Lɛɛrʋ na lagɩ tɩ yi lɩla te tɩn
7
Baŋa-Wɛ kwǝrǝ tu ka yi amʋ nɩ:2 «Nabiinu, Yuutu Baŋa-Wɛ na tagɩ te dɩ Yisɩrayɛlɩ tɩʋ kʋm tʋ mʋ tɩntʋ: Lɛɛrʋ maŋa yi ka ti! Maŋa yi sɩ abam tɩga kam ni maama cɔgɩ. 3 Abam cɔgɩm maŋa kam na yi tɩn ŋwaanɩ, amʋ wʋ́ yɔɔrɩ a lo a ban-lʋm dɩm mʋ á baŋa nɩ. A lagɩ a bwe abam cwe sɩlʋ á na tɔgɩ tɩn ŋwaanɩ. A ta wʋ́ waarɩ abam sɩ kʋ maŋɩ dɩ wo-zɔɔna kikiə yalʋ maama á na kɩ tɩn. 4 A bá ŋwanɩ a pa abam naa a duri á yibwənə. A nan lagɩ a waarɩ abam mʋ cwe sɩlʋ á na tɔgɩ tɩn ŋwaanɩ, dɩ á na yɔɔrɩ á kɩ kəm-balwaarʋ te tɩn. Kʋntʋ baŋa nɩ á wʋ́ lwarɩ nɩ amʋ mʋ yɩ Baŋa-Wɛ.
5 Yuutu Baŋa-Wɛ na tagɩ te tɩn mʋ tɩntʋ: Taá ye-na nɩ lɛɛrʋ tɩlʋ doŋ na tǝrǝ tɩn mʋ bɩɩnɩ á baŋa. 6 Cɔgɩm maŋa yiǝ! Lɛɛrʋ tɩm lagɩ tɩ yi lɩla! Tɩ nan diini á baŋa mʋ. Fɔgɩ-na á nii-na! 7 Abam balʋ na zʋʋrɩ tɩga kam baŋa nɩ tɩn, á lɛɛrʋ tɩm maŋa yiǝ. Baŋa-Wɛ dɛ dɩm yi dɩ ti. Dɛ dɩm kʋntʋ nɩ vuvugə wʋ́ taa wʋra. Á daa bá taá kaagɩ pweeru tɩm yuu nɩ á di ywəəni. 8 Kʋ bá daanɩ sɩ a lo a ban-lʋm dɩm á baŋa nɩ. Amʋ wʋ́ da a ban-zɔŋɔ kʋm ŋwaanɩ a bwe abam cwe sɩlʋ á na tɔgɩ tɩn ŋwaanɩ, yɩ a daarɩ a waarɩ abam sɩ kʋ maŋɩ dɩ wo-zɔɔna kikiə yalʋ maama á na kɩ tɩn. 9 A bá ŋwanɩ a pa abam naa a duri á yibwənə. A nan lagɩ a waarɩ abam mʋ cwe sɩlʋ á na tɔgɩ tɩn ŋwaanɩ, dɩ á na yɔɔrɩ á kɩ kəm-balwaarʋ te tɩn. Kʋntʋ baŋa nɩ á wʋ́ lwarɩ wɩ amʋ Baŋa-Wɛ tɩtɩ mʋ dʋlɩ abam ja-guli.
10 Nii-na! Dɛ dɩm bɩɩnɩ yɩ dɩ laan yiǝ! Lɛɛrʋ tɩm zaŋɩ tɩ nuŋi sɩ tɩ ba á baŋa. Da-lɔŋɔ kʋm kwi vɔɔrʋ mʋ. Zwabaniə dɩ puli je maama nɩ. 11 Ba nakɔɔrɩ kikiə yam daga ya gaalɩ, pa ya ji da-lɔŋɔ kʋlʋ na wʋra wo-balɔrɔ ŋwaanɩ tɩn mʋ. Ba wʋlʋwʋlʋ nan daa bá daarɩ. Ba kɔ-fɔrɔ kʋm, dɩ ba jɩjɩgɩrʋ tɩm, dɩ ba duuni dɩm maama wʋ́ ti mʋ. 12 Maŋa kam yiǝ. Ba cɔgɩm dɛ dɩm tuǝ. Balʋ na yəgi wǝǝnu dɩ səbu tɩn wʋʋ daa bá poli. Balʋ nan na yəgi-tɩ ba pa tɩn dɩ wʋʋ bá cɔgɩ nɩ ba tʋa. Bɛŋwaanɩ, Wɛ lagɩ DƖ waarɩ ba kɔgɔ kʋm maama mʋ. 13 Wʋlʋ na kwe o wǝǝnu o yəgi, kʋ tu daa bá joori o na-tɩ o ŋwɩa wʋnɩ. Bɛŋwaanɩ, a bá ləni a wʋbʋŋa yalʋ a na vɩɩrɩ dɩ ba tɩn. Ya maa ve ba kɔgɔ kʋm maama seeni mʋ. Ba maama dɩdʋa dɩdʋa na kɩ lwarɩm yalʋ tɩn ŋwaanɩ, ba bá joŋi ba ŋwɩa.
