Zeruzalɛm nyɩnyʋgʋ kʋm
4
«Nabiinu, kwe warɩ n tiŋi n yigə nɩ, sɩ n daarɩ n bə bibəli dɩ yɩra nɩ sɩ sɩ lwǝni Zeruzalɛm tɩʋ kʋm na yɩ te tɩn. 2 Laan kɩ sɩ kʋ brɩ nɩ jar-kərə kaagɩ tɩʋ kʋm mʋ ba pu. Tiŋi kandwa, dɩ tɩɩrʋ n ja n din tɩʋ kʋm kəbrə kam yuu, sɩ n daarɩ n cwi vwə sɩ jar-kərə bam taa zʋʋrɩ ya wʋnɩ. Ta tiŋi dɛ sɩlʋ ba na wʋ́ kwe ba ma magɩ kəbrə kam ba bwəri tɩn n kaagɩ tɩʋ kʋm.a 3 N laan wʋ́ lagɩ luu zʋŋ-tanlaŋa mʋ sɩ ka ji kəbrə ka cɩ nmʋ dɩ tɩʋ kʋm kəbrə kam daanɩ. Pipiri n yibiyə n jeeri tɩʋ kʋm nɩnɛɛnɩ n tɩtɩ mʋ li-kʋ n pu dɩ najara. Kǝm dɩm kʋntʋ maŋɩ sɩ kʋ kaanɩ Yisɩrayɛlɩ dwi tiinə bam mʋ.4 Nmʋ laan wʋ́ pəni n jagwiə saŋa nɩ, sɩ kʋ brɩ nɩ n zɩŋɩ Yisɩrayɛlɩ dwi tiinə bam lwarɩm mʋ. Da yalʋ wʋnɩ nmʋ na wʋ́ pəni da tɩn yɩ maŋa kalʋ ba lwarɩm jɩnɩ na wʋ́ taa wʋ n yuu nɩ tɩn mʋ. 5 Nmʋ wʋ́ ta n tigi da da biə-yatɔ dɩ funʋgʋ (390) sɩ kʋ brɩ bɩna yalʋ wʋnɩ Yisɩrayɛlɩ tiinə bam na kɩ lwarɩm tɩn, sɩ dɛ maama zɩgɩ dɩ pa bɩnɩ. Da yam kʋntʋ wʋnɩ mʋ Yisɩrayɛlɩ dwi tiinə bam lwarɩm jɩnɩ wʋ́ taa wʋ n yuu nɩ.
6 Da yam kʋntʋ na tu ya ti, sɩ n pipiri n pəni n jazɩm saŋa kam nɩ da fiinna (40), sɩ kʋ brɩ nɩ n zɩŋɩ Zuda dwi tiinə bam lwarɩm. Da yam kʋntʋ dɩ wʋ́ zɩgɩ ya pa bɩna yalʋ Zuda tiinə dɩ na yaarɩ ba lwarɩm ŋwaanɩ tɩn mʋ. 7 Pipiri n jeeri Zeruzalɛm tɩʋ dɩ kʋ najara yam nyɩnyʋgʋ kʋm, sɩ n pu n ja-gulə kʋ baŋa nɩ n pwərisi n cɔgɩ-kʋ. 8 Amʋ lagɩ a kwe ŋʋnɩ mʋ a vɔ‑m a tiŋi da. N bá wanɩ n pipiri n pəni saŋa wʋdoŋ nɩ, kʋ na daɩ nɩ n zaŋɩ najara yam dɩ tɩʋ kʋm n ti.
9 La bəniŋə, dɩ caara, dɩ soonə, dɩ siə, dɩ mɩna, dɩ kadagab n kɩ-tɩ kambi-zɔŋɔ wʋnɩ, sɩ n daarɩ n ma-sɩ n wɔ dɩpɛ n ta n jɩgɩ n di. Wʋdiu kʋm kʋntʋ mʋ nmʋ wʋ́ ta n di da biə-yatɔ dɩ funʋgʋ (390) yalʋ nmʋ na wʋ́ ta n tigi n saŋa baŋa nɩ tɩn. 10 Nmʋ wʋ́ maŋɩ wʋdiu kʋm ja-bwaanʋ nana mʋ sɩ n ta n jɩgɩ n di kʋ maŋa kʋ maŋa dɛ maama wʋnɩ. 11 Nan ta pwəri na sɩ ba maŋɩ dɩ kunkolo-yi cicoro, sɩ n ta n jɩgɩ-ba n nyɔ kʋ maŋa kʋ maŋa dɛ maama wʋnɩ. 12 Nii wʋdiu kʋm nɩ kʋ yɩ maasa mʋ n jɩgɩ n di. Nan kwe nabiinǝ bəənu n ji dɛ sɩlʋ n na wʋ́ ma n wɔ dɩpɛ dɩm, yɩ n wɔ-dɩ mɛ nɔɔna bam maama na wʋ́ taa zɩgɩ yɩ ba nii tɩn.»
13 Baŋa-Wɛ laan ma ta DƖ wɩ: «Tɩntʋ brɩ Yisɩrayɛlɩ tiinə bam na wʋ́ kɩ te yɩ ba di wʋdiiru tɩlʋ na wʋ maŋɩ dɩ cullu tɩm tɩn dwi-gɛ tiinə bam tɩtarɩ nɩ, mɛ amʋ na wʋ́ zəli-ba sɩ ba taa zʋʋrɩ tɩn.»
14 Amʋ ma ta a wɩ: «A loori-m! Yuutu Baŋa-Wɛ, yɩ pa a kɩ kʋntʋ doŋ. Kʋ na zɩgɩ a biini nɩ sɩ kʋ yi lele, amʋ ta wʋ digimi a tɩtɩ dɩ wʋdiiru tɩlʋ na wʋ maŋɩ dɩ cullu tɩm tɩn. A brɩ a wʋ di wo-tɩkʋ, naa woŋo kʋlʋ ga-vara na jaanɩ ba gʋ tɩn.»c
15 Wɛ laan ma ləri DƖ wɩ: «Tɔ. A nan pɛ‑m cwǝŋǝ sɩ n kwe na-bəənu n ma n wɔ n dɩpɛ dɩm, sɩ n daa n yɩ ma nabiinu bəənu n wɔ-dɩ.»
16 DƖ ta ma ta DƖ wɩ: «Nabiinu, a lagɩ a pa Zeruzalɛm tɩʋ kʋm ga wʋdiu mʋ. Kʋ nɔn-biə bam wʋ́ taa larɩ wʋdiiru ba di fɩnfɩɩn yɩ liǝ jɩgɩ-ba. Ba ta wʋ́ taa maŋɩ na fɩnfɩɩn ba nyɔ dɩ wʋ-cɔgɔ. 17 Bɛŋwaanɩ, wʋdiiru dɩ na wʋ́ tiini tɩ taa jɩgɩ zʋrɩ. Tɩʋ kʋm nɔɔna bam na nii daanɩ, ba yɩra wʋ́ sɔɔrɩ mʋ. Ba maa wʋ́ bugi ba je ba lwarɩm dɩm ŋwaanɩ.»