3
O ta ma ta dɩ amʋ o wɩ: «Nabiinu, di kʋlʋ na tigi n yigə nɩ tɩn. Dʋnɩ tɔnɔ kʋm sɩ n daarɩ n vu n ŋɔɔnɩ dɩ Yisɩrayɛlɩ dwi tiinə bam.» 2 A dɩ ma puri a ni yɩ o pa-nɩ tɔnɔ kʋm pa a dʋnɩ-kʋ.a3 O daa ma ta dɩ amʋ o wɩ: «Nabiinu, dʋnɩ tɔnɔ kʋntʋ a na kwe a pa‑m tɩn maama n li n su n pugə.» A ma sɩɩnɩ a dʋnɩ-kʋ a li. Kʋ yɔɔrɩ kʋ sʋna a ni nɩ mʋ, nɩ tʋʋrʋ na yɩ te tɩn.
4 O ma ta dɩ amʋ o wɩ: «Ja amʋ kwǝrǝ kam n vu n pa Yisɩrayɛlɩ dwi tiinə bam sɩ ba ni a taanɩ dɩm. 5 A na tʋŋɩ-m sɩ n vu balʋ tee nɩ tɩn daɩ nɔn-gɛ sɩlʋ taanɩ na yɩ dɩ yɩra, yɩ dɩ kuri nim cana tɩn. Kʋ nan yɩ Yisɩrayɛlɩ tiinə bam mʋ a wɩ n ve ba te, 6 sɩ kʋ daɩ sa-tɩɩnɩ dɩlʋ taanɩ na yɩ dɩ yɩra, yɩ dɩ cana sɩ n wanɩ n ni dɩ kuri tɩn. Kʋ ya na yɩ bantʋ tee nɩ mʋ a tʋŋɩ-m, ba yaá cəgi taanɩ dɩm. 7 Kʋ nan na yɩ te tɩn, Yisɩrayɛlɩ dwi tiinə bam bá sɛ sɩ ba cəgi n taanɩ dɩm, ba na vaɩ sɩ ba ni amʋ tɩtɩ kwǝrǝ tɩn ŋwaanɩ. Bɛŋwaanɩ, ba yɔɔrɩ ba yɩ zwabani-nyɩna mʋ yɩ ba jɩgɩ yi-dɛɛrɩ. 8 Nii mʋ! A lagɩ a pa nmʋ dɩ taa jɩgɩ wʋ-dɛɔ dɩ yi-dɛɛrɩ mʋ nɩ bantʋ na yɩ te tɩn. 9 Cɩga tɩn, a lagɩ a pa n wʋʋ taa tiini kʋ dana kʋ gaalɩ, nɩ piu na dana te tɩn. Kʋntʋ ŋwaanɩ, yɩ ta n kwarɩ fʋʋnɩ dɩ ba. Yɩ pa n wʋʋ ga baarɩ ba ŋwaanɩ, dɩ ba na maŋɩ ba yɩ vɩɩna te maama tɩn dɩ.»
10 O ta maa wɩ: «Nabiinu, fɔgɩ n cəgi a taanɩ dɩm lanyɩranɩ, sɩ n daarɩ n kwe kʋlʋ maama a na wʋ́ ta a brɩ-m tɩn n kɩ n yuu nɩ. 11 Nmʋ laan ma n wʋ́ vu n dwi tiinə balʋ ba na jaanɩ-ba jara-kǝm baŋa nɩ ba kalɩ ba vu Babilɔnɩ tɩʋ nɩ tɩn te, sɩ n ŋɔɔnɩ dɩ ba. Ta dɩ ba wɩ: ‹Taanɩ dɩntʋ yɩ Yuutu Baŋa-Wɛ mʋ tagɩ-dɩ!› Ba na sɛ ba cəgi n taanɩ dɩm, naa ba na maŋɩ ba vɩn dɩ, sɩ n ta dɩ ba kʋntʋ doŋ.»
