Baŋa-Wɛ paarɩ-zulǝ yam nuŋi Kʋ daarɩ Wɛ diga kam
10
A ma nii wɛyuu tɩlampolo kalʋ na tigi Serubɛn wo-kɩnkagɩla yam yum tɩm baŋa seeni tɩn a na woŋo na nyɩ dɩ paarɩ jangɔŋɔ yɩ Safiiria mʋ ba mɛ ba kɩ-kʋ tɩn. 2 Baŋa-Wɛ ma ta dɩ nɔɔnʋ wʋlʋ na zʋ gar-fɩfala kam tɩn DƖ wɩ: «Ve n zʋ wo-gugullu tɩm na virigə Serubɛn wo-kɩnkagɩla yam kuri dɩm seeni tɩn tɩtarɩ nɩ. Laan lɩ min-cala da tɩte nmʋ na wʋ́ wanɩ n pɛ tɩn, sɩ n daarɩ n ja-ya n zʋ Zeruzalɛm tɩʋ kʋm wʋnɩ n laan dʋlɩ n yagɩ kʋ ni maama nɩ.» A maa zɩgɩ da a niə yɩ o sɩɩnɩ o zʋ.3 Nɔɔnʋ wʋm na zʋ wo-kɩnkagɩla yam tɩtarɩ nɩ kʋntʋ tɩn, ya wʋ Wɛ diga kam jagwiə seeni mʋ. Kunkoŋo ma tu kʋ su kʋnkɔlɔ kʋlʋ na wʋ tɩtarɩ nɩ tɩn maama. 4 Baŋa-Wɛ paarɩ-zulǝ yam ma gɔ kʋ tɩtɩ mɛ kʋ ya na dɔgɩ Serubɛn wo-kɩnkagɩla yam baŋa nɩ tɩn kʋ fʋfɔ kʋ yi Wɛ diga kam ni dɩm seeni. Kunkoŋo kʋm ma lwarɩ kʋ pɩ Wɛ diga kam maama, yɩ ka kʋnkɔlɔ kʋm dɩ yɔɔrɩ kʋ nyɩɩnɩ dɩ Baŋa-Wɛ paarɩ-zulǝ yam pooni. 5 Serubɛn wo-kɩnkagɩla yam na ve yɩ ya vwana wuuri te tɩn, kʋ sɔɔ kʋm ma ni kʋ yi Wɛ diga kam dayigǝ kʋnkɔlɔ kʋm. Kʋ maa nyɩ dɩ Dam-fɔrɔ Tu Wɛ dɩm kwǝrǝ na dwanɩ te tɩn.
6 Baŋa-Wɛ dɛɛn ya pɛ nɔɔnʋ wʋlʋ na zʋ gar-fɩfala kam tɩn ni DƖ wɩ: «Ve n zʋ Serubɛn wo-kɩnkagɩla yam tɩtarɩ nɩ n lɩ min-cala wo-gugullu tɩm tɩtarɩ nɩ.» Nɔɔnʋ wʋm ma sɩɩnɩ o vu o zɩgɩ wo-gugullu tɩm dɩdʋa tee nɩ.b 7 Serubɛn wo-kɩnkagɩla yam dɩdʋa ma kwe o jɩŋa o tʋrɩ mim dɩlʋ na wʋ ya tɩtarɩ nɩ dɩ di tɩn o toŋi min-cala dɩ wʋnɩ. O ma kwe min-cala yam o kɩ nɔɔnʋ wʋlʋ na zʋ gar-fɩfala kam tɩn jɩŋa nɩ, yɩ o dɩ joŋi-ya o nuŋi o kɛ. 8 A ma nii a na woŋo kʋlʋ na nyɩ dɩ nabiinu jɩŋa tɩn Serubɛn wo-kɩnkagɩla yam dɩdʋa maama vɔŋɔ maama kuri nɩ.
