Baŋa-Wɛ yɩranɩ mʋ yɩ Wɛ cɩga cɩga
115
Kʋ daɩ dɩbam mʋmaŋɩ dɩ zulə,
sɩ nmʋ, Baŋa-Wɛ yɩranɩ mʋ.
Kʋ maŋɩ sɩ nɔɔna taa tee
nmʋ yɩrɩ,
nmʋ sono kʋm na gaalɩ
yɩ n ta jɩgɩ cɩga tɩn ŋwaanɩ.
2 Bɛɛ mʋ yɩ dwi-gɛ tiinə bam
bwe daanɩ ba wɩ:
«Ba Wɛ dɩm bɛ?»
3 Dɩbam Tu Wɛ dɩm nan wʋ
wɛyuu nɩ mʋ.
DƖ maa tʋŋɩ kʋlʋ maama
DƖ wʋʋ na dɛ tɩn.
4 Kʋ nan na yɩ bantʋ jwǝnǝ yam,
kʋ yɩ səbu-poŋo
dɩdaanɩ səbu-sɩŋa mʋ
nabiinǝ kwe ba mɔ-ya dɩ ba jɩa.
5 Ya maŋɩ ya jɩgɩ niə,
ya nan ba ŋɔɔna.
Ya zɩ jɩgɩ yiǝ mʋ dɩ,
ya nan ba naɩ.
6 Zwa mʋ ba jɩga,
yɩ ya ba ni kʋlʋkʋlʋ.
Ya mʋmwa dɩ ba ni lwəm.
7 Ya ta jɩgɩ jɩan,
yɩ ya warɩ ya ma-sɩ
ya dwe wǝǝnu.
Kʋ na yɩ ya nɛ sɩm,
ya warɩ ya ma-sɩ ya vu je je.
Ya kwǝri bá wanɩ sɔɔ sɩ sɩ kɩ.
8 Balʋ maama na kɩ jwə-yɔɔrʋ tɩn
wʋ́ ba ba taa nyɩ dɩ-ya.
Balʋ dɩ na kɩ ba wʋ-dɩdʋa
dɩ-ya tɩn wʋ́ ji nɔn-yɔɔrʋ mʋ.
9 Yisɩrayɛlɩ nɔn-kɔgɔ kʋm,
kɩ-na á wʋ-dɩdʋa
dɩdaanɩ Baŋa-Wɛ!
Dɩntʋ mʋ yɩ á zənnu
yɩ DƖ ta daarɩ DƖ cʋ abam.
10 Arɔn dwi tiinə bam,
kɩ-na á wʋ-dɩdʋa
dɩdaanɩ Baŋa-Wɛ!
Dɩntʋ mʋ yɩ á zənnu
yɩ DƖ ta daarɩ DƖ cʋ abam.
11 Abam balʋ maama
na kwarɩ Baŋa-Wɛ tɩn,
kɩ-na á wʋ-dɩdʋa dɩ DƖ!
Dɩntʋ mʋ yɩ á zənnu
yɩ DƖ ta daarɩ DƖ cʋ abam.
12 Baŋa-Wɛ yǝni DƖ guli dɩbam gulə
pa DƖ kɩ dɩbam yu-yoŋo.
Cɩga tɩn, DƖ wʋ́ kɩ Yisɩrayɛlɩ tiinə bam yu-yoŋo,
kʋ fɔgɩ kʋ daɩ Arɔn dwi tiinə bam dɩ.
13 Balʋ maama na kwarɩ Baŋa-Wɛ tɩn mʋ
DƖ lagɩ DƖ kɩ ba maama yu-yoŋo,
ba na maŋɩ ba yɩ nabwənə
naa nadunə mʋ dɩ.
14 Baŋa-Wɛ wʋ́ pa abam
dɩ á dwi dɩm puli zanzan.
15 DƖ maa yɩ dɩlʋ na naanɩ wɛyuu
dɩ tɩga baŋa tɩn mʋ.
Dɩntʋ wʋ́ kɩ abam yu-yoŋo lanyɩranɩ.
16 Wɛyuu kʋm maama
yɩ Baŋa-Wɛ nyɩm mʋ.
DƖ nan kwe tɩga kam baŋa
DƖ kɩ nabiinǝ jɩŋa nɩ.
17 Kʋ daɩ balʋ na tɩgɩ tɩn mʋ
waɩ ba tee Baŋa-Wɛ.
Ba niə nan məəri mʋ tɩga kuri nɩ.
18 Sɩ kʋ na yɩ dɩbam balʋ na ŋwɩ tɩn,
dɩ́ wʋ́ taa tee Baŋa-Wɛ,
kʋ zɩgɩ lele sɩ kʋ taa ve maŋa kalʋ na ba ti tɩn.
Pa-na dɩ́ tee Baŋa-Wɛ!a