Wʋ-cɔgɔ Tɔnɔ
Wʋ-cɔgɔ na yi Zeruzalɛm tiinə te tɩn
1
Nii tɩʋ kʋntʋ laan na tigi teyɩ nɔɔn-nɔɔnʋ tǝri kʋ wʋnɩ.
Kʋ dɛɛn nan su dɩ nɔɔna mʋ!
Kʋ dɛɛn yɩ tʋ-fɔrɔ mʋ lʋgʋ baŋa tɩɩnɩ dɩm wʋnɩ.
Nii kʋ laan na yɩ nɩ kadəm te!
Kʋ ya yɩ tɩɩnɩ dɩm maama dɩdɛɛrʋ mʋ,
yɩ kʋ laan tʋ gabɛɛm wʋnɩ.
2 Tɩʋ kʋm nyɩ dɩ kaanɩ wʋlʋ na yɔɔrɩ o keeri mʋ.
Yi-na ma tɔgɩ o pʋpwaanʋ yam tɩtɩɩ dɩm maama wʋnɩ.
O bɔɔla bam wʋlʋwʋlʋ nan tǝrǝ
sɩ kʋ tu zuri o bɩcarɩ.
O badonnǝ maama dɩ ma baarɩ o kwaga nɩ,
yɩ bantʋ ji o dʋna.
3 Zuda tiinə yaara yam dɩ ba tɩtʋŋ-dɛɛra yam kwaga nɩ,
ba ta kalɩ-ba mʋ ba ja ba vu sa-tɩʋ yigə yigə.
Ba laan maa zʋʋrɩ dwi-gɛ tiinə tɩtarɩ nɩ.
Ba daa ba jɩgɩ mɛ ba na wʋ́ jǝni sɩ ba sin tɩn.
Ba dʋna maama parɩ-ba ba ja mʋ.
Jǝgǝ daa tǝrǝ sɩ ba duri ba vu ba joŋi ba tɩtɩ.
4 Nɔɔna daa ba tui ba zʋʋrɩ tɩʋ kʋm wʋnɩ
sɩ ba di candi Wɛ diga kam wʋnɩ.
Kʋntʋ ŋwaanɩ cwe sɩlʋ na ve sɩ zʋʋrɩ Siyɔn wʋnɩ tɩn dɩ keeri mʋ.
Tɩʋ kʋm ni maama wʋnɩ nɔɔn-nɔɔnʋ tǝrǝ.
Wɛ kaanɩm tiinə yɔɔrɩ ba ŋʋʋsɩ mʋ.
Kʋ bukwa bam wʋʋ ma cɔgɩ,
Bɛŋwaanɩ, tɩʋ kʋm cam dɩm kɛ jɩŋa mʋ.
5 Balʋ na yɩ Zeruzalɛm dʋna tɩn laan mʋ jigi kʋ yuutiinə.
Ba nan ba liə dɩ kʋlʋkʋlʋ.
Bɛŋwaanɩ, Baŋa-Wɛ mʋ pɛ cam dɩntʋ yi tɩʋ kʋm,
kʋ lwarɩm dɩm na tiini dɩ gaalɩ tɩn ŋwaanɩ.
Kʋ dʋna bam yɔɔrɩ ba di kʋ nɔn-biə bam mʋ najara wʋnɩ,
yɩ ba daarɩ ba pɛ-ba ba ja ba viiri.a
6 Siyɔn nɩnwaŋ-fɔrɔ kʋm maama laan ti mʋ.
Tɩʋ kʋm dɩdɛɛra tiini ba bwǝnǝ
nɩ vara na beeri gaa ba ga sɩ ba di te tɩn.
Ba ma kwaanɩ sɩ ba duri ba dʋna yigə nɩ,
yɩ ba warɩ.
7 Zeruzalɛm na wʋ cam wʋnɩ yɩ kʋ kaagɩ kʋ beeri maŋa kalʋ tɩn,
mʋ kʋ guli kʋ dɛɛn na jɩgɩ ywəəni dɩlʋ kʋ di tɩn.
Kʋ yɩ kʋ faŋa faŋa gulə mʋ kʋ guli.
Kʋ laan nan tʋ kʋ dʋna jɩŋa nɩ mʋ,
yɩ nɔɔn-nɔɔnʋ tǝrǝ sɩ kʋ tu zən‑kʋ.
