Baŋa-Wɛ na waarɩ Zeruzalɛm DƖ ti te tɩn
4
Nii səbu-sɩŋa kam na gɛ ka lam dɩm te!Səbu-sɩŋ-laa kʋm daa ba jɩgɩ yuu.
Kandwa-ŋʋna tɩm laan jagɩ,
pa tɩ tigi tɩʋ kʋm cwe sɩm maama nɩ.
2 Siyɔn tɩʋ nɔɔna bam dɛɛn tiini ba jɩgɩ duuni,
nɩ səbu-sɩŋa na yɩ te tɩn mʋ.
Lele kʋntʋ ba laan nan nyɩ dɩ kambi sɩlʋ
kamɔ-mɔrʋ na mɔɔnɩ tɩn mʋ.
3 Kʋ na yɩ ga-kakuri, sɩ yǝni sɩ kwe yɩlɩ
sɩ ma kɔnɩ sɩ biə.
Amʋ nɔɔna bam nan vɩn ba biə mʋ,
nɩ nakɩlakwarʋa na kɩ tɩ biə te kagʋa yuu nɩ tɩn.
4 Na-nyɔm mʋ lagɩ dɩ gʋ biə bam.
Ba niə dɩ ma kʋ ya pɩɩrɩ.
Ba yɔɔrɩ ba loori wʋdiu mʋ,
yɩ nɔɔn-nɔɔnʋ ba sɛ o kɩ o pa-ba.
5 Balʋ dɛɛn na jɩgɩ wʋdi-ŋʋnnʋ ba di nɩ pwa te tɩn,
kana laan wʋra ka gʋ-ba tɩʋ kʋm cwe sɩm nɩ mʋ.
Balʋ nan ya na jɩgɩ ywəəni ba di tɩn,
laan mʋ tigi weeru puuri baŋa nɩ.b
6 A nɔɔna bam na nɛ waarɩm dɩlʋ tɩn daga
dɩ dwe dɩlʋ Sodɔm tiinə na nɛ tɩn.
Bantʋ dɛɛn nɛ cɔgɩm bɩdwɩ baŋa nɩ mʋ,
yɩ nɔɔn-nɔɔnʋ tǝrǝ sɩ o wǝli-ba.
7 Zeruzalɛm dɩdɛɛra bam dɛɛn tiini ba lana zanzan.
Ba maa yɩ nɔn-pwəənu.
Ba ta ma kwɛ ba yɩra pa ya nyɩɩna nɩ kandwa-ŋʋna te.
Ba maa jɩgɩ dam dɩ yazurə lanyɩranɩ.
8 Ba yibiyə laan yɩ liirə liirə ka dwe sambinnu mʋ.
Ba na nuŋi pooni, nɔɔna warɩ sɩ ba lwarɩ-ba.
Ba yɩra yam ma kwaarɩ ya tanɩ ba kwi nɩ.
Ba ya-nwana yam ma kʋ, nɩ dɛ na kʋgɩ te tɩn.
9 Balʋ na tɩgɩ najara wʋnɩ tɩn tʋʋnɩ dɩm
maŋɩ dɩ garɩ kana na gʋ balʋ tɩn.
Bɛŋwaanɩ, kana kam jɩgɩ-ba ka gʋɩ fɩɩn fɩɩn mʋ sɩ ba ba ti,
karɩ sɩm na wʋ kɩ wʋdiiru tɩn ŋwaanɩ.
10 Kaana balʋ na yɩ pu-bwən-nyɩna tɩn
mʋ mɛ ba tɩtɩ jɩn ba gʋ ba biə ba di.
Ba saŋɩ ba biə mʋ ba di,
sɩ ba wəri tɩʋ kʋm cɔgɩm baŋa nɩ.
11 Baŋa-Wɛ nan yɔɔrɩ DƖ pa DƖ banɩ tiini dɩ zaŋɩ mʋ.
DƖ ma pa o ban-lʋm dɩm tʋ dɩbam baŋa nɩ.
Dɩntʋ mʋ dwe mim sɩ dɩ di Siyɔn wʋnɩ.
Dɩ ma zwɛ tɩʋ kʋm kabri-kuri dɩm tɩtɩ kulə.
12 Lʋgʋ baŋa pwa bam dɩ nabiinǝ je maama nɩ
ya ba bʋŋɩ nɩ:
dɩbam dʋna wʋ́ na cwǝŋǝ
sɩ ba zʋ Zeruzalɛm wʋnɩ ba cɔgɩ tɩʋ kʋm.
13 Kʋntʋ nan sɩɩnɩ kʋ kɩ.
Kʋ maa yɩ tɩʋ kʋm nijoŋnə
dɩ ba kaanɩm tiinə lwarɩm dɩm ŋwaanɩ mʋ.
