145
Amʋ Tu Wɛ,nmʋ yɩ a Pɛ.
Amʋ wʋ́ taa tee‑m,
yɩ a zuli nmʋ yɩrɩ dɩm mʋ.
2 Dɛ maama wʋnɩ a lagɩ
a taa zuli-m,
yɩ a daarɩ a taa zǝŋi
n yɩrɩ dɩm maŋa maama mʋ.
3 Baŋa-Wɛ jɩgɩ kamunni mʋ!
DƖ maa sɩɩnɩ DƖ maŋɩ dɩdaanɩ tiə.
DƖ kamunni dɩm daga dɩ dwe
sɩ dɩ́ wanɩ dɩ́ lwarɩ dɩ kuri maama.
4 Kwə wʋ́ lwǝni nmʋ tɩtʋŋ-kamunə yam ba brɩ ba biə
sɩ ba taa zuli nmʋ.
5 Ba lagɩ ba ŋɔɔnɩ nmʋ paarɩ dɩm
paarɩ-zulǝ taanɩ mʋ
ba brɩ nɔɔna.
Amʋ dɩ maa wʋ́ taa bʋŋɩ
nmʋ tɩtʋŋ-kɩnkagɩla yam wʋbʋŋa.
6 Nɔɔna wʋ́ taa tɔɔlɩ nmʋ na tɔgɩ
n dam dɩm baŋa nɩ
n kɩ tɩtʋŋ-kamunə te tɩn.
Amʋ dɩ maa wʋ́ taa ŋɔɔnɩ
nmʋ kamunni dɩm taanɩ.
7 Ba ta wʋ́ tɔɔlɩ nmʋ na jɩgɩ yɩrɩ
nmʋ lanyɩranɩ dɩm ŋwaanɩ te tɩn,
yɩ ba daarɩ ba leeni dɩ wʋpolo
ba zuli nmʋ
n na yɩ cɩga tu tɩn ŋwaanɩ.
8 Baŋa-Wɛ tiini DƖ jɩgɩ yibwənə
dɩdaanɩ yu-yoŋo DƖ maa zǝni nɔɔna.
DƖ yǝni DƖ pɩɩnɩ DƖ banɩ mʋ.
DƖ sono kʋm maa tiini kʋ daga.
9 Baŋa-Wɛ yǝni DƖ kɩ nɔɔna maama lanyɩranɩ.
Kʋ na yɩ woŋo kʋlʋ maama
DƖ na kɩ tɩn,
DƖ maa duri ba maama yibwənə.
10 Baŋa-Wɛ, nmʋ na naanɩ
woŋo kʋlʋ maama tɩn
wʋ́ taa kɩ nmʋ le zanzan.
Balʋ na kɩ ba cɩga dɩ nmʋ tɩn
maa wʋ́ taa tee‑m.
11 Ba ta wʋ́ taa tɛ nmʋ paarɩ dɩm
na jɩgɩ paarɩ-zulǝ tee tɩn,
dɩ nmʋ dam dɩm na daga tee tɩn.
12 Kʋ laan maa wʋ́ pa
nabiinǝ maama lwarɩ tɩtʋŋ-kamunə
yalʋ nmʋ na tʋŋɩ tɩn ni nɩ.
Ba ta wʋ́ lwarɩ nmʋ paarɩ dɩm
na tiini dɩ jɩgɩ paarɩ-zulǝ tee tɩn.
13 Paarɩ dɩlʋ nmʋ na di tɩn
wʋ́ taa wʋra mʋ ga maŋa maama.
Dwi dɩdwɩ na kɛ
sɩ dɩdoŋ laan saŋɩ dɩ ba,
nmʋ wʋ́ taa tee nɔɔna
sɩ kʋ taa ve maŋa kalʋ na ba ti tɩn.
[Baŋa-Wɛ yǝni DƖ zɩgɩ
DƖ cɩga wʋnɩ mʋ
dɩ DƖ na tagɩ kʋlʋ maama tɩn.
DƖ ta maa yǝni DƖ jɩgɩ
nɔɔna yibwənə
dɩ tɩtʋŋa yalʋ maama Dɩ na kɩ tɩn.]a
14 Kʋ na yɩ balʋ na lagɩ ba tʋ tɩn,
Baŋa-Wɛ yǝni DƖ təli-ba mʋ DƖ zɩgɩ.
DƖ maa zǝni balʋ vwana na parɩ tɩn
sɩ ba wanɩ ba zɩgɩ dɩ dam.
15 Nɔɔna maama jɩgɩ nmʋ tɩɩna mʋ.
Nmʋ mʋ pa-ba ba ni-wʋdiu
kʋ maŋa nɩ.
16 Nmʋ ma n puri n jataala yam
n kwe wo-laarʋ zanzan n pa
balʋ maama n na naanɩ tɩn
pa ba di ba su.
17 Baŋa-Wɛ yɔɔrɩ DƖ tɔgɩ cwǝŋǝ
dɩ kʋlʋ maama DƖ na kɩ tɩn mʋ.
Maŋa maama DƖ jɩgɩ
nɔɔna ŋwaŋa.
18 Baŋa-Wɛ yǝni DƖ zǝni balʋ maama
na loori‑DƖ tɩn,
nɩnɛɛnɩ ba na loori‑DƖ
dɩ ba wʋʋ maama.
19 DƖ tʋŋɩ DƖ tɔgɩ balʋ na kwarɩ-DƖ tɩn wʋbʋŋa mʋ.
Ba na keeri ba loori-DƖ,
DƖ ta wʋ́ cəgi ba wɛ-loro kʋm,
yɩ DƖ daarɩ DƖ joŋi-ba DƖ yagɩ.
20 Baŋa-Wɛ cʋ balʋ na soe‑DƖ tɩn mʋ.
Kʋ nan na yɩ nɔn-balwaarʋ tɩm,
DƖ lagɩ DƖ cɔgɩ ba maama mʋ fasɩ.
21 Amʋ wʋ́ ma a ni mʋ a tee Baŋa-Wɛ.
Kʋ maŋɩ sɩ nabiinǝ maama
taa zuli‑DƖ maŋa maama,
DƖ yɩrɩ dɩm na yɩ lanyɩranɩ fasɩ tɩn ŋwaanɩ.