Wɛ ni-taanɩ dɩm jɩgɩ zǝnǝ zanzan
Alef
119
Balʋ na yɔɔrɩ ba tɔgɩ cwǝŋǝ yɩ ba ba tusi tɩn mʋ,Wɛ yu-yoŋo wʋ ba yuu nɩ lanyɩranɩ.
Bantʋ yǝni ba sɛ
Baŋa-Wɛ niə yam mʋ lanyɩranɩ.
2 Kʋ ta na yɩ balʋ na tʋŋɩ
ba tɔgɩ Wɛ zaasɩm dɩm
yɩ ba fʋfɔ ba twɛ‑DƖ
dɩ ba wʋʋ maama tɩn,
Wɛ yu-yoŋo wʋ ba yuu nɩ.
3 Bantʋ ba sɛ ba tʋŋɩ lwarɩm kikiə maŋa dɩ maŋa,
yɩ ba nan yɔɔrɩ ba tɔgɩ
Wɛ cwǝŋǝ cɩga mʋ.
4 Nmʋ Baŋa-Wɛ maŋɩ n pa
sɩ n cullu tɩm mʋ tigi jaja.
Kʋ maa maŋɩ sɩ nɔɔna taa tʋŋɩ
ba tɔgɩ-tɩ maŋa maama.
5 Pa a tɩtʋŋ-naga taa tɔgɩ
nmʋ kwǝrǝ na brɩ kʋlʋ tɩn!
6 Amʋ na sɩɩnɩ a yiǝ
sɩ a taa sɛ n ni-kaana yam,
cavɩɩra bá ja-nɩ ya ŋwaanɩ.
7 A na zaasɩ n cɩga taana yam,
a laan wʋ́ taa tee‑m
dɩ a wʋʋ maama.
8 Cɩga tɩn, amʋ wʋ́ taa sɛ
a kɩ nmʋ niə yam mʋ.
Yɩ ma n kwaga n ya amʋ.
Bet
9 Nɔn-dʋŋʋ wʋ́ kɩ tɛ mʋ
sɩ o ŋwɩa kam yɔɔrɩ cwǝŋǝ?
O maŋɩ sɩ o taa cʋ o tɩtɩ,
nɩ nmʋ ni-taanɩ dɩm na brɩ
sɩ o kɩ te tɩn mʋ.
10 Amʋ kwe a wʋʋ maama mʋ
a kwaanɩ sɩ a fʋfɔ a twɛ nmʋ.
Nan yɩ pa a ywəri
nmʋ ni-kaana yam kwaga nɩ.
11 Amʋ kwe n ni-taanɩ dɩm mʋ
a kɩ a bɩcarɩ nɩ,
sɩ kʋ cɩ-nɩ sɩ a yɩ tusi
a cɔgɩ nmʋ yigə.
12 Baŋa-Wɛ,
nmʋ maŋɩ dɩdaanɩ tiə mʋ!
Brɩ-nɩ sɩ a lwarɩ n niə yam cɩga.
13 Amʋ jɩgɩ n cullu tɩlʋ
n na pɛ dɩbam tɩn mʋ
a yǝni a tɛ a brɩ nɔɔna jaja.
14 Amʋ tiini a di ywəəni mʋ
n zaasɩm dɩm ŋwaanɩ,
nɩ ya pɛ a yɩ nadum mʋ te.
15 A wʋ́ taa jɩgɩ n cullu tɩm
a wʋbʋŋa nɩ,
sɩ a daarɩ a tɔgɩ n na-bwərə kam cɩga.
16 A maa wʋ́ pa n niə yam
taa jɩgɩ ywəəni ya pa-nɩ,
sɩ a daa yɩ swe n taanɩ dɩm swiə.
Gimel
17 Amʋ Tu, a loori‑m
sɩ n ta n kɩ lanyɩranɩ n pa-nɩ.
Amʋ laan maa wʋ́ taa jɩgɩ ŋwɩa
yɩ a sɛ a tɔgɩ n taanɩ dɩm
na brɩ te tɩn.
18 Pa a yiǝ puri,
sɩ a wanɩ a lwarɩ wo-kɩnkagɩla
yalʋ n taanɩ dɩm na brɩ tɩn.
19 Amʋ yɩ vəru mʋ lʋgʋ baŋa nɩ.
Yɩ səgi n ni-kaana yam amʋ tee nɩ,
sɩ a yɩ wanɩ a lwarɩ-ya.
20 Maŋa maama wʋnɩ n zaasɩm dɩm tiini ya jɩgɩ fra mʋ dɩ pa-nɩ.
21 Kʋ na yɩ balʋ na brɩ ba tɩtɩ kamunni tɩn,
nmʋ yǝni n waarɩ-ba mʋ.
Kampwəl-balɔrɔ maa wʋ ba yuu nɩ,
ba na vɩn nmʋ ni-kaana yam tɩn ŋwaanɩ.
22 Yɩ pa ba tʋrʋ naa ba yu-yaalɩm
yi amʋ,
Bɛŋwaanɩ, amʋ sɛ a tɔgɩ
nmʋ zaasɩm dɩm mʋ.
23 Pabiə tɩtɩ na maŋɩ ba beeri cwǝŋǝ
sɩ ba cɔge-nɩ mʋ dɩ,
amʋ ta wʋ́ taa jɩgɩ n niə yam
a wʋbʋŋa nɩ.
