Baŋa-Wɛ na waarɩ Zeruzalɛm te tɩn
2
Nii Baŋa-Wɛ banɩ na zaŋɩ Siyɔn tɩʋ kʋm baŋa nɩ te!O ban-lʋm li-ba mʋ nɩ kunkwən-liluru te.
Wɛ ma pa Yisɩrayɛlɩ tiinə bam lʋnnɩ jɩjɩgɩrʋ ji kafɛ.
DƖ ma zɩgɩ wɛyuu nɩ DƖ dɩ-tɩ tɩga nɩ.
Maŋa kalʋ DƖ banɩ na zaŋɩ dɩ Zeruzalɛm tɩn,
DƖ daa maŋɩ DƖ wʋ sɛ sɩ DƖ digə kam taa wʋra.
2 Baŋa-Wɛ cɔgɩ tɩɩnɩ dɩlʋ maama
Zakɔbɩ dwi tiinə na zʋʋrɩ dɩ wʋnɩ tɩn mʋ.
DƖ wʋ kʋm na fuli tɩn ŋwaanɩ,
DƖ vaŋɩ Zuda tiinə dam je sɩm maama DƖ dɩ tɩga nɩ mʋ.
DƖ ma cɔgɩ ba tɩɩnɩ dɩm dɩ ba pwa bam dɩ,
pa ba zulə maama ti.
3 DƖ ma pa Yisɩrayɛlɩ jar-kərə bam maama dam ti
DƖ ban-lʋm dɩm ŋwaanɩ.
Ba dʋna na bɩɩnɩ ba baŋa nɩ tɩn,
DƖ ma dwanɩ DƖ jɩŋa DƖ daarɩ-ba.
Dɩntʋ tɩtɩ jigi nɩ min-vʋgʋ na yɩ te tɩn mʋ,
yɩ DƖ yɔɔrɩ o zwɛ Zakɔbɩ dwi tiinə bam kulə!
4 Wɛ mʋ saŋɩ DƖ taŋa,
nɩ DƖ yɩ ba dʋnʋ mʋ te.
DƖ laan ma yɔɔrɩ ba baŋa sɩ DƖ ta.
DƖ ma gʋ ba nɔn-dʋnnʋ tɩlʋ maama
kikiə ya na su DƖ yi tɩn.
DƖ pɛ DƖ banɩ dɩm tʋ Zeruzalɛm tiinə baŋa nɩ mʋ,
nɩ mim na di bilǝm-biləm te tɩn.
5 Cɩga tɩn, Baŋa-Wɛ jigi Yisɩrayɛlɩ tiinə bam dʋnʋ mʋ.
DƖ ma yɔɔrɩ DƖ cɔgɩ-ba.
DƖ magɩ ba sɔ-fwaarʋ tɩm pa tɩ ji di-dwəənu mʋ.
DƖ nan ta cɔgɩ ba dam je sɩm dɩ.
DƖ ma pa Zuda tiinə kərə kam puli zanzan,
yɩ ka ba tiə.
6 Wɛ ta yigi DƖ digə kam DƖ dɩ tɩga nɩ,
nɩ ka ga yɩ kara wʋ vwe mʋ.
DƖ ma pa DƖ nɔɔna bam dɩ swe
sɩ ba yǝni ba di candi yam,
yɩ ba ta swe DƖ siun dɛ dɩm swiə.
Kʋ na yɩ pɛ wʋm dɩ kaanɩm tiinə bam maama,
Wɛ nuŋi ba kwaga nɩ DƖ ban-lʋm dɩm ŋwaanɩ.
7 Baŋa-Wɛ tagɩ DƖ kaanɩm bimbim dɩm mʋ DƖ yagɩ.
DƖ ma viiri DƖ daarɩ DƖ tɩtɩ digə kam.
DƖ ma kwe Zeruzalɛm sɔ-fwaarʋ tɩm DƖ kɩ kʋ dʋna bam jɩŋa nɩ
pa ba yigi tɩ kabri sɩm ba dɩ tɩga nɩ.
Bantʋ laan ma zɩgɩ Baŋa-Wɛ digə kam nɩ ba bagɩ tiguri-kaasa,
nɩ ba di candiə Wɛ ŋwaanɩ mʋ te.
