Le kǝm
118
Pa dɩ́ kɩ-na Baŋa-Wɛ le, sɩ DƖ lamma.DƖ sono kʋm wʋra mʋ maŋa maama.
2 Pa-na sɩ Yisɩrayɛlɩ tiinə bam tɔgɩ
ba ta wɩ:
«DƖ sono kʋm wʋra mʋ maŋa maama.»
3 Pa-na sɩ Wɛ kaanɩm tu Arɔn dwi tiinə bam dɩ tɔgɩ ba ta wɩ:
«DƖ sono kʋm wʋra mʋ maŋa maama.»
4 Pa-na sɩ balʋ maama na kwarɩ Wɛ tɩn dɩ tɔgɩ ba ta wɩ:
«DƖ sono kʋm wʋra mʋ maŋa maama.»
5 Amʋ wʋʋ ya na tiini kʋ cɔgɩ tɩn,
a ma loori Baŋa-Wɛ.
DƖ ma sɛ a wɛ-loro kʋm
pa a joori a na a tɩtɩ.
6 Baŋa-Wɛ mʋ zɩgɩ amʋ kwaga nɩ.
Kʋntʋ tɩn,
a daa bá taa kwarɩ fʋʋnɩ.
Nabiinǝ lagɩ ba kɩ amʋ bɛɛ mʋ?a
7 Cɩga ŋwaanɩ tɩn,
Baŋa-Wɛ mʋ wʋ amʋ tee nɩ
sɩ DƖ zəni-nɩ.
Kʋ na yɩ balʋ na culi-nɩ tɩn,
ba lagɩ ba tʋ mʋ yɩ a nii-ba.
8 Nɔɔnʋ na ve
o dalɩ Baŋa-Wɛ woro nɩ,
kʋntʋ garɩ o tɩɩna
na wʋ nabiinǝ baŋa nɩ.
9 Nɔɔnʋ na ve
o dalɩ Baŋa-Wɛ woro nɩ,
kʋntʋ garɩ o tɩɩna
na wʋ dɩdɛɛra baŋa nɩ.
10 Dwi-gɛ tiinə maama mʋ
ya gilimi amʋ ba kɩ tɩtarɩ nɩ.
Baŋa-Wɛ yɩrɩ dɩm dam ŋwaanɩ
amʋ nan wanɩ-ba a yigi
a dɩ tɩga nɩ.
11 Cɩga ŋwaanɩ tɩn,
ba yɔɔrɩ ba gilimi-nɩ,
yɩ a wanɩ-ba a yigi a dɩ tɩga nɩ,
Baŋa-Wɛ yɩrɩ dɩm dam ŋwaanɩ.
12 Ba yɔɔrɩ ba məəli-nɩ mʋ
nɩnɛɛnɩ twɩ na məəli nɔɔna te tɩn.
Ba nan je mʋ lɩla
nɩnɛɛnɩ sabarɩ sɩlʋ
mim na zwɛ tɩn mʋ.
A ma wanɩ-ba a yigi a dɩ tɩga nɩ,
Baŋa-Wɛ yɩrɩ dɩm dam ŋwaanɩ.
13 Ba ya tiini ba jɩgɩ-nɩ ba pɩɩna.
Kʋ ma gɛ fɩɩn mʋ sɩ a tʋ tɩga nɩ.
Baŋa-Wɛ nan yɔɔrɩ
DƖ da DƖ zəni-nɩ mʋ.
14 Baŋa-Wɛ mʋ yɩ dɩlʋ na yǝni
DƖ pa-nɩ dam
yɩ DƖ ta kwǝri DƖ cʋ amʋ
camb wʋnɩ.
DƖ maa yɩ dɩlʋ na joŋi-nɩ
DƖ yagɩ tɩn.
15 Cəgi-na! Wɛ nɔn-ŋʋna yam
zɩgɩ ba vwə wʋnɩ
ba kaasɩ ywəəni dɩ wɔnɔ ŋwaanɩ mʋ yɩ ba wɩ:
«Baŋa-Wɛ jazɩm dɩm mʋ
tʋŋɩ wo-kamunə!
