuŋi dɩ a zɩla, ya na daŋɩ a bakalɩ baŋa nɩ, yɩ nɔɔna bam zɩgɩ ba niə.
8 Tɩga na pʋʋrɩ tɩtɩɩtɩ tɩn, mʋ Baŋa-Wɛ kwǝrǝ daa tu ka yi amʋ ka wɩ:
9 «Nabiinu, Yisɩrayɛlɩ dwi zwabani-nyɩna bantʋ wʋ bwe‑m n kǝm dɩm kuri na? 10 Nan ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Kwǝrǝ kantʋ mʋ maŋɩ sɩ ka pa Zeruzalɛm tɩʋ dɩdɛɛrʋ wʋm, dɩ Yisɩrayɛlɩ dwi tiinə balʋ maama na zʋʋrɩ kʋ wʋnɩ tɩn.› 11 Ta n brɩ-ba nɩ: ‹Amʋ kǝm dɩm yɩ maana mʋ dɩ paɩ abam. A na kɩ te maama tɩn mʋ wʋ́ ba abam baŋa.›
Ba dʋna wʋ́ di-ba najara wʋnɩ yɩ ba daarɩ ba kalɩ-ba ba ja vu sa-tɩʋ yigə yigə. 12 Wʋlʋ na yɩ dɩdɛɛrʋ ba wʋnɩ tɩn wʋ́ lu o zɩla o buki o bakalɩ baŋa nɩ mʋ wa-zʋʋrɩ maŋa nɩ. O maa wʋ́ tɔgɩ bɔɔnɩ dɩlʋ ba na lugi kəbrə yɩra nɩ ba pa‑o tɩn o viiri. O na maa veǝ, oó kwǝli o yibiyə mʋ sɩ o yɩ taa nii o naɩ tɩga kam.a 13 Amʋ Baŋa-Wɛ nan wʋ́ cɩ a cɩkʋ sɩ kʋ ja-o. A maa wʋ́ pa ba kal‑o ba vu Babilɔnɩ tiinə tɩʋ. Oó tɩ je sɩm kʋntʋ nɩ. O yi nan bá na tɩʋ kʋm na yɩ te tɩn. 14 Kʋ ta na yɩ o kwaga nɔɔna bam dɩ o jar-kərə bam, a lagɩ a pa ba jagɩ je maama nɩ saɩ mʋ, sɩ a laan kwe a sʋ-lɔŋɔ a ma a zəli-ba.
15 A na jagɩ-ba pa ba vu yigə yigə sɩ a yagɩ-ba lʋgʋ baŋa tɩɩnɩ dɩm je maama wʋnɩ, mʋ ba laan wʋ́ lwarɩ nɩ amʋ mʋ yɩ Baŋa-Wɛ. 16 A nan wʋ́ yagɩ ba fɩɩn sɩ ba lu najara yam wʋnɩ, dɩ kana, dɩ yawɩɩrʋ wʋnɩ. Kʋntʋ tɩn, ba na yi sa-tɩɩnɩ dɩlʋ maama ba zʋʋrɩ dɩ wʋnɩ, ba laan wʋ́ maanɩ ba lwarɩ ba wo-zɔɔna kikiə yam maama ni nɩ. Ba maa wʋ́ wanɩ ba lwarɩ nɩ amʋ mʋ yɩ Baŋa-Wɛ.»
17 Baŋa-Wɛ kwǝrǝ daa ma yi amʋ ka wɩ:
18 «Nabiinu, n na yǝni n di wʋdiu, pa n yɩra taa saɩ. N ta na nyɔ na, sɩ n brɩ nɩ liǝ dɩ fʋʋnɩ mʋ jɩgɩ-m. 19 Ta dɩ tɩʋ kʋntʋ nɔɔna bam n wɩ: ‹Yuutu Baŋa-Wɛ na tagɩ te sɩ kʋ vu balʋ na zʋʋrɩ Zeruzalɛm nɩ, dɩ Yisɩrayɛlɩ laŋa kam maama nɩ tɩn mʋ tɩntʋ: Baá taa di ba wʋdiiru dɩ liǝ mʋ, yɩ ba ta nyɔ ba na dɩ wʋ-cɔgɔ. Bɛŋwaanɩ, ba tɩʋ kʋm lagɩ kʋ cɔgɩ mʋ sɩ kʋlʋkʋlʋ daa yɩ daarɩ. Kʋ nan yɩ ba nakɔɔrɩ kikiə yam ŋwaanɩ mʋ kʋntʋ wʋ́ kɩ. 20 Tɩɩnɩ dɩlʋ nɔɔna na zʋʋrɩ dɩ wʋnɩ lele tɩn wʋ́ ji di-dwəənu mʋ, sɩ tɩga kam maama dɩ cɔgɩ. Abam laan maa wʋ́ lwarɩ nɩ amʋ mʋ yɩ Baŋa-Wɛ.› »
21 Baŋa-Wɛ kwǝrǝ daa ta ma yi amʋ ka wɩ:
22 «Nabiinu, Yisɩrayɛlɩ tiinə bam bʋŋɩ bɛɛ mʋ yɩ ba ta maana dɩntʋ ba wɩ: ‹Maŋa zanzan maŋɩ ka kɛ, yɩ Wɛ na pɛ vɩɩra yalʋ maama tɩn jigi kafɛ›? 23 Nan ta dɩ ba wɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a pa Yisɩrayɛlɩ tiinə bam yagɩ maana dɩm kʋntʋ taanɩ mʋ.› Laan nan brɩ-ba nɩ: ‹Maŋa yiǝ sɩ vɩɩra maama laan sɩɩnɩ kʋ kɩ. 24 Yisɩrayɛlɩ dwi tiinə bam daa bá taa ni vɩɩra yalʋ na yɩ vwan tɩn, dɩ yi-nɛɛrɩ taana yalʋ na sʋgɩ-ba tɩn. 25 Amʋ Baŋa-Wɛ nan wʋ́ yɔɔrɩ a ta a na lagɩ te tɩn mʋ, yɩ kʋ bá daanɩ sɩ a taanɩ dɩm sɩɩnɩ kʋ kɩ. Abam zwabani-nyɩna bam, taá ye-na nɩ: á ta na ŋwɩ: amʋ na wʋ́ ta woŋo kʋlʋ maama tɩn wʋ́ sɩɩnɩ kʋ kɩ. Yuutu Baŋa-Wɛ mʋ tagɩ kʋntʋ.› »
26 Baŋa-Wɛ kwǝrǝ daa ma yi amʋ ka wɩ:
27 «Nabiinu, Yisɩrayɛlɩ dwi tiinə bam kaagɩ ba tɛ nmʋ taanɩ ba wɩ: ‹Vɩɩra yalʋ o na nɛ tɩn wʋ́ daanɩ sɩ ya kɩ. O taana yam daɩ lele ŋwaanɩ.› 28 Nan ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ taanɩ dɩm bá daanɩ sɩ dɩ kɩ nɩ a na bʋŋɩ te tɩn. Kʋlʋ maama a na tɛ kʋ taanɩ tɩn wʋ́ yɔɔrɩ kʋ kɩ mʋ. Yuutu Baŋa-Wɛ mʋ tagɩ kʋntʋ.› »