14 Ba wugi nabɔnɔ sɩ nɔɔna ti ba yigə najara ŋwaanɩ. Nɔɔn-nɔɔnʋ nan bá nuŋi o vu o zaŋɩ najara yam. Bɛŋwaanɩ, amʋ banɩ mʋ zaŋɩ ba kɔ-fɔrɔ kʋm maama baŋa nɩ. 15 Jara-kǝm mʋ wʋ pwələ nɩ. Kʋ daarɩ yawɩɩrʋ dɩ kana wʋ sam dɩm wʋnɩ. Balʋ na wʋ pwələ nɩ tɩn wʋ́ tɩ najara yam baŋa nɩ mʋ. Yawɩɩrʋ dɩ kana maa wʋ́ gʋ balʋ na wʋ tɩʋ kʋm wʋnɩ tɩn. 16 Balʋ na maŋɩ sɩ ba lu tɩn wʋ́ duri ba vu pweeru je nɩ mʋ ba taa wʋra. Ba maa wʋ́ taa keerǝ nɩ kunkwən-puli na keeri te tɩn, sɩ nɔɔnʋ maama taa keeri o tɩtɩ lwarɩm ŋwaanɩ. 17 Nɔɔna bam maama jɩan wʋ́ parɩ, yɩ ba nadoonə taa magɩ daanɩ. 18 Baá zʋ gwar-zɩnzwara, yɩ fʋʋnɩ dɩ ja-ba. Ba yigə maa wʋ́ nywanɩ cavɩɩra ŋwaanɩ, yɩ ba ceeri ba yum wʋ-cɔgɔ ŋwaanɩ. 19 Baá dʋlɩ ba səbu tɩm ba yagɩ tɩʋ kʋm cwe sɩm yuu nɩ, yɩ ba kɩ ba səbu-sɩŋa kam nɩ ka yɩ wo-yɔɔ mʋ tɩn. Ba səbu tɩm dɩ ba səbu-sɩŋa kam maama bá wanɩ tɩ joŋi-ba tɩ yagɩ Baŋa-Wɛ ban-zɔŋɔ kʋm dɛ dɩm nɩ. Ba jɩjɩgɩrʋ tɩm kʋntʋ bá pa-ba wʋdiu sɩ ba di ba su ba kana. Tɩ nan yɩ wǝǝnu tɩlʋ na pɛ ba cɔgɩ tɩn mʋ.a 20 Ba ya jɩgɩ tɩɩra mʋ dɩ ba wo-nyɩnnʋ tɩm, yɩ ba kwe-tɩ ba ma ba kɩ wo-zɔɔna nyɩnyʋrʋ sɩ ba taa zuli-tɩ. A nan wʋ́ pa wǝǝnu tɩm kʋntʋ pipiri tɩ ji wo-yɔɔrʋ tɩ pa-ba. 21 A ta wʋ́ pa dwi-gɛ tiinə dɩ lʋgʋ baŋa nɔn-balwaarʋ tɩm vrɩ wǝǝnu tɩm kʋntʋ ba tee nɩ, pa tɩ daa yɩ taa jɩgɩ lam. 22 A lagɩ a kwǝli a yibiyə mʋ sɩ dwi-gɛ tiinə bam na cwǝŋǝ ba zʋ jǝgǝ kalʋ na jɩgɩ a fra tɩn, yɩ ba daarɩ ba digimi-ka. Vɩnvɩrna mʋ wʋ́ digimi-ka kʋntʋ.
23 Fɔgɩ-na capʋnnʋ á tiŋi a nɔɔna bam ŋwaanɩ. Bɛŋwaanɩ nɔɔna soe nɔn-gʋra kikiə dɩ vuvugə tɩtʋŋa mʋ tɩʋ kʋm maama nɩ. 24 Kʋ na yɩ ba sam dɩm, a lagɩ a pa tɩɩnɩ dɩlʋ nɔɔna pu-sɩŋa na gaalɩ tɩn mʋ ba ba joŋi-dɩ ba taa te. A maa wʋ́ pa ba dɩdɛɛra bam dam ti, sɩ vɩnvɩrna dɩ ba ba digimi ba wara-je sɩm. 25 Cam dɩm na yi-ba, ba laan wʋ́ beeri yazurə je ba ga. 26 Lɛɛrʋ tɩm wʋ́ ba tɩ daŋɩ da-baŋa nɩ. Ba ta wʋ́ ni sawɩa ba wǝli sawɩa wʋdoŋ baŋa nɩ. Ba ta wʋ́ vu Wɛ nijoŋnu te sɩ o lɩ wǝǝnu o brɩ-ba yɩ ba ga kʋ ŋwa. Wɛ zaasɩm dɩm nan wʋ́ je DƖ kaanɩm tiinə bam ni nɩ. Tɩʋ kʋm nakwa bam dɩ daa bá taa ta yi-pʋrʋ taanɩ. 27 Pɛ wʋm wʋ́ taa keeri wʋ-cɔgɔ ŋwaanɩ, yɩ o dɩdɛɛrʋ wʋm tɩɩna dɩ ti. Fʋʋnɩ maa wʋ́ ja tɩʋ kʋm nɔɔna bam sɩ ba yɩra taa saɩ. A lagɩ a kɩ-ba sɩ kʋ maŋɩ dɩ ba kikiə na yɩ te tɩn mʋ. A ta wʋ́ di ba taanɩ sɩ kʋ tɔgɩ dɩ ba tɩtɩ cullu tɩm na brɩ te tɩn. Ba laan maa wʋ́ lwarɩ nɩ amʋ mʋ yɩ Baŋa-Wɛ.»