Lɛɛrʋ tɩlʋ na wʋ́ yi Yisɩrayɛlɩ tiinə tɩn
6
Baŋa-Wɛ kwǝrǝ tu ka yi amʋ wɩ:2 «Nabiinu, pa n yibiyə jeeri Yisɩrayɛlɩ pweeru tɩm seeni sɩ n daarɩ n ŋɔɔnɩ taanɩ n cɔgɩ-tɩ 3 n wɩ: ‹Yisɩrayɛlɩ pweeru tɩm, cəgi-na Yuutu Baŋa-Wɛ kwǝrǝ. Tɩntʋ mʋ Yuutu Baŋa-Wɛ tagɩ dɩ pweeru tɩm, dɩ pu-kum sɩm, dɩ gugwəəru tɩm, dɩ bwəəlu tɩm: A lagɩ a pa najara mʋ zaŋɩ á je sɩm maama nɩ, sɩ a cɔgɩ mɛ nɔɔna bam na diini ba zuli jwǝnǝ da tɩn. 4 Amʋ wʋ́ yigi ba kaanɩm bimbinə yam a dɩ tɩga nɩ, yɩ a daarɩ a cɩcʋgɩ bimbinə yalʋ ba na zwɛ wǝǝnu tɩlʋ lwǝm na ywǝmmǝ tɩn ya baŋa nɩ tɩn. Nɔɔna bam na zɩgɩ ba jwǝnǝ yam yigə nɩ ba zuli-ya, amʋ wʋ́ gʋ-ba dáanɩ mʋ. 5 A laan wʋ́ yagɩ abam Yisɩrayɛlɩ tiinə twa bam yɩra sɩ ya taa tigi á jwǝnǝ yam yigə nɩ. A maa wʋ́ pa á kwi sɩm jagɩ sɩ kaagɩ á bimbinə yam. 6 Tɩɩnɩ dɩlʋ maama á na zʋʋrɩ dɩ wʋnɩ tɩn wʋ́ cɔgɩ mʋ, sɩ wara-je sɩlʋ á na zuli jwǝnǝ da tɩn dɩ cɩcʋgɩ. Á jwǝnǝ kaanɩm bimbinə yam wʋ́ ba ya cɔgɩ fasɩ, kʋ ta wǝli dɩ jwǝnǝ yam tɩtɩ. Bimbinə yalʋ baŋa nɩ á na zwɛ wǝǝnu tɩlʋ lwǝm na ywǝmmǝ tɩn dɩ wʋ́ cɩcʋgɩ. Woŋo kʋlʋ maama á na kɩ tɩn maŋɩ sɩ kʋ saarɩ kʋ je mʋ. 7 Twa wʋ́ taa tigi je maama abam tɩtarɩ nɩ. Kʋntʋ maama baŋa nɩ mʋ á wʋ́ lwarɩ nɩ amʋ mʋ yɩ Baŋa-Wɛ.
8 A nan wʋ́ pa abam badonnǝ cwǝŋǝ sɩ ba lu tʋʋnɩ. Bantʋ bá tɩ najara wʋnɩ, ba na jagɩ ba zʋ tɩɩnɩ dɩdonnǝ wʋnɩ tɩn ŋwaanɩ. 9 Ba dʋna maa na kalɩ-ba ba ja vu sa-tɩɩnɩ wʋnɩ sɩ ba taa zʋʋrɩ da, ba laan wʋ́ guli amʋ gulə. Ba maa wʋ́ lwarɩ nɩ a wʋ tiini kʋ cɔgɩ dɩ ba na nuŋi amʋ kwaga nɩ te tɩn. Bɛŋwaanɩ, ba mɛ ba kwaga ba ya amʋ mʋ, yɩ ba daarɩ ba sɩɩnɩ ba yiǝ dɩ jwǝnǝ kaanɩm. Ba fra nan wʋ́ nuŋi ba tɩtɩ, lwarɩm dɩ kəm-balwaarʋ yalʋ maama ba na kɩ tɩn ŋwaanɩ. 10 Ba laan maa wʋ́ lwarɩ nɩ amʋ mʋ yɩ Baŋa-Wɛ. A na tagɩ nɩ a lagɩ a pa lɛɛrʋ tɩlʋ yi-ba tɩn, kʋ daɩ nɩ a ta dɩ a ni yɩranɩ mʋ.› »
11 Yuutu Baŋa-Wɛ na tagɩ te tɩn mʋ tɩntʋ: «Magɩ n jɩn sɩm daanɩ, sɩ n ta n nɔnɩ n nɛ tɩga nɩ dɩ dam, yɩ n daarɩ n kaasɩ dɩ wʋ-cɔgɔ n wɩ: ‹Lɛɛrʋ na!› Kɩ kʋntʋ Yisɩrayɛlɩ dwi tiinə bam tɩtʋŋ-lwaannʋ, dɩ ba wo-zɔɔna kikiə yam ŋwaanɩ. Ba nan lagɩ ba tɩ najara, dɩ kana, dɩ yawɩ-cɛɛrʋ baŋa nɩ mʋ. 12 Wʋlʋ na wʋ sa-tɩʋ wʋnɩ tɩn, yawɩ-cɛɔ mʋ wʋ́ gʋ-o. Wʋlʋ na bwələ tɩn dɩ maa wʋ́ tɩ najara wʋnɩ. Wʋlʋ na daarɩ yɩ o lu tʋʋnɩ tɩn dɩ maa wʋ́ tɩ dɩ kana. A lagɩ a tiini a waarɩ-ba kʋntʋ doŋ mʋ a ban-lʋm dɩm ŋwaanɩ. 13 Kʋntʋ baŋa nɩ baá lwarɩ nɩ amʋ mʋ yɩ Baŋa-Wɛ. Kʋ nan wʋ́ kɩ nɩ ba na nɛ nɩ ba tɩtɩ tiinə twa tigi ba faarɩ tɩga baŋa je maama. Kʋʋ́ taa yɩ ba jwǝnǝ yam tɩtarɩ nɩ, dɩ ba kaanɩm bimbinə yam təŋə nɩ, dɩ pu-kum sɩm dɩ pweeru tɩm maama yum nɩ, dɩ tu-kamunnu kurə nɩ mɛ ba ya na kwe wǝǝnu tɩlʋ lwǝm na ywǝmmǝ tɩn ba kaanɩ ba pa ba jwǝnǝ yam maama tɩn mʋ. 14 Amʋ wʋ́ zǝŋi a jɩŋa mʋ sɩ a waarɩ-ba sɩ a daarɩ a cɔgɩ ba tɩga kam sɩ ka ji di-dwəənu yɩranɩ, kʋ zɩgɩ kagʋa kam nɩ sɩ kʋ yi Dibila. Amʋ wʋ́ cɔgɩ je sɩlʋ maama ba na zʋʋrɩ tɩn. Ba laan maa wʋ́ lwarɩ nɩ amʋ mʋ yɩ Baŋa-Wɛ.»