Baá di Zeruzalɛm dɩdɛɛra bam taanɩ
11
Viua ma gɔ-nɩ kʋ ja kʋ vu kʋ cwi Baŋa-Wɛ digə ni dɩlʋ na jeeri wa-puli seeni tɩn. Baara fiinle-banu maa je da, yɩ Azuuri bu Yazanɩa, dɩ Benaya bu Pelatɩa wʋ ba wʋnɩ. Bantʋ bale dɛɛn yɩ tɩʋ kʋm nakwa mʋ. 2 Baŋa-Wɛ ma ta dɩ amʋ DƖ wɩ: «Nabiinu, n nɛ nɔɔna bantʋ na? Bantʋ yɔɔrɩ ba je ba bʋŋɩ lwarɩm kikiə yɩranɩ mʋ. Ba ta maa soe sɩ ba taa brɩ tɩʋ kʋm nɔɔna kwiə yalʋ na ba lamma tɩn. 3 Ba maa ta ba wɩ: ‹Kʋ daɩ sɩ dɩ́ zaŋɩ dɩ́ lɔ sam lɩla. Dɩ́ tɩʋ kʋm nyɩ dɩ kambiə mʋ, yɩ dɩbam yɩ nɩ nwana yalʋ na wʋ ka wʋnɩ tɩn.› 4 Kʋntʋ ŋwaanɩ, nabiinu, yɔɔrɩ n ŋɔɔnɩ n cɔgɩ-ba.»5 Baŋa-Wɛ Joro ma ba amʋ baŋa, yɩ kʋ ta dɩ amʋ kʋ wɩ: «Ja kwǝrǝ kantʋ n vu n pa Yisɩrayɛlɩ dwi tiinə bam. Ta dɩ ba n wɩ: Baŋa-Wɛ na tagɩ te tɩn mʋ tɩntʋ: Amʋ ye kʋlʋ maama á na bʋŋɩ á yum nɩ tɩn. 6 Abam tiini á gʋ tɩʋ kʋntʋ nɔɔna zanzan pa kʋ cwe sɩm maama su dɩ twa. 7 Kʋntʋ ŋwaanɩ, amʋ Yuutu Baŋa-Wɛ na tagɩ te tɩn mʋ tɩntʋ: Cɩga tɩn, Zeruzalɛm tɩʋ kʋm sɩɩnɩ kʋ yɩ kambiə kalʋ á na ta ka taanɩ tɩn mʋ. Abam na gʋ balʋ yɩ á pa ba yɩra tigi tɩʋ kʋm wʋnɩ tɩn maa yɩ ka wʋ nwana yam. A nan wʋ́ lɩ abam mʋ sɩ á nuŋi á daarɩ tɩʋ kʋm. 8 Abam fʋna dɩ jara-kǝm mʋ. A nan lagɩ a pa nɔɔna mʋ ba ba zaŋɩ najara dɩ abam. Yuutu Baŋa-Wɛ na tagɩ kʋlʋ tɩn mʋ kʋntʋ. 9 Amʋ wʋ́ zəli abam sɩ á nuŋi da tɩʋ kʋntʋ nɩ, yɩ a daarɩ a kwe abam a kɩ vərə jɩŋa nɩ sɩ a tɔgɩ ba baŋa a waarɩ abam. 10 Abam dʋna wʋ́ taa gʋɩ abam mʋ najara nɩ ba vu ba kwaarɩ Yisɩrayɛlɩ laŋa kam sisəm ni nɩ, sɩ á laan wanɩ á lwarɩ wɩ amʋ mʋ yɩ Baŋa-Wɛ. 11 Tɩʋ kʋntʋ bá taa nyɩ dɩ kambiə sɩ kʋ taa cʋ abam. Abam tɩtɩ bá taa yɩ nɩ nwana yalʋ na wʋ ka wʋnɩ tɩn. A nan lagɩ a waarɩ abam mʋ a vu a kwaarɩ á tɩʋ kʋm sisəm ni nɩ. 12 Á laan wʋ́ ba á lwarɩ nɩ amʋ mʋ yɩ Baŋa-Wɛ. Bɛŋwaanɩ, abam yɔɔrɩ á vɩn a zaasɩm dɩm mʋ. Á wʋ tʋŋɩ á tɔgɩ amʋ cullu tɩm, yɩ á joori á kɩ tɩɩnɩ dɩlʋ na gilimi abam tɩn cullu tɩm na brɩ te tɩn.»
13 Amʋ ta na wʋra a ŋɔɔnɩ yiyiu-ŋwɛ dɩm dɩ ba tɩn, mʋ Benaya bu Pelatɩa parɩ o tʋ tɩga nɩ o tɩ. A dɩ ma tʋ a vin a yibiyə tɩga nɩ yɩ a kaasɩ wɛ wɛ a wɩ: «Aba! Yuutu Baŋa-Wɛ, n lagɩ n cɔgɩ Yisɩrayɛlɩ tiinə balʋ ta na daarɩ tɩn n ti mʋ na?»
