Zeruzalɛm tɩʋ na wʋ́ cɔgɩ te tɩn
5
«Nabiinu, kwe sʋ-lɔŋɔ kʋlʋ ni na di lanyɩranɩ tɩn n ma n fanɩ n twana yam dɩ n yuuywe sɩm. Maŋɩ-tɩ sɩ n lwarɩ tɩ duuni na maɩ te tɩn, sɩ n daarɩ n pɔɔrɩ-tɩ kuni bɩtɔ. 2 Nmʋ na zaŋɩ najara dɩ Zeruzalɛm tɩʋ nyɩnyʋgʋ kʋm n ti, sɩ n kwe n twana yam, dɩ n yuuywe sɩm pɔɔrɩm bɩtɔ wʋnɩ dɩdʋa n zwɛ tɩʋ nyɩnyʋgʋ kʋm wʋnɩ. N ta wʋ́ kwe sɩ pɔɔrɩm bɩtɔ wʋnɩ dɩdʋa n ja n nuŋi tɩʋ kʋm dáa nɩ n zagɩ n go dɩ sʋ-lɔŋɔ. Ta daarɩ n kwe sɩ pɔɔrɩm bɩtɔ wʋnɩ dɩdʋa n dʋlɩ n yagɩ sɩ viu ja-sɩ kʋ jagɩ. Amʋ laan wʋ́ kwe a sʋ-lɔŋɔ mʋ a ma a zəli-sɩ. 3 Nan daarɩ yuuywe fɩnfɩɩn sɩ n kwe-sɩ n vɔ n gɔrɔ ni nɩ. 4 N daa n wʋ́ lɩ yuuywe sɩm kʋntʋ wʋnɩ mʋ, sɩ n dʋlɩ-sɩ n dɩ mim dɩm wʋnɩ sɩ sɩ zwɛ. Mim dɩm kʋntʋ mʋ lagɩ dɩ di dɩ jagɩ dɩ yi Yisɩrayɛlɩ dwi tiinə bam maama.5 Yuutu Baŋa-Wɛ na tagɩ te tɩn mʋ tɩntʋ: Kʋntʋ lagɩ kʋ brɩ Zeruzalɛm tɩʋ kʋm na yɩ te tɩn mʋ. A ya kwe-kʋ a zɩgɩ dwi-gɛ tiinə tɩtarɩ nɩ mʋ, yɩ ba tɩɩnɩ dɩm gilimi-kʋ dɩ kɩ tɩtarɩ nɩ. 6 Kʋ nɔn-biə bam nan nuŋi a kwaga nɩ mʋ, yɩ ba tʋŋɩ kǝm-balwaarʋ yɩranɩ sɩ kʋ dwǝni dwi tiinə balʋ na gilimi-ba tɩn kikiə na yɩ te tɩn. Ba yɔɔrɩ ba vɩn a niə yam dɩ a zaasɩm dɩm mʋ.
7 Yuutu Baŋa-Wɛ nan na tagɩ te tɩn mʋ tɩntʋ: Abam zwabaniə kikiə maŋɩ ya dwe tɩɩnɩ dɩlʋ na gilimi abam dɩ kɩ tɩtarɩ nɩ tɩn, yɩ á ba tɔgɩ a zaasɩm dɩm. Á nan ba sɛ a niə yam. Kʋ na maŋɩ kʋ yɩ dwi tiinə balʋ na gilimi abam tɩn cullu tɩm, á wʋ kwaanɩ á kɩ tɩntʋ na brɩ te tɩn.
