Wɛ na waarɩ jwǝ-kaana bam te tɩn
9
O laan ma bagɩ dɩ kwǝr-dɩa yɩ a ni nɩ: «Abam balʋ na maŋɩ sɩ á waarɩ tɩʋ kʋm tɩn, titwəni-na á yi yo, yɩ á maama ze najara zɩla sɩ á ma á cɔgɩ-kʋ!» 2 Nɔɔna bardʋ ma ba ba nuŋi ba tɔgɩ Wɛ diga kam ni dɩlʋ na wʋ jazɩm baŋa seeni tɩn ba bɩɩnɩ. Ba dɩdʋa maama maa jɩgɩ jara-kǝm zɩlɩ na sɩlɩ lanyɩranɩ tɩn o jɩŋa nɩ. Nɔɔnʋ wʋdoŋ maa wʋ ba tee nɩ. O dɛɛn zʋ gar-fɩfala mʋ yɩ o vɔ tɔnɔ pʋpʋnɩm zɩla o təŋə nɩ.a Ba maama ma vu ba zɩgɩ canna bimbim dɩm təŋə nɩ.3 Yisɩrayɛlɩ tiinə Wɛ dɩm paarɩ-zulǝ yam ma gɔ kʋ tɩtɩ mɛ kʋ ya na dɔgɩ Serubɛn wo-kɩnkagɩla yam baŋa nɩ tɩn. Kʋ laan ma vu kʋ yi Wɛ diga kam ni dɩm seeni. Baŋa-Wɛ ma bəŋi nɔɔnʋ wʋlʋ na zʋ gar-fɩfala kam yɩ o jɩgɩ tɔnɔ pʋpʋnɩm zɩla tɩn 4 yɩ DƖ ta dɩd-o DƖ wɩ: «Kaagɩ Zeruzalɛm tɩʋ kʋm ni maama sɩ n beeri balʋ maama na suuri dɩ wʋ-cɔgɔ wo-zɔɔna kikiə yalʋ na jɩgɩ ya kɩ tɩʋ kʋm wʋnɩ tɩn ŋwaanɩ, sɩ n daarɩ n kɩ daalɩ n yagɩ ba trǝ nɩ.»
5 A ta na zɩgɩ a cəgi tɩn, mʋ o tagɩ dɩ nɔɔna badonnǝ bam o wɩ: «Ta á tɔgɩ-na o kwaga sɩ á dɩ kaagɩ tɩʋ kʋm ni maama á gʋ wuu. Yɩ ŋwanɩ-na á pa nɔɔn-nɔɔnʋ naa á duri ba wʋlʋwʋlʋ yibwənə. 6 Yɔɔrɩ á taá gʋɩ nankwɩn: dɩ nɔn-dʋnnʋ, dɩ kabwənə, kʋ ta wǝli dɩ biə dɩ kaana dwi maama. Nan yɩ gʋ-na balʋ na jɩgɩ daala yam ba trǝ nɩ tɩn. Nan puli-na amʋ digə kam ni nɩ sɩ á taá gʋɩ á veǝ.» Ba ma sɩɩnɩ ba puli ba gʋ nakwa balʋ na wʋ Wɛ diga kam yigə nɩ tɩn.
7 O ta ma ta dɩ nɔɔna bam o wɩ: «Dʋlɩ-na twa bam á yagɩ Wɛ diga kam kʋnkwallʋ tɩm je maama nɩ sɩ kʋ pa digə kam digimi. Ve-na á puli tɩtʋŋa!» Ba ma sɩɩnɩ ba zʋ tɩʋ kʋm wʋ ba kaagɩ kʋ ni maama ba gʋɩ yɔɔ. 8 Nɔɔna bam na yɔɔrɩ ba jɩgɩ nɔɔna bam ba gʋɩ kʋntʋ yɩ ba daarɩ a yɩranɩ tɩn, mʋ a yɔɔrɩ a tʋ a vin a yibiyə tɩga nɩ yɩ a kaasɩ a yagɩ nɩ: «A loori-m, Yuutu Baŋa-Wɛ, nmʋ na yɔɔrɩ n tɔgɩ n ban-lʋm dɩm baŋa n tiini n waarɩ Zeruzalɛm tɩʋ tiinə kʋntʋ tɩn, n ta wʋ́ cɔgɩ Yisɩrayɛlɩ tiinə balʋ na daarɩ tɩn maama dɩ mʋ na?»
9 O ma ləri-nɩ o wɩ: «Yisɩrayɛlɩ dɩ Zuda dwi tiinə bam na cɔgɩ te tɩn tiini kʋ kɛ jɩŋa mʋ. Nɔɔna kaagɩ ba gʋɩ daanɩ tɩga kam ni maama nɩ mʋ, yɩ cɩga kam ba tʋŋa tɩʋ kʋm wʋnɩ. Ba ta maa ta ba wɩ: ‹Baŋa-Wɛ viiri DƖ daarɩ dɩ́ tɩʋ kʋm mʋ. Baŋa-Wɛ ba naɩ dɩ́ kikiə yam.› 10 Amʋ nan bá ŋwanɩ a pa-ba naa a duri ba yibwənə kɔtaa! A yɔɔrɩ a lagɩ a pa kʋ ni-ba mʋ sɩ kʋ maŋɩ dɩ ba tɩtʋŋ-lwaannʋ tɩm.»
11 Nɔɔnʋ wʋlʋ na zʋ gar-fɩfala kam yɩ o jɩgɩ tɔnɔ pʋpʋnɩm zɩla tɩn ma joori yɩ o ta dɩ Baŋa-Wɛ o wɩ: «A kɩ n ni dɩm nɩ mʋ.»