Zeruzalɛm tiinə wɛ-loro kʋm
5
Dɩ́ Tu Baŋa-Wɛ, guli kʋlʋ na yi dɩbam tɩn.Nii n na dɩ́ yuu na tiini kʋ yáalɩ te tɩn!
2 Vərə laan mʋ joŋi dɩbam tɩga kam ba te.
Dɩ́ sam dɩm laan ma ji vərə nyɩm.
3 Dɩ́ kwə daa tǝrǝ yɩ ba daarɩ dɩbam bɩtara.
Dɩ́ niinə dɩ laan ma ji kadənə.
4 Dɩ́ maŋɩ sɩ dɩ́ yəgi na balʋ dɩ́ na nyɔ tɩn dɩ səbu mʋ.
Kʋ maa na yɩ dɩ́ dɛ sɩm dɩ,
dɩ́ wʋ́ lɩ səbu zanzan mʋ sɩ dɩ́ ma na-sɩ.
5 Dɩ́ dʋna mʋ pɛ dɩ́ kwaga ba pu.
Dɩ́ yɔɔrɩ dɩ́ bugi mʋ, yɩ siun tǝrǝ kʋ paɩ dɩbam.
6 Dɩ́ laan tʋ dɩ́ pa Ezipi dɩ Asiiri tiinə mʋ,
sɩ ba pa dɩbam wʋdiu sɩ dɩ́ ma dɩ́ wəri.
7 Dɩ́ kwə mʋ kɩ lwarɩm, ba nan daa tǝrǝ.
Wɛ ma waarɩ dɩbam bantʋ lwarɩm ŋwaanɩ.
8 Dɩ́ dʋna bam gambɛ laan mʋ te dɩbam.
Nɔɔn-nɔɔnʋ nan tǝrǝ sɩ o joŋi dɩbam ba jɩŋa nɩ o yagɩ.
9 Dɩ́ yǝni dɩ́ dʋlɩ dɩ́ ŋwɩa mʋ dɩ́ yagɩ sɩ dɩ́ na wʋdiu.
Bɛŋwaanɩ, nɔn-gʋra mʋ kaagɩ ba zi nɔɔna kagʋa kam nɩ.
10 Dɩ́ yɩra yam maama maa lonɩ zanzan.
Dɩbam yatana kam lʋnɩ mʋ nɩnɛɛnɩ kurə tɩte.
11 Baara yǝni ba zi dɩ́ kaana bam Siyɔn tɩʋ kʋm nɩ.
Ba maa fɩn dɩ́ busankan-pwalɩ sɩm Zuda tɩɩnɩ dɩm maama nɩ ba laga.
12 Ba jaanɩ dɩ́ tɩʋ kʋm dɩdɛɛra mʋ ba kuuri dɩ ŋʋnɩ ba gʋ.
Ba maa wʋ nɩgɩ dɩ́ nakwa bam maŋa dɩ maŋa!
13 Ba jɩgɩ dɩ́ nɔn-dʋnnʋ tɩm mʋ ba cʋ muni.
Bəkəri biə dɩ maŋɩ sɩ ba zɩŋɩ dɛ sɩlʋ na dunǝ sɩ dwe-ba tɩn mʋ.
14 Dɩ́ tɩʋ kʋm nakwa daa warɩ tɩʋ kʋm manchoŋo ni nɩ sɩ ba jǝni.
Nɔn-dʋnnʋ tɩm maa ba magɩ gungwe.
15 Wʋpolo kikiə maama je dɩbam tee nɩ.
Dɩ́ jɔŋɔ magɩm maama laan ləni kʋ ji kərə mʋ.
16 Dɩ́ nɩnwaŋa kam maama je.
Lɛɛrʋ ma yi dɩbam, dɩ́ lwarɩm dɩm ŋwaanɩ.
17 Kʋntʋ ŋwaanɩ dɩ́ wʋʋ maama je.
Dɩ́ daa ba naɩ lanyɩranɩ, dɩ́ yiǝ na suli dɩ yi-na tɩn ŋwaanɩ.
18 Bɛŋwaanɩ, Siyɔn piu kʋm laan tigi dɩ di-dwəənu yɩranɩ mʋ.
Ga-kakuri dɩ laan maa kaagɩ tɩ wʋnɩ sɩ beerǝ.
19 Dɩ́ Tu Baŋa-Wɛ, nmʋ yɩ pɛ mʋ maŋa dɩ maŋa.
N paarɩ dɩm bá taa jɩgɩ kweelim sɩ kʋ taa ve maŋa kalʋ na ba ti tɩn.
20 Bɛŋwaanɩ mʋ nmʋ yɔɔrɩ n swe dɩ́ swiə?
Bɛɛ mʋ yɩ n yagɩ dɩbam dɩ́ yɩranɩ bɩna zanzan wʋnɩ kʋntʋ?
21 Dɩ́ Tu Baŋa-Wɛ, nan pa dɩ́ pipiri dɩ́ joori nmʋ te.
Pa dɩ́ joori dɩ́ na dɩ́ faŋa kam.
22 Kʋ na daɩ kʋntʋ, kʋ brɩ nɩ n yɔɔrɩ n vɩn dɩbam mʋ,
yɩ n ban-lʋm dɩm wʋ dɩ́ baŋa nɩ sɩ kʋ kɛ jɩŋa.