Baŋa-Wɛ mʋ yɩ DƖ nɔɔna dalɩm je
91
Wʋlʋ maama na zʋʋrɩ Yuutu Baŋa-Wɛ woro kʋm wʋnɩ,Dam-fɔrɔ Tu Wɛ dɩm wʋ́ kwǝli kʋ tu pa o na siun.
2 Amʋ wʋ́ ta Baŋa-Wɛ taanɩ mʋ nɩ:
«Dɩntʋ mʋ yɩ amʋ dalɩm je,
amʋ na wʋ́ səgi DƖ woro kʋm wʋnɩ tɩn ŋwaanɩ.
DƖ maa yɩ amʋ Tu Wɛ,
yɩ a kɩ a wʋ-dɩdʋa dɩ DƖ.»
3 Cɩga tɩn, Baŋa-Wɛ wʋ́ taa cʋ-m
sɩ cɩgɩrʋ dwi maama
yɩ wanɩ‑m ya ja.
Yawɩ-cɛɛrʋ dɩ bá na cwǝŋǝ
sɩ tɩ daanɩ‑m.
4 DƖ lagɩ DƖ yarɩgɩ DƖ vwana mʋ
DƖ kwǝli n maama,
sɩ n səgi DƖ woro kʋm wʋnɩ.
DƖ na zɩgɩ DƖ cɩga tɩn ŋwaanɩ,
DƖ wʋ́ taa kaagɩ‑m
yɩ DƖ daarɩ DƖ cʋ-m
nɩ najara cɩ-kwaŋa na kwǝli nɔɔnʋ
najara wʋnɩ te tɩn.
5 Nmʋ bá ta n kwarɩ tɩtɩɩ dɩm
dɩdaanɩ dɩ fʋʋnɩ maama.
Cɩna mʋ na jaana
ya tɔgɩ n seeni wɩa nɩ dɩ,
nmʋ bá kwarɩ fʋʋnɩ.
6 Kʋ ta na yɩ yawɩɩrʋ tɩlʋ na lagɩ
sɩ tɩ ja‑m lim wʋnɩ tɩn,
naa cam dɩlʋ na wʋ́ ba wɩa tɩtarɩ nɩ sɩ dɩ cɔgɩ‑m tɩn,
nmʋ bá kwarɩ fʋʋnɩ dɩ wo-balwaarʋ tɩm kʋntʋ maama.
7 Nɔɔna mʋrʋ naa mʋrrʋ fugə
na wʋ nmʋ tee nɩ,
yɩ ba maama na maŋɩ ba tɩ
najara wʋnɩ,
kʋlʋkʋlʋ bá yi‑m.
8 Nmʋ nan mʋ wʋ́ zɩgɩ da n nii
n na waarɩm na wʋ́ ba
nɔn-balwaarʋ tɩm baŋa nɩ te tɩn.
9 Nmʋ pɛ Yuutu Baŋa-Wɛ
ji nmʋ dalɩm je,
pa n zʋʋrɩ DƖ woro kʋm wʋnɩ.
10 Kʋntʋ ŋwaanɩ,
lwarɩm daa bá wanɩ‑m dɩ ja.
Kʋlʋkʋlʋ dɩ bá cɔgɩ‑m
n sɔŋɔ kʋm nɩ.
11 Baŋa-Wɛ wʋ́ tʋŋɩ DƖ malɛsɩ sɩm
nmʋ tee nɩ,
sɩ ba taa cʋ-m dɩ cam
n cwǝŋǝ maama wʋnɩ,
12 sɩ ba daarɩ ba ma ba jɩa
ba lwǝri-m,
sɩ n yɩ magɩ n naga dɩ kandwɛ
n tʋ tɩga nɩ.a
13 Nmʋ wʋ́ ta n jɩgɩ dam
nywəənu dɩ bɩsankwɩ baŋa nɩ,
sɩ n wanɩ n nɔnɩ tɩ baŋa nɩ.
Baŋa-Wɛ maa wɩ:
14 «Amʋ wʋ́ joŋi wʋntʋ a yagɩ,
o na jɩgɩ amʋ sono tɩn ŋwaanɩ.
Amʋ wʋ́ taa cʋ-o,
o na sɛ amʋ dɩ wʋ-dɩdʋa tɩn ŋwaanɩ.
15 O na bəŋi amʋ yɩrɩ sɩ a zən‑o,
amʋ wʋ́ sɛ a cəgi o wɛ-loro kʋm.
O ta na wʋ cam wʋnɩ,
a wʋ́ lɩ-o dɩ wʋnɩ,
a daarɩ a pa o yɩrɩ zaŋɩ.
16 Amʋ wʋ́ kɩ a su o wʋbʋŋa yam
sɩ a pa‑o mʋmwɛ-dɛɛrɩ,
yɩ a daarɩ a pa o lwarɩ
amʋ vrɩm dɩm na yɩ te tɩn.»