8 Baŋa-Wɛ jaanɩ DƖ wʋbʋŋa mʋ
sɩ DƖ yigi Siyɔn kabri sɩm DƖ dɩ tɩga nɩ.
DƖ ma maŋɩ sɩ dɩdwarɩm baŋa lanyɩranɩ,
yɩ DƖ daarɩ DƖ cɔgɩ sɩ maama fasɩ.
Kabri sɩlʋ ya na kaagɩ tɩʋ kʋm sɩ cɩ tɩn maama
laan maa tigi tɩga nɩ buri buri.
9 Zeruzalɛm tɩʋ ni-bwəəru tɩm mʋʋrɩ tɩga nɩ mʋ.
Wɛ ma yɔɔrɩ DƖ bwəri tɩ luuru tɩm.
Kʋ na yɩ tɩʋ kʋm pɛ dɩ pabiə bam,
DƖ kalɩ-ba DƖ ja DƖ vu DƖ dɩ tɩɩnɩ dɩdonnǝ wʋnɩ mʋ.
Nɔɔna daa ba maɩ Wɛ zaasɩm dɩm ba tʋŋa.
Wɛ nijoŋnǝ bam daa warɩ
sɩ ba lwarɩ Baŋa-Wɛ kwǝrǝ na yɩ te tɩn.
10 Siyɔn nakwa bam laan je tɩga nɩ mʋ cɩmm.
Ba wʋ-cɔgɔ ŋwaanɩ mʋ ba taagɩ ba yum dɩ kasʋlʋ,
yɩ ba ta yɔɔrɩ ba zʋ gwar-zɩnzwara ba je.
Zeruzalɛm tɩʋ bukwa bam dɩ goori ba tira tɩga nɩ mʋ dɩ cavɩɩra.
11 A keeri a yiǝ yi-na maama a ti.
A wʋʋ kʋm dɩ ma yɔɔrɩ kʋ cɔgɩ.
Amʋ joro nyɩ dɩ kʋ logi mʋ kʋ tigi tɩga nɩ,
Bɛŋwaanɩ, ba jɩgɩ a nɔɔna bam ba cɔgɩ mʋ.
Biə dɩ bu-sɩsɩn yɔɔrɩ ba tigi tɩʋ kʋm cwe sɩm nɩ mʋ.
12 Biə bam maa ta dɩ ba niinə ba wɩ
«Dɩ́ lagɩ wʋdiu mʋ sɩ dɩ́ di.»
Ba ma tʋ tɩʋ kʋm cwe sɩm nɩ,
nɩ kʋ na tiini kʋ zʋ nɔn-bɩbɛ te jara-kǝm nɩ tɩn.
Ba ŋwɩa ma ti
ba niinə bam ja-kukwəəru wʋnɩ.
13 Zeruzalɛm tiinə bam, amʋ wʋ́ ta abam yɩra taanɩ nɩ bɛɛ mʋ?
Amʋ lagɩ a kwe bɛɛ mʋ sɩ a maŋɩ dɩ abam?
Siyɔn tiinə bam, amʋ wʋ́ kɩ ta mʋ
sɩ a wanɩ a pa á bɩcarɩ zuri?
Á yaara yam daga mʋ nɩ nɩnɩʋ na yalma te tɩn.
Wɔɔ mʋ wʋ́ wanɩ o wǝli abam sɩ á na yazurə?
14 Abam nijoŋnǝ bam na nɛ kʋlʋ yɩ ba brɩ abam tɩn
ya yɩ vwan mʋ.
Ba ma ganɩ abam.
Ba wʋ pɛ á lwarɩ á na tiini á cɔgɩ te tɩn,
sɩ á wanɩ á joori á taá tɔgɩ cwǝŋǝ.
Ba nan tagɩ vwan taana mʋ ba brɩ abam,
pa á ywəri cɩga cwǝŋǝ kam wʋnɩ.a
15 Balʋ maama na tɔgɩ abam seeni ba kɛ tɩn
laan jɩgɩ abam mʋ ba yeeri.
Ba ta fooli mʋ, yɩ ba daarɩ ba dʋlɩ ba yum,
Zeruzalɛm tɩʋ kʋm na nɛ cɔgɩm tɩn ŋwaanɩ.
