Wɛ na bəŋi Ezekɩyɛlɩ te tɩn
2
O ma ta dɩ amʋ o wɩ: «Nabiinu, zaŋɩ n zɩgɩ wɛɛnɩ sɩ a ŋɔɔnɩ dɩ nmʋ.» 2 O na yɔɔrɩ o wʋra o ŋɔɔnɩ kʋntʋ tɩn, mʋ viua fuli kʋ zʋ-nɩ, yɩ kʋ gɔ-nɩ kʋ zɩgɩ wɛɛnɩ. Amʋ ma cəgi o na ŋɔɔnɩ kʋlʋ dɩ amʋ tɩn.3 O ma ta o wɩ: «Nabiinu, a lagɩ a tʋŋɩ-m Yisɩrayɛlɩ tiinə bam tee nɩ mʋ. Ba nan yɩ dwi dɩlʋ nakɔɔrɩ na daga tɩn mʋ. Ba dɩ ba nabaara bam nuŋi amʋ kwaga nɩ, yɩ ba ta vɩ-nɩ dɩ zɩm maama. 4 Amʋ na tʋŋɩ-m balʋ tee nɩ tɩn yi dana yɩ ba zwa dɩ ba ni taanɩ. Nan ta dɩ ba nɩ: ‹Taanɩ dɩntʋ yɩ Yuutu Baŋa-Wɛ mʋ tagɩ-dɩ!› 5 Ba na sɛ n taanɩ dɩm, naa ba na vɩ-dɩ, kʋ ba fɩan. Ba maŋɩ ba yɩ zwabani-nyɩna mʋ. Kʋ laan wʋ́ pa ba lwarɩ nɩ Wɛ nijoŋnu tu o wʋ ba tɩtarɩ nɩ. 6 Nabiinu, kʋ nan na yɩ nmʋ, yɩ ta n kwarɩ fʋʋnɩ dɩ ba. Nan yɩ ta n fʋna dɩ wǝǝnu tɩlʋ ba na taɩ ba pa‑m tɩn. Ba ŋwɛ sɩm nyɩ dɩ sabar-mangwəli dɩ gʋlsaarʋ mʋ na gilimi‑m tɩ kɩ tɩtarɩ nɩ, yɩ ba ni-taanɩ ta nyɩ dɩ nɔŋɔ na dʋnɩ nɔɔnʋ te tɩn. Dɩ kʋ dɩ, yɩ pa n yɩra taa saɩ ba ŋwɛ sɩm naa ba tʋrʋ tɩm ŋwaanɩ. Ta n ye nɩ ba dwi dɩm yɩ vɩɩna mʋ.b 7 Nan yɔɔrɩ n ta amʋ taanɩ dɩm n brɩ-ba, ba zɩ na ti yigə sɩ ba cəgi, naa ba na vɩn mʋ dɩ. Bɛŋwaanɩ, ba zwabaniə kam kɛ jɩŋa mʋ. 8 Sɩ kʋ na yɩ nmʋ nabiinu, fɔgɩ n cəgi a na jɩgɩ kʋlʋ sɩ a ta dɩ nmʋ tɩn. Yɩ lwǝni vɩɩna dwi dɩm kʋntʋ kikiə yam doŋ. Puri n ni sɩ n di kʋlʋ maama a na lagɩ a pa‑m tɩn.»