Jwǝnǝ kaanɩm
8
Bɩna yardʋ bɩnɩ dɩm canɩ sɩrdʋ cana kam da yanu dɛ dɩm nɩ, mʋ a je dɩ Zuda tɩʋ nakwa bam a tɩtɩ sɔŋɔ nɩ. Yuutu Baŋa-Wɛ dam dɩm ma da dɩ ba amʋ baŋa. 2 A ma nii a na woŋo na nyɩ dɩ nabiinu tɩn a yigə nɩ. O təŋə seeni sɩ kʋ taa tu tɩn yɔɔrɩ kʋ di mʋ nɩ mim na yɩ te tɩn. O təŋə seeni sɩ kʋ taa diini dɩ maa nyɩɩna nɩ canna na tiini ka nyɩɩnɩ te tɩn. 3 O ma pa woŋo na nyɩ dɩ o jɩŋa tɩn twɩ ka ja-nɩ a yuuywe sɩm seeni. Viua laan ma fuli kʋ gɔ-nɩ wɛɛnɩ pa a jaanɩ a lə tɩga kam dɩ wɛyuu tɩtarɩ laŋa nɩ. Kʋ ma tɔgɩ wǝǝnu tɩlʋ Wɛ na vɩɩrɩ DƖ brɩ-nɩ tɩn baŋa nɩ, kʋ kwe-nɩ kʋ ja kʋ vu Zeruzalɛm. A ma vu a yi Wɛ diga kam tɩtarɩ kʋnkɔlɔ kʋm ni dɩlʋ na jeeri jazɩm baŋa seeni tɩn. Daanɩ mʋ jwəm nyɩnyʋgʋ kʋlʋ na zaŋɩ Wɛ banɩ tɩn yɔɔrɩ dɩ zɩga. 4 A ma nii a na nɩ Yisɩrayɛlɩ tiinə Wɛ dɩm paarɩ-zulǝ yam wʋ daanɩ. Kʋ nyɩ dɩ nyɩnyʋgʋ kʋlʋ Wɛ ya na lɩ DƖ brɩ-nɩ yɩ a wʋ bolo kʋm tɩga nɩ tɩn mʋ.5 O laan ma ta dɩ amʋ o wɩ: «Nabiinu, kwǝni n yuu n nii jazɩm baŋa seeni.» A na nii jazɩm baŋa seeni tɩn, mʋ a nɛ jwəm dɩlʋ na zaŋɩ Wɛ banɩ dɩm tɩn. Dɩ maa zɩgɩ dɩ maŋɩ dɩ kaanɩm bimbim dɩm jazɩm seeni ni dɩm.
6 O ma ta dɩ amʋ o wɩ: «Nabiinu, n nɛ tɩtʋŋ-nɛ sɩlʋ Yisɩrayɛlɩ dwi tiinə bam na jɩgɩ ba kɩ yo seeni tɩn na? Ba yɔɔrɩ ba kɩ tɩtʋŋ-zɔɔna sɩ ba zəli-nɩ pa a vu yigə yigə a daarɩ a digə kam mʋ. Nan ta n ye nɩ: nń na kəm-balwaarʋ na dwe tɩntʋ.»