24 Nmʋ zaasɩm dɩm mʋ tiini
ya paɩ amʋ na ywəəni.
Ya maa brɩ-nɩ cwə-laa
sɩ a taa tɔga.
Dalɩta
25 Amʋ laan tʋ tɩga nɩ,
yɩ tʋʋnɩ lagɩ dɩ ja-nɩ.
Nan tɔgɩ n ni dɩm baŋa nɩ
n pa a joori a na ŋwɩa.
26 A tagɩ a ŋwɩa na yɩ te tɩn maama
a brɩ-m,
yɩ nmʋ dɩ ləri a taanɩ dɩm.
Laan nan brɩ-nɩ n niə yam lanyɩranɩ.
27 Wǝli-nɩ sɩ a wanɩ a ni
n cullu tɩm kuri,
sɩ kʋ paɩ a taa bʋŋɩ
n tɩtʋŋ-kɩnkagɩla yam wʋbʋŋa.
28 Amʋ wʋ-cɔgɔ kʋm
mʋ lagɩ kʋ gʋ-nɩ.
Nan tɔgɩ n ni dɩm baŋa nɩ
n pa a joori a na dam.
29 Pa a nuŋi vwan dwi maama wʋnɩ,
sɩ n daarɩ n tɔgɩ n yu-yoŋo dɩm baŋa nɩ
n pa a taa ye nmʋ niə yam.
30 Amʋ kuri sɩ a taa zɩgɩ dɩ cɩga mʋ a pa‑m.
A ta maa yǝni a guli
nmʋ cullu tɩm gulə.
31 Amʋ Tu Baŋa-Wɛ,
amʋ sɛ a tɔgɩ n zaasɩm dɩm mʋ.
Yɩ pa cavɩɩra di amʋ!
32 Amʋ sɩɩnɩ a yiǝ mʋ sɩ a kɩ
n ni-kaana yam na brɩ kʋlʋ tɩn.
Kʋntʋ tɩn, wǝli-nɩ
sɩ a ni ya kuri lanyɩranɩ.
Hee
33 Amʋ Tu Baŋa-Wɛ, brɩ-nɩ
sɩ a wanɩ a lwarɩ n niə yam kuri.
Amʋ ba lagɩ sɩ a lɔ ya dɩdʋa tɩtɩ kwaga nɩ.
34 Nan pa a yi pʋʋrɩ,
sɩ a wanɩ a sɛ nmʋ ni-taanɩ dɩm.
Amʋ zɩgɩ sɩ a yɔɔrɩ a tɔgɩ-dɩ
dɩ a wʋʋ maama mʋ.
35 Pa n ni-kaana yam taa brɩ-nɩ cwǝŋǝ sɩ a taa veǝ.
Bɛŋwaanɩ, amʋ tiini a ni
ya ywəəni lanyɩranɩ.
36 Pa a wʋbʋŋa taa tɔgɩ n zaasɩm dɩm,
sɩ a fra yɩ zʋ jɩjɩgɩrʋ wʋnɩ.a
37 Dwanɩ amʋ yiǝ wo-yɔɔrʋ baŋa nɩ.
Pa a na ŋwɩa n cwǝŋǝ kam tɔgɩm ŋwaanɩ.b
38 Amʋ Tu, a yɩ n tɩntʋŋnʋ mʋ.
Nan kɩ n na goni ni sɩ n kɩ kʋlʋ
yɩ n pooli sɩ n kɩ te
dɩ balʋ na kwarɩ nmʋ tɩn.
39 A kwarɩ fʋʋnɩ dɩ balʋ na jɩgɩ-nɩ
ba yáalɩ tɩn mʋ.
Yɩ pa a na cavɩɩra ba ŋwaanɩ.
Bɛŋwaanɩ nmʋ tɩtɩ ni-taanɩ dɩm lana zanzan.
40 Nii a na tiini a lagɩ
sɩ a taa tɔgɩ n cullu tɩm te!
Tɔgɩ n cɩga kam ŋwaanɩ
n pa a ŋwɩa joori ka na dam.
Wawu
41 Amʋ Tu Baŋa-Wɛ,
pa n sono kʋm yi amʋ,
sɩ n daarɩ n joŋi-nɩ n yagɩ,
nɩ n na goni ni sɩ n kɩ te tɩn.
42 Kʋntʋ wʋ́ pa a wanɩ a ləri
balʋ na jɩgɩ-nɩ ba twɩ tɩn,
a na kɩ a cɩga n taanɩ dɩm wʋnɩ tɩn ŋwaanɩ.
43 Yɩ pa n cɩga taanɩ dɩm je
amʋ ni nɩ,
sɩ a tɩɩna maama wʋ
nmʋ sarɩya yam nɩ mʋ.
44 Amʋ lagɩ sɩ a taa sɛ nmʋ niə yam maŋa maama mʋ
sɩ kʋ taa ve wuu.
45 Amʋ laan ve mʋ
yɩ kʋlʋkʋlʋ ba daanɩ-nɩ,
a na tiini a lagɩ n cullu tɩm tɩn ŋwaanɩ.
46 A ta wʋ́ taa tɛ n zaasɩm dɩm a brɩ pwa,
yɩ cavɩɩra bá ja-nɩ dɩ ŋwaanɩ.
