Ləŋ-ŋwɩ 128

Wɛ yu-yoŋo wʋ balʋ na kwarɩ-DƖ tɩn yuu nɩ

Kʋ na yɩ balʋ maama

na kwarɩ Baŋa-Wɛ

yɩ ba tɔgɩ DƖ cwe sɩm tɩn,

Wɛ yu-yoŋo wʋ ba yuu nɩ!

2 Nmʋ wʋ́ di n tɩtʋŋa nyɔɔrɩ

pa n ta n zʋʋrɩ dɩ yazurə

dɩ wʋpolo.

3 Nmʋ kaanɩ wʋ́ taa lʋrɩ biə mʋ

o pa‑m,

nɩnɛɛnɩ tu-ŋʋŋʋ na ləri

biə zanzan te tɩn.

Nmʋ biə bam wʋ́ taa kaagɩ‑m

nɩnɛɛnɩ tweeru na puli

yɩ tɩ kɩ nɔɔna te tɩn.

4 Cɩga tɩn, wʋlʋ maama na kwarɩ Baŋa-Wɛ,

Wɛ wʋ́ kɩ-o yu-yoŋo.

5 Baŋa-Wɛ wʋ́ zɩgɩ Siyɔn nɩ

DƖ kɩ nmʋ yu-yoŋo.

Maŋa maama yɩ n ta ŋwɩ tɩn,

Wɛ wʋ́ pa n maanɩ nɩ

Zeruzalɛm tɩʋ kʋm ve yigə lanyɩranɩ.

6 Wɛ wʋ́ pa n ta n ŋwɩ

sɩ n di wʋdiu n naarʋ jɩŋa nɩ.

Yazurə taa wʋ

Yisɩrayɛlɩ tiinə bam tee nɩ!