Baŋa-Wɛ na wʋ́ kɩ Yisɩrayɛlɩ tiinə dʋna bam te tɩn
129
Kʋ na maŋɩ kʋ zɩgɩamʋ biini nɩ tɩn
mʋ a dʋna bam yɔɔrɩ
ba jɩgɩ-nɩ ba daana.
Yisɩrayɛlɩ tiinə bam maŋɩ sɩ ba ləri
ba ta wɩ:
2 «Kʋ na maŋɩ kʋ zɩgɩ amʋ biini nɩ tɩn
mʋ a dʋna bam yɔɔrɩ
ba jɩgɩ-nɩ ba daana,
yɩ ba wʋ wanɩ-nɩ ba ja cɔgɩ.a
3 Amʋ kwaga kam laan nyɩ
dɩ bolo mʋ
ba na mɛ nabɛ ba ma lɔ pɩmpala
ba tiŋi.
4 Baŋa-Wɛ nan yɔɔrɩ
DƖ tɔgɩ cwǝŋǝ dɩ cɩga mʋ.
DƖ ma goni nɔn-balwaarʋ tɩm ŋʋnɩ sɩm
sɩ a wanɩ a lu ba jɩŋa nɩ.»
5 Balʋ maama na culi Siyɔn tɩʋ kʋm tɩn mʋ
Wɛ wʋ́ pa ba na ba cavɩɩra,
pa ba pipiri ba joori kwaga.
6 Wɛ wʋ́ pa ba je lɩla,
nɩnɛɛnɩ digə nayuu gaarʋ
na kwaarɩ tɩ tɩ lɩla te tɩn.
7 Zagɩna bam yigə tǝrǝ
gaarʋ tɩm kʋntʋ wʋnɩ.
Ba maa ba gaanɩ-tɩ ba tiŋə.
8 Balʋ na tɔgɩ bantʋ seeni ba kɛ tɩn
bá sɛ sɩ ba loori Wɛ
sɩ DƖ kɩ-ba lanyɩranɩ.
Ba bá ta nɩnɛɛnɩ,
«Baŋa-Wɛ yu-yoŋo taa wʋ á baŋa nɩ.»