Davidi wɛ-loro zǝnǝ ŋwaanɩ
140
Baŋa-Wɛ, joŋi-nɩ nɔn-balwaarʋ jɩŋa nɩ n yagɩ!Kwəli-nɩ sɩ vɩɩna
yɩ wanɩ ba kɩ-nɩ zʋnnɩ.
2 Bantʋ yǝni ba bʋŋɩ sɩ ba kɩ lwarɩm dwi maama mʋ.
Ba maa lagɩ sɩ ba taa jaanɩ
ni-kantɔgɔ ba tui.
3 Ba niə yam zagɩ mʋ
nɩ bɩsankwɩ-dwǝ niə na dʋnɩ te tɩn.
Ba ni-taanɩ maa gʋɩ nɔɔna,
nɩ kapaa vɩan kam na kɩ te tɩn.a
4 Baŋa-Wɛ, a loori-m! Ta n kwəli-nɩ
sɩ nɔn-balwaarʋ yɩ ma ba dam
ba cɔge-nɩ.
Ta n cʋ-nɩ dɩ wʋ-lʋn-nyɩna,
dɩ ba na lagɩ sɩ a tʋ tɩga nɩ te tɩn.
5 Kamun-nyɩna tiŋi cɩkʋ mʋ
sɩ ba ja-nɩ.
Ba ma cɩ bʋra amʋ cwǝŋǝ nɩ
sɩ a tʋ ka wʋnɩ.
6 Amʋ lagɩ a ta dɩ Baŋa-Wɛ mʋ a wɩ:
«Nmʋ mʋ yɩ amʋ Tu Wɛ dɩm.»
Baŋa-Wɛ, nan cəgi
a na magɩ a japoori a loori n yigə nɩ te tɩn.
7 Amʋ Yuutu Baŋa-Wɛ,
n jɩgɩ dam sɩ n vrɩ-nɩ n yagɩ.
Najara na yi amʋ dɛ dɩlʋ wʋnɩ,
n yǝni n kwǝli a yuu.
8 Baŋa-Wɛ, yɩ sɛ sɩ nɔn-balwaarʋ tɩm
na wǝǝnu tɩlʋ
ba fra na zʋʋrɩ tɩn.
Ba na zaŋɩ amʋ baŋa nɩ,
yɩ pa ba na pwələ
ba tʋŋɩ ba lwarɩm dɩm.
9 Kʋ na yɩ balʋ na gilimi-nɩ
sɩ ba kɩ-nɩ zʋnnɩ tɩn,
pa cam dɩlʋ ba na bʋŋɩ
sɩ ba kɩ amʋ yɩra nɩ tɩn
joori dɩ ba ba tɩtɩ yuu nɩ.
10 Lo min-cala n yagɩ ba yuu nɩ,
sɩ n daarɩ n dʋlɩ-ba n yagɩ
min-lɔŋɔ wʋnɩ.
Pa ba tʋ goŋ-canluŋu wʋnɩ
sɩ ba daa yɩ wanɩ ba nuŋi
kʋ wʋnɩ.
11 Yɩ pa pwələ sɩ bɩbarɩ-nyɩna
na jǝŋǝ je dɩ́ tɩga kam wʋnɩ.
Nan pa lɛɛrʋ zəli wʋ-lʋn-nyɩna
tɩ ja lɩla.
12 Amʋ ye nɩ Baŋa-Wɛ mʋ yǝni
DƖ zɩgɩ DƖ pa yinigə tiinə,
pa nabwənə wanɩ
ba na ba cɩga.
13 Cɩga ŋwaanɩ tɩn,
nɔn-ŋʋna wʋ́ tee n yɩrɩ dɩm.
Balʋ na ve cwə-laa wʋnɩ tɩn
wʋ́ taa zʋʋrɩ n woro kʋm wʋnɩ.