47 Amʋ wʋʋ mʋ poli zanzan
dɩ nmʋ ni-kaana yam,
a na tiini a soe-ya tɩn ŋwaanɩ.
48 Cɩga tɩn, a soe n niə yam
yɩ a nɩgɩ-ya lanyɩranɩ.
A maa wʋ́ taa bʋŋɩ ya wʋnɩ mʋ zii.
Zayin
49 Yɩ zaŋɩ n swe ni dɩlʋ n na tiŋi
dɩ amʋ wʋlʋ na yɩ n tɩntʋŋnʋ tɩn,
sɩ a tɩɩna maama wʋ dáanɩ mʋ.
50 A na wʋ cam wʋnɩ,
n ni-taanɩ dɩm yǝni dɩ pa
a bɩcarɩ pəni tɩga nɩ mʋ,
yɩ a ŋwɩa joori ka na dam.
51 Banɩgɩrʋ nyɩna jɩgɩ amʋ mʋ
ba kɩ ba mwana.
Amʋ nan wʋ sɛ sɩ a yagɩ
n niə yam tɔgɩm.
52 Amʋ Tu Baŋa-Wɛ,
nmʋ cullu tɩm maŋɩ tɩ wʋra mʋ
sɩ kʋ nuŋi faŋa.
A na yǝni a guli tɩ gulə,
tɩ paɩ a bɩcarɩ tigi tɩga nɩ mʋ.
53 Amʋ wʋʋ mʋ wiirə zanzan
dɩdaanɩ nɔn-balwaarʋ tɩm
na vɩn n niə yam tɩn.
54 A na zʋʋrɩ mɛ maama lʋgʋ baŋa nɩ,
a yǝni a leeni wʋpolo le mʋ
nmʋ zaasɩm dɩm ŋwaanɩ.
55 Baŋa-Wɛ, a ta na yǝni a pəni tɩtɩɩ nɩ,
a guli n yɩrɩ dɩm gulə mʋ.
Kʋntʋ tɩn, a lagɩ a taa tɔgɩ n niə yam.
56 Amʋ na yǝni a kɩ te tɩn mʋ tɩntʋ:
a yɔɔrɩ a sɛ a tɔgɩ n cullu tɩm mʋ.
Het
57 Baŋa-Wɛ, nmʋ yɩranɩ mʋ yɩ dɩlʋ
na maŋɩ dɩ amʋ tɩn.
A wʋbʋŋa jaanɩ sɩ a taa tɔgɩ
n niə yam mʋ.
58 A nan loori‑m
dɩ a wʋʋ maama mʋ
sɩ n yigə taa wʋ a wʋnɩ.
Tɔgɩ n ni dɩm baŋa nɩ
n pa n zaanɩ taa wʋ a yuu nɩ.
59 Amʋ maanɩ a nii
a ŋwɩa na yɩ te tɩn,
pa a yɔɔrɩ a pipiri
a tɔgɩ n zaasɩm dɩm.
60 A sɩɩnɩ a yiǝ mʋ yɩ a kɩ lɩla
sɩ a taa sɛ n ni-kaana yam.
61 Nɔn-balwaarʋ kwaanɩ mʋ
sɩ ba sʋgɩ-nɩ sɩ a cɔgɩ,
nɩ ba vɔgɩ-nɩ mʋ dɩ ŋʋnɩ
ba ja te tɩn.
Amʋ nan bá swe nmʋ niə yam ni nɩ.
62 Tɩtɩɩ kʋnkʋrʋ nɩ mʋ a yǝni a zaŋɩ
sɩ a kɩ nmʋ le zanzan,
nmʋ cullu tɩm na zɩgɩ
cɩga baŋa nɩ tɩn ŋwaanɩ.
63 Kʋ na yɩ a yuudonnə balʋ
a na tɔgɩ dɩ ba tɩn,
bantʋ kwarɩ nmʋ mʋ
yɩ ba ta sɛ n cullu tɩm.
64 Baŋa-Wɛ, nmʋ sono kʋm mʋ
yi lʋgʋ baŋa je maama.
Kʋntʋ tɩn, brɩ-nɩ sɩ a wanɩ
a lwarɩ n niə yam.
Tet
65 Amʋ Tu Baŋa-Wɛ,
a yɩ n tɩntʋŋnʋ mʋ.
Nmʋ sɩɩnɩ n tɔgɩ n ni dɩm baŋa nɩ
n kɩ lanyɩranɩ n pa-nɩ.
66 Nan pa a taa jɩgɩ yiyiu
dɩdaanɩ swan
sɩ a wanɩ a tɔgɩ cwə-laa.
Bɛŋwaanɩ, amʋ pɛ n ni-kaana yam cɩga mʋ zanzan.
67 Maŋa kalʋ nmʋ ta na
wʋ kʋrɩsɩ-nɩ tɩn,
a kaagɩ a tusi cwǝŋǝ mʋ.
Lele kʋntʋ amʋ laan yɔɔrɩ a sɛ
n ni-taanɩ dɩm mʋ.
68 Nmʋ tiini n lamma,
yɩ n kənə dɩ lana zanzan.
Kʋntʋ tɩn, brɩ-nɩ sɩ a lwarɩ
n niə yam cɩga cɩga.
69 Banɩgɩrʋ nyɩna yǝni ba fɔ vwan mʋ
ba daŋɩ a yuu nɩ.