Kʋ dʋna bam maa nii,
yɩ ba jɩg-kʋ ba mwana
dɩ kʋ na nɛ cɔgɩm tɩn ŋwaanɩ.b
8 Zeruzalɛm yɔɔrɩ kʋ kɩ kʋ cɔgɩ zanzan mʋ,
pa kʋ ji wo-zɔɔnɩ nɔɔna yigə nɩ.
Balʋ dɛɛn na nɩg-kʋ tɩn laan gooni‑kʋ mʋ,
ba na nɛ kʋ cavɩɩra tɩn ŋwaanɩ.
Wʋntʋ tɩtɩ dɩ laan yɔɔrɩ o ŋʋʋsɩ mʋ,
yɩ o daarɩ o jɩgɩ o yibiyə o səgə
cavɩɩra na jɩg-o tɩn ŋwaanɩ.
9 O cɔgɩ o tɩtɩ mʋ dɩ wo-zɔɔna kənə.
O nan wʋ bʋŋɩ sɩ o lwarɩ kʋ jwa na wʋ́ kɩ-o te tɩn.
O laan na tʋ te tɩn mʋ tiini kʋ jɩgɩ lɛɛrʋ.
Nɔɔn-nɔɔnʋ nan tǝrǝ sɩ kʋ tu zuri o bɩcarɩ.
O maa wɩ: «Baŋa-Wɛ, nii kʋ na zʋʋrɩ a yɩra te!
A dʋna bam mʋ di dam a baŋa nɩ!»
10 O dʋna bam nɛ cwǝŋǝ sɩ ba zʋ
ba pɛ o jɩjɩgɩrʋ maama ba ja ba viiri.
O zɩgɩ o nii mʋ yɩ dwi-gɛ tiinə zʋ Wɛ digə kam wʋnɩ.
Baŋa-Wɛ tɩtɩ nan ya maŋɩ DƖ ta nɩ:
kʋ culǝ sɩ bantʋ zʋ DƖ digə kam wʋ.
11 Tɩʋ kʋm nɔn-biə bam maama yɔɔrɩ ba ŋʋʋsɩ mʋ
yɩ ba beeri wʋdiu sɩ ba di.
Ba laan ma kwe ba jɩjɩgɩrʋ ba yəgi,
sɩ tɩntʋ ləri wʋdiu yuu nɩ sɩ ba ma wəri.
Ba maa wɩ: «Baŋa-Wɛ, nii dɩ́ seeni,
sɩ ba tiini ba gooni dɩbam zanzan.»
12 «Abam balʋ na wʋ cwǝŋǝ yuu nɩ á kɛ tɩn,
á yigə tǝrǝ na?
Nan pipiri-na á nii kʋlʋ na yi amʋ tɩn.
Nɔɔnʋ tǝrǝ kʋ tu yaara na yi amʋ nyɩm dɩm.
Kʋ yɩ Baŋa-Wɛ mʋ kwe cam dɩm kʋntʋ DƖ kɩ amʋ yɩra nɩ,
maŋa kalʋ DƖ ban-lʋm na zaŋɩ dɩ amʋ tɩn.
13 DƖ pɛ mim mʋ nuŋi wɛyuu nɩ dɩ ba amʋ baŋa,
Dɩ ma zʋ a yɩra nɩ, yɩ dɩ zwɛ a kwi sɩm.
DƖ cɩgɩ cɩkʋ mʋ sɩ kʋ ja-nɩ,
pa a pipiri a joori kwaga.
DƖ yagɩ amʋ a yɩranɩ mʋ,
pa a yɩra cɛ dɛ dɩm maama wʋnɩ.
14 Kʋ nyɩ dɩ DƖ kwe a lwarɩm dɩm mʋ DƖ kɩ daanɩ,
nɩ nɔɔnʋ na vɔgɩ ŋʋnɩ daanɩ te tɩn.
DƖ ta kwe-ya DƖ lə a ban nɩ
pa a dam maama je mʋ.
Baŋa-Wɛ na kwe-nɩ DƖ kɩ a dʋna jɩŋa nɩ tɩn,
a warɩ sɩ a zɩgɩ dɩ ba.
15 Baŋa-Wɛ tɩtɩ mʋ maŋɩ DƖ vɩn
a na jɩgɩ wʋpolo dɩ pamaŋa balʋ tɩn.
