Wɛ zǝni dɩbam cam maŋa nɩ
147
Pa-na dɩ́ tee Baŋa-Wɛ!aKʋ lamma mʋ sɩ dɩ́ leeni
dɩ́ zuli dɩ́ Tu Wɛ dɩm,
kʋ na paɩ ywəəni
yɩ kʋ tɔgɩ cwǝŋǝ tɩn ŋwaanɩ.
2 Baŋa-Wɛ lagɩ DƖ fɔgɩ DƖ lɔ
Zeruzalɛm tɩʋ kʋm.
DƖ maa laɩ Yisɩrayɛlɩ tiinə balʋ
ya na jagɩ je maama nɩ tɩn
DƖ kɩ daanɩ sɩ ba joori
ba tɩtɩ tɩʋ kʋm.
3 DƖ maa zuri balʋ bɩcɔŋɔ na pogili tɩn bɩcara,
yɩ DƖ vɔ ba fufwələ yam pa tɩ je.
4 DƖ jeeli calɩcwɩ sɩm ni mʋ DƖ ja,
yɩ DƖ daarɩ DƖ bəŋi sɩ maama
dɩdʋa dɩdʋa dɩ ka yɩrɩ.
5 Dɩ́ Yuutu wʋm yɔɔrɩ
o jɩgɩ kamunni mʋ,
yɩ o dam dɩm gaalɩ.
Dɩ́ warɩ sɩ dɩ́ lwarɩ o yǝno kʋm
dɩ́ ti.
6 Baŋa-Wɛ yǝni DƖ zǝŋi balʋ
na tu ba tɩtɩ tɩn mʋ wɛɛnɩ.
Kʋ nan na yɩ nɔn-balwaarʋ tɩm,
DƖ lagɩ DƖ mɩɩrɩ-ba mʋ DƖ dɩ tɩga nɩ.
7 Leeni-na á tee Baŋa-Wɛ
yɩ á kɩ DƖ le.
Kwe-na kwaanʋ á magɩ
á ma á zuli‑DƖ.
8 Wɛ yǝni DƖ paɩ kunkwǝǝnu kwǝli wɛyuu kʋm maama.
DƖ ta maa paɩ dʋa nɩa
tɩga kam baŋa nɩ,
sɩ gaarʋ dɩ nuŋi
tɩ faarɩ zwəənu tɩm.
9 Dɩntʋ mʋ paɩ vara ba ni-wʋdiu,
kʋ ta wǝli dɩ bacangaarʋ dɩ,
nɩ tɩ na keerǝ wʋdiu ŋwaanɩ.
10 Wɛ ba jɩgɩ wʋpolo dɩ
siseŋ-nɔɔna na dana tee tɩn.
DƖ yigə maa tǝrǝ jar-kərə
dɩ ba baarɩ dɩm wʋnɩ.
11 Baŋa-Wɛ wʋʋ nan poli
dɩ balʋ na kwarɩ-DƖ tɩn,
ba na kwe ba tɩɩna ba daŋɩ
DƖ sono kʋm baŋa nɩ tɩn ŋwaanɩ.b
12 Zeruzalɛm tɩʋ nɔn-biə bam,
zəŋi-na Baŋa-Wɛ yɩrɩ dɩm.
Siyɔn tiinə bam,
tee-na á Tu Wɛ dɩm.
13 Bɛŋwaanɩ, Dɩntʋ fɔgɩ DƖ kwɛ
á tɩʋ kʋm ni-bwəəru tɩm,
pa tɩ damma.
DƖ ma daarɩ o kɩ abam balʋ
na zʋʋrɩ kʋ wʋnɩ tɩn yu-yoŋo.
14 DƖ maa paɩ yazurə taa wʋ
á tɩga kam ni maama nɩ,
yɩ á na mɩna zanzan
sɩ á taá di á sui.
15 Wɛ yǝni DƖ tʋŋɩ DƖ kwǝrǝ mʋ
sɩ ka yi lʋgʋ baŋa ni maama.
Ka maa kɩ lɩla ka ve
je maama nɩ.
16 DƖ ma pa kunu ba
kʋ kwǝli tɩga kam
yɩ ka pɩɩrɩ carɩ carɩ
nɩ lɔŋɔ na yɩ tee tɩn.
Kʋ ta na yɩ nyɔnɔ,
DƖ yǝni DƖ pa kʋ jagɩ lɩla mʋ
nɩ tɩntwarɩm tee tɩn.
17 DƖ maa dʋlɩ dʋ-kambana
DƖ yagɩ tɩga baŋa nɩ.
DƖ waarʋ tɩm na puli sɩ tɩ zuri,
nɔɔn-nɔɔnʋ bá wanɩ o zɩgɩ
tɩ yigə nɩ.
18 DƖ laan ma tʋŋɩ DƖ kwǝrǝ
sɩ DƖ pa tɩntʋ maama nyɩɩnɩ.
DƖ ta ma pa viu kʋm zaŋɩ
kʋ taa dʋla,
pa bwi sɩm na bam
joori ba taa durǝ.
19 Wɛ tʋŋɩ DƖ kwǝrǝ mʋ
sɩ Zakɔbɩ dwi tiinə bam lwarɩ-ka.
DƖ ma kwe DƖ zaasɩm dɩm
dɩ DƖ niə yam
DƖ pa Yisɩrayɛlɩ tiinə bam
sɩ ba taa tɔgɩ-ya.
20 Dwi-gɛ tiinə nan tǝrǝ
Wɛ na kɩ kʋntʋ doŋ DƖ pa-ba.
Bantʋ maŋɩ ba yǝri
DƖ zaasɩm dɩm ni nɩ.
Pa-na dɩ́ tee Baŋa-Wɛ!