Amʋ nan ta wʋ́ taa tɔgɩ nmʋ cullu tɩm mʋ dɩ a wʋʋ maama.
70 Bantʋ wʋbʋŋa je mʋ
yɩ ba ba jɩgɩ yibwənə.
Kʋ nan na yɩ amʋ,
a tiini a di ywəəni n niə yam ŋwaanɩ.
71 Amʋ na nɛ kʋrɩsɩm dɩlʋ tɩn
tiini dɩ wǝli-nɩ zanzan,
dɩ kʋ na pɛ a zaasɩ
n zaasɩm dɩm tɩn ŋwaanɩ.
72 Niə yalʋ nmʋ na brɩ dɩbam tɩn
tiini ya jɩgɩ kuri ya pa-nɩ,
ya dwe səbu-sɩŋa
dɩ səbu-poŋo maama.c
Yod
73 Nmʋ jɩa mʋ naanɩ amʋ,
yɩ ya fɔgɩ ya pa a zɩga.
Kʋntʋ tɩn, pa a yi pʋʋrɩ
sɩ a wanɩ a ni
n ni-kaana yam kuri.
74 Balʋ dwi maama na zuli nmʋ tɩn
na nɛ amʋ, ba wʋʋ wʋ́ poli,
dɩ amʋ tɩɩna na wʋ nmʋ taanɩ dɩm wʋnɩ tɩn ŋwaanɩ.
75 Baŋa-Wɛ, amʋ ye nɩ
nmʋ na yǝni n bʋŋɩ n ja
kʋlʋ maama tɩn
yɩ cɩga mʋ.
Nmʋ na kʋrɩsɩ-nɩ te tɩn
yɔɔrɩ kʋ jɩgɩ cɩga.
76 Pa n sono kʋm yi amʋ
sɩ a bɩcarɩ laan pəni tɩga nɩ
nɩ n na tiŋi n ni sɩ n kɩ te
n pa amʋ wʋlʋ na yɩ
n tɩntʋŋnʋ tɩn.
77 Ta pa n yibwənə yi amʋ
sɩ a wanɩ a na ŋwɩa cɩga cɩga.
Bɛŋwaanɩ, a tiini a di ywəəni
n niə yam ŋwaanɩ.
78 Pa banɩgɩrʋ nyɩna bam
di cavɩɩra,
sɩ bantʋ fɔgɩ vwan mʋ
ba ma cɔge-nɩ.
Kʋ nan na yɩ amʋ,
amʋ wʋ́ taa guli
n cullu tɩm gulə mʋ.
79 Pa balʋ na kwarɩ nmʋ tɩn
fʋfɔ ba yi amʋ te,
sɩ ba wanɩ ba mɩ dɩ nmʋ zaasɩm dɩm.
80 Pa a yɔɔrɩ a taa tɔgɩ
nmʋ niə yam yɩ tusim tǝrǝ.
Kʋntʋ baŋa nɩ, cavɩɩra bá di amʋ.
Kaf
81 Amʋ yɔɔrɩ a nii mʋ
sɩ n vrɩ-nɩ n yagɩ.
A tɩɩna maama dɩ maa wʋ
nmʋ taanɩ dɩm baŋa nɩ.
82 A kwaanɩ a nii mʋ sɩ a na nɩ
ni dɩlʋ n na tiŋi tɩn
sɩɩnɩ dɩ kɩ, yɩ a ga.
Maŋa kɔɔ mʋ nmʋ wʋ́ ba
n zəni-nɩ,
sɩ a bɩcarɩ pəni tɩga nɩ?
83 Amʋ yɩra yam kwaarɩ mʋ
nɩnɛɛnɩ lɔɔ mʋ tɩte ba na kwe ba ca mim yigə nɩ.
Dɩ kʋ dɩ, amʋ ta wʋ swe
n zaasɩm dɩm ni nɩ.
84 Amʋ Tu Wɛ,
amʋ wʋ́ taa cəgi‑m taa
sɩ kʋ vu kʋ maŋɩ yən mʋ?
Kʋ na yɩ balʋ na jɩgɩ-nɩ ba daana tɩn,
maŋa kɔɔ mʋ nmʋ wʋ́ zaŋɩ
n waarɩ-ba?
85 Banɩgɩrʋ nyɩna bam yǝni
ba vɩn nmʋ niə yam mʋ,
yɩ ba bʋŋɩ sɩ ba ja-nɩ,
nɩ ba na kʋgɩ goŋo
sɩ a tʋ kʋ wʋnɩ te tɩn.
86 Nmʋ ni-kaana yam maama
maŋɩ sɩ dɩ́ pa-ya cɩga mʋ.
Nan ba n zəni-nɩ,
sɩ nɔɔna tɔgɩ vwan baŋa nɩ mʋ
ba bɛɛsɩ-nɩ.
87 Kʋ ya gɛ fɩɩn yɩranɩ mʋ
sɩ ba gʋ-nɩ.
Amʋ maa wʋ dʋlɩ nmʋ cullu tɩm
a yagɩ.
88 Nan da n sono kʋm ŋwaanɩ
n pa a taa jɩgɩ a ŋwɩa
yɩ a tʋŋɩ a tɔgɩ
n zaasɩm dɩm maama.