Wɛ goni ni dɩ balʋ ba na kalɩ ba vu sa-tɩʋ tɩn
14 Baŋa-Wɛ kwǝrǝ dɛɛn tu ka yi amʋ ka wɩ:
15 «Nabiinu, nii Zeruzalɛm tɩʋ nɔn-biə bam na taɩ n cʋrrʋ tɩm taanɩ te tɩn. Kʋ yɩ n tɩtɩ yɩra nɔɔna bam dɩ Yisɩrayɛlɩ dwi dɩm maama taanɩ mʋ ba ta yɩ ba wɩ: ‹Dɩ́ cʋrrʋ tɩm laan ve yigə yigə pa ba daa ba bwələ dɩ Baŋa-Wɛ. Kʋ nan yɩ tɩga kantʋ mʋ Wɛ kwe DƖ pa dɩbam sɩ dɩ́ taa te.›
16 Kʋntʋ ŋwaanɩ, ta tɩntʋ nɩ: ‹Yuutu Baŋa-Wɛ na tagɩ te tɩn mʋ tɩntʋ: A sɩɩnɩ a lɩ a nɔɔna bam a pa ba vu yigə yigə sɩ a yagɩ-ba lʋgʋ baŋa tɩɩnɩ dɩm je maama wʋnɩ. Dɩ kʋ dɩ, maŋa kalʋ ba ta na wʋ sa-tɩɩnɩ wʋnɩ tɩn, amʋ tɩtɩ mʋ wʋ́ taa yɩ ba tɩtarɩ nɩ nɩ wara-je a pa-ba, sɩ ba taa zuli-nɩ.›
17 Nan ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ wʋ́ la abam sɩ á nuŋi tɩɩnɩ dɩlʋ a ya na jagɩ abam sɩ á taá zʋʋrɩ dɩ wʋnɩ tɩn, yɩ a pa á joori Yisɩrayɛlɩ tɩga kam á joŋi á taá te.›b 18 Ba nan na joori da, baá lɩ jwə-yɔɔrʋ dɩ wo-zɔɔna dwi maama ka wʋnɩ. 19 A maa wʋ́ pa ba taa jɩgɩ wʋ-dɩdʋa ba ma zuli-nɩ, yɩ a pa-ba wʋbʋŋ-dʋʋra. A ta wʋ́ pa ba wʋʋ daa yɩ kɩ dam, sɩ a daarɩ a pa ba yi taa bwǝnǝ. 20 Kʋntʋ mʋ wʋ́ pa ba taa sɛ a zaasɩm dɩm, yɩ ba daarɩ ba tʋŋɩ ba tɔgɩ a cullu tɩm na brɩ te tɩn. Ba laan maa wʋ́ taa yɩ a nɔɔna cɩga cɩga, yɩ amʋ dɩ taa yɩ ba Tu Wɛ dɩm. 21 Kʋ daarɩ, balʋ wʋʋ na dɛ sɩ ba taa kaanɩ ba wo-zɔɔna nyɩnyʋrʋ dɩ ba jwə-yɔɔrʋ tɩn, a lagɩ a waarɩ-ba mʋ sɩ kʋ maŋɩ dɩ ba lwarɩm na yɩ te tɩn. Amʋ Yuutu Baŋa-Wɛ mʋ tagɩ kʋntʋ.»
22 Baŋa-Wɛ na ŋɔɔnɩ DƖ ti tɩn, Serubɛn wo-kɩnkagɩla yam ma gɔ ya tɩtɩ ya yarɩgɩ ya vwana ya jaanɩ ya din wɛɛnɩ, yɩ wo-gugullu tɩm tɔgɩ tɩ wʋ ya tee nɩ. Yisɩrayɛlɩ tiinə Wɛ paarɩ-zulǝ yam pooni maa wʋ ya baŋa kam seeni. 23 Kʋntʋ tɩn Baŋa-Wɛ paarɩ-zulǝ yam ma nuŋi Zeruzalɛm tɩʋ kʋm wʋnɩ, yɩ kʋ vu kʋ maŋɩ piu kʋlʋ na wʋ tɩʋ kʋm wa-puli seeni tɩn baŋa nɩ. 24 Kʋntʋ kwaga nɩ mʋ Wɛ Joro kʋm daa gɔgɩ-nɩ kʋ ja kʋ joori Babilɔnɩ tɩʋ nɩ. Kʋ ma ja-nɩ kʋ vu kʋ yi balʋ ba na jaanɩ jara-kǝm baŋa nɩ ba kalɩ ba vu ba yagɩ dáanɩ tɩn te. Kʋ yɩ Wɛ dɛɛn ya tɔgɩ DƖ Joro baŋa mʋ DƖ vɩɩrɩ wǝǝnu DƖ brɩ-nɩ. Amʋ na nɛ vɩɩra yalʋ tɩn ma ti, 25 yɩ a dɩ lwǝni kʋlʋ maama Wɛ na lɩ DƖ brɩ-nɩ tɩn a brɩ nɔɔna bam.