12 Viub laan ma fuli kʋ gɔ-nɩ kʋ zɩgɩ wɛɛnɩ. A ma ni sɔɔ na nuŋi a kwaga nɩ yɩ kʋ tiini kʋ mumunə. Kʋ yɩ wo-kɩnkagɩla na brɩ Baŋa-Wɛ paarɩ-zulǝ yam tɩn mʋ zaŋɩ ya jǝgǝ kam nɩ. 13 A ma ni wo-kɩnkagɩla yam vwana na magɩ daanɩ yɩ ya sɔɔ kʋm zaŋɩ te tɩn, kʋ wǝli dɩ wo-gugullu tɩm dɩ na wʋ ya təŋə nɩ tɩn sɔɔ kʋm. Kʋ yɔɔrɩ kʋ mumuni zanzan. 14 Viu kʋm daa ta ma gɔ-nɩ kʋ ja kʋ viiri. A maa yɔɔrɩ a ve yɩ a wʋʋ cɔgɩ. A banɩ dɩ ma tiini dɩ zaŋɩ. Baŋa-Wɛ dam dɩm nan ya tiini dɩ daga a baŋa nɩ mʋ. 15 A ma vu a yi balʋ ba na jaanɩ jara-kǝm baŋa nɩ ba kalɩ ba ba yɩ ba laan zʋʋrɩ Tɛl-abibi nɩ tɩn te. Je sɩm kʋntʋ bwələ dɩ Kebarɩ bugə kam. A ma maŋɩ ba na zʋʋrɩ mɛ tɩn da yarpɛ. A na jǝni ba tɩtarɩ nɩ kʋntʋ tɩn, a yɩra sɔɔrɩ mʋ.c
Wɛ na kaanɩ Yisɩrayɛlɩ tiinə te tɩn
16 Da yarpɛ yam kʋntʋ kwaga nɩ mʋ Baŋa-Wɛ kwǝrǝ tu amʋ te yɩ DƖ wɩ:
17 «Nabiinu, a lɩ nmʋ mʋ a zɩgɩ sɩ n ta n yɩrɩ Yisɩrayɛlɩ dwi tiinə bam n pa-nɩ. Nmʋ nan maŋɩ sɩ n cəgi a kwǝrǝ kam n daarɩ n lwəni-ka n ma n kaanɩ-ba mʋ n pa-nɩ. 18 Amʋ na pɛ nɔn-balɔrɔ kwǝrǝ nɩ: ‹N maŋɩ sɩ n tɩ mʋ,› yɩ nmʋ wʋ ve n kaan‑o, kʋ tu wʋ́ sɩɩnɩ o tɩ o lwarɩm kikiǝ ŋwaanɩ. Nmʋ na wʋ maŋɩ kʋ kuri n brɩ-o sɩ o yagɩ o kǝm-balwaarʋ tɩm sɩ o wanɩ o ŋwɩa o joŋi, o maŋɩ sɩ o tɩ mʋ. A nan wʋ́ bwe nmʋ mʋ o tʋʋnɩ dɩm baŋa nɩ. 19 Nmʋ nan na ve n kaanɩ kʋ tu, yɩ o na vɩn sɩ o za o kǝm-balwaarʋ yam dɩ o tɩtʋŋ-lwaannʋ tɩm, o ta wʋ́ tɩ mʋ o lwarɩm kikiǝ yam ŋwaanɩ. Nmʋ dɩ maa wʋ́ bwəli n ban ŋʋna.
20 Nɔn-ŋʋm na yagɩ tɩtʋŋ-ŋʋna kikiə yɩ o sɩŋɩ sɩ o taa tʋŋɩ lwarɩm, yɩ amʋ na cɩgɩ o cwǝŋǝ, kʋ tu dɩ maŋɩ sɩ o tɩ mʋ. Nmʋ na wʋ kaan‑o, oó sɩɩnɩ o tɩ o lwarɩm dɩm ŋwaanɩ. Amʋ yigə bá taa wʋ o kǝm-laarʋ tɩm wʋnɩ, yɩ a nan wʋ́ bwe‑m o tʋʋnɩ dɩm baŋa nɩ. 21 Nmʋ nan na kaanɩ kʋ tu nɩ o daa yɩ kɩ lwarɩm pa o sɩɩnɩ o wʋ kɩ-dɩ, o daa bá tɩ, o na sɛ kaanɩm dɩm tɩn ŋwaanɩ. Nmʋ dɩ maa wʋ́ bwəli n ban ŋʋna.»
22 Dáanɩ mʋ Baŋa-Wɛ dam dɩm wʋ amʋ baŋa nɩ. DƖ ma ta dɩ amʋ DƖ wɩ: «Zaŋɩ n nuŋi n vu tɩ-kamparɩ laŋa kam seeni, sɩ a lagɩ a ŋɔɔnɩ dɩ nmʋ daanɩ mʋ.» 23 A ma sɩɩnɩ a vu tɩ-kamparɩ sɩm. A ma na nɩ Baŋa-Wɛ paarɩ-zulǝ yam wʋ je sɩm kʋntʋ nɩ. Kʋ nyɩ dɩ a ya na nɛ-ya te yɩ a wʋ Kebarɩ bugə kam ni nɩ tɩn mʋ. A ma tʋ a vin a yibiyə tɩga nɩ.
24 Wɛ Joro kʋm ma fuli kʋ zʋ-nɩ pa a zaŋɩ a zɩgɩ wɛɛnɩ. Baŋa-Wɛ ma ŋɔɔnɩ dɩ amʋ DƖ wɩ: «Joori n vu sɔŋɔ, sɩ n pɩ n tɩtɩ n yagɩ digə nɩ. 25 Nabiinu, nan ta lwarɩ nɩ baá kwe ŋʋnɩ mʋ ba vɔ‑m sɩ n daa yɩ wanɩ n nuŋi n zʋ kɔgɔ wʋ. 26 A maa wʋ́ pa n ni məəri pa n jǝni da cɩmm. N bá wanɩ n kaanɩ-ba, dɩ ba na yɔɔrɩ ba yɩ zwabani-nyɩna te tɩn dɩ. 27 Maŋa nan na yiǝ sɩ a ŋɔɔnɩ dɩ nmʋ, a laan wʋ́ puri n ni sɩ n daarɩ n ta dɩ ba nɩ: ‹Taanɩ dɩntʋ yɩ Yuutu Baŋa-Wɛ mʋ tagɩ-dɩ.› Balʋ na wʋ́ cəgi taanɩ dɩm tɩn wʋ́ yɔɔrɩ ba sɛ-dɩ. Balʋ dɩ na wʋ́ vɩ-dɩ tɩn maŋɩ sɩ ba taa yɩ kʋntʋ. Bɛŋwaanɩ, ba dwi dɩm yɩ zwabani-nyɩna mʋ.»