Tɩɩna wʋra Baŋa-Wɛ sono kʋm ŋwaanɩ
3
Amʋ yɩ wʋlʋ na nɛ cam,nɩ Baŋa-Wɛ na yaarɩ-nɩ DƖ ban-lʋm dɩm ŋwaanɩ te tɩn mʋ.
2 DƖ yɔɔrɩ DƖ kalɩ-nɩ mʋ sɩ a taa ve lim wʋnɩ,
yɩ pooni daa tǝrǝ kɔtaa!
3 DƖ nan yɔɔrɩ DƖ jɩgɩ-nɩ o maga mʋ taan.
DƖ ma dʋlɩ DƖ ja-guli a yɩra nɩ dɛ maama wʋnɩ.
4 DƖ ma pa a ya-nwana yam kwɩn lɩla,
yɩ DƖ daarɩ DƖ ja a kwi sɩm DƖ bwəri.
5 DƖ yɔɔrɩ DƖ zaŋɩ a baŋa nɩ mʋ DƖ pɩɩnɩ-nɩ,
pa a maama yɩ cam dɩ wʋ-cɔgɔ yɩranɩ.
6 DƖ ma zəli-nɩ pa a je yi-bri wʋnɩ,
nɩ balʋ na tɩgɩ ba daanɩ tɩn.
7 Kʋ nyɩ dɩ DƖ pɩ-nɩ mʋ DƖ yagɩ digə nɩ,
yɩ DƖ ta vɔ-nɩ dɩ capʋnnʋ sɩ a yɩ lu.
8 Amʋ na maŋɩ a keeri a loori-DƖ te maama dɩ,
DƖ yǝni DƖ vɩn sɩ DƖ cəgi-nɩ mʋ.
9 DƖ mɛ kandwa mʋ DƖ lɔ kabri DƖ cɩ a cwǝŋǝ.
Cwǝŋǝ daa tǝrǝ sɩ a wanɩ a tɔgɩ da a kɛ.
10 DƖ səgi je nɩ mʋ DƖ tigə, nɩ ga-varɩm te.
DƖ maa lagɩ sɩ DƖ zi-nɩ, nɩ nyoŋo na kɩ te tɩn.
11 DƖ ma tuuri-nɩ o lɩ cwǝŋǝ yuu nɩ yɩ DƖ tʋrɩ-nɩ.
DƖ laan ma yagɩ-nɩ pa a wʋ a yɩranɩ yɩ zǝnǝ tǝrǝ.
12 DƖ yɔɔrɩ DƖ saŋɩ DƖ taŋa mʋ,
yɩ DƖ laan jɩgɩ-nɩ DƖ taɩ dɩ cɩna.
13 DƖ jeeri amʋ mʋ DƖ ta DƖ cɩna yam.
Ya ma yɔɔrɩ ya mʋʋrɩ ya yi a bɩcarɩ-yi.
14 Amʋ nɔɔna bam laan jɩgɩ-nɩ mʋ ba mwana.
Dɛ maama ba leeni le mʋ ba ma twɩ-nɩ.
15 DƖ pɛ a ŋwɩa maama su dɩ wo-cɛɛrʋ mʋ.
Kʋ ta nyɩ nɩnɛɛnɩ DƖ kwe wʋ-cɔgɔ mʋ o kɩ na-zʋŋa nɩ
DƖ pa-nɩ sɩ a nyɔ.
16 DƖ pɛ a dʋnɩ kandwa mʋ yɩ ya guri a yələ.
DƖ ta ma nɔnɩ amʋ DƖ sɩn tɩga nɩ
pa a yɩra taagɩ dɩ kasʋlʋ.
17 Yazurə daa tǝrǝ amʋ tee nɩ.
Amʋ swe wʋpolo na yɩ te tɩn.
18 Amʋ laan ma ta a wɩ: «A dam dɩm je.
Tɩɩna yalʋ amʋ ya na jɩgɩ Baŋa-Wɛ tee nɩ tɩn dɩ ti.»
19 A guli a cam dɩm,
dɩ a na kaagɩ a beeri yɔɔ yɩranɩ te tɩn gulə.
A ŋwɩa yɔɔrɩ ka su dɩ wo-cɛɛrʋ mʋ.
20 A maa na yǝni a guli kʋntʋ maama,
a wʋʋ wʋ́ cɔgɩ mʋ.
21 Dɩ kʋ dɩ, a daa na yǝni a guli tɩntʋ,
a tɩɩna daa ta wʋ́ joori a tee nɩ mʋ.
