Le kǝm
116
Amʋ soe Baŋa-WɛDƖ na yǝni DƖ cəgi-nɩ
yɩ DƖ sɛ amʋ wɛ-loro kʋm tɩn ŋwaanɩ.
2 DƖ yǝni DƖ pʋrɩ DƖ zwa mʋ
DƖ ni amʋ ni-taanɩ.
Kʋntʋ ŋwaanɩ, amʋ wʋ́ war‑DƖ
sɩ kʋ taa nii a ŋwɩa sisəm.
3 Tʋʋnɩ dɛɛn kɩkarɩ amʋ dɩ vɔ.
A maa kwarɩ fʋʋnɩ
curu vəŋə ŋwaanɩ.
Cam dɩ wʋ-cɔgɔ yɩranɩ mʋ
ya yɩ amʋ nyɩm.
4 Amʋ laan ma kaasɩ
a bəŋi Baŋa-Wɛ yɩrɩ a wɩ:
«A loori-m, amʋ Tu Baŋa-Wɛ!
Joŋi-nɩ n yagɩ!»
5 Baŋa-Wɛ jɩgɩ ŋwaŋa dɩ zaanɩ mʋ
DƖ maa zǝni nɔɔna.
DƖ tiini DƖ duri nɔɔna yibwənə.
6 Kʋ na yɩ nabwənə,
Baŋa-Wɛ yǝni DƖ cʋ-ba
sɩ ba yɩ tʋ.
Amʋ dɛɛn na tiini
a wʋ cam wʋnɩ tɩn,
DƖ joŋi-nɩ DƖ yagɩ.
7 Amʋ wʋ́ ta a tɩtɩ nɩ sɩ a joori
a sin dɩ bɩcar-zuru,
Baŋa-Wɛ na tiini DƖ kɩ amʋ yu-yoŋo tɩn ŋwaanɩ.
8 Amʋ Tu Baŋa-Wɛ,
nmʋ joŋi a ŋwɩa kam
tʋʋnɩ jɩŋa nɩ n yagɩ.
N pi n joŋi-nɩ,
sɩ a daa yɩ keeri a kan yi-na
sɩ a ta yɩ seeri a tʋ tɩga nɩ.
9 Kʋntʋ ŋwaanɩ, amʋ wʋ́ taa jɩgɩ
a ŋwɩa tɩga baŋa nɩ
yɩ a kwarɩ Baŋa-Wɛ.
10 A ta kɩ a wʋ-dɩdʋa dɩ Wɛ mʋ,
yɩ a wɩ: «Cam tiini dɩ jɩgɩ-nɩ.»
11 A wʋbʋŋa na vugimi tɩn,
a maa wɩ:
«Nabiinǝ maama yɩ vwa-fɔra mʋ.»
12 Bɛɛ mʋ amʋ brɩ a lagɩ a kwe
a pa Baŋa-Wɛ,
dɩ DƖ na tiini DƖ kɩ-nɩ yu-yoŋo?
13 A na wʋ́ kɩ kʋlʋ tɩn mʋ tɩntʋ:
Amʋ wʋ́ zǝŋi zʋŋa mʋ
dɩ ka wʋ wo-nyɔɔrʋ,
a maa kɩ-DƖ le DƖ vrɩm ŋwaanɩ,
yɩ a daarɩ a bəŋi DƖ yɩrɩ
a maa zuli‑DƖ.
14 Amʋ wʋ́ vu a zɩgɩ Baŋa-Wɛ
nɔn-kɔgɔ kʋm tɩtarɩ nɩ,
sɩ a kɩ kʋlʋ maama a na goni ni dɩ DƖ nɩ a wʋ́ kɩ tɩn.
15 Kʋ na yɩ balʋ na jɩgɩ cɩga
dɩ Baŋa-Wɛ tɩn,
ba dɩdʋa na tɩga,
kʋ tiini kʋ jɩgɩ kuri kʋ pa‑DƖ.
16 Amʋ Tu Baŋa-Wɛ,
a yɩ n tɩntʋŋnʋ mʋ.
Cɩga tɩn, a yɩ gambaa mʋ n sɔŋɔ nɩ.
Nmʋ nan bwǝli ŋʋnɩ sɩlʋ
ya na vɔgɩ-nɩ tɩn.
17 Amʋ wʋ́ ja le-kǝm pɛɛrɩ mʋ
a ba a kɩ kaanɩm a pa‑m,
yɩ a daarɩ a bəŋi nmʋ Baŋa-Wɛ yɩrɩ a maa zuli‑m.
18 Amʋ wʋ́ zɩgɩ Baŋa-Wɛ
nɔn-kɔgɔ kʋm tɩtarɩ nɩ,
sɩ a kɩ kʋlʋ maama a na goni ni dɩ DƖ nɩ a wʋ́ kɩ tɩn.
19 Amʋ wʋ́ vu Zeruzalɛm tɩʋ kʋm tɩtarɩ nɩ,
sɩ a kɩ Baŋa-Wɛ le
DƖ tɩtɩ digə kam nɩ.
Pa-na dɩ́ tee Baŋa-Wɛ!a