9 A daa ta ma nii a na wo-gugullu tɩna na wʋ Serubɛn wo-kɩnkagɩla yam tee nɩ, pa wo-gugulu dɩdʋa zɩgɩ wo-kɩnkagɩlɩ dɩdʋa maama tee nɩ. Wo-gugullu tɩm yɔɔrɩ sɩ nyɩɩnɩ mʋ nɩ kandwa-ŋʋnac tɩn. 10 Wo-gugullu tɩna tɩm maama nyɩ daanɩ mʋ. Wo-gugulu maama maa nyɩ dɩ kʋ jɩgɩ wo-gugulu kʋdoŋ na wʋ kʋ wʋnɩ kʋ garɩ-kʋ tɩn mʋ. 11 Wo-kɩnkagɩla yamd maa na ve mɛ maama, yaá taa yɔɔrɩ ya ve ya yigə dɩdʋa na yɔɔrɩ mɛ tɩn, yɩ ya ba pipirǝ. Wo-kɩnkagɩlɩ yigə kam na yɔɔrɩ mɛ tɩn mʋ yaá taa tɔgɩ ya ve yɔɔrɔ-tɔtɔ, yɩ ya ba pipirǝ. 12 Yiǝ mʋ yɔɔrɩ ya faarɩ ya yɩra yam maama, kʋ na yɩ ya kwaga kam, dɩ ya jɩn sɩm, dɩ ya vwana yam, kʋ ta wǝli dɩ wo-gugullu tɩlʋ na wʋ ya yana yam maama tee nɩ tɩn. 13 Amʋ ma ni ba na bəŋi wo-gugullu tɩm yɩrɩ nɩ: «Wo-gugullu tɩlʋ na virigə tɩn.» 14 Wo-kɩnkagɩlɩ maama jɩgɩ yibi sɩna mʋ. Pulim yibiyə kam yɩ na-balae nyɩm mʋ. Yibiyə bale tu maa yɩ nabiinu nyɩm. Yibiyə batɔ tu wʋm yɩ nyoŋo nyɩm mʋ, yɩ kalʋ na kweeli tɩn yɩ kaloŋ-zɔŋɔ yibiyə.
15 Serubɛn wo-kɩnkagɩla yam ma jaanɩ ya maa diini wɛɛnɩ. Wo-kɩnkagɩla yam kʋntʋ mʋ a ya nɛ Kebarɩ bugə kam ni nɩ tɩn. 16 Ya maa na yǝni ya veǝ, wo-gugullu tɩm na wʋ ya tee nɩ tɩn dɩ ve mʋ. Ya daa na yarɩgɩ ya vwana sɩ ya zaŋɩ ya jaanɩ, wo-gugullu tɩm dɩ wʋ́ maŋɩ ya tee nɩ mʋ. 17 Ya nan na maŋɩ mɛ ya zɩgɩ, wo-gugullu tɩm dɩ wʋ́ taa zɩgɩ kʋntʋ mʋ. Ya daa na zaŋɩ ya jaanɩ wɛɛnɩ, wo-gugullu tɩm dɩ maa tɔgɩ-ya tɩ jaana. Bɛŋwaanɩ, wo-kɩnkagɩla yam joro wʋ wo-gugullu tɩm wʋnɩ mʋ.
18 Baŋa-Wɛ paarɩ-zulǝ yam maa zaŋɩ Wɛ diga kam ni nɩ kʋ vu kʋ zɩgɩ Serubɛn wo-kɩnkagɩla yam na wʋ mɛ tɩn baŋa seeni. 19 A na zɩgɩ da a nii tɩn, mʋ wo-kɩnkagɩla yam yarɩgɩ ya vwana yam ya jaanɩ ya di wɛɛnɩ. Ya na maa ve tɩn, wo-gugullu tɩm tɔgɩ tɩ wʋ ya tee nɩ mʋ. Ya ma vu ya zɩgɩ Wɛ diga kam wa-puli seeni ni dɩm nɩ. Yisɩrayɛlɩ tiinə Wɛ dɩm paarɩ-zulǝ yam maa wʋ ya baŋa kam seeni.
20 Wo-kɩnkagɩla yam kʋntʋ mʋ a ya nɛ Kebarɩ bugə kam ni nɩ yɩ ya wʋ Yisɩrayɛlɩ tiinə Wɛ dɩm kuri nɩ. A laan lwarɩ nɩ ya sɩɩnɩ ya yɩ Serubɛn mʋ. 21 Ya dɩdʋa maama jɩgɩ yibi sɩna, dɩ vwana yana mʋ. Vɔŋɔ maama laan maa jɩgɩ woŋo kʋlʋ na nyɩ dɩ nabiinu jɩŋa tɩn kʋ kuri nɩ. 22 Ya yibi sɩm maa nyɩ dɩ yibi sɩlʋ a ya na nɛ Kebarɩ bugə kam ni nɩ tɩn. Wo-kɩnkagɩlɩ dɩlʋ yigə maa na yɔɔrɩ mɛ tɩn, dɩ yɔɔrɩ dɩ ve kʋntʋ mʋ yɔɔrɔ-tɔtɔ.