22 Baŋa-Wɛ na yɔɔrɩ DƖ jɩgɩ DƖ sono te tɩn bá fɔgɩ kʋ ti.
DƖ na yǝni o duri dɩbam yibwənə te tɩn dɩ nan ba tiə.a
23 Tɩga na pʋʋrɩ dɛ maama,
tɩntʋ yǝni tɩ joori tɩ wʋra mʋ.
Cɩga tɩn, nmʋ zaanɩ dɩm tiini dɩ daga.
24 Amʋ wʋ́ ta a tɩtɩ nɩ mʋ wɩ:
«Baŋa-Wɛ wʋ amʋ tee nɩ.
DƖ nan maŋɩ amʋ.
Dɩntʋ yɩra nɩ mʋ a tɩɩna maama tigə.»
25 Baŋa-Wɛ lana mʋ DƖ pa balʋ na salɩ‑DƖ tɩn.
DƖ maa zǝni balʋ na tui DƖ te tɩn.
26 Kʋ lana mʋ sɩ nɔɔna taa cəgi cɩmm
ba nii sɩ Baŋa-Wɛ joŋi-ba DƖ yagɩ.
27 Nɔn-dʋnnʋ na lwarɩ sɩ ba pɩɩnɩ ba tɩtɩ,
kʋʋ́ taa lana kʋ pa-ba.
28 Baŋa-Wɛ na kwe nɔɔnʋ sɩ o da cwǝŋǝ,
kʋ maŋɩ sɩ kʋ tu zuri o yɩra mʋ o pa‑DƖ.
29 O nan na tu o tɩtɩ kʋntʋ doŋ
tɩɩna daa wʋ́ joori ya ba o tee nɩ.
30 Nɔɔna na lagɩ ba mag-o, sɩ o yagɩ sɩ ba lɔ o pʋpɔŋɔ.
Ba na jɩg-o ba twɩa, kʋ maŋɩ sɩ o sɛ ba tʋrʋ tɩm mʋ.
31 Bɛŋwaanɩ, Baŋa-Wɛ ba yɔɔrɩ DƖ vɩn nɔɔna
DƖ yagɩ-ba taan wuu.b
32 DƖ na maŋɩ DƖ cɔgɩ ba wʋʋ te dɩ, DƖ ta wʋ́ duri ba ŋwaŋa,
DƖ sono kʋm na tiini kʋ daga tɩn ŋwaanɩ.
33 Dɩntʋ ba soe sɩ DƖ ja yaara naa cam
DƖ ba DƖ dɩ nabiinǝ baŋa nɩ.
34 Nɔɔnʋ na nɔnɩ pɩɩna balʋ maama na wʋ tɩga kam baŋa nɩ tɩn
o sɩn o nɛ kuri nɩ, kʋ lana na?
35 Kʋ tu na vɩn Yuutu Baŋa-Wɛ dɩm ni,
yɩ o cɩ nɔɔna dɩ ba cɩga, kʋ lana na?
36 Kʋ tu na vɩn nɔɔnʋ bʋra taanɩ dim baŋa nɩ,
Baŋa-Wɛ ba naɩ kʋ maama na?
37 Wɔɔ mʋ wʋ́ wanɩ o ŋɔɔnɩ sɩ wǝǝnu tʋŋɩ,
yɩ kʋ daɩ Baŋa-Wɛ mʋ pɛ cwǝŋǝ sɩ tɩ kɩ?
38 Kʋ yɩ Yuutu Baŋa-Wɛ wʋm kwǝrǝ mʋ paɩ
sɩ cam dɩ ywəəni tui nabiinǝ baŋa.
39 Wɛ nan na waarɩ nabiinǝ ba lwarɩm ŋwaanɩ,
ba wʋlʋ na pʋʋnɩ kʋ baŋa nɩ, kʋ jɩgɩ kuri na?
40 Nan pa-na sɩ dɩ́ fɔgɩ dɩ́ maanɩ dɩ́ ŋwɩa na yɩ te tɩn,
sɩ dɩ́ laan daarɩ dɩ́ joori Baŋa-Wɛ te.
41 Pa-na sɩ dɩ́ pʋrɩ dɩ́ bɩcara, yɩ dɩ́ zǝŋi dɩ́ jɩn wɛɛnɩ
dɩ́ jeeri Baŋa-Wɛ sɩ dɩ́ ta wɩ:
42 «Baŋa-Wɛ, dɩbam cɔgɩ yɩ dɩ́ ta nuŋi n kwaga nɩ.
Nmʋ wʋ yagɩ dɩ́ lwarɩm n cɛ dɩbam.
43 Nmʋ mɛ n banɩ dɩm mʋ n pɛ dɩbam kwaga n pu.
N ma n daarɩ n gʋ dɩbam, yɩ n wʋ duri dɩ́ ŋwaŋa.