7 O laan ma ja-nɩ pa dɩ́ vu dɩ́ yi Wɛ diga kam kʋnkɔlɔ kʋm ni dɩm. A ma nii a na bɔɔnɩ dɩ na wʋ kabri kam yɩra nɩ. 8 O ma ta dɩ amʋ o wɩ: «Nabiinu, fɔgɩ n bɔɔrɩ bɔɔnɩ n kɩ kabri kam yɩra nɩ.» A na kɩ kʋntʋ tɩn, mʋ a nɛ ni na tigi da. 9 O daa ma ta o wɩ: «Tɔgɩ ni dɩm n zʋ sɩ n na lwarɩm dɩ wo-zɔɔna kikiə yalʋ ba na jɩgɩ ba tʋŋɩ yo seeni tɩn.» 10 A ma zʋ da, yɩ a na nɩ ba pʋpʋrɩ wo-zɔɔna dwi dwi nyɩnyʋrʋ mʋ ba yagɩ kəbrə kam yɩra maama nɩ. Nyɩnyʋrʋ tɩm brɩ tɩga wo-vəəlu, dɩ varɩ-balwaarʋ, dɩ Yisɩrayɛlɩ dwi tiinə na kaanɩ jwǝnǝ yalʋ dwi maama tɩn mʋ. 11 Yisɩrayɛlɩ dwi tiinə nakwa fusɩrpɛ maa zɩgɩ nyɩnyʋrʋ tɩm yigə nɩ, yɩ Safan bu Yazanɩa wʋ ba tɩtarɩ nɩ. Ba maa ze min-cala zwɩ yɩ ba zwɛ wǝǝnu tɩlʋ lwǝm na ywǝmmǝ tɩn pa ka nyʋa zaŋa wɛɛnɩ.
12 O ma bwe amʋ o wɩ: «Nabiinu, n nɛ Yisɩrayɛlɩ dwi tiinə nakwa bam na səgi lim wʋnɩ ba kɩ wǝǝnu tɩlʋ na? Nɔɔnʋ maama səgi o jwəm nyɩnyʋrʋ digə nɩ mʋ o kɩ o na lagɩ te. Ba maa ta ba wɩ: ‹Baŋa-Wɛ ba naɩ dɩbam. Baŋa-Wɛ viiri DƖ daarɩ dɩ́ tɩʋ kʋm mʋ.› » 13 O daa ma ta o wɩ: «Nan ta n ye nɩ: n ta wʋ́ na kəm-balwaarʋ ba na kɩ yɩ ya dwe tɩntʋ.»
14 O daa ma ja-nɩ o vu o yi Baŋa-Wɛ digə kam ni dɩlʋ na jeeri jazɩm baŋa seeni tɩn. A ma na kaana na je da yɩ ba keeri Tamuuzib kərə kam. 15 O ma ta dɩ amʋ o wɩ: «Nabiinu, n nɛ kʋntʋ dɩ na? Nan ta n ye nɩ: nń na kəm-balwaarʋ na dwe tɩntʋ.»
16 O ma ja-nɩ o zʋ Wɛ di-kamunu kʋm tɩtarɩ kʋnkɔlɔ kʋm. A ma nii Wɛ diga kam ni dɩm seeni mɛ na yɩ napɔrɔ kʋm dɩ kaanɩm bimbim dɩm tɩtarɩ laŋa nɩ tɩn a na nɔɔna badonnǝ na maŋɩ dɩ fiinle-banu. Bantʋ mɛ ba kwaga ba ya Baŋa-Wɛ digə kam, yɩ ba pipiri ba yibiyə wa-puli seeni ba jeeri wɩa kam ba tiiri tɩga nɩ ba zuli-ka. 17 O ma ta dɩ amʋ o wɩ: «Nabiinu, n nɛ kʋntʋ dɩ na? Zuda dwi tiinə bam na kɩ wo-zɔɔna yalʋ maama yo seeni tɩn, ba bʋŋɩ nɩ ya daɩ kʋlʋkʋlʋ mʋ na? Ba nan ta jɩgɩ nakɔɔrɩ tɩtʋŋa mʋ ba kɩ tɩʋ kʋm ni maama nɩ ba wǝli da, pa ba zaŋɩ a banɩ sɩ kʋ gaalɩ. Nii ba na jɩgɩ-nɩ ba twɩa te! 18 Kʋntʋ ŋwaanɩ nan mʋ amʋ dɩ wʋ́ da a ban-lʋm dɩm ŋwaanɩ a waarɩ-ba! A bá ŋwanɩ a pa-ba naa a duri ba yibwənə kɔtaa! A bá sɛ sɩ a cəgi ba kərə kam, dɩ ba na maŋɩ ba keeri ba jarɩ-nɩ dɩ kwǝr-dɩa te maama dɩ.»