Ba maa mwana yɩ ba ta ba wɩ:
«Tɩʋ kʋlʋ na lana kʋ gaalɩ tɩn mʋ tɩntʋ na?
Nabiinǝ maama daa jɩgɩ wʋpolo dɩ-kʋ na?»b
16 Abam dʋna maama jɩgɩ abam mʋ ba twɩa.
Ba maa fooli abam.
Ba maa nywanɩ ba yibiyə dɩ abam yɩ ba wɩ:
«Dɩ́ laan wanɩ-ba dɩ́ cɔgɩ dɩ́ yagɩ.
Dɩ́ ya je dɩ́ cəgi dɛ dɩntʋ mʋ,
dɩ́ yi nan nɛ-dɩ!»
17 Kʋ nan yɩ Baŋa-Wɛ mʋ laan kɩ
DƖ na kɩ DƖ wʋbʋŋa nɩ sɩ DƖ kɩ te tɩn.
DƖ yɔɔrɩ DƖ kɩ DƖ su ni dɩlʋ DƖ na tiŋi faŋa faŋa tɩn mʋ.
DƖ dʋlɩ tɩʋ kʋm DƖ dɩ yɩ DƖ wʋ jaanɩ á ŋwaŋa.
DƖ ta pɛ á dʋna jɩgɩ wʋpolo á cɔgɩm ŋwaanɩ.
DƖ ma pa ba tiini ba dana ba dwe abam.
18 Siyɔn tɩʋ kʋm, keeri-na dɩ kwǝr-dɩa
á loori Baŋa-Wɛ.
Pa-na á yi-na taa cuuri barɩ-barɩ
wɩa dɩ tɩtɩ maama nɩ.
Yɩ sɛ-na sɩ á sin.
Á yiǝ dɩ nan yɩ kɔ kərə.
19 Zaŋɩ-na dɔɔm nɩ sɩ á keeri á loori Baŋa-Wɛ.
Loori-DƖ-na kʋ na puli dɩ tɩtɩɩ dɩm maama wʋnɩ.
Lo-na á wʋ-cɔgɔ kʋm maama á tiŋi Baŋa-Wɛ yigə nɩ,
nɩ nɔɔna na logi na ba tiŋi tɩga nɩ te tɩn.
Zəŋi-na á jɩn Baŋa-Wɛ yigə nɩ sɩ á loori‑DƖ,
sɩ DƖ duri á biə bam ŋwaŋa sɩ ba yɩ tɩ.
Bɛŋwaanɩ, kana wʋra ka gʋ-ba
tɩʋ kʋm cwe sɩm maama nɩ.
20 «Baŋa-Wɛ, nii dɩbam seeni, sɩ n duri dɩ́ ŋwaŋa.
Kʋ yɩ n tɩtɩ nɔɔna mʋ n jɩgɩ n yaara!
N lagɩ sɩ kaana kwe ba tɩtɩ biə balʋ ba na jɩgɩ ba kɔnɩ tɩn mʋ
ba di na?
N ta lagɩ sɩ ba gʋ n kaanɩm tiinə bam dɩ n nijoŋnǝ bam
n tɩtɩ digə kam nɩ mʋ na?
21 Nɔn-dʋnnʋ dɩ nankwɩn maama mʋ tɩga
ba tigi tɩʋ kʋm cwe sɩm nɩ.
Nɔn-dʋnnʋ dɩ kabwənə dɩ ma yɔɔrɩ ba tɩ najara wʋnɩ.
Nmʋ banɩ na zaŋɩ dɩ ba tɩn pɛ n gʋ-ba.
N yɔɔrɩ n goni-ba n tiŋi mʋ
yɩ n wʋ jaanɩ ba ŋwaŋa.
22 Nmʋ bəŋi a dʋna mʋ sɩ ba ba ba di candiə,
yɩ ba fugi-nɩ je maama nɩ.
Nmʋ Baŋa-Wɛ banɩ na zaŋɩ maŋa kalʋ nɩ tɩn,
nɔɔn-nɔɔnʋ wʋ wanɩ sɩ o lu.
Biə balʋ amʋ ya na jɩgɩ a kɔna, yɩ a nii ba baŋa nɩ tɩn
mʋ a dʋnʋ wʋm yɔɔrɩ o gʋ nyɔ!»