44 Nmʋ yɔɔrɩ n kwe kunkoŋo mʋ n cɩ n tɩtɩ,
pa wɛ-loro tǝrǝ dɩ́ na wʋ́ kɩ sɩ kʋ yi‑m.
45 Nmʋ dʋlɩ dɩbam n yagɩ nɩ dɩ́ yɩ weeru mʋ tɩn.
Dɩ́ ma ji wo-yɔɔrʋ dwi-gɛ tiinə bam tɩtarɩ nɩ.
46 Dɩbam dʋna bam maama maa jɩgɩ dɩbam ba twɩa.
47 Cam dɩ cɔgɩm zanzan mʋ tu dɩbam baŋa.
Fʋʋnɩ maa jɩgɩ dɩbam.»
48 A yi-na mʋ yɔɔrɩ ba cuuri barɩ-barɩ,
Bɛŋwaanɩ, ba jɩgɩ a nɔɔna bam ba cɔgɩ mʋ.
49 A yiǝ yi-na wʋ́ yɔɔrɩ ba ta nuŋi mʋ taan,
yɩ ba ba kwǝrǝ,
50 sɩ kʋ yi Baŋa-Wɛ na zɩgɩ wɛyuu nɩ,
yɩ DƖ tiiri DƖ nii DƖ na-nɩ.
51 A wʋʋ tiini kʋ cɔgɩ, a yiǝ na naɩ wǝǝnu tɩlʋ tɩn ŋwaanɩ,
dɩ a na nɛ a tɩʋ kʋm bukwa bam na yaarɩ te tɩn.
52 Kʋ na yɩ balʋ na culi-nɩ ba tɩtɩ wʋbʋŋa ŋwaanɩ tɩn,
ba jɩgɩ-nɩ ba zəli nɩ nɔɔnʋ na zəli zuŋə sɩ o ja te tɩn mʋ.
53 Ba ma ja-nɩ ba vu ba dʋlɩ ba yagɩ goŋ-canluŋu wʋnɩ,
yɩ ba daarɩ ba dʋlɩ-nɩ dɩ kandwa sɩ ba gʋ.cd
54 Na ma bibili a baŋa nɩ ba kɛa.
A ma bʋŋɩ nɩ a ŋwɩa ti mʋ.
55 Baŋa-Wɛ, amʋ dɩ ma zɩgɩ goŋo kʋm wʋnɩ
a bəŋi n yɩrɩ sɩ n ba n zəni-nɩ.
56 Nmʋ ma n cəgi a na loori‑m te a wɩ:
«Yɩ sɩn n zwa. Nan cəgi a wɛ-loro kʋm.»
57 Amʋ na bǝŋi-m kʋntʋ tɩn mʋ n fʋfɔ n yi a te.
N ma n ta dɩ amʋ n wɩ: «Yɩ ta n fʋna.»
58 Amʋ Yuutu Wɛ, nmʋ mʋ joŋi a taanɩ dɩm n ŋɔɔnɩ n pa-nɩ.
Nmʋ ta mʋ joŋi a ŋwɩa n yagɩ.
59 Baŋa-Wɛ, n ye ba na kɩ ba cɔgɩ a yigə te tɩn.
Nan di a taanɩ sɩ a na bʋra.
60 Nmʋ nɛ a dʋna na tiini ba culi-nɩ te tɩn.
Ba jǝni ba kɩ ni daanɩ mʋ sɩ ba cɔge-nɩ.
61 Baŋa-Wɛ, nmʋ ta ni ba na jɩgɩ-nɩ ba twɩ te tɩn.
Ba jǝni ba kɩ ni daanɩ mʋ sɩ ba cɔge-nɩ.
62 Nmʋ ta ni ba na waasɩ te,
dɩ ba na yɔɔrɩ ba banɩ daanɩ sɩ ba cɔge-nɩ te tɩn.
63 Nii-ba mʋ! Ba kənə maama wʋnɩ,
ba jɩgɩ-nɩ mʋ ba mwanɩ dɩ ba le sɩm.
64 Baŋa-Wɛ, yiri jɩnɩ ba baŋa nɩ,
sɩ kʋ maŋɩ dɩ kʋlʋ maama ba na kɩ tɩn.
65 Pa ba bɩcara taa tiini ya dana,
sɩ n daarɩ n sɔɔlɩ lwarɩm n yagɩ ba yuu nɩ.
66 Tɔgɩ n ban-lʋm dɩm baŋa n zəli-ba n ja,
sɩ n daarɩ n ti-ba sɩ ba yɩrɩ saarɩ tɩga baŋa nɩ.