Baŋa-Wɛ jɩgɩ dɩbam ŋwaŋa
130
Amʋ Tu Baŋa-Wɛ,a zɩgɩ na-luŋə kuri nɩ mʋ
a keeri a loori nmʋ.
2 Amʋ Yuutu, cəgi amʋ kərə kam!
A loori-m, pʋrɩ n zwa sɩ n cəgi
amʋ wɛ-loro kʋm.
3 Baŋa-Wɛ, nmʋ ya na jeeli
nɔɔna lwarɩm kikiǝ n tiŋi,
nɔɔn-nɔɔnʋ daa bá na bʋra
n yigə nɩ.
4 Nmʋ nan kwe nɔɔna lwarɩm
n ma n cɛ-ba,
sɩ kʋ pa dɩ́ taa kwarɩ-m mʋ.a
5 Amʋ zɩgɩ a cəgi dɩ a wʋʋ maama
sɩ Baŋa-Wɛ laan ba DƖ zəni-nɩ.
Amʋ tɩɩna nan wʋ
DƖ taanɩ dɩm wʋnɩ mʋ.
6 Amʋ yɔɔrɩ a yɩrɩ a nii mʋ
sɩ amʋ Yuutu Wɛ laan ba
DƖ zəni-nɩ,
kʋ dwe tɩtɩɩ yɩrɩna bam na jɩgɩ tɩɩna
sɩ tɩga laan ba ka pʋʋrɩ te tɩn.
Cɩga tɩn, a tɩɩna wʋ Baŋa-Wɛ wʋnɩ,
kʋ dwe yɩrɩna bam na jɩgɩ tɩɩna
nɩ tɩga kam wʋ́ ba ka pʋʋrɩ te tɩn.
7 Yisɩrayɛlɩ tiinə bam,
pa-na sɩ á tɩɩna taa daŋɩ
Baŋa-Wɛ baŋa nɩ.
Bɛŋwaanɩ, Baŋa-Wɛ sono kʋm
ba fɔgɩ kʋ tiə.
DƖ maa yɔɔrɩ DƖ vrɩ nɔɔna
DƖ yagɩ cɩga cɩga.
8 Dɩntʋ tɩtɩ mʋ lagɩ DƖ joŋi Yisɩrayɛlɩ tiinə bam
ba lwarɩm kikiǝ yam maama wʋnɩ
DƖ yagɩ.