Lameda
89 Baŋa-Wɛ, nmʋ ni-taanɩ dɩm
wʋ́ taa jɩgɩ kuri maŋa maama
wɛyuu je maama nɩ.
90 Dwi dɩdwɩ wʋ́ kɛ,
sɩ dɩdoŋ dɩ saŋɩ dɩ ba.
Nmʋ nan zɩgɩ n cɩga wʋnɩ mʋ
maŋa maama.
Nmʋ ta kɩ tɩga kam baŋa
sɩ ka taa wʋra maŋa maama.
91 Dɩ zɩm maama
nmʋ niə yam ta jɩgɩ kuri.
Wǝǝnu maama dɩ jɩgɩ
sɩ tɩ taa tʋŋɩ tɩ pa‑m mʋ.
92 Amʋ ya na wʋ di ywəəni
nmʋ niə yam tɔgɩm ŋwaanɩ,
tɩntʋ wɛɛnɩ yaara yaá gʋ-nɩ.
93 Amʋ ba lagɩ a fɔgɩ a swe
nmʋ cullu tɩm swiə,
tɩntʋ na pɛ a ŋwɩa kɩ dam tɩn ŋwaanɩ.
94 Joŋi-nɩ n yagɩ,
sɩ a yɩ nmʋ nɔɔnʋ mʋ.
A maa tiini a nɩgɩ n cullu tɩm.
95 Nɔn-balwaarʋ tɩm beeri cwǝŋǝ mʋ
sɩ ba ja amʋ ba gʋ.
Amʋ nan wʋ́ taa jɩgɩ n zaasɩm dɩm
a wʋbʋŋa nɩ mʋ.
96 Amʋ nɛ nɩ
woŋo maama wʋ́ ba kʋ kɛ,
kʋ na maŋɩ kʋ lamma te dɩ.
Nmʋ ni-kaana yam nan jagɩ
je maama nɩ mʋ,
yɩ ya ba jɩgɩ sisəm.
Mem
97 Nii amʋ na soe n niə yam te!
Amʋ jɩgɩ ya wʋbʋŋa mʋ
dɛ dɩm maama wʋnɩ.
98 Nmʋ ni-kaana yam mʋ paɩ
a jɩgɩ swan a dwe a dʋna maama,
a na jɩgɩ ya wʋbʋŋa
maŋa maama tɩn ŋwaanɩ.
99 A maa jɩgɩ yi-pʋrʋ a dwe
balʋ na jɩgɩ-nɩ ba zaasɩ tɩn tɩtɩ,
a na yǝni a guli n zaasɩm dɩm gulə tɩn ŋwaanɩ.
100 Amʋ yi pʋʋrɩ sɩ kʋ dwǝni
nankwɩn tɩtɩ dɩ,
a na tʋŋɩ a tɔgɩ n cullu tɩm tɩn ŋwaanɩ mʋ.
101 Amʋ ba sɛ sɩ a taa tɔgɩ
lwarɩm cwǝŋǝ,
pa a taa kɩ n ni-taanɩ dɩm
na brɩ kʋlʋ tɩn.
102 Amʋ wʋ pipiri a lɔ
n niə yam kwaga nɩ,
nmʋ tɩtɩ na brɩ-nɩ
sɩ a lwarɩ ya kuri tɩn ŋwaanɩ.
103 Nmʋ ni-taanɩ dɩm tiini
dɩ ywəmmə dɩ pa-nɩ,
sɩ kʋ dwǝni tʋʋrʋ na sʋna te tɩn!
104 Nmʋ cullu tɩm paɩ
a yi pʋʋrɩ lanyɩranɩ.
Kʋntʋ ŋwaanɩ amʋ laan culi
cwǝŋǝ kalʋ maama
na yɩ vwan cwǝŋǝ tɩn.
Nun
105 Nmʋ taanɩ dɩm mʋ yǝni
dɩ pa-nɩ pooni pa a ve dɩ wʋnɩ,
nɩ min-zoŋo na nyɩ
pooni cwǝŋǝ nɩ te tɩn.
106 Amʋ maŋɩ a du durə mʋ wɩ
amʋ wʋ́ tʋŋɩ a tɔgɩ n niə yam
dɩ ya na yɔɔrɩ ya jɩgɩ cɩga te tɩn.
Amʋ bá yiri a ni dɩm kʋntʋ.
107 Amʋ Tu Baŋa-Wɛ,
cam tiini dɩ zʋ-nɩ zanzan.
Kʋntʋ tɩn, tɔgɩ n ni dɩm baŋa nɩ
n pa a ŋwɩa joori ka kɩ dam.
108 Baŋa-Wɛ, sɛ sɩ n joŋi
a wʋ-yoŋo pɛɛra yam,
a na lagɩ a ma-ya a zuli nmʋ tɩn ŋwaanɩ.
Nan ta brɩ-nɩ n cullu tɩm.
109 A yǝni a dʋlɩ a ŋwɩa kam mʋ a yagɩ,
yɩ a daa ta ba swe n niə yam swiə.
110 Nɔn-balwaarʋ tɩm kwaanɩ mʋ
sɩ ba ja-nɩ,
nɩ ba tiŋi cɩkʋ mʋ te.
Amʋ nan wʋ pipiri a lɔ
n cullu tɩm kwaga nɩ.
111 Nmʋ zaasɩm dɩm wʋ́ taa jɩgɩ lʋnnɩ
dɩ pa-nɩ maŋa maama.