8 Yuutu Baŋa-Wɛ nan na tagɩ te tɩn mʋ tɩntʋ: Zeruzalɛm tiinə bam, amʋ tɩtɩ nan wʋ́ pipiri a ji á dʋnʋ. A lagɩ a waarɩ abam mʋ sɩ dwi-gɛ tiinə bam taa zɩgɩ ba niə. 9 A nan wʋ́ tiini a waarɩ abam, á na zuli wo-zɔɔna tɩn ŋwaanɩ. A na wʋ́ kɩ abam te tɩn daɩ kʋlʋ a na maŋɩ a kɩ tɩn, yɩ a nan daa bá fɔgɩ a waarɩ nɔɔna kʋntʋ doŋ dɩ. 10 Kwə wʋ́ tɔgɩ kʋ baŋa nɩ ba di ba biə, yɩ biə dɩ di ba kwə, kana na jɩgɩ-ba tɩn ŋwaanɩ. Amʋ wʋ́ waarɩ abam á lwarɩm ŋwaanɩ. A ta wʋ́ jagɩ abam wʋnɩ balʋ na daarɩ tɩn a yagɩ tɩga baŋa je maama nɩ. 11 Kʋntʋ ŋwaanɩ, Yuutu Baŋa-Wɛ tagɩ tɩntʋ mʋ nɩ: Nɩ amʋ na jɩgɩ ŋwɩa te tɩn, kʋ yɔɔrɩ kʋ yɩ cɩga mʋ nɩ a jaanɩ wʋbʋŋa sɩ a ti abam mʋ, á na digimi amʋ digə kam dɩ wo-zɔɔna, dɩ kəm-balwaarʋ dwi maama tɩn ŋwaanɩ. A bá ŋwanɩ a pa abam naa a duri á yibwənə kɔtaa! 12 Abam tɩʋ nɔɔna bam pɔɔrɩm bɩtɔ wʋnɩ dɩdʋa mʋ lagɩ ba maŋɩ tɩʋ kʋm wʋnɩ ba tɩ yawɩ-cɛɛrʋ, dɩ kana ŋwaanɩ. Pɔɔrɩm bɩtɔ wʋnɩ dɩdʋa maa wʋ́ nuŋi yɩ á dʋna bam gʋ-ba najara baŋa nɩ. Á pɔɔrɩm bɩtɔ wʋnɩ dɩdʋa kalʋ na daarɩ tɩn, a maa wʋ́ jagɩ-ba je maama nɩ, yɩ a ta kwe a sʋ-lɔŋɔ a zəli-ba sɩ a gʋ.
13 Amʋ na kɩ kʋntʋ ba yɩra nɩ a ti, a banɩ dɩm laan wʋ́ zuri, a na waarɩ-ba sɩ kʋ maŋɩ dɩ ba lwarɩm dɩm tɩn ŋwaanɩ. Amʋ ban-lʋm dɩm na tʋ ba baŋa nɩ kʋntʋ, ba laan wʋ́ lwarɩ nɩ kʋ yɩ amʋ Baŋa-Wɛ mʋ pɛ kʋ kɩ-ba kʋntʋ doŋ amʋ na cana ba baŋa nɩ tɩn ŋwaanɩ.
14 Amʋ wʋ́ pa á tɩʋ kʋm ji di-dwəənu sɩ dwi-gɛ tiinə balʋ na gilimi abam tɩn na á cavɩɩra, yɩ ba dɩ balʋ maama na tɔgɩ da ba maa kɛ tɩn taa jɩgɩ abam ba goonə. 15 Abam na nɛ á lɛɛrʋ tɩntʋ, dwi-gɛ tiinə bam wʋ́ taa jɩgɩ abam ba twɩa yɩ ba mwana. Ba nan ta wʋ́ kwarɩ fʋʋnɩ dɩ amʋ na yɔɔrɩ a cɔgɩ abam te a ban-zɔŋɔ kʋm ŋwaanɩ tɩn. Amʋ Baŋa-Wɛ mʋ tagɩ kʋntʋ. 16 Kana lagɩ ka ji cɩnɩ dɩlʋ vɩan na cana tɩn mʋ, yɩ amʋ wʋ́ kwe-ka a ma a cɔgɩ abam a ti. Amʋ wʋ́ pa kana taa jaanɩ abam taan, á tɩʋ kʋm na wʋ́ ga wʋdiu dwi maama tɩn ŋwaanɩ. 17 Amʋ wʋ́ pa kana dɩ ga-vara ba á baŋa dɩ dam. Tɩ nan wʋ́ ti á biə maama sɩ á daa yɩ taá jɩgɩ biə. Yawɩ-cɛɛrʋ, dɩ tigurə, dɩ jara-kǝm wʋ́ tʋ á tɩtarɩ nɩ sɩ tɩ gʋ abam. Amʋ Baŋa-Wɛ mʋ tagɩ kʋntʋ.»