Wɛ le kǝm
146
Pa-na dɩ́ tee Baŋa-Wɛ!Amʋ tɛ a tɩtɩ wʋnɩ mʋ wɩ:
«Tee Baŋa-Wɛ!»
2 Amʋ wʋ́ yɔɔrɩ a tee a Tu
Baŋa-Wɛ dɩm
a ŋwɩa maama wʋnɩ.
A wʋ́ taa leeni a tee-DƖ
sɩ kʋ taa nii a ŋwɩa kam kweelim.
3 Yɩ kwe-na á tɩɩna á daŋɩ dɩdɛɛra
naa nabiinǝ wʋlʋwʋlʋ baŋa nɩ,
sɩ ba bá wanɩ abam
ba joŋi ba yagɩ.
4 Bɛŋwaanɩ, ba siun kʋm na kɔga,
ba yǝni ba joori tɩga kuri nɩ mʋ.
Dɛ dɩm kʋntʋ nɔ́ɔ mʋ
ba ya na jɩgɩ wʋbʋŋa yalʋ maama tɩn wʋ́ je.
5 Wʋlʋ nan na sɛ nɩ
Zakɔbɩ Wɛ dɩm yɩ o zənnu,
yu-yoŋo wʋ kʋ tu tee nɩ,
o tɩɩna maama na wʋ
o Tu Baŋa-Wɛ yɩra nɩ tɩn ŋwaanɩ.
6 Baŋa-Wɛ mʋ naanɩ wɛyuu kʋm,
dɩ tɩga kam,
dɩ nɩnɩʋ kʋm, dɩdaanɩ kʋlʋ maama na wʋ tɩ wʋnɩ tɩn.
DƖ maa yǝni DƖ zɩgɩ DƖ cɩga wʋnɩ
maŋa maama.
7 DƖ maa paɩ balʋ nɔɔna na
jɩgɩ-ba ba bɛɛsɩ tɩn na ba bʋra,
yɩ DƖ daarɩ DƖ paɩ kana
na jɩgɩ balʋ tɩn ba ni-wʋdiu.
Baŋa-Wɛ vrɩ balʋ na wʋ
pɩɩna digə nɩ tɩn DƖ yagɩ
pa ba nuŋi da.
8 DƖ ta maa puri lilwǝ yiǝ pa ba naɩ.a
Kʋ na yɩ balʋ vwana na parɩ tɩn,
Baŋa-Wɛ paɩ ba wanɩ
ba zɩgɩ dɩ dam.
DƖ maa soe balʋ na jɩgɩ cɩga
DƖ yigə nɩ tɩn.
9 Baŋa-Wɛ nii balʋ na yɩ vərə
sa-tɩʋ wʋnɩ tɩn baŋa nɩ.
DƖ maa zǝni bɩtara dɩ kadənə.
Kʋ nan na yɩ nɔn-balwaarʋ,
DƖ yǝni DƖ cɩ ba yigə.
10 Baŋa-Wɛ wʋ́ taa di paarɩ mʋ
maŋa maama.
Siyɔn tiinə bam,
abam Tu Wɛ dɩm mʋ kʋntʋ,
maŋa maama sɩ kʋ taa ve maŋa kalʋ na ba ti tɩn.
Pa-na dɩ́ tee Baŋa-Wɛ!