Baŋa-Wɛ maŋɩ dɩ zulǝ
Davidi dɛɛn panɩ ləŋə kantʋ.
144
Baŋa-Wɛ maŋɩ dɩdaanɩ tiə,sɩ Dɩntʋ nyɩ dɩ piu kʋlʋ
amʋ na dalɩ da tɩn mʋ.
DƖ maa brɩ-nɩ
sɩ a taa ye najara kǝm laŋa.
2 A Tu Wɛ dɩm jɩgɩ a sono mʋ
maŋa maama.
DƖ maa yɩ amʋ dam je,
dɩ a dalɩm je, dɩ a vrɩnʋ.
DƖ maa yǝni DƖ cʋ-nɩ,
nɩ najara cɩ-kwaŋa na kwǝli nɔɔna
najara wʋnɩ te tɩn,
yɩ a səgi a tɩtɩ DƖ woro kʋm wʋnɩ.
DƖ maa jaanɩ dwi-gɛ tiinə DƖ tui
DƖ kɩ amʋ dam kuri nɩ.
3 Baŋa-Wɛ, bɛɛ mʋ kɩ
yɩ n yigə wʋ nabiinǝ wʋnɩ?
Bɛŋwaanɩ mʋ n jɩgɩ nabiin-biə wʋbʋŋa kʋntʋ?
4 Nabiinǝ maama mʋmwɛ
yɩ viu yɩranɩ mʋ.
O ŋwɩa da yam yǝni ya ti lɩla
nɩnɛɛnɩ lunluŋu na yɩ te tɩn mʋ.
5 Baŋa-Wɛ, kɔɔrɩ wɛyuu kʋm
nɩnɛɛnɩ digə ni gɔrɔ,
sɩ n daarɩ n tu tɩga kam baŋa.
Twɩ n jɩŋa n dwe pweeru tɩm,
sɩ tɩ tarɩgɩ min-vʋgʋ
yɩ nyʋa zaŋɩ gulululu.
6 Kwe dʋa pɩpɩlɩm
n ma n bagɩ n dʋna bam
pa ba jagɩ je maama nɩ.
Kwe n cɩna yam n ta-ba
pa ba duri ba je.
7 Zɩgɩ wɛyuu baŋa kam nɩ
n twɩ n jɩŋa n ja-nɩ,
sɩ n joŋi-nɩ n yagɩ.
Liiri-nɩ n ja n nuŋi
na-fara bam wʋnɩ,
sɩ dwi-gɛ tiinə yɩ taa jɩgɩ dam
a baŋa nɩ.
8 Bantʋ niə yam yɔɔrɩ ya su mʋ
dɩdaanɩ vwan.
Ba na yǝni ba pooli sɩ ba kɩ kʋlʋ tɩn maa yɩ gana yɩranɩ mʋ.
9 Amʋ Tu Wɛ,
a lagɩ a leeni ləŋ-dʋŋa mʋ
a ma a zuli-m.
A ta wʋ́ kwe kɔnɔ a magɩ,
sɩ a ma a zuli‑m.
10 Bɛŋwaanɩ, nmʋ mʋ zǝni pwa
sɩ ba wanɩ ba dʋna ba di.
N ta ma joŋi n tɩntʋŋnʋ Davidi
n yagɩ,
sɩ o dʋna yɩ gʋ-o najara wʋnɩ.
11 Vrɩ-nɩ dwi-gɛ tiinə jɩŋa nɩ
n yagɩ.
Bantʋ niə yam yɔɔrɩ ya su mʋ
dɩdaanɩ vwan.
Ba na yǝni ba pooli
sɩ ba kɩ kʋlʋ tɩn
maa yɩ gana yɩranɩ mʋ.
12 Sɛ sɩ dɩ́ biə bam
kɩ nɔɔna lanyɩranɩ,
nɩnɛɛnɩ tweeru na jɩgɩ
tɩ brɩ lɩla te tɩn.
Dɩ́ bukwa dɩ wʋ́ taa jɩgɩ lam,
nɩnɛɛnɩ ywə yalʋ
na təli pɛ di-kamunu
yɩ ba gɔgɩrɩ-ya lanyɩranɩ te tɩn.
13 Nan ta pa dɩ́ tuli sɩm taa sui
dɩ wʋdiiru dwi dwi,
sɩ dɩ́ peeni sɩm dɩ taa lʋrɩ biə zanzan, mʋrʋ mʋrʋ laŋa nɩ,
pa sɩ faarɩ tɩga kam maama.
14 Pa dɩ́ naanɩ dɩm yɔɔrɩ
dɩ taa lʋrɩ biə zanzan.
Yɩ pa dɩ́ dʋna cwǝŋǝ
sɩ ba wanɩ dɩ́ tɩʋ kʋm ba zʋ,
sɩ ba kalɩ dɩbam ba ja viiri.
Cɩ sɩ nɔɔna yɩ taa coosǝ
dɩ́ tɩʋ kʋm cwe sɩm nɩ.
15 Wɛ na kɩ kʋntʋ doŋ
DƖ zǝni tɩʋ kʋlʋ
yu-yoŋo wʋ kʋ nɔn-biə bam
tee nɩ!
Kʋ ta na yɩ nɔɔna balʋ
na sɛ Baŋa-Wɛ
sɩ DƖ taa yɩ ba Yuutu tɩn,
yu-yoŋo wʋ ba tee nɩ!