16 Cɩga ŋwaanɩ tɩn,
Baŋa-Wɛ jazɩm dɩm jɩgɩ dam!
DƖ ma tɔgɩ dɩ baŋa nɩ
DƖ tʋŋɩ wo-kamunə!»c
17 Amʋ bá tɩ, a lagɩ a taa ŋwɩ mʋ.
Amʋ laan maa wʋ́ taa tɔɔlɩ
a brɩ nɔɔna
Baŋa-Wɛ na kɩ
tɩtʋŋ-kamunə yalʋ tɩn.
18 Baŋa-Wɛ ya tiini DƖ pa
kʋ cɛ a yɩra nɩ.
Dɩ kʋntʋ maama dɩ,
DƖ wʋ pɛ tʋʋnɩ ja-nɩ.
19 «Pʋrɩ-na manchoŋo ni dɩm
á pa-nɩ
sɩ a zʋ Wɛ digə kam
mɛ nɔn-ŋʋna na yǝni ba zʋʋrɩ tɩn.
Sɩ amʋ wʋ́ zʋ dáanɩ mʋ
a kɩ Baŋa-Wɛ le.»
20 «Baŋa-Wɛ wara-je di-niə yam
mʋ tɩntʋ.
Wɛ nɔn-ŋʋna yam yɩranɩ mʋ
jɩgɩ cwǝŋǝ sɩ ba tɔgɩ da
ba vu ba zuli‑DƖ.»
21 «Amʋ nan wʋ́ kɩ nmʋ Baŋa-Wɛ le,
nmʋ na sɛ a wɛ-loro kʋm
yɩ n joŋi-nɩ n yagɩ tɩn ŋwaanɩ.»
22 Kandwɛ dɩlʋ di-lwara bam na vɩn tɩn
laan joori dɩ ba dɩ ji kandwɛ
dɩlʋ na paɩ digə kam damma tɩn.
23 Kʋntʋ yɩ Baŋa-Wɛ kǝm mʋ.
Kʋ maa yɩ wo-kɩnkagɩlɩ
kʋ pa dɩbam.d
24 Zɩm mʋ yɩ Baŋa-Wɛ
tɩtʋŋ-kamunə dɛ dɩm!
Pa-na sɩ dɩ́ taa caka dɩ wʋpolo
dɩ ŋwaanɩ.
25 Yuutu Baŋa-Wɛ,
dɩ́ loori nmʋ tee nɩ
sɩ n joŋi dɩbam n yagɩ!
Pa dɩ́ tɩtʋŋa taa ve yigə lanyɩranɩ!
26 «Baŋa-Wɛ wʋ́ kɩ wʋlʋ na tu
o yɩrɩ ŋwaanɩ tɩn yu-yoŋo.
Dɩbam zɩgɩ Baŋa-Wɛ
digə kam nɩ mʋ
dɩ́ warɩ Wɛ sɩ DƖ kɩ-o yu-yoŋo!»e
27 Baŋa-Wɛ sɩɩnɩ DƖ yɩ
dɩbam Tu Wɛ dɩm mʋ.
DƖ maa paɩ pooni taa wʋ
dɩ́ tee nɩ.
Kʋntʋ tɩn, di-na candiə á ma á zuli‑DƖ!
Kwe-na varɩm á vɔ dɩ ŋʋnɩ
á ja á vu á le
kaanɩm bimbim dɩm nyɩa nɩ.
28 Nmʋ mʋ yɩ amʋ Tu Wɛ dɩm.
Amʋ wʋ́ kɩ nmʋ le zanzan.
Cɩga tɩn, amʋ wʋ́ tee nmʋ yɩrɩ
pa dɩ zaŋɩ wɛɛnɩ,
n na yɩ amʋ Tu Wɛ tɩn ŋwaanɩ.
29 Pa dɩ́ kɩ-na Baŋa-Wɛ le,
sɩ DƖ lamma.
DƖ sono kʋm wʋra mʋ maŋa maama.