Dɩntʋ mʋ paɩ a di ywəəni lanyɩranɩ.
112 Amʋ yɔɔrɩ a bʋŋɩ a ja mʋ nɩ
amʋ wʋ́ taa tɔgɩ n niə yam
na brɩ kʋlʋ tɩn taa
sɩ a ŋwɩa ba ka ti.
Sameka
113 Kʋ na yɩ balʋ na jɩgɩ
wʋbʋŋa yale tɩn,
amʋ yǝni a culi-ba mʋ.d
Amʋ ta ma daarɩ a ja
sɩ a taa soe n niə yam.
114 Nmʋ mʋ yɩ amʋ dalɩm je.
Nmʋ ta ma n cʋ-nɩ cam wʋnɩ.
Nmʋ taanɩ dɩm yɩranɩ wʋnɩ mʋ
amʋ tɩɩna wʋra.
115 Abam balʋ na kɩ lwarɩm
á daŋɩ a yuu nɩ tɩn,
lagɩ-na je da a yigə nɩ!
Bɛŋwaanɩ a wʋbʋŋa maŋɩ ya ja
sɩ a taa tɔgɩ ni-kaana yalʋ
amʋ Tu Wɛ dɩm na pɛ-nɩ tɩn mʋ.
116 Baŋa-Wɛ, da n ni dɩm ŋwaanɩ
n pa a ŋwɩa na dam.
Amʋ tɩɩna na wʋ nmʋ tee nɩ tɩn,
yɩ pa cavɩɩra di-nɩ kʋ ŋwaanɩ.
117 Fɔgɩ n ta n jɩgɩ-nɩ kəŋkəŋ,
sɩ cam yɩ yi-nɩ.
Kʋntʋ mʋ wʋ́ pa amʋ yigə taa wʋ
n niə yam wʋnɩ maŋa maama.
118 Kʋ na yɩ balʋ na yǝni ba lɔ
n niə yam kwaga nɩ tɩn,
n yɔɔrɩ n vɩ-ba mʋ.
Ba wʋbʋŋa maama
yɩ vwan yɩranɩ mʋ.
119 Nmʋ nii nɔn-balwaarʋ balʋ maama
na wʋ tɩga baŋa nɩ tɩn
sɩ ba taa yɩ weeru mʋ n yigə nɩ.
Kʋntʋ ŋwaanɩ amʋ soe n zaasɩm dɩm.
120 Amʋ yɩra mʋ tiini ya saɩ
a na kwarɩ fʋʋnɩ dɩ nmʋ tɩn ŋwaanɩ.
Nmʋ na di nɔɔna taanɩ te tɩn
maa paɩ a fʋna zanzan.
Ayin
121 Amʋ kɩ kʋlʋ na lamma
yɩ kʋ jɩgɩ cɩga tɩn mʋ.
Yɩ yagɩ-nɩ sɩ a tʋ
balʋ na bɛɛsɩ-nɩ tɩn jɩŋa nɩ.
122 Amʋ yɩ n tɩntʋŋnʋ mʋ.
Ta n zɩgɩ n pa-nɩ,
sɩ lanyɩranɩ yi amʋ.
Yɩ sɛ sɩ banɩgɩrʋ nyɩna bam
taa bɛɛsɩ-nɩ.
123 Amʋ kwaanɩ a nii mʋ taan
sɩ n vrɩ-nɩ n yagɩ,
sɩ ni dɩlʋ nmʋ na tiŋi tɩn
sɩɩnɩ dɩ kɩ.
124 Da n sono kʋm ŋwaanɩ
n ba n wǝli amʋ
na yɩ n tɩntʋŋnʋ tɩn.
Brɩ-nɩ sɩ a wanɩ a lwarɩ
n niə yam cɩga cɩga.
125 Ta pa a yi pʋʋrɩ
sɩ a wanɩ a lwarɩ n zaasɩm dɩm,
a na yɩ n tɩntʋŋnʋ tɩn ŋwaanɩ.
126 Baŋa-Wɛ, maŋa kam yi
sɩ n zaŋɩ n kɩ kǝm,
nɔɔna na vɩn n niə yam tɩn ŋwaanɩ.
127 Cɩga tɩn, amʋ tiini a soe
n ni-kaana yam.
Ya jɩgɩ kuri ya dwe səbu-sɩŋa,
nɩ ka na maŋɩ ka lana te dɩ.
128 Kʋntʋ ŋwaanɩ a yǝni a tɔgɩ
n cullu tɩm maama mʋ.
Amʋ ta culi cwǝŋǝ kalʋ maama
na yɩ vwan cwǝŋǝ tɩn.
Peeni
129 Nmʋ zaasɩm dɩm yɩ
zaasɩm-kɩnkagɩla mʋ.
Kʋntʋ ŋwaanɩ a yɔɔrɩ a tɔgɩ-dɩ.
130 Nɔɔna na tu ba lwarɩ
n taanɩ dɩm kuri,
baá na pooni
sɩ kʋ pa ba yiǝ puri.
Dɩ ta paɩ nayəri-nyɩna jaanɩ swan.
131 Amʋ tiini a jɩgɩ
nmʋ ni-kaana yam fra,
nɩnɛɛnɩ na-nyɔm mʋ jɩgɩ-nɩ tɩn.
