Wɛ wǝli nɔn-ŋʋna
112
Pa-na dɩ́ tee Baŋa-Wɛ!aNɔɔnʋ wʋlʋ na kwarɩ Baŋa-Wɛ
yɩ o paɩ Wɛ niə yam
jɩgɩ ywəəni ya pa‑o,
Wɛ yu-yoŋo wʋ kʋ tu yuu nɩ lanyɩranɩ.
2 O biə bam tɩtɩ wʋ́ na yɩrɩ
tɩga kam baŋa nɩ.
Wɛ wʋ́ yɔɔrɩ DƖ kɩ nɔn-ŋʋna
dwi dɩm yu-yoŋo.
3 Kʋ tu sɔŋɔ kʋm wʋ́ na jɩjɩgɩrʋ
dwi dwi.
Nɔɔna maa bá fɔgɩ ba swe
o nɔn-ŋʋnnɩ kikiə ni nɩ.
4 Kʋ na yɩ balʋ na yɔɔrɩ
cwə-laa wʋnɩ ba ve tɩn,
pooni wʋ́ zǝŋi dɩ pa-ba,
dɩ ba na maŋɩ ba wʋ
lim je wʋnɩ tɩn dɩ.
Kʋʋ́ kɩ kʋntʋ kʋ pa nɔn-ŋʋm wʋlʋ maama
na jɩgɩ nɔɔna yibwənə
yɩ o paɩ cɩga tʋŋa tɩn.
5 Kʋ ta na yɩ wʋlʋ wʋʋ na ywəmmə
pa o jɩnɩ wǝǝnu mʋ
o pa o donnǝ,
yɩ o tɩtʋŋɩ maama tʋŋɩ
dɩ tɔgɩ dɩ cwǝŋǝ tɩn,
wǝǝnu wʋ́ kɩ lanyɩranɩ
tɩ pa kʋ tu mʋ.
6 Nɔn-ŋʋm nan bá fɔgɩ o seeri o tʋ.
Nɔɔna dɩ bá swe o swiə
sɩ kʋ taa ve maŋa maama.
7 Kwər-balɔrɔ nan na yi‑o,
o bá taa kwarɩ fʋʋnɩ.
O jɩgɩ baarɩ mʋ
yɩ o wʋʋ kʋm yɔɔrɩ kʋ da Baŋa-Wɛ.
8 O wʋbʋŋa maa zɩgɩ cɩga kam wʋnɩ
yɩ fʋʋnɩ ba jɩg-o.
O laan maa wʋ́ ba
o wanɩ o dʋna o di.
9 Kʋ tu pɔɔrɩ o wǝǝnu
o pa yinigə tiinə zaanɩ mʋ.
O nɔn-ŋʋnnɩ dɩm wʋ́ taa wʋ
o tee nɩ maŋa maama.
O maa wʋ́ tiini o na dam,
pa nɔɔna zǝŋi o yɩrɩ dɩm wɛɛnɩ.
10 Nɔn-balwaarʋ wʋ́ na kʋntʋ maama
yɩ ba bana taa zaŋa kʋ ŋwaanɩ.
Ba maa wʋ́ dʋnɩ ba nwa
liǝ ŋwaanɩ,
yɩ ba taa bugi ba jeə.
Nɔn-balwaarʋ tɩm fra na zʋ
woŋo kʋlʋ maama,
ba nan bá na-kʋ kɔtaa.