Wɛ Nijoŋnu
Ezekɩyɛlɩ Tɔnɔ
Baŋa-Wɛ na lɩ kʋlʋ DƖ brɩ Ezekɩyɛlɩ tɩn
1
Kʋ dɛɛn na yi bɩna fiintɔ bɩnɩ dɩm canɩ sɩna cana kam da yanu dɛ dɩm nɩ tɩn mʋ amʋ Ezekɩyɛlɩ zɩgɩ Kebarɩ bugə kam ni nɩ. A maa wʋra dɩ Zuda tiinə balʋ ba na kalɩ jara-kǝm baŋa nɩ ba ja vu Babilɔnɩ tɩn. Amʋ dɛɛn na wʋra kʋntʋ tɩn, mʋ a nɛ wɛyuu kʋm na pʋrɩ pa Wɛ vɩɩrɩ o tɩtɩ o brɩ-nɩ. 2 Bɩnɩ dɩm kʋntʋ yɩ ba dɛɛn na jaanɩ Zuda pɛ Zekonɩa ba kalɩ ba vu je sɩm kʋntʋ yɩ bɩna yanu kɛ tɩn mʋ.a Cana kam da yanu dɛ dɩm nɩ 3 Baŋa-Wɛ kwǝrǝ dɛɛn yi amʋ yɩ a zɩgɩ Kebarɩ bugə kam ni nɩ mʋ Babilɔnɩ tɩʋ wʋnɩ. A ma maanɩ nɩ Baŋa-Wɛ dam dɩm tu amʋ wʋlʋ na yɩ Buzi bu Ezekɩyɛlɩ yɩ a yɩ Wɛ kaanɩm tu tɩn baŋa.4 Amʋ dɛɛn kwǝni a yuu a nii a na vu-dɩʋ na nuŋi jazɩm baŋa seeni kʋ fʋʋrɩ kʋ bɩɩna. Kunkoŋ-kamunu ma da kʋ baŋa kʋ ba yɩ kʋ pɩpɩlɩ je maama dɩ dam. Pooni dɩlʋ na tiini dɩ nyɩɩnɩ tɩn maa gilimi kʋ maama. Kunkoŋo kʋm tɩtarɩ mim dɩm yɔɔrɩ dɩ sɩɩnɩ mʋ nɩ canna na tiini ka nyɩɩnɩ te tɩn. 5 A ma nii a na wo-kɩnkagɩla yana na ŋwɩ tɩn mim dɩm tɩtarɩ nɩ.b Ya dɛɛn nyɩ dɩ nabiinǝ mʋ, 6 yɩ wo-kɩnkagɩlɩ maama laan jɩgɩ yibi sɩna, dɩ vwana yana sɩ tɩ taa maa jaana. 7 Ya nɛ sɩm nan yɔɔrɩ sɩ twɩ mʋ, yɩ ya napra seeni maa nyɩ dɩ nʋa napɔɔna yalʋ na nyɩɩnɩ nɩ canna na nyɩɩnɩ te tɩn. 8 Wo-kɩnkagɩla sɛ sɩna sɩm maama maa jɩgɩ nabiinǝ jɩa ya vwana yam kuri nɩ mʋ. Ya yana yam maama maa jɩgɩ yibiyə dɩ vwana tɩntʋ doŋ: 9 Ya ma kwe ya vwana ya dwe daanɩ. Wo-kɩnkagɩlɩ maama yɔɔrɩ dɩ ve dɩ yigə na jeeri mɛ tɩn mʋ, pa dɩ ve yɩ dɩ ba pipirǝ.
10 Ya maama jɩgɩ yibi sɩna sɩna mʋ na yɩ sɩ yɩra: Dɩdʋa maama jɩgɩ nabiinu yibiyə dɩ yigə seeni. Nyoŋo yibiyə maa wʋ dɩ jazɩm seeni. Na-bala yibiyə maa wʋ dɩ jagwiə seeni. Kaloŋ-zɔŋɔ yibiyə dɩ maa wʋ dɩ kwaga kam seeni. 11 Wo-kɩnkagɩlɩ maama vwana zǝŋi wɛɛnɩ mʋ, yɩ ya yale yarɩgɩ ya dwe wo-kɩnkagɩla yalʋ na zɩgɩ ya yǝri dɩ yɩra nɩ tɩn vwana yam jazɩm dɩ jagwiə seeni. Kʋ na daarɩ vwana yale yadonnə yam tɩn, dɩ laan ma kwe yantʋ dɩ kwǝli dɩ yɩra yam. 12 Wo-kɩnkagɩlɩ maama mʋ yɔɔrɩ dɩ ve yigə yɩ dɩ ba pipirǝ. Ya maa ve ya joro kʋm na brɩ sɩ ya vu mɛ tɩn. 13 Wo-kɩnkagɩla yam nyɩ dɩ min-mɔɔla naa min-zwǝǝnu mʋ wʋ ya tɩtarɩ nɩ. Mim dɩm maa zaŋa ya tɩtarɩ nɩ yɩ dɩ ve yigə dɩ kwaga. Dɩ tiini dɩ nyɩɩnɩ zanzan mʋ yɩ dɩ pɩpɩla. 14 Wo-kɩnkagɩla yam tɩtɩ maa yɔɔrɩ ya ve yigə dɩ kwaga lɩla nɩ dʋa pɩpɩlɩm tɩn.