132 A loori-m, nii amʋ seeni
sɩ n duri a yibwənə,
nɩ n na yǝni n kɩ te
n pa balʋ na zuli nmʋ yɩrɩ tɩn.
133 Tɔgɩ n ni dɩm baŋa nɩ
n pa a yɔɔrɩ a tɔgɩ cwǝŋǝ.
Yɩ sɛ sɩ lwarɩm na dam
amʋ baŋa nɩ.
134 Kʋ na yɩ balʋ na jɩgɩ-nɩ ba bɛɛsa tɩn,
joŋi-nɩ ba jɩŋa nɩ n yagɩ,
sɩ a wanɩ a taa sɛ n cullu tɩm.
135 Pa n yibiyə jeeri amʋ seeni
sɩ n kɩ-nɩ yu-yoŋo,
a na yɩ n tɩntʋŋnʋ tɩn ŋwaanɩ.
Brɩ-nɩ sɩ a wanɩ a lwarɩ
n niə yam cɩga cɩga.
136 Amʋ kanɩ yi-na mʋ barɩ-barɩ,
a na nɛ nɔɔna na vɩn
n niə yam tɔgɩm tɩn ŋwaanɩ.
Tesadɩ
137 Baŋa-Wɛ,
nmʋ jɩgɩ cɩga lanyɩranɩ.
Nmʋ cullu tɩm dɩ yɔɔrɩ
tɩ tɔgɩ cwǝŋǝ mʋ.
138 Nmʋ na pɛ dɩbam zaasɩm dɩlʋ
sɩ dɩ́ taa tɔgɩ tɩn
tiini ya yɩ cɩga mʋ,
yɩ ya maŋɩ sɩ dɩ́ sɛ-dɩ.
139 Kʋ tiini kʋ daanɩ-nɩ mʋ
dɩdaanɩ a dʋna bam na swe
nmʋ taanɩ dɩm swiə tɩn.
140 Nmʋ ni-taanɩ dɩm tiini dɩ jɩgɩ kuri.
Amʋ wʋlʋ na yɩ n tɩntʋŋnʋ tɩn
tiini a soe-dɩ zanzan.
141 Amʋ tiini a muri
yɩ nɔɔna jɩgɩ-nɩ ba goonə.
Amʋ nan ba fɔgɩ a swe
n cullu tɩm ni nɩ.
142 Nmʋ na zɩgɩ n cɩga wʋnɩ te tɩn
wʋ́ taa wʋra mʋ maŋa maama.
Nmʋ ni-kaana yam dɩ yɔɔrɩ
ya yɩ cɩga mʋ.
143 Yaara dɩ cam mʋ tʋ amʋ baŋa nɩ.
Nmʋ ni-kaana yam nan paɩ
a di ywəəni zanzan.
144 Nmʋ zaasɩm dɩm yɔɔrɩ ya yɩ
cɩga mʋ sɩ kʋ taa ve maŋa maama.
Pa a yi pʋʋrɩ lanyɩranɩ
sɩ a wanɩ a na ŋwɩa cɩga cɩga.
Qɔtɩ
145 Amʋ Tu Baŋa-Wɛ,
amʋ keeri a loori nmʋ
dɩ a bɩcarɩ maama!
Nan ləri a wɛ-loro kʋm,
sɩ a wanɩ a taa tɔgɩ n niə yam.
146 Nan joŋi-nɩ n yagɩ
nɩ a na loori‑m te tɩn,
sɩ a taa kɩ a tɔgɩ n zaasɩm dɩm.
147 Amʋ yǝni a dɔ a zaŋɩ
yɩ tɩga ta wʋ pʋʋrɩ,
sɩ a loori zǝnǝ nmʋ tee nɩ.
A kwe a tɩɩna a daŋɩ
n taanɩ dɩm baŋa nɩ mʋ.
148 Tɩtɩɩ dɩm maama wʋnɩ
dɔɔm ba tui a yiǝ nɩ,
yɩ a wʋbʋŋa yɔɔrɩ ya wʋ
n ni-taanɩ dɩm wʋnɩ mʋ.
149 Baŋa-Wɛ, da n sono kʋm ŋwaanɩ
n cəgi a wɛ-loro kʋm.
Ta tɔgɩ n cɩga cwǝŋǝ baŋa nɩ
n pa a ŋwɩa joori ka na dam.
150 Balʋ na soe kǝm-balwaarʋ tɩn
laan twɛ amʋ mʋ
sɩ ba kɩ-nɩ zʋnnɩ.
Bantʋ yigə brɩ ka tǝrǝ dɩ n niə yam.
151 Kʋ nan na yɩ nmʋ, Baŋa-Wɛ,
nmʋ wʋ amʋ tee nɩ mʋ.
Nmʋ ni-kaana yam maama
maa yɔɔrɩ ya yɩ cɩga.
152 Kʋ na zɩgɩ faŋa faŋa tɩn
mʋ a maanɩ n zaasɩm dɩm wʋnɩ nɩ
n pɛ dɩ zɩgɩ mʋ maŋa maama.
Resa
153 Nii cam na tiini dɩ jɩgɩ-nɩ te tɩn
sɩ n daarɩ n vrɩ-nɩ n yagɩ.
Bɛŋwaanɩ, amʋ ba swe
nmʋ niə yam swiə.