O ma bəŋi nɔn-kɔgɔ sɩ ba ba amʋ baŋa,
yɩ ba daarɩ ba cʋcʋgɩ a nɔn-dʋnnʋ tɩm.
Wɛ tɩtɩ mʋ nɔnɩ Zuda dwi tiinə bam o lɩ,
nɩ nɔɔnʋ na nɔnɩ sɛɛrʋ o lɩ swan wʋnɩ te tɩn.
16 Wǝǝnu tɩntʋ ŋwaanɩ nan mʋ pa a yɔɔrɩ a keerǝ.
A yiǝ yi-na dɩ maa cuuri barɩ-barɩ.
Nɔɔn-nɔɔnʋ nan tǝrǝ sɩ kʋ tu zuri a bɩcarɩ.
Nɔɔnʋ tǝrǝ sɩ o wǝli-nɩ sɩ a joori a tɩtɩ nɩ.
Amʋ biə bam daa ba jɩgɩ jwa,
Bɛŋwaanɩ, dɩ́ dʋna bam wanɩ dɩbam mʋ.»
17 Zeruzalɛm yɔɔrɩ o loori zǝnǝ mʋ nɔɔna tee nɩ.
Nɔɔn-nɔɔnʋ nan tǝrǝ sɩ kʋ tu zi o bɩcarɩ.
Baŋa-Wɛ maŋɩ DƖ ta Zakɔbɩ dwi tiinə yɩra taanɩ DƖ wɩ:
ba doonə wʋ́ ji ba dʋna.
Zeruzalɛm sɩɩnɩ o ji wo-zɔɔnɩ mʋ bantʋ yigə nɩ,
pa ba cul‑o.
18 O maa wɩ: «Baŋa-Wɛ yɩ cɩga Tu mʋ,
sɩ kʋ yɩ amʋ mʋ nuŋi o ni dɩm kwaga nɩ.c
Cəgi-na, abam dwiə yalʋ na zʋʋrɩ je sɩlʋ maama nɩ tɩn,
nii-na a na yaarɩ yɩ kʋ zʋʋrɩ a yɩra te!
Ba jaanɩ a nɔn-dʋnnʋ tɩm dɩ a bukwa bam mʋ
ba kalɩ ba ja vu sa-tɩʋ yigə yigə.
19 A bəŋi a bɔɔla mʋ sɩ ba ba ba wǝli-nɩ.
Ba nan kʋgɩ a kuri mʋ ba pa a dʋna.
Kana ma gʋ a kaanɩm tiinə bam, dɩ a nakwa bam,
tɩʋ kʋm wʋnɩ.
Ba kaagɩ je maama mʋ ba beeri wʋdiu
sɩ ba di ba wəri yɩ ba ga.
20 Baŋa-Wɛ, nii kʋ na tiini kʋ yi-nɩ te!
Kʋ jɩgɩ-nɩ mʋ kʋ ni.
A wʋʋ kʋm tɩtɩ dɩ ma di,
a na nuŋi n ni dɩm kwaga nɩ tɩn ŋwaanɩ.
Tɩʋ kʋm cwe sɩm nɩ, nɔɔna tʋa najara wʋnɩ mʋ.
Sɔŋɔ nɩ dɩ, tʋʋnɩ ta maa wʋra.
21 Nɔɔna ni a na ŋʋʋsɩ te tɩn,
yɩ nɔɔn-nɔɔnʋ tǝrǝ sɩ kʋ tu zi a bɩcarɩ.
A dʋna bam maama na ni kʋlʋ na yi-nɩ tɩn,
ba yɔɔrɩ ba cakɩ mʋ dɩ nmʋ na kɩ te a yɩra nɩ tɩn.
Ja! Nan pa bantʋ dɩ dɛ yi,
nɩ n na goni ni sɩ n kɩ-ba te tɩn,
sɩ ba dɩ na yaara nɩ kʋ na yɩ te amʋ yɩra nɩ tɩn.
22 Pa ba lwarɩm kənə maama taa tigi n yigə nɩ,
sɩ n pa kʋ zʋ ba dɩ yɩra,
nɩ n na pɛ kʋ zʋ amʋ yɩra te
a lwarɩm dɩm maama ŋwaanɩ tɩn.
A tiini a ŋʋʋsɩ zanzan.
A wʋʋ dɩ ma je.»