Wɛ zulə ləŋə
Ba dɛɛn panɩ ləŋə kantʋ Wɛ siun dɛ ŋwaanɩ.
92
Kʋ maŋɩ sɩ dɩ́ taa kɩBaŋa-Wɛ le!
Yuutu Baŋa-Wɛ,
dɩ́ wʋ́ leeni dɩ́ tee nmʋ yɩrɩ.
2 Zɩzɩŋa maama nɩ dɩ́ wʋ́ ta
n sono kʋm taanɩ.
Tɩtɩ nɩ dɩ, dɩ́ ta wʋ́ brɩ
n na yɔɔrɩ n zɩgɩ
n cɩga kam wʋnɩ te tɩn.
3 Dɩ́ wʋ́ kwe kwaanʋ dɩ gɩgana zɩla dwi dwi mʋ
dɩ́ taa paɩ tɩ kwǝri zaŋa
yɩ dɩ́ leeni dɩ́ zuli nmʋ.
4 Bɛŋwaanɩ, nmʋ Baŋa-Wɛ pɛ
sɩ a di ywəəni,
dɩ n na kɩ tɩtʋŋa yalʋ maama tɩn.
A lagɩ a leeni a zuli-m dɩ wʋpolo,
wǝǝnu tɩlʋ maama
n jɩa na kɩ tɩn ŋwaanɩ
5 Amʋ Tu Baŋa-Wɛ,
nmʋ tʋŋɩ tɩtʋŋ-kamunə zanzan.
Nmʋ wʋbʋŋa yam dɩ tiini ya lirǝ.
6 Balʋ na gɛ wʋbʋŋa tɩn yǝri nɩ
tɩntʋ wʋ́ ba ba baŋa.
Nɔn-jwəəru dwi dɩm
dɩ maa ba ni kʋ kuri.
7 Nɔn-balwaarʋ na maŋɩ ba puli zanzan
nɩ gaarʋ na kwi te tɩn,
yɩ vwan-kikiə tiinə bam dɩ na ve yigə mʋ dɩ,
ba maama wʋ́ ba ba je mʋ.
8 Nmʋ Baŋa-Wɛ nan jɩgɩ n paarɩ
n di mʋ sɩ kʋ taa ve maŋa kalʋ na ba ti tɩn.
9 Baŋa-Wɛ, nmʋ dʋna bam maŋɩ sɩ
ba yɔɔrɩ ba na cɔgɩm mʋ.
Nɔn-balwaarʋ tɩm maama
maa wʋ́ jagɩ ba je.
10 Nmʋ nan pɛ
a tiini a na dam mʋ,
nɩ ga-naa na dana te tɩn.
N ta ma lo nugə a yuu nɩ
pa a yɩra yam zuri lanyɩranɩ.
11 A dʋna bam na tʋ tɩga nɩ tɩn,
a yiǝ mʋ nɛ ba cɔgɩm dɩm kʋntʋ.
Kʋ na yɩ wʋ-lʋŋ-nyɩna balʋ
na zaŋɩ sɩ ba ja dɩ amʋ tɩn,
a zwa ma ni ba na duri ba kɛ
yɩ ba coosi te tɩn.
12 Nɔn-ŋʋna wʋ́ taa jɩgɩ nyɔɔrɩ mʋ
nɩ suŋu na yɩ te tɩn.
Baá taa damma
nɩ Liban tɩʋ Sɛdrɩ tweeru
na zɩgɩ lanyɩranɩ te tɩn.
13 Ba nyɩ nɩ ba kugu mʋ wʋ
Baŋa-Wɛ digə kam nɩ tɩn.
Ba maa wʋ́ taa zʋʋrɩ dɩ yazurə
Wɛ digə kam nɩ.
14 Ba kʋkwɩɩrʋ maŋa nɩ
ba ta wʋ́ taa jɩgɩ nyɔɔrɩ,
nɩ tweeru tɩlʋ na ləri biə tɩn mʋ.
Maŋa maama yazurə wʋ́ yi-ba,
yɩ ba kɩ tɩtʋŋ-ŋʋna.
15 Ba maa wʋ́ taa tɛ jaja wɩ:
«Baŋa-Wɛ tʋŋɩ cɩga mʋ.
Tusim tǝrǝ DƖ tee nɩ.
DƖ maa nyɩ dɩ piu kʋlʋ
amʋ na dalɩ da tɩn.»