Ləŋ-ŋwɩ 114

Wɛ na wʋ DƖ nɔɔna tee nɩ te tɩn

Wɛ dɛɛn lɩ Yisɩrayɛlɩ tiinə bam na yɩ Zakɔbɩ dwi tiinə tɩn

Ezipi tiinə bam jɩŋa nɩ,

pa ba nuŋi dwi-gɛ tiinə bam kʋntʋ tɩtarɩ nɩ.

2 Wɛ dɛɛn na kɩ kʋntʋ tɩn,

DƖ laan pɛ Zuda dwi tiinə

tɩʋ kʋm mʋ ji DƖ wara-je.

DƖ ma di paarɩ Yisɩrayɛlɩ tiinə bam baŋa nɩ.

3 Nɩnɩʋ kʋm dɛɛn nii

kʋ na yɩ te tɩn mʋ,

yɩ kʋ titwəni dáa kʋ daarɩ pwələ.

Zʋrdɛn bugə kam dɩ ma pipiri

ka kɛ dáa.

4 Pweeru tɩm dɩ zwəənu tɩm

dɛɛn sisiŋi mʋ,

nɩnɛɛnɩ pi-balɩ na faŋɩ wɛɛnɩ

te tɩn.

5 Nɩnɩʋ, ta n tɛa, bɛɛ mʋ kɩ yɩ

n titwəni n daarɩ pwələ?

Zʋrdɛn bugə kam,

bɛɛ mʋ yɩ n pipiri n kɛ dáa?

6 Kʋ ta na yɩ pweeru tɩm

dɩ zwəənu tɩm,

bɛɛ mʋ yɩ abam dɩ faŋɩ wɛɛnɩ

nɩnɛɛnɩ peeni tɩn?

7 Tɩga kam baŋa, kʋ nan maŋɩ

sɩ n yɩra taa saɩ mʋ,

Wɛ na tu n te tɩn ŋwaanɩ.

Cɩga tɩn, Zakɔbɩ dwi tiinə Wɛ dɩm fʋfɔ DƖ twɛ nmʋ mʋ.

8 Dɩntʋ dɛɛn pɛ piu ləni

kʋ ji bugǝ.

Piu kʋm tɩtɩ ma ji buli-yi,

pa na ta ba nuŋi da.