Bɛŋwaanɩ, bantʋ jɩgɩ nɔn-ŋʋna mʋ tɩʋ kʋm wʋnɩ
ba gʋɩ kafɛ ŋwaanɩ.
14 Ba laan nan kaagɩ tɩʋ kʋm cwe sɩm yuu nɩ mʋ
ba taana ba beeri cwǝŋǝ, nɩ lilwǝ na kɩ te tɩn.
Ba na tiini ba digimi ba tɩtɩ dɩ nɔɔna jana te tɩn,
pɛ nɔɔna kwarɩ sɩ ba dwe ba yɩra,
ba na wʋ maŋɩ dɩ cullu tɩm tɩn ŋwaanɩ.
15 Nɔɔna tɔɔlɩ ba dɩ ba zwa nɩ mʋ ba wɩ:
«Lagɩ-na je dɩ́ tee nɩ, sɩ á digimi á tɩtɩ zanzan!
Yɩ dwe-na dɩbam!»
Ba nan na kaagɩ tɩɩnɩ dɩdonnǝ nɩ ba beeri jǝŋǝ je tɩn,
dwi-gɛ tiinə ta ba taanɩ ba wɩ:
«Dɩ́ bá sɛ sɩ ba taa zʋʋrɩ dɩbam tɩtarɩ nɩ.»
16 Kʋ nan yɩ Baŋa-Wɛ tɩtɩ mʋ jagɩ-ba DƖ yagɩ.
DƖ yigə daa tǝrǝ dɩ ba.
Nɔɔna daa ba nɩgɩ kaanɩm tiinə bam.
Nakwa bam dɩ maa ba naɩ zulə nɔɔna tee nɩ.
17 Dɩbam nan ya nii cwǝŋǝ nɩ mʋ,
sɩ dɩ́ doonə na wʋ́ ba ba wǝli dɩbam, yɩ dɩ́ ga.
Dɩ́ maa zɩgɩ dɩ́ tɩʋ kʋm nayuni nɩ dɩ́ yɔɔrɩ dɩ́ niə,
yɩ tɩʋ kʋlʋ dɩ́ na beeri kʋ zǝnǝ tɩn wʋ tu.
18 Dɩ́ dʋna bam yɔɔrɩ ba yɩrɩ dɩ́ na-vəli maama mʋ.
Dɩ́ daa warɩ dɩ́ tɩʋ kʋm cwe sɩm yuu nɩ sɩ dɩ́ taa veǝ.
Maŋa kam yiǝ sɩ dɩ́ tɩʋ kʋm cɔgɩ.
Dɩ́ na wʋ́ na dɩ́ lɛɛrʋ maŋa kalʋ tɩn yiǝ!
19 Balʋ na zəli dɩbam sɩ ba ja tɩn
nyɩ dɩ maarʋ na nuŋi wɛyuu nɩ tɩ tu tɩ zi wǝǝnu te tɩn mʋ.
Dɩ́ na duri dɩ́ din pweeru yuu tɩn,
mʋ ba pɛ dɩbam kwaga ba pu.
Dɩ́ na yɔɔrɩ dɩ́ zʋ kagʋa kam wʋnɩ tɩn,
ba ta li dɩbam da.c
20 Ba ma cɩ cɩkʋ ba ja Baŋa-Wɛ na tiŋi pɛ wʋlʋ DƖ pa dɩbam tɩn,
yɩ wʋntʋ ya mʋ pɛ dɩbam ŋwɩa.
Dɩ́ nan ya tɩɩnɩ nɩ dɩ́ na zʋʋrɩ o woro kʋm wʋnɩ tɩn,
tɩɩnɩ dɩlʋ na gilimi dɩbam tɩn bá wanɩ dɩbam dɩ di.d
21 Abam Edɔm dwi tiinə bam, á wʋ́ taá jɩgɩ wʋpolo na?
Abam balʋ na zʋʋrɩ Usi tɩga kam nɩ tɩn wʋ́ taá caka na?
Nan lwarɩ-na nɩ Wɛ banɩ wʋ́ zaŋɩ abam dɩ baŋa nɩ.
Á wʋ́ nyɔ DƖ ban-lʋm dɩm á su yɩ á daarɩ á na á cavɩɩra,
nɩ dɩbam na nɛ te tɩntʋ tɩn.
22 Abam Siyɔn tiinə bam,
waarɩm dɩlʋ á na nɛ á kəm-balwaarʋ ŋwaanɩ tɩn wʋ́ kɛ.
Wɛ bá yagɩ abam sa-tɩʋ nɩ yigə yigə sɩ kʋ daanɩ.
Kʋ daarɩ, kʋ na yɩ abam Edɔm tiinə bam,
DƖ lagɩ DƖ waarɩ abam mʋ á lwarɩm ŋwaanɩ,
sɩ nɔɔna lwarɩ nɩ á kǝm-balwaarʋ gaalɩ.