Wʋ-cɔgɔ ləŋə
137
Dɩ́ dɛɛn yǝni dɩ́ jeBabilɔnɩ tɩʋ bwi sɩm ni nɩ
dɩ́ kan yi-na mʋ,
dɩ́ na guli dɩ́ tɩʋ Siyɔn gulə tɩn ŋwaanɩ.a
2 Dɩ́ ma kwe dɩ́ kwaanʋ tɩm mʋ
dɩ́ palɩ bu-tʋlɩ sɩm ni
tweeru tɩm nɛ yɩra nɩ
dɩ́ yagɩ da.
3 Bɛŋwaanɩ, dɩ́ dʋna
dɛɛn daanɩ dɩbam mʋ
sɩ dɩ́ leeni ləŋə dɩ́ pa-ba.
Ba maa jɩgɩ dɩbam ba bɛɛsa
sɩ ba pa dɩ́ leeni wʋpolo le
yɩ ba wɩ:
«Leeni-na ləŋə na ve
Siyɔn tɩʋ kʋm seeni tɩn
á brɩ dɩbam.»
4 Dɩbam nan na zʋʋrɩ
sa-tɩʋ wʋnɩ kʋntʋ tɩn,
dɩ́ wʋ́ kɩ tɛ mʋ sɩ dɩ́ leeni ləŋə
kalʋ na ve Baŋa-Wɛ seeni tɩn?
5 Zeruzalɛm, nɩnɛɛnɩ amʋ na wʋ́ swe nmʋ ni nɩ,
Wɛ dɩ nan wʋ́ pa a jazɩm dɩm swe ka tɩtʋŋa yam kǝmb.
6 Amʋ na ba yǝni a guli
Zeruzalɛm gulə,
Wɛ wʋ́ pa a ni dɩm
laan məəri mʋ.
Amʋ na ba paɩ Zeruzalɛm yɩ
amʋ wʋpolo maama,
Wɛ wʋ́ waarɩ-nɩ kʋntʋ doŋ mʋ.
7 Baŋa-Wɛ, guli Edɔm tiinə bam
na kɩ te maama Zeruzalɛm tɩʋ
cɔgɩm dɛ dɩm nɩ tɩn,
sɩ n daarɩ n waarɩ-ba.
Bantʋ dɛɛn zɩgɩ dɩ́ dʋna bamc
kwaga nɩ yɩ ba wɩ:
«Cɔgɩ-na tɩʋ kʋm fasɩ!
Yɩ daarɩ-na sɔŋɔ dɩdʋa dɩ!»
8 Babilɔnɩ tiinə bam, á nan yɔɔrɩ
á maŋɩ dɩ cɔgɩm!
Balʋ na wʋ́ joori ba kɩ abam
sɩ kʋ maŋɩ dɩ á na kɩ dɩbam te tɩn,
Wɛ wʋ́ pa bantʋ taa jɩgɩ yu-yoŋo.
9 Cɩga tɩn, balʋ na maŋɩ ba kwe
á bu-sɩsɩn ba fǝri pweeru yɩra nɩ,
Wɛ wʋ́ pa bantʋ dɩ
taa jɩgɩ yu-yoŋo.