Baŋa-Wɛ ye wǝǝnu maama ni nɩ
Davidi dɛɛn panɩ ləŋə kantʋ.
139
Amʋ Tu Baŋa-Wɛ,nmʋ yɔɔrɩ n vɛɛsɩ
a maama mʋ,
pa n lwarɩ amʋ na yɩ te maama tɩn.
2 Amʋ na jǝni tɩga nɩ
naa a na zaŋɩ wɛɛnɩ,
nmʋ maŋɩ n ye kʋ ni nɩ.
Nmʋ na maŋɩ n yɩ yigə yigə
te maama dɩ,
n ta lwarɩ a wʋbʋŋa yam.
3 Kʋ na yɩ amʋ cwǝŋǝ vəŋə maama
dɩdaanɩ a siun kʋm maama,
kʋ yɩ nmʋ mʋ ye a na-vəli
dɩ a kənə maama.
4 Baŋa-Wɛ, amʋ na bʋŋɩ sɩ a ŋɔɔnɩ
yɩ a ta wʋ puri a ni,
nmʋ maŋɩ n ye a ŋwaŋa kam maama ni nɩ.
5 Nmʋ yɔɔrɩ n gilimi amʋ mʋ
n kɩ tɩtarɩ nɩ.
Nmʋ daŋɩ n jɩŋa a baŋa nɩ
sɩ n zəni-nɩ.
6 Nmʋ yǝno kʋm na gaalɩ te tɩn
mʋ paɩ a yɩ yǝǝu.
Amʋ wʋbʋŋa warɩ sɩ ya yi
nmʋ yǝno kʋm na tiini
kʋ yalma te tɩn.a
7 Jǝgǝ wʋra amʋ na wʋ́ vu
sɩ a wanɩ a lu
nmʋ Joro kʋm yigə nɩ na?
Amʋ brɩ a lagɩ a duri
a vu yən mʋ yɩ nmʋ tǝrǝ?
8 Amʋ na kwaanɩ a din wɛyuu
baŋa baŋa mʋ
nmʋ maŋɩ n wʋ dáanɩ.
Amʋ nan na kʋgɩ goŋo mʋ
luŋu luŋu
sɩ a vu a yi curu kuri kuri,
nmʋ daa n ta wʋ daanɩ dɩ!
9 Amʋ na jaanɩ wɛɛnɩ nɩ zuŋə te
a vu a yi wa-puli seeni,
naa a na ve a gaalɩ nɩnɩʋ kʋm
yigə yigə a vu a zʋʋrɩ
wa-zʋʋrɩ seeni,
10 nmʋ ta wʋ dáanɩ dɩ,
sɩ n kwe n jɩŋa n ma
n brɩ-nɩ cwǝŋǝ sɩ a taa veǝ,
sɩ n daarɩ n ma n jazɩm dɩm
n ta n təli-nɩ.
11 Amʋ wʋ́ ta nɩnɛɛnɩ,
«A lagɩ a vu a səgi lim wʋnɩ mʋ,
pa dɩ kwəli-nɩ.
Wɩa kam wʋ́ ji lim pa
nɔɔna yiǝ daa ba naɩ.»
12 Amʋ ya na tagɩ kʋntʋ doŋ,
lim dɩm nan bá wanɩ nmʋ yiǝ dɩ cɩ.
Nmʋ tee nɩ,
tɩtɩɩ dɩm maa jɩgɩ pooni
kʋ maŋɩ dɩ wɩa kam na yɩ te tɩn.
Lim dɩdaanɩ pooni yɩ bɩdwɩ mʋ
tɩ pa‑m.
13 Nmʋ mʋ naanɩ a yɩra yam maama.
Amʋ ta na wʋ a nu pugə nɩ tɩn,
mʋ n kwe-ya n məəli n kɩ daanɩ.
14 A kɩ nmʋ le zanzan,
dɩ n na tɔgɩ cwə-kɩnkagɩla
n naanɩ-nɩ sɩ a taa kwarɩ-m te tɩn.
Nmʋ tɩtʋŋa yam maama
maa yɩ wo-kɩnkagɩla,
yɩ kʋ ba jɩgɩ bʋbwɛa.
15 Amʋ yɩra yam kʋlʋkʋlʋ
wʋ səgi nmʋ tee nɩ
maŋa kalʋ nmʋ na naanɩ-nɩ
yɩ nɔɔn-nɔɔnʋ yǝri kʋ ni nɩ tɩn.
Maŋa kalʋ n na gɔgɩrɩ amʋ maama n kɩ daanɩ
tɩga kuri goŋ-canluŋu wʋnɩb tɩn mʋ kʋntʋ.
16 Maŋa kam kʋntʋ nɩ
nmʋ maŋɩ n na-nɩ,
yɩ a ta wʋ bɩgɩ a ti sɩ ba lʋ-nɩ.
Ba ta na wʋ lʋgɩ-nɩ sɩ a na
wɩa pooni tɩn mʋ,
nmʋ maŋɩ n jeeli da yalʋ maama
amʋ na wʋ́ taa ŋwɩ tɩn
n tiŋi n tɔnɔ kʋm wʋnɩ.
17 Amʋ Tu Wɛ, nmʋ wʋbʋŋa yam gaalɩ
ya dwe sɩ a lwarɩ-ya.
Nɔɔnʋ warɩ ya ni sɩ o jeeli o ja.
18 Amʋ na maŋɩ a kwaanɩ mʋ
sɩ a ga ya ni,
a ga ga mʋ a vu a doogi,
ya na daga ya dwe bugə ni
kasʋl-biə bam tɩn ŋwaanɩ.
Amʋ ta na dɔ a zaŋɩ,
nmʋ ta wʋra amʋ tee nɩ.
19 Amʋ Tu Wɛ, nan zaŋɩ
n gʋ nɔn-balwaarʋ tɩm!
Abam nɔn-gʋra bam,
lagɩ-na je da amʋ yigə nɩ!
20 Bantʋ kaagɩ ba ŋɔɔnɩ wo-balwaarʋ mʋ ba pa‑m.
Nmʋ dʋna bam fɔ vwan yɩranɩ mʋ.
21 Baŋa-Wɛ, amʋ yɔɔrɩ a culi
balʋ na culi nmʋ tɩn.
Kʋ na yɩ balʋ na lɔgɩ
nmʋ kwaga nɩ tɩn,
amʋ tiini a nɩɩsɩ-ba mʋ.
22 Amʋ tiini a culi-ba mʋ cɩga cɩga,
ba na jigi a dʋna tɩn ŋwaanɩ.
23 Amʋ Tu Wɛ, yɔɔrɩ n yɛ
a maama n ja,
sɩ n lwarɩ amʋ bɩcarɩ dɩm
na yɩ te tɩn.
Maŋɩ a maama n nii,
sɩ n lwarɩ a wʋbʋŋa yam cɩga cɩga.
24 Kwaanɩ sɩ n nii,
tusim cwǝŋǝ wʋra
amʋ na tɔgɩ-ka na?
Sɩ n daarɩ n vaŋɩ amʋ n dɩ ŋwɩan kalʋ na ba ti tɩn cwəŋə kam wʋnɩ!