154 Zaŋɩ n zɩgɩ a kwaga nɩ
sɩ n ŋɔɔnɩ n pa-nɩ,
yɩ n daarɩ n joŋi-nɩ n yagɩ.
Tɔgɩ n ni-taanɩ dɩm baŋa nɩ
n pa a na ŋwɩa.
155 Nɔn-balwaarʋ tɩm bá fɔgɩ
ba na vrɩm,
ba yigə na tǝri n niə yam wʋnɩ tɩn ŋwaanɩ.
156 Baŋa-Wɛ, nmʋ tiini n yɩ yibwənə tu.
Tɔgɩ n cwə-laarʋ tɩm ŋwaanɩ
n pa a ŋwɩa joori ka na dam.
157 Amʋ dʋna bam dɩ balʋ
na bɛɛsɩ-nɩ tɩn mʋ tiini ba gaalɩ.
Dɩ kʋntʋ maama dɩ
amʋ ba ywəri a daarɩ nmʋ zaasɩm dɩm.
158 Kʋ na yɩ balʋ na nuŋi
n cɩga kam kwaga nɩ tɩn,
amʋ culi-ba mʋ,
ba na vɩn n ni-taanɩ dɩm tɩn ŋwaanɩ.
159 Baŋa-Wɛ, nii amʋ na soe
n cullu tɩm te!
Nan da n sono kʋm ŋwaanɩ
n pa a na ŋwɩa cɩga cɩga.
160 Nmʋ taanɩ dɩm maama yɔɔrɩ
dɩ yɩ cɩga mʋ.
Nmʋ cɩga taana yam maama
dɩ maa wʋra maŋa maama.
Sin
161 Dɩdɛɛra jɩgɩ-nɩ mʋ ba yaarɩ
kafɛ ŋwaanɩ.
Amʋ nan nɩgɩ n taanɩ dɩm mʋ
dɩ a bɩcarɩ maama.
162 Amʋ tiini a di ywəəni mʋ
nmʋ ni-taanɩ dɩm ŋwaanɩ,
nɩnɛɛnɩ a na pɛ jɩjɩgɩrʋ zanzan te tɩn.e
163 Amʋ tiini a culi vwan dwi maama.
Kʋ daarɩ a soe nmʋ niə yam mʋ lanyɩranɩ.
164 Kuni bɩrpɛ mʋ dɛ maama wʋnɩ
amʋ wʋ́ zuli nmʋ,
n niə yam na zɩgɩ dɩ cɩga tɩn ŋwaanɩ.
165 Kʋ na yɩ balʋ na soe n niə yam tɩn,
n yǝni n pa ba bɩcarɩ zuri lanyɩranɩ mʋ.
Kʋlʋkʋlʋ tǝrǝ kʋ na wʋ́ pa
sɩ bantʋ tʋ tɩga nɩ.
166 Baŋa-Wɛ, amʋ tɩɩna wʋ
nmʋ yɩranɩ wʋnɩ mʋ
sɩ n vrɩ-nɩ n yagɩ.
Amʋ sɛ a kɩ n ni-kaana yam
na brɩ kʋlʋ tɩn.
167 Amʋ yɔɔrɩ a tɔgɩ n zaasɩm dɩm mʋ,
bɛŋwaanɩ a tiini a soe-dɩ zanzan.
168 Amʋ tʋŋɩ a tɔgɩ n cullu tɩm
dɩ n zaasɩm dɩm.
Nmʋ maŋɩ n ye amʋ tɩtʋŋ-naga maama ni nɩ.
Tawɩ
169 Baŋa-Wɛ, cəgi amʋ na keeri
a loori nmʋ te tɩn!
Tɔgɩ n taanɩ dɩm baŋa nɩ
n pa a na yi-pʋrʋ.
170 Cəgi a wɛ-loro kʋm,
sɩ n daarɩ n da n ni dɩm ŋwaanɩ
n joŋi-nɩ n yagɩ.
171 Amʋ wʋ́ puri a ni mʋ
sɩ a taa ma-dɩ a tee nmʋ,
nmʋ na brɩ-nɩ sɩ a lwarɩ
n niə yam kuri tɩn ŋwaanɩ.
172 Amʋ ta wʋ́ leeni a zuli
n ni-taanɩ dɩm mʋ,
nmʋ ni-kaana yam maama
na yɩ cɩga tɩn ŋwaanɩ.
173 Kwe n jɩŋa kam n ma n zəni-nɩ,
amʋ na kuri sɩ a sɛ
n cullu tɩm tɩn ŋwaanɩ.
174 Baŋa-Wɛ, amʋ yɔɔrɩ a nii mʋ
sɩ n vrɩ-nɩ n yagɩ.
Nmʋ niə yam mʋ paɩ a di ywəəni.
175 Sɛ sɩ amʋ yɔɔrɩ a taa ŋwɩ:
sɩ a taa tee‑m a ŋwɩa kam wʋnɩ.
Pa n niə yam taa jɩgɩ zǝnǝ
ya pa-nɩ.
176 Amʋ tusi cwǝŋǝ mʋ yɩ a je
nɩ pi-jiǝ doŋ tɩn.f
Pa n yigə taa wʋ amʋ wʋlʋ
na yɩ n tɩntʋŋnʋ tɩn wʋnɩ,
Bɛŋwaanɩ, amʋ brɩ a wʋ swe
n ni-kaana yam ni nɩ.