15 A na zɩgɩ da a nii wo-kɩnkagɩla yam kʋntʋ tɩn, mʋ a nɛ wo-gugulu na tigi tɩga nɩ ya maama dɩdʋa dɩdʋa təŋə nɩ. 16 Wo-gugullu tɩna tɩm nyɩ daanɩ mʋ, yɩ tɩ nyɩɩna nɩ kandwa-ŋʋnac. Wo-gugulu maama maa nyɩ dɩ kʋ jɩgɩ wo-gugulu kʋdoŋ na wʋ kʋ wʋnɩ kʋ garɩ-kʋ tɩn. 17 Wo-gugullu tɩm maa na ve mɛ maama, tɩ wʋ́ taa yɔɔrɩ tɩ ve wo-kɩnkagɩla yam yigə dɩdʋa na yɔɔrɩ mɛ tɩn, yɩ tɩ ba pipirǝ. 18 Wo-gugullu tɩm niə dɛɛn dwara mʋ yɩ ya tiini ya jɩgɩ fʋʋnɩ. Yiǝ mʋ yɔɔrɩ ya faarɩ niə yam je maama.d
19 Wo-kɩnkagɩla yam na zaŋɩ ya maa veǝ, wo-gugullu tɩm dɩ tɔgɩ dɩ-ya tɩ ve mʋ. Wo-kɩnkagɩla yam maa na jaanɩ ya maa diini wɛɛnɩ, wo-gugullu tɩm dɩ wʋ́ jaanɩ tɩ din wɛɛnɩ mʋ. 20 Wo-kɩnkagɩla yam joro dɛɛn wʋ wo-gugullu tɩm wʋnɩ mʋ. Kʋntʋ ŋwaanɩ, joro kʋm maa na laga sɩ ya vu mɛ maama, ya maŋɩ sɩ ya vu dáanɩ mʋ, yɩ wo-gugullu tɩm dɩ wʋ́ zaŋɩ tɩ tɔgɩ tɩ maa veǝ. 21 Kʋ na yɩ te tɩn, wo-kɩnkagɩla yam na yǝni ya veǝ, wo-gugullu tɩm dɩ tɔgɩ dɩ-ya tɩ ve mʋ. Ya nan na maŋɩ mɛ ya zɩgɩ, wo-gugullu tɩm dɩ wʋ́ taa zɩgɩ mʋ. Ya daa na zaŋɩ ya jaanɩ wɛɛnɩ, wo-gugullu tɩm dɩ maa tɔgɩ-ya tɩ jaana. Bɛŋwaanɩ, wo-kɩnkagɩla yam joro wʋ wo-gugullu tɩm wʋnɩ mʋ.
22 A ma nii wo-kɩnkagɩla yam yum tɩm baŋa kam seeni a na woŋo na nyɩ dɩ wɛyuu tɩlampolo tɩn na tigi da. Ka yɔɔrɩ ka jɩgɩ nɩnwaŋa yɩ ka nyɩɩnɩ je maama mʋ nɩ niu na yɩ te tɩn. 23 Wɛyuu tɩlampolo kʋm kuri seeni, wo-kɩnkagɩlɩ maama yarɩgɩ dɩ vwana mʋ pa ya dwe dɩdoŋ vwana. Wo-kɩnkagɩlɩ maama ta ma kwe vwana yale dɩ ma kwǝli dɩ yɩra yam. 24 Wo-kɩnkagɩla yam na yǝni ya jaana, a ni ya vwana yam na wuuri te tɩn mʋ. Ya sɔɔ kʋm nyɩ dɩ dʋ-fara na cuuri te tɩn mʋ. Kʋ ta maa nyɩ dɩ Dam-fɔrɔ Tu Wɛ dɩm tɩtɩ kwǝrǝ, naa jar-kərə kɔgɔ sɔɔ na yɩ te tɩn. Kʋ daarɩ ya na jaanɩ ya ti, ya yǝni ya yagɩ ya vwana yam mʋ.
25 Wo-kɩnkagɩla yam na zɩgɩ da kʋntʋ yɩ ya vwana yam wʋ tɩga nɩ tɩn, a ma ni kwǝrǝ na nuŋi pwələ kalʋ na wʋ ya yum tɩm baŋa seeni tɩn. 26 Wɛyuu tɩlampolo kʋm baŋa seeni woŋo maa wʋra, kʋ na nyɩ dɩ paarɩ jangɔŋɔ, yɩ Safiirie mʋ ba mɛ ba kɩ-kʋ. Woŋo kʋdoŋ dɩ maa wʋ wɛyuu baŋa seeni, kʋ na je paarɩ jangɔŋɔ kʋm baŋa nɩ yɩ kʋ nyɩ dɩ nabiinu na yɩ te tɩn.f 27 A ma nii a na nɩnɛɛnɩ kʋ na zɩgɩ kʋ təŋə seeni sɩ kʋ taa diini tɩn, kʋ yɔɔrɩ kʋ nyɩɩnɩ nɩ canna na wʋ mim wʋnɩ te tɩn mʋ. Kʋ ta na zɩgɩ kʋ təŋə nɩ sɩ kʋ taa tuǝ tɩn, kʋ nyɩ dɩ kʋ yɩ mim mʋ. Pooni dɩlʋ na tiini dɩ nyɩɩnɩ tɩn dɩ ma gilimi kʋ maama. 28 Kʋ lam dɩm yɩ nɩnɛɛnɩ dʋa na nɩgɩ ka waarɩ yɩ manlaa-taŋa yǝni ka garɩ wɛɛnɩ te tɩn mʋ.
Nyɩnyʋgʋ kʋm kʋntʋ brɩ-nɩ Baŋa-Wɛ paarɩ-zulǝ yam na yɩ te tɩn mʋ. A na nɛ kʋntʋ tɩn, mʋ a vin a yibiyə tɩga nɩ, yɩ a ni nɔɔnʋ kwǝrǝ na ŋɔɔnɩ dɩ amʋ.g