Davidi wɛ-loro
143
Baŋa-Wɛ,cəgi a wɛ-loro kʋm.
Pʋrɩ n zwa sɩ n ni
a na magɩ a japoori a loori n yigə nɩ te tɩn.
N na yɔɔrɩ n zɩgɩ n cɩga wʋnɩ tɩn,
da n nɔn-ŋʋnnɩ dɩm ŋwaanɩ
n ləri n pa-nɩ.
2 Yɩ ja-nɩ n ba n saŋɩ n tɩtɩ yigə nɩ,
sɩ a yɩ nmʋ tɩntʋŋnʋ mʋ.
Nɔɔn-nɔɔnʋ tǝrǝ o na ŋwɩ
yɩ o yɔɔrɩ o jɩgɩ bʋra nmʋ yigə nɩ.a
3 Amʋ dʋna bam kwaanɩ mʋ
ba zəli-nɩ
sɩ ba magɩ-nɩ ba dɩ tɩga nɩ.
Ba ma fɩn-nɩ ba kɩ lim je nɩ
nɩnɛɛnɩ balʋ na tɩga ba daanɩ
na yɩ te tɩn.
4 Kʋntʋ ŋwaanɩ,
a vwana tiini ya parɩ mʋ,
yɩ a wʋʋ dɩ cɔɔrɩ zanzan.
5 A ma guli faŋa kam
dɛɛn na yɩ te tɩn.
A maa bʋŋɩ nmʋ kənə yam maama wʋbʋŋa,
yɩ a daarɩ a jeeli n na mɛ n jɩa
n kɩ kʋlʋ tɩn.
6 A maa zǝŋi a jɩn sɩm wɛɛnɩ
a warɩ‑m.
A maa tiini a lagɩ‑m
dɩ a wʋʋ maama,
nɩ tɩ-kʋra na tigi yɩ na tǝrǝ te tɩn.
7 Baŋa-Wɛ, kɩ lɩla n ba n ləri-nɩ,
sɩ a vwana yam laan parɩ mʋ.
Yɩ səgi n yibiyə amʋ tee nɩ,
sɩ a laan wʋ́ taa nyɩ dɩ
balʋ na maa ve curu tɩn.
8 Amʋ na yǝni a zaŋɩ
zɩzɩŋa maama nɩ,
pa a taa guli
nmʋ sono kʋm gulə.
Bɛŋwaanɩ,
a kɩ a wʋ-dɩdʋa dɩdaanɩ‑m.
Nan pa a lwarɩ cwǝŋǝ kalʋ
a na wʋ́ tɔgɩ tɩn,
a na kwe a tɩtɩ a pa‑m tɩn ŋwaanɩ.
9 Baŋa-Wɛ, joŋi-nɩ n yagɩ
a dʋna bam jɩŋa nɩ.
A duri mʋ a ba sɩ a səgi
n woro kʋm wʋnɩ.
10 Brɩ-nɩ a na wʋ́ kɩ te
sɩ a taa kɩ nmʋ wʋbʋŋa yam,
nmʋ na yɩ amʋ Tu Wɛ dɩm tɩn ŋwaanɩ.
Sɛ sɩ n Joro kʋm
tɔgɩ amʋ yigə
sɩ a taa ve tɩga kalʋ
na maŋɩ daanɩ tɩn baŋa nɩ.b
11 Baŋa-Wɛ, da n yɩrɩ dɩm ŋwaanɩ
sɩ n pa a ŋwɩa joori ka kɩ dam.
Tɔgɩ n nɔn-ŋʋnnɩ dɩm baŋa nɩ
n lɩ-nɩ yaara wʋnɩ.
12 Nmʋ na jɩgɩ a sono maŋa maama tɩn,
yɔɔrɩ n cɔgɩ a dʋna bam n ti!
Kʋ na yɩ balʋ maama
na beeri amʋ gʋm tɩn,
saarɩ-ba tɩga baŋa nɩ sɩ ba je.
Bɛŋwaanɩ,
amʋ yɩ nmʋ tɩntʋŋnʋ mʋ.